Thãgbaa Thɔ̃thɔnaa Thɔ̃ 11
11
Kɩɛr Pɩɛr mɩɛ ha pɛdaraakɛ hanɩ Jerujalɛm gɩrɛ a cʋʋnɩ
1Thɔ̃thɔna na omɩnaakɛ hanɩ Jude kɔɔ nɩɛrɛ dɩ ca kpala dakha kɔɔ ˈlɛr Thãgbaa thɩmɩɩ. 2Dɩ ɔbɔɔkɛ Pɩɛr kɛrnɩ bir Jerujalɛm, ha pɛdaraakɛ dɔnɩ khʋ̃ kurdara kɔɔ ɩɩrnanaanɛ thɩmɩɩr ayɩ, 3a lʋʋn tɩbɩlaakɛ na kuroni khʋ̃aa pa, a khona wɩ dɩkor. 4Dɩ Pɩɛr gba thɩmɩa a mɩɛ wɩ kpa kha kpa kha, mɔ̃kɛ thɩ̃ɛ kɔɔ danɩ ayɩ:
5Jope dɩɩra mɩ kɔɔ ha dɩ ma‐n bɩɛl Thãgba a yɩ thɩ̃ yɩr; thɩ̃ɛ gɩ a ho kɩ̃kɩɩn phə̃kərə̃ə dɩ wɩ li li paar yenã, dɩɩ the ƴũ a gbũ dã mɩ. 6Dɩ mɔ̃ mɩ‐n hɩɩnnɩ kirkirkir sɩ ma‐n kpɩɛr, mɩ yɩrɔrɛ le nɛbi kho thɩ̃ɛ, na nɛkɩɛr sɛ̃bi thɩ̃ɛsɔ thɩɩraakɛ, na hɔ̃ nʋma, na thɩ̃ɛsɔɔkɛ n puuloneni, na ˈlominəsɔ. 7Dɩ mɩ nɩɛrɛ nʋɔ dakha kɛ sɔ marnɩ: Pɩɛr, ɩrɛ kʋrɛ a khɔ. 8Sɩ dɩ ɩ̃ birsee: Kpei Kɔ̃tɩn, gɩdonɩ ma kɔɔ kho thɩ̃ sãsɩnanɛ dɩ gɩrɛ biseneni gɩ a lõ mɩ nɔɔ yuurakaˈ. 9Sɩ nʋɔ kɔɔ bire the ƴũ balanyɔ a so: Gɩrɛ Thãgba yɩnɩ gɩ phure, fa‐n hɩɩn gɩ dɩɩ do far thɩ̃ sãsɩnanaˈ. 10Sɩ gɩ kɔɔ bire cʋʋ balãther wo, sɩ agɩpɩ gɩ bire hal koo a lõ thãgbara ƴũ. 11Dɩ dapaara kona yẽtherɩkɛ thɛnɩ Sejare dɩ wɩ thɔ̃ wɩ ɩ̃ pa daan, a jɩɩl cʋɔrɔɔkɛ sɩ kɔɔ hanɩ. 12Dɩ Thu Phuu kɔɔ so marɛ ɩ̃ jalana wɩ sɩ ma‐n baalɔaˈ. Omɩna maadõokɛ kɔɔ thɔɔ mɩ dɩ sɩ kɔɔ jal a lõ Kɔrnɛɩɩ cɔ. 13Dɩ a so sarɛ mɔ̃ a kɔɔ yɩnɩ ɔɔ cɔ Thãgbaa thɔ̃thɔ̃daar thu dɩ jɩɩlaa sa sʋʋraa, a thɔna Jope a wɛ Sɩmɔ̃ɔkɛ wɩ‐n wenɩ Pɩɛr, 14ɔr na mɩɛnɛɛ thɩmɩasɔɔkɛ na taanɩ ɔɔ thɛthɛ na ɔɔ cɔdara fɛʋ. 15Dɩ ɔbɔɔkɛ mɩ manɩ dɩ ma‐n mɩɩ, Thu Phuu kɔɔ gbune a lõ war mɔ̃kɛ gɩ kɔɔ ha sarnɩ dakha fʋ paar mamara. 16Dɩ le mɩ jɩna Kɔ̃tɩnɩ thɩmɩɩkɛ a sonɩ ayɩ: Nyʋɔnɔ Jã n kɔɔ kpɛɛ tɩbɩla, sɩ ne wer na ˈlɛr Thu Phuu kpɛɛrɛ.#Th t t 1:5 17Dɩ mɔ̃kɛ Thãgba ha wɩnɩ khaarda ca bɩɛlla na sɛrɛɛkɛ pɩɛrnɩ Jeju Kirisiti haar, amɛ mɛrkɛ do a na puno na pɩɛr Thãgba? 18Dɩ ɔbɔɔkɛ wɩ nɩɛnɩ gele, wɩ pɩrrɛ kɩrkɩrkɩr sɩ wa‐n dʋbɩ Thãgbaa i ayɩ: Dɩ a thale gɩ, Thãgba ˈlaarɛ ha debire ca kpalala wɩ hanana yire.
Barnabasɩ na Sɔl Ãtɩyɔsɩ
19Wɩrɛɛkɛ kpoore kɔɔ cʋʋnɩ dɩ wɩ bɩ̃bɩlã ɔbɔɔkɛ Etɩɛn kɔɔ khini, wɩ kɔɔ jaal a dana Fenɩsɩ, na Sɩpɩr, na Ãtɩyɔsɩ, dɩ wa‐n mɩɩ Thãgbaa thɩmɩɩ Juifisɔra dɩbara.#Th t t 8:1–4 20Sɩ ɩkhasɔ wo wɛrraakɛ dɔnɩ Sɩpɩrdara na Sɩrɛndara kɔɔ jaal Ãtɩyɔsɩ a mɩɩna Gɩrɛkɩsɔ a mɩɛ wɩ Jeju Kɔ̃tɩnɩ tutugo bɔda. 21Dɩ Kɔ̃tɩnɩ fãga kɔɔ ha warɛ, dɩ wɩrɛ kɔɔ pɩɛrnɩ haar a kpa Kɔ̃tɩnna wɩ jɔrɛ ka.
22Dɩ ga tutugoole kɔɔ daan Jerujalɛm we gbɛbɩdara, dɩ wɩ thɔ̃ Barnabasɩ dɩ pɔ le Ãtɩyɔsɩ. 23Dɩ ɔbɔɔkɛ a danɩ le, a yɩrɛ gɩrɛ Thãgba cʋʋnɩ ɔɔ bɔ jɩra dɩ gɩ daaraa, dɩ a kɔɔ mɩɩ wɛr fɛʋ wa‐n yɩrana ƴɛ kʋʋl jaal a tɔɔ dakha na ha tɩɩ a ma Kɔ̃tɩnna. 24Gɩdonɩ tibil bʋɔ a do a hinə Thu Phuu na ha pɛrɛ, dɩ tibil jɔjʋɔ kɔɔ pɔr Kɔ̃tɩnna.
25Sɩ agɩpɩ Barnabasɩ kɔɔ gbaar jal Tarsɩ a ƴaal Sɔl; 26ɔbɔɔkɛ a yɩɩnɩ, a kpaarɛ dɩ wɩ jal Ãtɩyɔsɩ. Dɩ le wɩ too nakha we gbɛbɩdara dɩ wa‐n dɩɩr tɩbɩla bərəəm a cʋʋna yɛ bɩɛl biləni; Ãtɩyɔsɩ dɔ caca bɔɔkɛ wɩ kɔɔ hanɩ kpãkpãadara ire Kirisitii too.
27Ga bɔɔlera Thãgba tukɩr tidara kɔɔ ther Jerujalɛm a jal Ãtɩyɔsɩ. 28Dɩ bɩɛl wɛrraakɛ wɩ‐n wenɩ Agabusi ɩɩrɛ dɩ Thu Phuu kɔɔ cʋgʋʋ dɩ so ayɩ: Kɔmɛ kɔ̃tɩ̃ɩ na jire thɩɩra fɛʋ. Dɩ gɩ kɔɔ daan bɔɔkɛ Kʋloodɩ kɔɔ dɔnɩ fãgadaar kɔ̃tɩ̃ɩ. 29Dɩ kpãkpãadara kɔɔ gʋʋrɛ kha, sa thɔna thɩ̃ɛ mɔ̃ wɛr bɩɛlbɩɛlɩ puno hanɩ a bulnə omɩnaakɛ hanɩ Jude. 30Dɩ mɛna wɩ kɔɔ gʋʋr sa thɔna Barnabasɩ na Sɔl we gbɛbɩdaraa kɔ̃tɩ̃sɔra.
Currently Selected:
Thãgbaa Thɔ̃thɔnaa Thɔ̃ 11: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
