Thãgbaa Thɔ̃thɔnaa Thɔ̃ 20
20
Polɩ jal Masedʋan na Gɩrɛsɩ
1Ɔbɔɔkɛ khʋ̃ɛɛle pɩnɩ, gɛr Pol wer kpãkpãadara a der pa bɩɛl a mɩɩ wɩ wa‐n yɩrana ƴɛ kʋʋl jaal, sa fʋɔr wɩ sa gba jal Masedʋan. 2Dɩ a kpaarɛ paarɩle a mɩɩ kpãkpãadara thɩmɩa jɔɔ dɩɩ ha wɩ ƴɛ kʋʋl jaal, agɩpɩ dɩ gba jal Gɩrɛsɩ 3a too le pora yẽther. Sɩ ɔbɔɔkɛ a ƴaalnɩ a lõ bato a jal Siri, a nɩɛrɛ dɩ Juifisɔ gʋʋrɛ kha sa nʋɔ, dɩ a kpɩɛrɛ a hɩɩn sa bir na Masedʋan hʋɛ a kɔ̃. 4Wɩrɛ kɔɔ thɔgɔɔnɩ ha wɩrɛ: Sopatɛɛrɩkɛ thɛnɩ Bere, Pirusii bikuun gɩ, na Arɩsɩtarkɩ, na Sekɔ̃ɔkɛ thɛnɩ Tesalonɩkɩ, na Gayʋsɩɩkɛ thɛnɩ Dɛɛrbɩ, na Timothe, na Tɩsɩkɩ, na Tʋrofɩmɩkɛ wɩ kɔnɩ Ajɩ. 5Wele kɔɔ kʋʋlɛ sɩ ƴɩɛ dɩ wa‐n pɩɛr sɩ Tʋrʋasɩ. 6Sɩ se wer, ɔbɔɔkɛ Buruukɛ na hananɩ tabɩɩraa bɔ kanɩ pɩ, gɛr sɩ gbaar bato Filipi, dɩ wire yemɔɩ wire sɩ kɔɔ caan wɛr Tʋrʋasɩ a too le wire makonyɔ.
Pol Tʋrʋasɩ dɩɩra ka a ɩɩrnɩ Etikusi khirera
7Sɩ wire makonyɔɔ caca wi, sɩ kɔɔ kpar kha a jɛ sɩ kho Kɔ̃tɩnɩ dɩko. Sɩ gɩdonɩ, a dɩɩ wɩl gɛr Pol na jaal, a kɔɔ mɩɩrɛ thɩmɩɩr kpãkpãadarara sɩ a mɩɩna wɛr waa dɩ dɩɩ nɩrɔna. 8Dɩ lãphã jɔɔ kɔɔ hale lɩ̃ganaale sɩ‐n kpanɩ kha a jɛ. 9Dɩ daɓol bɩɛl gɩ da‐n do Etikusi a too fɛnɛtɩrɩra, a daar khi kper ɔbɔɔkɛ Pol mɩɩnɩ thɩmɩa da‐n pʋɔrna ƴɛrr, dɩ daan tʋɔrɛ dɩ the le lɩ̃gã yẽtherdaara a təə ji thʋnɔ, dɩ wa gbaa dɩɩ do a khire. 10Sɩ Pol gbune a dɛɛnaa a palʋʋ sa so: Na‐n do haar n uu naˈ, gɩdonɩ ɔɔ fesu hale. 11Ɔbɔɔkɛ Pol birni jʋʋn, a khor Kɔ̃tɩnɩ dɩko sa bir fʋ thɩmɩa dɩ dɩɩ wɩlna; agɩpɩ dɩ gba jal. 12Sɩ wɩ kpar daɓolbirile a jalna na yire, dɩ gɩ kɔɔ do warɛ ha faa kɔ̃tɩ̃ɩ.
Pol ther Tʋrʋasɩ a jal Mɩle
13Sɩ se wer, sɩ kɔɔ kʋʋlɛ Pol ƴɩɛ a lõ bato a jal Asɔsɩ, ka sɩ kɔɔ gʋʋrnɩ kha sa caanɛ na gbaa, gɩdonɩ hʋɛ or ƴaal a pɔna. 14Ɔbɔɔkɛ a kɔɔ caan sɩnɩ Asɔsɩ, a lʋʋn batookɛ sɩ harnɩ dɩ sɩ jal Mɩtɩlɛn. 15Le sɩ jal na bato waa, dɩ dɩɩ na wɩl dɩɩ do sɩ daan ka Kɩyɔsɩ dɩɩ pɛnɩ ƴɩɛ. Dɩ ʋ̃ dɩ bir na wɩl dɩ sɩ dã Samɔsɩ, dɩ wireekɛ na kpaanɛnɩ dɩɩ do sɩ daan Mɩle. 16Sɩ Pol kpɩɛrɛ hi ɔɔ bɩnɔ sa yɩ, ɩna kpãasɛrɛ Efɛjɩ sɩ ɩna jɩɩlaˈ, dɩ mɛ̃ ɩna dɩ̃dɩ̃ə Ajɩ dɩɩra ga; gɩdonɩ a‐n phananɛ adora punone hale a dã Jerujalɛm Pãtɩkotɩ wire.
Pol fʋɔrɛ Efɛjɩ we gbɛbɩdaraa kɔ̃tɩ̃sɔ
17Sɩ Pol toore Mɩle, sa thɔ̃ Efɛjɩ a we we gbɛbɩdaraa kɔ̃tɩ̃sɔ. 18Ɔbɔɔkɛ wɩ pɔnɩ dã a so warɛ ayɩ: A fʋna wireekɛ mɩ lonɩ Ajɩ dɩɩra, nɩ jɩrɛ mɔ̃kɛ ɩ̃ fɩl hanɩ bɔɔ fɛʋ na nɛrɛ, 19dɩ ma‐n dona Kɔ̃tɩnɩ thɔ̃ na dɩbara jor koo, nakha yilẽbe, na gaarɛraakɛ mɩ‐n yɩnɩ Juifisɔɔ gʋʋrraakɛ wɩ‐n gʋʋrnɩ sɩ wa‐n nɔ mɩ. 20Nɩ jɩrɛ dɩ ma kɔɔ ker nar thɩ̃ɛɛkɛ na bɔ narnɩ, ɔbɔɔkɛ mɩ‐n mɩɩ nɩnɩ Thãgbaa thɩmɩɩ dɩ ma‐n dɩɩrnanɩ thɩ̃ɛ tibil jɔɔ ƴɛra na cɔnanɔsɔaˈ, 21dɩ mɩ‐n kpãkpaanɛ Juifisɔra na wɩrɛraakɛ na dɔnɩ Juifisɔaˈ, wɩ deba haar a birə Thãgbara a hanana ha pɛrɛ asɩ Kɔ̃tɩ̃ Jeju Kirisitira.
22Sɩ nɛnɛ̃ nɩ hɩnɛ, Thu Phuu hala mɩ gɩrɛ da‐n jalna Jerujalɛm, sɩ ma jɩ gɩrɛ na dana mɩnɩ laˈ; 23sɩ gɩrɛ mɩ jɩnɩ dɩbara dʋɔn: Dɩɩ wo dɩɩraakɛ mɩ‐n kpaarnɩ, Thu Phuu n nɩ marɛ dɩ khaɩ lʋʋn na bɔ gaarɛ n hale dɩ ga‐n pɩɛr mɩ. 24Sɩ ma‐n therna ɩ̃ yi dɩɩ do mar thɩ̃ ɓʋ̃ɔaˈ, sɩ gɩrɛ mɩ‐n hɩɩnnɩ dʋɔn ado mɩ puno pɩ ɩ̃ kɔlɔ̃kɔɔ ca na dakha thɔmaakɛ Jeju Kɔ̃tɩn kɔɔ ha mɩnɩ ayɩ, ɩ̃ mɩa Thãgbaa bɔ jɩ tutugo bʋɔɔ thɩmɩɩ.#2 Tim 4:7 25Dɩ nɩ hɩnɛ nɛnɛ̃ dɩphã, na yɩ mɩ ƴɛ bire bã nɛrɛ fɛʋʋkɛ mɩ kɔɔ kpaarɔnɩ a mɩɩ Thãgbaa fãgadaar doda. 26Gɛr gɩ dɩ ma‐n so nar nĩ gɩrɛ casɩ, ado nɩ buu anɩ so na heen maˈ, 27gɩdonɩ mɩ mɩɩ nɛr gɩrɛ dɔnɩ Thãgbaa ƴaal fɛʋ sɩ ma ker nar dɩkha ga. 28A nɩ jɩ na‐n dɔ bʋrɛ anɩbara na banaa fɛʋʋkɛ Thu Phuu kɔɔ pɛ narnɩ nɩ dɔrɔ hɩɩndara ayɩ, na‐n khɛ Kɔ̃tɩnɩ we gbɛbɩdaraakɛ a kɔɔ thenɩ na ɔɔ thɛthɛɛ tɔmɩ̃. 29Mɩ jɩrɛ a mɩ kɔ̃ na pɩ, kpe hɔ̃hɔla na lʋʋn anɩ thɩ̃thɩɩn dɩ wa sɩ banaanaakaˈ; 30wo, tɩbɩla na ɩɩrɛ anɩ thɩ̃thɩɩn wa‐n dɩɩr thɩ̃ɛɛkɛ gõgolonenɩ wɩ kɛr kpãkpãadara wa‐n kpa war. 31Gɛr gɩ na‐n jʋrɛ a jɛna gɩ, dɩ ƴɛna yẽther biləni mɩ kɔɔ cʋʋ, sɩ ma‐n kɔɔ sɩrɔ fɩl dɩɩrɛ nɛrɛ fɛʋ bɩɛlbɩɛlla na yilẽbe dɩtɩnɔ na dɩwɩlʋaˈ.
32Dɩ nɛnɛ̃ dɩphã Kɔ̃tɩnɩ nyɔ̃kɔɔ mɩ faa nɩ na ɔɔ bɔ jɩ thɩmɩɩra, kɛ hananɩ punone a na cʋʋ nɩ dɩ na khɔ̃, kɛ na hana nɩnɩ dakha anɩdaakɛ na hɩnɩ na wɩrɛ Thãgba leenɩ kpɩɩ. 33Ma kɔɔ ƴaal tibillə war, dɩ dɛ gɩ, dɩ kẽkena ga. 34Nɛrɛɛ thɛthɛ jɩrɛ dɩ mɩ‐n dor thɔma na ɩ̃ nyɛ̃ɛkɛ, dɩ ma‐n ˈlɛ gɩrɛ n ɓɔra mɩnɩ nakha wɩrɛɛkɛ n kɔɔ hana mɩnɩ kha. 35Dɩ thɩ̃ɛ fɛʋra mɩ kɔɔ nɩ narɛ na‐n dɔ thɔma thale a na bulo wɩrɛ yɔɔnɛnɩ, a na jɛnana Kɔ̃tɩnɩ thɩmɩɩkɛ ɔɔ thɛthɛ sonɩ ayɩ: ˈLaarɛ n hananɛ Thãgba bɔnanɛ dɩɩ jɔ ˈlɛr.
36Ɔbɔɔkɛ a mɩɩnɩ thale pɩ, a gulẽgarɛ dɩ wɩ bɩɛl kha Thãgba fɛʋ. 37Dɩ wɛr fɛʋ n khɩɩrɛ wɛlɛ wɛlɛ wɛlɛ a palna Pol dɩ wa‐n fʋɔrʋʋ 38sa gbobi; sɩ gɩrɛraakɛ a kɔɔ so warnɩ ayɩ, wa yɩ nɩ ƴɛ bire bã dɔ war sor. Sɩ wɩ kɔɔ thɔgʋʋrɛ a dana bato.
Currently Selected:
Thãgbaa Thɔ̃thɔnaa Thɔ̃ 20: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
