Thãgbaa Thɔ̃thɔnaa Thɔ̃ 15
15
Kpa jɛrɩkɛ hanɩ Jerujalɛm
1Ɩkhaa tibilsɔ kɔɔ ther Jude a pɔ a dɩɩr omɩna ayɩ: Ado na‐n kur khʋ̃ʋ mɔ̃kɛ Mʋɩjɩɩ jɔfʋ n sonaˈ, na puno na ˈlɛ taaraˈ.#Lev 12:3 2Sɩ mɔ̃kɛ Pol na Barnabasɩ na‐n tunəˈ, wɩ ɩɩrnanɛ kha thɩ̃ banaa; dɩ omɩna kɔɔ gʋʋrɛ kha sa yɩ, Pol na Barnabasɩ na awɩ tibil ɩkhasɔ n jala Jerujalɛm thɔ̃thɔnana na we gbɛbɩdaraa kɔ̃tɩ̃sɔɔ pa thɩ̃ banaanaalera. 3Dɩ we gbɛbɩdara kɔɔ thɔɔ wɛr a pɛ hʋɛra, dɩ wɩ kpaarɛ Fenɩsɩ na Samarɩ dɩ wa‐n mɩɩ mɔ̃kɛ ca kpala kɛrnɩ dɩ wa‐n kpa Thãgbara, dɩ gɩ kɔɔ dar omɩnasɔra fɛʋ ka. 4Ɔbɔɔkɛ wɩ kɔɔ danɩ Jerujalɛm we gbɛbɩdara, na thɔ̃thɔna, na we gbɛbɩdaraa kɔ̃tɩ̃sɔ kɔɔ tee wer, dɩ wɩ kɔɔ mɩɛ wɛr thɩ̃ɛ fɛʋʋkɛ Thãgba kɔɔ gba wɩnɩ a cʋʋna. 5Sɩ wɛ hale wɩrɛraakɛ dɔnɩ jɔfʋ bʋ dʋdara awɩ ƴɛra kpɩɩ, kɛ kɔɔ pɩɛrnɩ haar, wɛr ɩrɛ a so ayɩ, dɔ wa‐n kur ca kpala khʋ̃ʋ, sɩ wɩ so war wa‐n hɩɩn Mʋɩjɩɩ jɔfʋ.
6Dɩ thɔ̃thɔna na we gbɛbɩdaraa kɔ̃tɩ̃sɔ kpar gbɛbɩrɩ kha wɩ gʋʋr thɩmɩɩrɩle. 7Ɔbɔɔkɛ wɩ bananɩ kha jɔɔ pɩ, Pɩɛr ɩɩrɛ a so war: Omɩna, nɩ jɩrɛ gɩ maanɛ gɩrɛ ka Thãgba phiir mini anɩ thɩ̃thɩɩn dɩ ma‐n mɩɩ tutugo bʋɔɔ thɩmɩɩ ca kpalala wɩ pɛr haar;#Th t t 10:1–43 8dɩ Thãgbaakɛ n jɛnɩ tɩbɩlaa ha, a nɩna wɛr mɔ̃ a tee wɩnɩ a hana wɩ Thu Phuu mɔna a ha sɩnɩ;#Th t t 2:4; 10:44 9aa hana dɩɩdɩɩ hɩɩnɛ sɛrɛ na wɛrra ga, gɩdonɩ a cʋʋrɛ awɩ ha dɩɩ phu dɩɩ the ha pɛrɛra. 10Dɩ nɛnɛ̃ mɔ̃gɩdo dɩ na‐n fifilə Thãgba nɩ hɩɩn a ƴaal nɩ heen kpãkpãadara heendaakɛ asɩ mama thɩ kɔ̃tɩ̃sɔ, dɩ sɛr gɩ, na kɔɔ punoni a heena? 11Sɩ Jeju Kirisiti Kɔ̃tɩnɩ bɔ jɩra sɩ pɛr haar a ˈlɛ taarɛ mɔ̃ wɩ ˈlɛnɩ taarɛ.
12Dɩ tibil jɔɔle pɩrrɛ kɩrkɩrkɩr sɩ wa‐n pɛ Pol na Barnabasɩ nũu, kɛ n mɩa wɩnɩ nɔ kpaa thɩ̃ɛsɔ na ma kʋ thɩ̃ɛsɔɔkɛ Thãgba gba wɩnɩ a cʋʋna ca kpalaa thɩ̃thɩɩn.
Gɩrɛɛkɛ na gʋrɛnɩ we gbɛbɩdaraa kɔ̃tɩ̃sɔɔ kpa jɛ pa
13Ɔbɔɔkɛ wɩ mɩɩnɩ pɩ, Jakɩ gbaar thɩmɩɩr a so ayɩ: Omɩna, nɩ pɛ ɩ̃da nũu. 14Sɩmɔ̃ so sarɛ mɔ̃kɛ Thãgba kɔɔ hɩɩnnɩ ca kpala caca bɔɔlera, sa phiir tɩbɩla awɩ thɩ̃thɩɩn kɛ na‐n wɛnɩ ɔɔ i. 15Dɩ Thãgbaa bobonaa thɩmɩɩ fʋrɛ kha na gelela, mɔ̃kɛ gɩ kherenɩ ayɩ:
16“A gele pɩ, mɛr Thãgba na bire na ɩ̃;
a na bir na dʋ Davɩdɩɩ waakɛ kɔɔ jenɩ.
Ma bire na dʋ ɔɔ dakʋɛ,
ma bire na gbɛbɩ gɩ wo.#Amɔ 9:11–12
17Dɩ mɛ̃ tɩbɩlaakɛ sɛnɩ na ƴaal mɛr Kɔ̃tɩn;
mɛna gɩ na tibil caar fɛʋʋkɛ n fʋɔrɛ mɩnɩ.
18Mɛr Kɔ̃tɩnɩkɛ cʋɛnɩ ga thɩ̃ɩkɛ dɩɩ do gɩrɛ dɔnɩ dajɩnanɛ khorr sɔ.”
19Gɛr gɩ, ka mer yɩna gɩnɩ, gɩ bɔrɛ dɩ sa‐n gba nɩwɛ a heen wɩrɛ thɛnɩ ca kpalaa pa a kɛr a pɛ Thãgba haaraˈ. 20Sɩ sɩ kherene sɛbɛ a sɔ war, wɩ bɔ thɩl thɩ̃ khor, na bɔdɛl cʋʋrɛ, wa‐n kho dakha nʋmɩkɛ khenɩ sɩ tɔmɩn na thaa ga, wa‐n kho dakha tɔmɩnaˈ.#Thɩɩ 34:15–17; Lev 17:10–16; 18:6–23 21Gɩdonɩ gɩ maanɛ kɛkɛkɛ tɩbɩla kɔɔ hanɩle dɩɩ dɩɩra dɩ wa‐n so Mʋɩjɩɩ jɔfʋ. Hɩɩr wire fɛʋ wɩ‐n so gɩ sɛbɛra Juifisɔɔ Thãgba fʋɔr cɔra.
22Dɩ le thɔ̃thɔnasɔ, na we gbɛbɩdaraa kɔ̃tɩ̃sɔ, na we gbɛbɩdara fɛʋ dakha yɩɛrɛ aa, gɩ bɔrɛ ɩnɩ‐n phiir tɩbɩla ɩnɩ thɩ̃thɩɩn ɩnɩ‐n thɔ̃ wɩ Ãtɩyɔsɩ nakha Pol, na Barnabasɩ, na Juudiikɛ wɩ‐n wenɩ Barsabasɩ, nakha Sɩlasɩɩkɛ dɔnɩ tɩbɩlaakɛ hananɩ i bʋɔ omɩnaa thɩ̃thɩɩn. 23Dɩ wɩ kherere sɛbɛ a ha wɩ ayɩ:
Sɛr omɩnaakɛ dɔnɩ thɔ̃thɔna, na we gbɛbɩdaraa kɔ̃tɩ̃sɔ, kherene sɛbɛɛkɛ a thɔna omɩnanaakɛ thɛnɩ ca kpalaa pa kɛ hanɩ Ãtɩyɔsɩ, na Siri, na Silisi ayɩ: Nɩ gba fʋɔrɛ. 24Mɔ̃ sɩ nɩɛnɩ dɩ ɩkhasɔɔkɛ kɔɔ thɛnɩ asɩ pa, kɛ sa kɔɔ soronɩ thɩ̃ bɩɛllakaˈ, awɩ thɩmɩɩ kɔɔ cʋʋ nɛr kpɩɛrɛ dɩɩ nyanyãa dɩ haar fi ni; 25dɩ gɛr gɩ sɩ kɔɔ gʋʋr kha, a do nɔ bɩɛl, a yɩɛ dɩɩ bɔr dɩ sɩ kɔɔ phiir tɩbɩlaakɛ, a thɔ̃ wɩ anɩ pa na Barnabasɩ na Polɩkɛ sɩ‐n nanɩ, 26kɛ dɔnɩ tɩbɩlaakɛ faanɩ awɩ yi dɩɩ do Jeju Kirisiti asɩ Kɔ̃tɩnɩ i dɔ nɔɔ. 27Sɩ thʋɔn dakha Juudi na Sɩlasɩ, wa mɩɩ nɛr ɔmɛna na awɩ nɔ. 28Gɩdonɩ Thu Phuu yɩɛrɛ dɩɩ bɔr, dɩ sɛrɛ dakha mɛ̃ sɩ yɩɛ, dɩ sa‐n pɛ nar heendaa saagado thɩ̃ doo teere kha gaaga, dɩ gɩrɛ teanɩ kha dʋɔn: 29Nɩ bɔ bonɩ ji nʋʋn, na tɔmɩn, na nʋmɩkɛ khenɩ sɩ tɔmɩn na thaˈ, na bɔdɛl cʋʋrɛ, thɩ̃ɛ gɩɩkɛ na‐n jɩɩnɩ dʋrɔ bʋrɛ, na‐n cʋaˈ. Nɩ tɔɔ bɔɔ.
Wɩrɛ wɩ phiirni a thɔ̃ Ãtɩyɔsɩ
30Sɩ wɛr, ɔbɔɔkɛ we gbɛbɩdara kɔɔ fʋɔr wɩnɩ pɩ, gɛr wɩ jaal Ãtɩyɔsɩ a kpa tibil jɔ a jɛ sa ha wɩ sɛbɛɛle. 31Ɔbɔɔkɛ omɩnaale hɩɩnnɩ sɛbɛɛle pɩ, daʋ fʋ wɛr ha faarɛraale wɩ ˈlɛnɩ. 32Dɩ Juudi na Sɩlasɩɩkɛ dɔnɩ Thãgba tukɩr tidara, wɛr kɔɔ mɩa omɩnaale thɩmɩa jɔɔ dɩɩ ha wɩ ƴɛ kʋʋl jaal a cʋʋna wɩ dɩ wɩ tɩ dakha. 33A gɩ pʋɔr gbe, omɩnaale kɔɔ sɩ warɛ na ha ɩɩ dɩ wɩ bir kɔ̃ wɩrɛraakɛ kɔɔ thɔna wɩnɩɩ pa. [ 34Sɩlasɩ or, a yɩɛrɛ dɩɩ bɔr dɩ too.]
35Pol na Barnabasɩ toore Ãtɩyɔsɩ dɩ wa‐n dɩɩr tɩbɩla, dɩ wa‐n mɩɩna Kɔ̃tɩnɩ tutugo bʋɔɔ thɩmɩɩ na tibil jɔ.
Pol na Barnabasɩɩ lee
36Ɔbɔɔkɛ ga pʋɔrnɩ gbe, gɛr Pol sor Barnabasɩra ayɩ: Sɩ kɛra birə a yɛ omɩna dɩɩsɔ fɛʋraakɛ sɩ kɔɔ mɩɩnɩ Kɔ̃tɩnɩ so, a hɩnɛ a jɛ mɔ̃ wɩ hanɩ. 37Dɩ Barnabasɩ or ƴaalɛ ɩnɩ‐n kpa Jãakɛ wɩ‐n wenɩ Markɩ a fɔrɔ, 38sɩ Pol yɩɛrɛ dɩ ga bɔr dɩ ɩna kpa ʋrɛɛkɛ kɔɔ faa nɩnɩ Pãfɩlɩ, kɛ na kɔɔ thɔɔ nɩnɩ thɔmana ga, a jalana ga.#Th t t 13:13 39Dɩ thɩ̃ banaale kɔɔ ɩɩrɛ a khɩɩr ka, gɛr gɩ dɩ wɩ lee kha, dɩ Barnabasɩ kpa Markɩ dɩ wɩ ha kha a gba jal Sɩpɩr. 40Sɩ Pol or phiir Sɩlasɩ dɩ wɩ jal, sɩ omɩna kɔɔ bɩɛlɛ Kɔ̃tɩn a bɔna wɩ. 41Dɩ le wɩ gba jal Siri na Silisi a cʋʋ we gbɛbɩdarasɔ dɩ wɩ tɩ.
Currently Selected:
Thãgbaa Thɔ̃thɔnaa Thɔ̃ 15: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
