Thãgbaa Thɔ̃thɔnaa Thɔ̃ 21
21
Polɩ jal Tɩɩr
1Sɩ sɛrɛ ɔbɔɔkɛ sɩ leenɩ kha, sɩ gbaar bato a jal dẽdẽdẽ Kɔsɩ; a dɩɩ wɩl sɩ jaal Rɔɔdɩ a the le a jal Patara. 2Dɩ mɔ̃ sɩ yɩnɩ bato bɩɛlɩkɛ na jalanɩ Fenɩsɩ, sɩ lʋʋn a jal. 3Ɔbɔɔkɛ sɩ ˈlaanɩ yɩ Sɩpɩr yɔ dɩɩ, sɩ faa gɛr nyɔ̃bɩlana sa gba asɩ hʋ a jalna Siri khʋʋ a dã Tɩɩr; liir wɩ tiir thɩ̃ɛsɔ batora. 4Dɩ sɩ kɔɔ yɩrɛ kpãkpãadara a too le wire makonyɔ. Dɩ kpãkpãadara sor Polla dɩɩ do Thu Phuu pa gɩ the ayɩ, a na‐n jal Jerujalɛmna ga. 5A wiresɔɔle ka pɩ, sɩ ɩɩrɛ a gba asɩ kpaar pa hʋ, dɩ kona fɛʋ, na khɛra, na bɩsana kɔɔ thɔɔ sɛr a thena dɩ khuirə. Dɩ sɩ kɔɔ gulẽgarɛ le lanyɔ̃ gẽgerẽ nʋɔra a bɩɛl Thãgba. 6Agɩpɩ dɩ sɩ fʋɔr kha bɩɛlbɩɛl sa lõ batora, sɩ wɛr wɩ kɛrrɛ bir awɩ cɔ.
Pol daan Sejare
7Ɔbɔɔkɛ sɩ kɔɔ thenɩ Tɩɩr, sɩ gbaar asɩ hʋ a jal dã Pʋtolemaɩsɩ, liir asɩ kpaar lanyʋɔnna khu, dɩ le sɩ bule kha bɔɔ na omɩna sa too kha wi bɩɛl. 8A dɩɩ wɩl sɩ kɔɔ ɩɩrɛ jal Sejare a lõ Filipiikɛ dɔnɩ tutugo bʋɔɔ thɩmɩɩ mɩɩdaarɩ cɔ, kɛ dʋɔnnɩ tibil bɩɛl#21:8 Bɩɛl tɩbɩla makonyɔra: Wɛr dɔ kona makonyɔɔkɛ caca we gbɛbɩdara phiirni pɛr thɔmana Jerujalɛm. tɩbɩla makonyɔraakɛ wɩ kɔɔ phiirni, dɩ le sɩ cɔ.#Th t t 6:5; 8:5 9A hananɛ bikhɛna yenãakɛ na kɔɔ jɛnɩ kona paˈ, dɩ wa‐n ti Thãgba tukɩrʋ. 10Mɔ̃ sɩ toonɩ le a na pʋɔr, Thãgba tukɩr tidaar bɩɛl hale dɩ wa‐n wɩɩ Agabusi, Jude a the#Th t t 11:28 11a pɔ asɩ pa; dɩ a gbaar Polɩ lophɛrɛ a linə ɔɔ thɛthɛɛ nɛ na nyɛ̃ɛ sa so ayɩ: Thu Phuu sor aa: Kuunikɛ hɩnanɩ lophɛrɛɛkɛra, thakɛ Juifisɔ na fʋʋ na li Jerujalɛm dɩɩra a na ha ca kpala. 12Ɔbɔɔkɛ sɩ nɩɛnɩ gele, sɛrɛ na wɩrɛ hanɩ paarɩlera kɔɔ phʋʋrɛ Pol a na‐n jal Jerujalɛmnana ga. 13Dɩ le a birse: Anye nɩ‐n cʋʋrɔ thaa dɩ na‐n khɩɩ dɩ haar kʋɛ mɩ? Gɩdonɩ mɩ gbɛbɩrɛ pɩ, ga do wɩ to mɩ khaɩra dɩbara ga, sɩ dɩ ma khi Jerujalɛm, gɩ do Jeju Kɔ̃tɩnɩ i dɔ nɔɔ. 14Dɩ mɔ̃ aa‐n ƴaalnɩ a tuəˈ, sa kɔɔ bir jalna gɩ ƴɔɔ bã sɩ sɩ sor: Dɩ dɔ gɩrɛ dɔnɩ Kɔ̃tɩnɩ tuur n cʋʋ.
Polɩ jal Jerujalɛm
15A ga wisɔɔle ka pɩ, sɩ gbɛbɩrɛ asɩ thɩ̃sɔ sɩ jal Jerujalɛm. 16Dɩ wɩ̃ kpãkpãadaraakɛ dɔnɩ Sejaredara kɔɔ thɔɔ sɛr a jalna Manasɔ̃ɔ cɔ kãkɛ gɩ teenanɩ sɩ tɔɔ; tibil gɩɩkɛ wɩ kɔnɩ Sɩpɩr yɔ dɩɩra, a kɔɔ mãa dʋʋr kpãkpãadaar.
Pol, na Jakɩ, na we gbɛbɩdaraa kɔ̃tɩ̃sɔɔ kpa jɛ
17Ɔbɔɔkɛ sɩ danɩ Jerujalɛm, omɩna kɔɔ tee ser na daʋ. 18A ga dɩ wɩl, Pol kpa sɛr a jalna Jakɩɩ cɔ, kãkɛ we gbɛbɩdaraa kɔ̃tɩ̃sɔ fɛʋ kpanɩ kha a jɛ. 19A sɩ fʋɔr wɩ pɩ, a mar da‐n mɩɛ wɩ dɩɩdɩɩ thɔmaakɛ Thãgba kɔɔ cʋʋnaanɩ ca kpalaa thɩ̃thɩɩn. 20Ɔbɔɔkɛ wɩ nɩɛnɩ gele, wɩ‐n dʋbɩrɛ Thãgbaa i; agɩpɩ dɩ wɩ sʋʋraa: Asɩ omi, fɩ yɩrɛ mɔ̃kɛ Juifisɔ tə̃tə̃tə̃ pɛrnɩ haar, dɩ wɛr fɛʋ n pərre jɔfʋra. 21Wɩ‐n yɩ aa, mɔ̃ fɩ‐n dɩɩrnɩ Juifisɔ fɛʋʋkɛ hanɩ ca kpalaa thɩ̃thɩɩn fɩ‐n yɩ, wɩ faa Mʋɩjɩɩ jɔfʋ dɩ fɩ sona war dakha aa, wa‐n kur bɩsana khʋ̃aˈ, wa‐n hɩɩn dakha mama fɩlaˈ. 22Mɔ̃ sa do gɩrɛ, gɩdonɩ tɩbɩla fɛʋ na nɩɛrɛ dɩ fɩ ɩnɛ kɛ. 23Gɛr gɩ, cʋɛ gɩrɛ sa so farnɩ: Tɩbɩla yenã hakɛ asɩ pa a so nʋɔ.#Ther 6:13–21 24Kpa wɩ nɩ phʋɔl kha, sa lɩma gɩrɛ wa kɔɔ kʋɛnɩ sɩ wɩ puno wɩ bel yʋʋ. Dɩ mɛ̃ tɩbɩla fɛʋ na jɩ dɩ gɩrɛ fɛʋʋkɛ wɩ nɩɛnɩ dɩ wɩ mɩɩ dɩ wa‐n pɛ far, sõsor gɩ, sɩ fɛrɛ dakha fa‐n jɩɩ ɩɩr bɔɔbɔɔ fa‐n hɩɩnna jɔfʋ. 25Sɩ ado ca kpalaakɛ n pɩɛrnɩ haar gɩ, sɩ kɔɔ gʋʋrɛ hɩɩn sa yɩ, wɩ bɔ bonɩ ji nʋʋn, na tɔmɩn, na nʋmɩkɛ khenɩ sɩ tɔmɩn na thaˈ, na bɔdɛl cʋʋrɛ.#Th t t 15:29 26Dɩ Pol kpar konaale dɩ wɩ phʋɔl kha, dɩ dɩɩ wɩl dɩ wɩ lõ kha Thãgba fʋɔr cɔ kɔ̃tɩɩna wɩ so tɩbɩlala wireekɛ awɩ phʋɔl na pɩnɩ, na ɔbɔɔkɛ wa jini bonɩɛ a na pɛ war fɛʋ bɩɛlbɩɛl.
Wɩ fʋrɛ Pol Thãgba fʋɔr cɔ kɔ̃tɩɩna
27Ɔbɔɔkɛ wire makonyɔɔle n thɔɔnɩ pɩr, Juifisɔɔkɛ thɛnɩ Ajɩ kɔɔ yɩrɛ Pol Thãgba fʋɔr cɔ kɔ̃tɩɩna, a tɔ tibil jɔ a pɛr dɩ wɩ fʋʋ, 28sɩ wa‐n hulẽ: Ɩjɩrayɛldara, nɩ ɩna a bulo si. Ʋrɛ dɔ kuunikɛ n dɩrɛnɩ tɩbɩla fɛʋ da‐n kpaarna paar fɛʋ da‐n kpɛna tɩbɩla, na jɔfʋ, na paarɩkɛ. A kparrakɛ Gɩrɛkɩsɔ a lona Thãgba fʋɔr cɔ kɔ̃tɩ̃ bɩnɔ a ƴɔ̃ƴɔɔna pa phuukɛ. 29Gɩdonɩ wi bɩɛl wɩ kɔɔ yɩrɛ Tʋrofɩmɩkɛ dɔnɩ Efɛjɩdaar dɩɩra nakha ɔr, a ka jɩna Pol kpaarɛ a lona Thãgba fʋɔr cɔ kɔ̃tɩ̃ bɩnɔ.#Th t t 20:4
30Dɩ dɩɩ fɛʋ tutugore, dɩ tɩbɩla na‐n caalɛ dɩɩdɩɩ. Dɩ wɩ fʋrɛ Pol Thãgba fʋɔr cɔ kɔ̃tɩ̃ bɩnɔ, a hal thena sa khaan loosɔ dapaara. 31Mɔ̃ wɩ‐n ƴaalnɩ wɩ kʋʋ, tutugore daan sɔrasɛɛ sɛfʋ dɩ nyanyaanɛ har Jerujalɛm dɩɩra fɛʋ. 32Dɩ dapaara dɩ kpa sɔrasɛ na sɔrasɛ tamaa kɔ̃tɩ̃sɔ, a cana pɔna. Dɩ ɔbɔɔkɛ wɩ yɩnɩ sɔrasɛɛ sɛfʋ na sɔrasɛsɔ wa‐n be Pol bã. 33Dɩ le sɔrasɛɛ sɛfʋ dã a fʋʋ sa so, wɩ lie na jɔrkɔ yenyɔ sa bulee ntɛ a donɩ na gɩrɛ a cʋʋnɩ. 34Sɩ tibil jɔɔlee thɩ̃thɩɩn, wɛ n hulene dɩ wɩ yɩ aa: Gɩrɛ gɩ; wɛ n hulẽ aa: Thakɛ gɩ; sɩ mɔ̃kɛ aa punoni na jɩ gɩrɛ dɔnɩ sobɔraˈ gɩdonɩ khʋ̃ɛ jɔrɛ, a sor wɩ kpaa a jalana sɔrasɛɛ cɔ. 35Sɩ ɔbɔɔkɛ Pol kɔɔ danɩ jʋʋn paar, sɔrasɛ thar thʋnɔ sa gbaa, gɩdonɩ nĩkhii thʋnɛ fʋlɛ tɩbɩlaale ka ɔrra. 36Gɩdonɩ tɩbɩla bərəəm n kpaanɛ dɩ wa‐n hulẽ aa, wɩ dɔ kuunikɛ n khi.
Pol mɩɩrɛ tɩbɩlaa ƴɛra
37Ɔbɔɔkɛ wɩ hanaanɩ wa‐n lona sɔrasɛɛ cɔ, Pol bulele sɔrasɛɛ sɛfʋ aa: Mɩ hananɛ hʋɛ a na so far thɩ̃ɛ ya? Dɩ sɔrasɛɛ sɛfʋ birsee: Fɩ‐n nɩrɛ gɩrɛkɩ thɩmɩɩr ya? 38Ga do fɛr dɔ Ejipitidaarɩkɛ kɔɔ ɩrɛnanɩ lãʋ kɩɛr delẽ delẽ, a kpana tɩɩ kʋdara gbɩlanɩ yenã a jalna bəənnə gaa? 39Dɩ Pol birsee: Mɛrɛ, Juifi ha mɩ dɩ ɩ̃ the Silisi, Tarsɩ dɩɩraakɛ na hanɩ gbəˈ wɩ kɔ̃ mɩ; mɩ‐n bɩɛl fɛr, ha mɩ hʋɛ ɩ̃ mɩɩna tɩbɩlaakɛ. 40Dɩ sɔrasɛɛ sɛfʋ haa hʋɛ, dɩ Pol ɩɩr jɩɩl jʋʋn paar sa jɛ tɩbɩla na nyɛ̃ɛ. Dɩ wɩ pɩrrɛ dĩi, dɩ Pol gba thɩmɩa na ebirə thɩmɩɩr da‐n mɩɩ wɩ ayɩ:
Currently Selected:
Thãgbaa Thɔ̃thɔnaa Thɔ̃ 21: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
