Thãgbaa Thɔ̃thɔnaa Thɔ̃ 16
16
Timothe thɔɔrɛ Pol na Sɩlasɩ
1Agɩpɩ dɩ Pol gba jal Dɛɛrbɩ na Lisitiri, dɩ kpãkpãadaar bɩɛl gɩ a hale dɩ wa‐n wɩɩ Timothe; ɔɔ nɩ dʋɔn Juifi khɛrɩkɛ pɩɛrnɩ Thãgba haar, sɩ ɔɔ thɩ do Gɩrɛkɩ. 2Omɩnaakɛ hanɩ Lisitiri na Ɩkɔn n mɩɩrɛ ɔɔda bɔ. 3Dɩ Pol kɔɔ ƴaalɛ a kpaa wɩ ha kha, dɩ gɛr gɩ dɩ gbaa a kur khʋ̃ʋ, gɩdonɩ Juifisɔ kɔɔ har paarɩle dɩɩ do wɛr fɛʋ jɩrɛ dɩ Gɩrɛkɩ ɔɔ thɩ do. 4Dɩ mɔ̃kɛ wɩ‐n kpaarnɩ dɩɩra, wɩ‐n sor omɩnana wa‐n hɩnɛ gɩrɛɛkɛ thɔ̃thɔna na we gbɛbɩdaraa kɔ̃tɩ̃sɔ kɔɔ gʋʋrnɩ Jerujalɛm. 5Dɩ we gbɛbɩdara n ˈlɛr fãga ha pɛrɛra dɩ wɩ jɔrna na pɛr wire wire.
Pol yɩrɛ Thãgbaa thɩ̃ yɩr
6Sɩ mɔ̃kɛ Thu Phuu kɔɔ pɩɛr wɩnɩ wa‐n mɩɩ Thãgbaa thɩmɩɩ Ajɩra ga, wɩ kpãasɛrɛ Firiji na Galasɩ dɩɩ. 7Ɔbɔɔkɛ wɩ thɔɔnɩ Mɩsɩ wɩ kɔɔ ƴaalɛ wɩ lõ Bitini, sɩ Jejuu Thu na kɔɔ ha wɩ hʋɛaˈ. 8Dɩ le wɩ kpãsɛ Mɩsɩ sa dã Tʋrʋasɩ. 9Dɩtɩnɔ Pol kɔɔ yɩrɛ Thãgbaa thɩ̃ yɩr dɩɩ do Masedʋandaar gɩ, a jɩɩlaa da‐n bɩɛlɛɛ thakɛ ayɩ: Seere kɛ Masedʋan a taa sɩ. 10Ɔbɔɔkɛ Pol yɩnɩ thɩ̃ɛɛle pɩ, sɩ kɔɔ yaalɛ dapaara kɔrɔ sɩ jal Masedʋan, gɩdonɩ sɩ jɩrɛ tue dɩ Kɔ̃tɩn gɩɩkɛ n wɛ sɩnɩ sɩ mɩa le tutugo bʋɔɔ thɩmɩɩ.
Masedʋan jaal
11Ɔbɔɔkɛ sɩ kɔɔ thenɩ Tʋrʋasɩ, sɩ gbaar bato a jal dẽdẽdẽ Samɔtɩrasɩ, dɩ ga dɩ wɩlla sɩ jal Neapolɩsɩ. 12Dɩ le sɩ kɔɔ gba jal Filipi dɩɩraakɛ hanɩ Masedʋan caca#16:12 Caca mara: Kɩrʋ dʋɔn Masedʋan mara tɩnɛnɛ tɩnɛ paar yenã. marara, kolonɩ#16:12 Kolonɩ: Ca kpala dɩɩkɛ Rɔmɛ̃sɔ kɔɔ gbanɩ tooro. gɩ kɔɔ do dakha, dɩ sɩ kɔɔ toore dɩɩraale a pʋɔr gbe.
13Hɩɩr wire sɩ kɔɔ ther dɩ khuirə mɩɩr nʋɔra, ka sɩ kɔɔ kpɩɛrnanɩ Thãgba fʋɔr paar na yɩrɛ. Dɩ sɩ kɔɔ toore dɩ sa‐n mɩɩna khɛrasɔɔkɛ n gbɛbanɩ kha le.
Lidii ha debi
14Dɩ khɛ bɩɛl hale kɛ wɩ‐n wenɩ Lidi, a do gbɩlã kẽkẽ ƴaƴabɩdaar, a the Tɩatɩɩr da‐n cʋ Thãgba; dɩ a‐n pɛr nũu, dɩ Kɔ̃tɩn khɛrʋʋ haar dɩ pɛ nũu gɩrɛraakɛ Pol n sonɩ. 15Ɔbɔɔkɛ a kɔɔ kpɛɛnɩ nyʋɔnɔ na ɔɔ cɔdara pɩ, a kɔɔ bɩɛl sɛr thakɛ ayɩ: Ado sobɔ tibil nɩ‐n we mɩ mɔ̃ mɩ donɩ Kɔ̃tɩnɩda, nɩ lona ɩ̃ cɔ a tɔɔ; dɩ a kɔɔ bɩɛl sɛr da‐n gbɛ̃gbɛrɛna.
Pol na Sɩlasɩɩ khaɩ khaan
16A gele ka pɩ, sɩ jaal Thãgba fʋɔr paar, dɩ thɔ̃daar khɛ bɩɛl gɩ, a hale dɩ sɩ caanaa, dɩ hana Pɩtɔ̃ kɔ̃tɛɛbuukɛ cʋgɛɛnɩ da‐n bo, dɩ a‐n ˈlɛr war jɔɔ ɔɔ borara da‐n ha ɔɔ kɔ̃tɩ̃sɔ; 17dɩ a mar da‐n kpaan Pol na sɛrɛ khiro sɩ da‐n hulẽ ayɩ: Tɩbɩlaakɛ Thãgba Kəkəədaarɩ thɔ̃dara wɩ do dɩ wa‐n mɩɩ nar taa hʋɛ. 18Wire jɔɔjɔɔ a‐n kɔɔ cʋʋ ga thɩ̃ɩlera. Dɩ Pol thʋ̃ vɔɔ a kɛr a so kɔ̃tɛɛbuurəəle ayɩ: Mɩ so farɛ na Jeju Kirisitii i, thɛ khɛrraakɛ. Dɩ the liirrəə dapaara.
19Mɔ̃kɛ thɔ̃daar khɛrɩ kɔ̃tɩ̃sɔ yɩɛnɩ dɩ awɩ war ˈlɛ hʋ kʋɛrɛ, wɩ fʋrɛ Pol na Sɩlasɩ a hal wɩ jalna tɩɩ jɔ paar kɔ̃tɩnasɔɔ ƴɛra, 20a nɩna so kɩɩldara a so: Tɩbɩlaakɛ nyanyãa sɛr dɩɩ; 21Juifisɔ wɩ do dɩ wa‐n mɩɩ gɩrɛɛkɛ sa hananɩ hʋɛ a na tu agɩbo sɩ kpaanɔaˈ, gɩdonɩ Rɔmɛ̃sɔ ha sɩ. 22Dɩ tibil jɔɔle ɩɩrɛ a mana wɩ, dɩ so kɩɩldara so wɩ ɓəəre wi kẽkena sa cile wi na khasa. 23Ɔbɔɔkɛ wɩ kɔɔ bɩɩr wɩnɩ dakɔ̃tɩ̃ɩ pɩ, wɩ pɛ wɛr khaɩra sa kpãkpãa khaɩ bɛrdaarraakɛ a na‐n jɩɛ hɩɩn wɩ. 24Dɩ mɔ̃ khaɩ bɛrdaar nɩɛnɩ thɩmɩɩrɩle, a gba wɛr pɛ khaɩ du thɩ̃thɩɩn sa kpala wɩ nɛɛ na kpulole.
Khaɩ bɛrdaarɩ taa ˈlɛ
25Ɔbɔɔkɛ dɩɩ nɩrɔnɩ, Pol na Sɩlasɩ bɩɛlɛ Thãgba dɩ wa‐n khɩna nɩɛ dɩ wa‐n kpãgana Thãgba, dɩ khaɩdara nɩɛ. 26Dapaara thɩɩ kɔɔ jɩɩn dɩɩ khɩɩr ka, dɩ khaɩ cʋɔr gbugbuyo; dɩ bɔ bɩɛllala loosɔ fɛʋ kɔɔ khɛr, dɩ khaɩdara fɛʋʋ lidasɔ thʋbɩrɛ. 27Dɩ ɔbɔɔkɛ khaɩ bɛrdaar na jaanɩ a yɩ khaɩ loosɔ dɩɩ khɛr, a pher bajɩna a kʋra dɩbara gɩdonɩ a ka jɩna khaɩdara kɔɔ fuulele. 28Sɩ Pol phã nɔ khɩɩr ayɩ: Fa‐n cʋʋ afɩ dɩbara puurəˈ, sɩ hakɛ fɛʋ. 29Dɩ khaɩ bɛrdaar bɩɛl dɔɔ a cana birbirbir lõ, a ji Pol na Sɩlasɩɩ ƴɛra da‐n jẽ kpakpakpa, 30sa kpa wɩ thena a bule wi: Kɔ̃tɩna, anye teana ɩ̃ cʋɛ a ˈlɛ taarɛ? 31Dɩ Pol na Sɩlasɩ birsee: Pɩɛr Jeju Kɔ̃tɩn haar dɩ fa ˈlɛr taarɛ, fɛrɛ na afɩ cɔdara. 32Dɩ wɩ kɔɔ mɩgʋʋrɛ Kɔ̃tɩnɩ so na wɩrɛ fɛʋʋkɛ hanɩ ɔɔ cɔ. 33Dɩ a kpa wɛr ga dɩtɩnɔɔlera a thena a cɔcɔɔ wɩ khoisɔ, sɩ dapaara dɩ wɩ kpɛgʋʋ nyʋɔnɔ na ɔɔ cɔdara fɛʋ. 34Dɩ a kpa wɛr a kɔna ɔɔ cɔ a ha wɩ dɩkɔ, dɩ gɩ kɔɔ daaraarɛ kpɛ ɔr na ɔɔ cɔdara fɛʋ mɔ̃ a pɛrnɩ Thãgba haar.
Pol na Sɩlasɩɩ faa
35Ɔbɔɔkɛ dɩɩ wɩlnɩ, so kɩɩldara thʋɔn gardɛsɔ wɩ jala a sɔ khaɩ bɛrdaarra a faa tɩbɩlaale wɩ kɔ̃. 36Dɩ bɛrdaar gbaar jal a so Polla ayɩ: So kɩɩldara thʋɔn ayɩ, wɩ faa nɩ; gɛr gɩ nɛnɛ̃ nɩ thɛ kɔna na ha ɩɩ. 37Sɩ Pol so gardɛsɔra: Sɛr Rɔmɛ̃sɔɔkɛra wɩ kɔɔ ciilni tibil jɔɔ ƴɛra, sɩ kɩrʋ na yɩr dɩ wɩ jɩ gɩrɛ sɩ cʋʋnaˈ, sa to sɩ khaɩra, gɩ do wɩ cʋʋ sɛr dɩ sɩ the thaa waa gbul bɛɛ? Ga ha mãˈ. Wɛr thɛthɛra n ɩna dɩbara a faa sɩ. 38Dɩ gardɛsɔ gba thɩmɩaale a jalna so kɩɩldarara, dɩ maar fʋlɛ wɩ mɔ̃ wɩ nɩɛnɩ dɩ Rɔmɛ̃sɔ wɩ do. 39Dɩ wɩ pɔr a phʋʋr wɩ a pɛ wɩ hʋɛra, sa bɩɛl wɩ wɩ thɛ dɩɩra. 40Ɔbɔɔkɛ wɩ thenɩ khaɩra wɩ kɔɔ jaal Lidii pa. A wɩ yɩ omɩna a mɩɩ wɩ ƴɛ kʋʋl jal thɩmɩɩr pɩ, wɩ gbaar kɔ̃.
Currently Selected:
Thãgbaa Thɔ̃thɔnaa Thɔ̃ 16: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
