Thãgbaa Thɔ̃thɔnaa Thɔ̃ 13
13
Mɔ̃ kɔ̃tɩna dɛɛnɩ Barnabasɩ na Sɔlla nyɛ̃ɛ Thãgba n bɔna wɩ
1Thãgba tukɩr tidara na dɩɩrdara kɔɔ har we gbɛbɩdararaakɛ hanɩ Ãtɩyɔsɩ; Barnabasɩ na Sɩmɛ̃ʋʋkɛ dɔnɩ tɩɩ biru, na Lusiyusiikɛ thɛnɩ Sɩrɛn, na Manahɛnɩkɛ wɩ haananɩ kha Ɛrɔɔdɩ fãgadaar buu, na Sɔl. 2Mɔ̃kɛ wɩ lini nʋɔ dɩ wa‐n fʋɔrna Kɔ̃tɩn, Thu Phuu sor: Nɩ lea mar Barnabasɩ na Sɔl kpɩɩ thɔmanaakɛ mɩ we warnɩ. 3Dɩ ɔbɔɔkɛ wɩ lini nʋɔ sa bɩɛl Thãgba pɩ, wɩ dɛ̃ɛ warɛ nyɛ̃ɛ sa sɩ war dɩ wɩ jal.
Barnabasɩ na Sɔl jal Sɩpɩr
4Dɩ mɔ̃ Thu Phuu thɔnɩ Barnabasɩ na Sɔl, mɛ̃ wɩ jal a dã Seləsɩ, dɩ le wɩ gba bato a jal Sɩpɩr. 5Ɔbɔɔkɛ wɩ danɩ Salamɩn, wɩ kɔɔ mɩɩrɛ Thãgbaa thɩmɩɩ Juifisɔɔ Thãgba fʋɔr cɔnanɔ; sɩ Jã wɩ kɔɔ hana kha da‐n bul wi.
6Ɔbɔɔkɛ wɩ kɔɔ kpaarnɩ yɔ dɩɩle fɛʋ a pɩ sa dã Pafɔsɩ, le wɩ kɔɔ caana Juifi dɔdɔɔdaar bɩɛlɩkɛ n sõsonenɩ dɩ yɩ bobon ha nɩ. Ɔɔ i n dʋɔn Barjeju; 7a kɔɔ har kha na Sɛrjiyusi Polusiikɛ dɔnɩ gobanɛr, kɛ jɩɛnnɩ thɩ̃ɛ ka. Gobanɛrɩle kɔɔ wer Barnabasɩ na Sɔl, gɩdonɩ a kɔɔ ƴaalɛ ka a nɩ Thãgbaa thɩmɩɩ. 8Sɩ Elɩmasɩɩkɛ dɔnɩ dɔdɔɔdaar, thale dɔ ɔɔ i na gɩrɛkɩ thɩmɩɩr, a‐n bãbarã wɛr da‐n ƴaal a pɩɛr gobanɛrɩle a na‐n pɛ haaraˈ. 9Sɩ Sɔlɩkɛ wɩ‐n wenɩ dakha Pol hinəne Thu Phuu da‐n hɩɩn Elɩmasɩ kirkirkir sa sʋʋraa ayɩ: 10Fɛrɛɛkɛ gõgolone na fɩɩlɛ n theronɩ, fɛr Satãa bi, fɛr fɩl sar lãlaardaar, fa thʋ̃ na sɩrɔ Kɔ̃tɩnɩ hʋ sarra fɩ‐n golonaa? 11Nɛnɛ̃ fa yɩ gaa, Kɔ̃tɩn na ga farɛ ɔɔ nyɔ̃bi dɩ fa yaar, fa yɩ wirəˈ phaphapha gɩ dana bɔɔ gbe. Dɩ dapaara dɩɩ haaraa gbibi dɩ dabirə thiirəə da‐n bəər, dɩ le a ƴaal tɩbɩla dɩ wa‐n halʋʋ. 12Ɔbɔɔkɛ gobanɛr yɩnɩ gele dananɩ, a pɛrɛ haar sɩ nʋɔ kɔɔ kpagʋʋrɛ Kɔ̃tɩnɩ dɩɩra.
Pol mɩɩrɛ Thãgbaa thɩmɩɩ Pisidi Ãtɩyɔsɩ dɩɩra
13Pol kɔɔ ther Pafɔsɩ na ɔɔ kpakpaarsɔ a lõ bato a jal Pãfɩlɩ Pɛɛrjɩ dɩɩra. Sɩ Jã kɔɔ faa wɛr sa kɛr bir Jerujalɛm. 14Sɩ wɩ kɔɔ ther Pɛɛrjɩ wo a gba hʋɛ a jal Pisidi Ãtɩyɔsɩ. Dɩ hɩɩr wire wɩ kɔɔ lʋʋn Juifisɔɔ Thãgba fʋɔr cɔra a too. 15Ɔbɔɔkɛ wɩ sonɩ jɔfʋ na Thãgbaa bobonasɔɔ sɛbɛ a pɩ, wɩrɛ dɔnɩ kɔ̃tɩna Juifisɔɔ Thãgba fʋɔr cɔra thʋɔn bule wi aa: Omɩna, ado nɩ hananɛ thɩmɩɩrɩkɛ na hananɩ tɩbɩla ƴɛ kʋʋl jaal, nɩ mɩa wɩ. 16Le Pol ɩɩr a jɛ tɩbɩla na nyɛ̃ɛ wɩ pɩra sa so war:
Nɛr Ɩjɩrayɛldara, na nɛrkɛ n maannɩ Thãgba, nɩ pɛ nũu. 17Ɩjɩrayɛl Thãgba kɔɔ phire asɩ mama thɩ kɔ̃tɩ̃sɔ, dɩ a cʋʋ wɛr dɩ wɩ ler ɔbɔɔkɛ wɩ kɔɔ donɩ kpakpala Ejipiti dʋɔ, agɩpɩ dɩ pɛr ɔɔ fãga nyɛ̃ a ti wi le.#Thɩɩ 1:7; 12:51 18Dɩ a kɔɔ fʋ warɛ haar a cʋʋna yɛna kpalanyɔ le bəənnə,#Ther 14:34; Dət 1:31 19dɩ ɔbɔɔkɛ a kɔɔ bũburoni caar makonyɔ Kanãa dɩɩra, a gbaar awɩ dɩ a ha ɔɔ too.#Dət 7:1; Joj 14:1 20Gɩ pʋɔrɛ a thɔɔ yɛna taanã na kpalanyɔ yʋɔr. A gele pɩ, a kɔɔ ha wɛr so kɩɩldara dɩɩ dana Samʋɛl Thãgbaa bobonɩ bɔɔ.#So 2:16; 1 Sam 3:20 21Dɩ agɩpɩ wɛr kɔɔ bɩɛlnɛ fãgadaar. Dɩ Thãgba ha wɛr Sayʋl, Kɩsɩɩ bikuun, kɛ dɔnɩ Bɛ̃jamɛ̃ɛ ca dɩ do war fãgadaar a cʋʋna yɛna kpalanyɔ.#1 Sam 8:5; 10:21 22Ɔbɔɔkɛ Thãgba kɔɔ bʋʋnɩ faa, a kɔɔ gbaar Davɩdɩ a ha wɩ dɩ do fãgadaar. Ɔr a mɩɩrɔ sobɔ so jɩ thɩmɩɩrɩkɛ ayɩ: “Mɩ yɩrɛ Davɩdɩ Ɩjaɩɩ bikuun dɩphã, tibil gɩ a ha mɔ̃ ɩ̃ bɩ̃ pɛrnɩ haar, ɔr na cʋɛ ɩ̃ tuur fɛʋ.”#1 Sam 13:14; 16:12; Khɩ 89:20
23Dɩ Davɩdɩɩ məlla Thãgba kɔɔ cʋʋ Taadaarɩkɛ dɔnɩ Jeju dɩ the, dɩ ha Ɩjɩrayɛldara mɔ̃kɛ ɔɔ ʋlfɛ hanɩ. 24Ɔbɔɔkɛ aa kɔɔ ɩnɩ paˈ, Jã n kɔɔ mɩa Ɩjɩrayɛldarara fɛʋ aa: Nɩ deba haar sa ˈlɛ yɔ kpɛɛrɛ.#Mar 1:4; Lu 3:3 25Dɩ ɔbɔɔkɛ Jãa thɔ̃ n wɔrɔnɩ pɩr, gɛr a kɔɔ sor ayɩ: Ma do tibil ʋrɛ nɩ‐n pɛrnɩ haar gɩrɛ mɩ doraˈ, sɩ nɩ hɩnɛ, tibil bɩɛl hale a na kpa mar, kɛ ma teenanɩnakɛ ɩ̃ fʋʋrʋʋ nɛfaa ga.#Mat 3:11; Mar 1:7; Lu 3:16; Jã 1:20, 27
26Omɩna, nɛrkɛ dɔnɩ Abɩrahamɩ məl na wɩrɛ hanɩ anɩ thɩ̃thɩɩn kɛ n maannɩ Thãgba, sɛrra wɩ thɔna taa thɩmɩɩrɩkɛ. 27Gɩdonɩ Jerujalɛmdara na awɩ kɔ̃tɩ̃sɔ na kɔɔ jɩ Jeju, dɩ Thãgbaa bobonaa thɩmɩɩkɛ wɩ‐n sonɩ wire fɛʋ hɩɩr wire ga, dɩ mɔ̃ wɩ kɔɔ heenuuni sor, wɩ kɔɔ cʋʋrɛ dɩɩ ha mɔ̃kɛ Thãgbaa bobona kɔɔ sonɩ ga har. 28Sɩ gɩdonɩ wa yɩ thɩ̃ bɩɛllakɛ dɩɩ teena wɩ kʋaˈ, sɩrakɛ wɩ kɔɔ bɩɛlɛ Pɩlatɩ a kʋɔ.#Mat 27:22–23; Mar 15:13–14; Lu 23:21–23; Jã 19:15 29Dɩ mɛ̃ wɩ kɔɔ cʋʋ thɩ̃ɛ fɛʋ dɩɩ ha mɔ̃ gɩ khereraanɩ Thãgbaa sɛbɛra, agɩpɩ wɩ gbuune kʋkʋ thɩrʋra a dʋ.#Mat 27:57–61; Mar 15:42–47; Lu 23:50–56; Jã 19:38–42 30Sɩ Thãgba kɔɔ ɩɩrʋʋrɛ khirera. 31Dɩ wire jɔɔjɔɔ a‐n kɔɔ nɩnanɛ ɔɔbara wɩrɛɛkɛ a‐n kɔɔ thenanɩ kha Galile da‐n jal Jerujalɛm, kɛ dɔnɩnakɛ gɩrɛ ɔɔ sobɔ so jɩdara tɩbɩlala.#Th t t 1:3 32Dɩ sɛrɛ, sɩ‐n mɩɩ narɛ ga tutugo bʋɔɔ thɩmɩɩkɛ dɩ sɩ yɩ, gɩrɛ Thãgba kɔɔ ʋlfɛnanɩ asɩ mama thɩ kɔ̃tɩ̃sɔ, 33a kɔɔ cʋʋ gɛr dɩɩ ha otirə; dɩ ha sɛrɛɛkɛ dɔnɩ awɩ bɩsãsɔ mɔ̃ a kɔɔ ɩɩrnɩ Jeju khirera mɔ̃kɛ gɩ kherenɩ Khɩkhɩɩ nɩɛsɔ yenyɔra ayɩ:
“Fɛr dʋɔn ɩ̃ Bikuun,
mɛr Thãgba kɔna fɩ nĩ gɩrɛ.”#Khɩ 2:7
34Dɩ a kɔɔ ɩɩrʋʋrɛ khirera dɩ mɛ̃ a na bir kʋɛrɛra ga, gɩdonɩ gɛrra a kɔɔ so ayɩ:
“Mɛr Thãgba na ha nɛr thɩ̃ɛɛkɛ phonɩ,
kɛ dɔnɩ Davɩdɩɩdaakɛ dɔnɩ thɩ̃ɛ waa gel.”#Eja 55:3
35Dɩ gɛr gɩ gɩ bire so Thãgbaa sɛbɛra dɩkhãa pa wo ayɩ:
“Fa tu dɩ afɩ Tɩɩ phu na yɩ kʋɛraˈ.”#Khɩ 16:10
36Dɩ Davɩdɩ, ɔbɔɔkɛ a kɔɔ cʋʋnɩ Thãgbaa tuur ɔɔ bɔraalera pɩ, a kɔɔ khire dɩ wɩ dʋʋ ɔɔ mama thɩ kɔ̃tɩ̃sɔɔ kara dɩ yɩ kʋɛrɛ. 37Sɩ ʋrɛɛkɛ wer Thãgba kɔɔ ɩɩrnɩ khirera, aa kɔɔ yɩ kʋɛraˈ.
38Gɛr gɩ, nɛr omɩna, nɩ jɩɛ jɩ bɔɔbɔɔ dɩ sopugo faarɛɛkɛ wɩ‐n mɩɩ narnɩ ɔɔ pa gɩ the; 39sorɩkɛ Mʋɩjɩɩ jɔfʋ na kɔɔ punoni na hɛl naraˈ, ʋrɛɛkɛ pɩɛrnɩ haar ɔrra, sorra na hɛlaalɛ. 40Gɛr gɩ na‐n jɩɛ dʋ bʋrɛ dɩ gɩrɛɛkɛ Thãgbaa bobona kɔɔ sonɩ na dã naˈ. Gɩdonɩ gɩ sor:
41“Nɩ hɩnɛ, nɛr tɩɩ beesidara,
nɩ dɔ nʋɔ n kpaa nɩ, dɩ dakha nɩ bũburone.
Gɩdonɩ mɛr Thãgba na cʋʋrɛ thɔ̃ bɩɛl anɩ bɔra,
thɔma gɩ ado wa mɩɩ nar na pɛr haaraˈ.”#Aba 1:5
42Ɔbɔɔkɛ Pol na Barnabasɩ n thenɩ, wɩ bire ƴaal wɩ wɩ birə mɩa ga thɩmɩɩle hɩɩr wireekɛ n kpaanɛnɩ. 43Ɔbɔɔkɛ wɩ thenɩ Thãgba fʋɔr cʋɔrɔ, Juifisɔ bərəəm na kpakpalaakɛ fenɩ ho Juifisɔ, kɛ n cʋɔnnɩ Thãgba n kpar Polla na Barnabasɩra dɩ wa‐n khʋɛ kha, dɩ wɩ kɔɔ yɩrna wɛr ƴɛ kʋʋl jaal dɩ wa mar yʋʋ Thãgbaa bɔ jɩra.
44Hɩɩr wireekɛ n kpaanɛnɩ, fɩɩʋ sɛ sɩɩ do tɩbɩla dɩɩraale koo gbɛbɩrɛra kha a pɛ Thãgbaa thɩmɩɩ nũu. 45Sɩ mɔ̃ Juifisɔ yɩnɩ tibil jɔɔle, gbugi fʋlɛ wɛr dɩ wa‐n bana thɩ̃ banaa gɩrɛraakɛ Pol sonɩ dɩ wa‐n kʋɛnaa ire. 46Dɩ le Pol na Barnabasɩ so war na ˈlar ayɩ: Nɛr Thãgbaa thɩmɩɩ kɔɔ teena gɩ mɩa ɓo, sɩ gɩdonɩ nɩ bor sa hɩɩn anɩbara dɩɩ do yire khorr na teena naˈ, gɛr gɩ nɩ hɩnɛ, ca kpalaa pa sɩ‐n jal gɩrɛ. 47Gɩdonɩ mɛ̃ Kɔ̃tɩn kɔɔ ˈlaa sar jɔfʋ ayɩ:
“Mɩ thɩɩn fɛr fɩ do dahɩrɛ tibil caar fɛʋra,
dɩ fa gba taarɛ na jalna gɩ dana ka thɩɩ khuni.”#Eja 42:6; 49:6
48Dɩ ca kpala n kãkarɛ mɔ̃ wɩ nɩɛnɩ gele. Dɩ wɩ‐n kpãgarɛ Kɔ̃tɩnɩ so, dɩ wɩrɛ fɛʋʋkɛ Thãgba phiirni dɩ wa ˈlɛ yire khorr kɔɔ pɩɛr haar.
49Dɩ Kɔ̃tɩnɩ so kɔɔ kpaarɛ dɩɩraale koo. 50Khɛraakɛ jɩɛnnɩ too, kɛ n cʋɔnnɩ Thãgba dakha, Juifisɔ kɔɔ cʋr wɛr pɛr na kɔ̃tɩna dɩɩra dɩ wɩ ɩɩrna kpoore Polla na Barnabasɩra, a wee wɩ le awɩ dɩra a faa. 51Dɩ wɛr dakha kɔɔ kpɛɛrɛ thɩlãkobeekɛ ma wɩnɩ nɛɛ a faa war, sa gba jal Ɩkɔn.#Mat 10:14; Mar 6:11; Lu 9:5; 10:11 52Sɩ ado kpãkpãadara wer gɩ, daʋ na Thu Phuu kɔɔ he war.
Currently Selected:
Thãgbaa Thɔ̃thɔnaa Thɔ̃ 13: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
