Thãgbaa Thɔ̃thɔnaa Thɔ̃ 14
14
Pol na Barnabasɩ Ɩkɔn
1Ɔbɔɔkɛ Pol na Barnabasɩ kɔɔ danɩ Ɩkɔn, wɩ kɔɔ lʋʋn le Juifisɔɔ Thãgba fʋɔr cɔra mɔna wɩ‐n kɔɔ cʋʋnɩ, a thʋ̃ mɩɩ thɩmɩɩr, dɩ Juifisɔ bərəəm na Gɩrɛkɩsɔ pɛr haar. 2Sɩ Juifisɔɔkɛ na‐n tuonni dɩ wa pɛr haaraˈ, wɩ ɩɩrɛ cʋr ca kpala a pɛr wɩ cʋɛ omɩna puure. 3Sɩ Pol na Barnabasɩ kɔɔ toore Ɩkɔn a pʋɔr dɩ wa‐n mɩɩ Thãgbaa thɩmɩɩ na ˈlar gɩdonɩ Kɔ̃tɩnna wɩ ƴɛl; dɩ Kɔ̃tɩn ture ɔɔ bɔ jɩ thɩmɩɩkɛ wɩ‐n mɩɩnɩ dɩ sobɔr gɩ do, a ha wɛr dakha punone dɩ wa‐n cʋʋna nɔ kpaa thɩ̃ɛsɔ na ma kʋ thɩ̃ɛsɔ. 4Sɩ dɩdara kɔɔ tɩnɛnɛ dɩ wɛ hana Juifisɔ, sɩ wɛ hana thɔ̃thɔna. 5Dɩ mɔ̃kɛ ca kpala, na Juifisɔ, na awɩ kɔ̃tɩ̃sɔ kɔɔ gʋʋrnɩ kha sa ɩɩrna kpoore Polla na Barnabasɩra dɩ wa‐n dʋʋrna wɩ bokana, 6wɩ fuure jal Likaʋnɩ dɩɩsɔraakɛ wɩ‐n wenɩ Lisitiri na Dɛɛrbɩ na yɛ̃ dɩsɔraakɛ khonanɩ le. 7Dɩ le wɩ too dɩ wa‐n mɩɩ tutugo bʋɔɔ thɩmɩɩ.
Pol na Barnabasɩ Lisitiri
8Sɩ kũu bɩɛl kɔɔ hale Lisitiri dɩ ɔɔ nɛ khi; wɩ kʋɔnɛ na gbãgbarɛ dɩ aa kɔɔ sarakɛ thɩɩ a jal a yɩ ga. 9Dɩ a‐n kɔɔ pɛ nũu ɔbɔɔkɛ Pol n kɔɔ mɩɩnɩ Thãgbaa thɩmɩɩ, sɩ Pol n hɩɩnʋʋnɛ kirkirkir a yɩɛ a jɩ dɩɩ do a hananɛ ha pɛrɛɛkɛ na kpɛɛnɛɛnɩ, 10a so nɔ khɩɩr ayɩ: Ɩrɛ jɩlɛ kɩbɩ na nɛɛ; dɩ dapaara dɩ pal ɩɩr a ma da‐n sa. 11Mɔ̃ tibil jɔ yɩnɩ gɩrɛ Pol cʋʋnɩ, wɩ‐n hulene na Likaʋnɩ thɩmɩɩr ayɩ: Thãgbasɔ gbuno kɛ asɩ pa a ho tɩbɩla. 12Dɩ wɩ‐n wer Barnabasɩ Jəsi, sɩ Pol na‐n do Ɛrmɛsɩ gɩdonɩ ɔr n mɩa thɩmɩa. 13Dɩ lõfonʋɔra Jəsii fʋɔr cɔ kɔɔ ha; dɩ ʋrɛ dɔnɩ Jəsii gbõdaar kɔɔ kpar nakenaakɛ wɩ tonɩ sʋkparasɔɔkɛ wɩ cʋʋnanɩ thɩr phɩ̃ɩ a pɔna lõfonʋɔra, dɩ a ƴaalɛ ɔr, na tibil jɔɔle n je Polsɔra bonɩɛ. 14Sɩ ɔbɔɔkɛ thɔ̃thɔnaale Barnabasɩ na Pol kɔɔ nɩɛnɩ gele, wɩ ɓəəre awɩ kẽkẽsɔ sa ca birbir lõ tibil jɔraalee thɩ̃thɩɩn a hulẽ: 15Kona, mɔ̃gɩdo dɩ na‐n cʋʋ gɩrɛ? Sɛrɛ dakha tɩbɩlala sɩ do mɔ̃ nɩ hanɩ, dɩ sa‐n mɩɩ nar tutugo bʋɔɔ thɩmɩɩr dɩ sɩ yɩ, gɩ teenanɛ dɩ na faa mɔlɔ thɩlasɔɔkɛ sɩ nɩ kɛr nɩ pɛ Thãgba haar, ʋrɛɛkɛ dɔnɩ yidaar, kɛ kɔɔ tenɩ ƴũ, na thɩɩ, na lanyʋɔn, na gɩrɛ fɛʋʋkɛ ha garnɩ bɩnɔ.#Thɩɩ 20:11; Khɩ 146:6 16Dɩ bɔɔkɛ kɔɔ kanɩ, a kɔɔ sɩrɛ tibil caarra fɛʋ wa‐n jalana awɩ hʋ, 17sɩrakɛ aa kɔɔ faarakɛ nɩnanɛɛkɛ a‐n nɩnanɩ ntɛ a donaˈ; a‐n nɩna nɛr ɔɔ bɔ cʋʋ mɔ̃ a‐n ˈlaa narnɩ nyʋɔn na yɛ bʋɔ, da‐n hana nɩ dakha dɩkɔ jɔɔjɔɔ na daʋ anɩ hara. 18Sɩrakɛ thɔ̃thɔnaale mɩɩ wɩnɩ thale, sɩ ga khe war kpãkpalã sɩ dɩ wɩ mar a pɩɛr tibil jɔɔle dɩ wa jɩ war bonɩaa ga.
19Agɩpɩ Juifisɔ kɔɔ ther Ãtɩyɔsɩ na Ɩkɔn a pɔ a fɩɩl tibil jɔ pɛr, dɩ wɩ dʋʋr Pol na bokana sa halʋʋ thena dɩ khuirə, a ka jɩna a khire. 20Dɩ mɔ̃ kpãkpãadara kpanɩ jɛ a diirəə, a pallɛ ɩɩr a bir lõ le dɩɩra.
Mɔ̃ Pol kɛrnɩ bir Ãtɩyɔsɩ
A dɩɩ wɩl Pol gbaar jal Dɛɛrbɩ na Barnabasɩ. 21Ɔbɔɔkɛ wɩ mɩɩnɩ tutugo bʋɔɔ thɩmɩɩ dɩɩraale a cʋʋna tɩbɩla jɔɔ dɩ wɩ do kpãkpãadara, wɩ kɛrrɛ bir Lisitiri, na Ɩkɔn, na Ãtɩyɔsɩ; 22dɩ wɩ kɔɔ cʋʋrɛ kpãkpãadara dɩ wɩ tɩ, dɩ wɩ yɩrna wɛr wɩ yɩra tɔɔ ha pɛrɛra, wɩ so warɛ dakha ayɩ, dɔ sɩ yɩ bɔ gaarɛ jɔɔ sɩ sɩ lõ Thãgba fãgadaarɩ dɩra. 23Dɩ wɩ kɔɔ phiire we gbɛbɩdaraa kɔ̃tɩ̃sɔ a pɛ we gbɛbɩdarara paar fɛʋ bɩɛlbɩɛl; ɔbɔɔkɛ wɩ kɔɔ lini nʋɔ a bɩɛlna Thãgba a pɛ war, wɩ faa wɛr Kɔ̃tɩnnaakɛ wɩ kɔɔ pɛrnɩ haarɩ nyɔ̃kɔɔ. 24Agɩpɩ wɩ jaal the Pisidi sa gba pɔ Pãfɩlɩ. 25Ɔbɔɔkɛ wɩ mɩɩnɩ Thãgbaa thɩmɩɩ Pɛɛrjɩ pɩ, wɩ gbaar jal Atalɩ. 26Le wɩ kɔɔ gba bato a jal Ãtɩyɔsɩ, ka wɩ kɔɔ bɩɛlnɩ Thãgba a bɔna wɩ thɔmanaakɛ wɩ pɩnɩ gele.
27Ɔbɔɔkɛ wɩ danɩ, wɩ wer we gbɛbɩdara a der pa bɩɛl a mɩɛ wɩ gɩrɛ fɛʋʋkɛ Thãgba gba wɩnɩ a cʋʋna, na mɔ̃kɛ a kɔɔ khɛrnɩ hʋɛ ca kpalala dɩ wa pɛr haar. 28Sɩ wɩ kɔɔ toore na kpãkpãadara a pʋɔr.
Currently Selected:
Thãgbaa Thɔ̃thɔnaa Thɔ̃ 14: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
