Korɛ̃tɩdara 5
5
1Gɩdonɩ sɩ jɩrɛ dɩɩ do ado asɩ tomɩ kɛ thɩɩra, kɛ dɔnɩ waa wɩɛl, sɩ hananɛ le Thãgbaa dʋɔ cʋɔrɩkɛ dɔnɩ Thãgbaa nyɛ̃ thɔ̃, khorr too paar gɩ, ga do tibil nyɛ̃ɛ maˈ. 2Sɩ dakha sɩ‐n thʋnɛ sa‐n ˈwɩɩ waʋʋkɛra ka, dɩ sa‐n gbɛ̃gbɛrɛ̃ sɩ mʋa asɩ Thãgbaa dɩ cɔra, 3gɩdonɩ a sɩ ˈli mʋʋrɛ pɩ, wa yɩ sɩ gɩ do sɩ ˈleere tomɩraˈ. 4Gɩdonɩ sɛrkɛ hanɩ wa ʋrɛraakɛ, sɩ‐n ˈwɩɩrɛ sɩ gbɛ̃gbɛlnɩ, dɩ sɩ‐n ƴaalɛ ga do dɩ sa for thɩɩkɛɛ tomɩ na fa ga, sɩ dɩ sa to ƴũ tomɩr, dɩ mɛ̃ ga dor yire gbaan gɩrɛ dɔnɩ dakhinəne a dɩɩ. 5Dɩ ʋrɛɛkɛ cʋɛ sɩnɩ a pɛ gelelala, Thãgba gɩ, kɛ kɔɔ hana sɩnɩ Thu Phuu dɩ do barã paar gɩrɛraakɛ sa ˈlɛnɩ.
6Gɛr gɩ wire fɛʋ sɩ‐n hananɛ tu jɩɩr, dɩ sɩ jɩrɛ mɔ̃ sɩ‐n cɔnɩ tomɩrraakɛ, sɩ toore a hʋnɔna Kɔ̃tɩn. 7Gɩdonɩ ha pɛrɛra sɩ‐n ɩɩr, ga do yi yɩrra ga. 8Gɛr gɩ tu jɩɩrɩkɛra sɩ hananɩ, ƴaal kɔ̃tɩ̃ɩ dʋɔn, sɩ faa tomɩrɩkɛ sɩ hananɩ sa jala a tɔɔna Kɔ̃tɩn. 9Gɛrra dɔ nɔɔ dakha dɩ sa‐n do bʋɔ, sɩ sɩ daaraa haar, ado sɩ‐n toore kɛ tomɩrraakɛ, a sɩ‐n fagʋʋrɛ. 10Gɩdonɩ dɔ sɛrɛ fɛʋ n jal sɩ jɩɩl Kirisitii kɩɩl too pa ƴɛ thɩ̃thɩɩn, wɩ nɩrɔ mɔ̃ sɩ hanɩ, dɩ mɛ̃ fɛʋ bɩɛlbɩɛl na ˈlɛ thɩ̃ɛ dɩ a ha mɔ̃ ntɛɛ bɔ cʋʋ, na ntɛɛ puu cʋʋ hanɩ, a hanɩkɛ tomɩrra.#Rɔm 14:10
Gɩrɛ dɔnɩ ha pɛda bʋɔɔ thɔ̃
11Dɩ sɩ jɩnɩ gɩrɛ n dɔnɩ sɩ ma Kɔ̃tɩn, sɩ‐n ƴaalɛ sa‐n yɩrana tɩbɩla, Thãgba jɩ sɛr casɩ mɔ̃kɛ sɩ hanɩ, dɩ mɩ pɛrɛ haar anɩ kpɩɛrnɔra nɩ jɩ sɛr dakha mɔ̃kɛ sɩ hanɩ. 12Sa bir ma sa‐n nɩna asɩbara nɛrɛra dɩ tɩɩ teena sɩ doaˈ, sɩ hʋɛ sɩ ha nɩ dɩ na məbi asɩdara, dɩ na puno na birse wɩrɛɛkɛ n məbəni gɩrɛraakɛ dɔnɩ yi yɩdaa, sɩ ga‐n do hadaa ga. 13Gɩdonɩ a sɩ də̃bəəl Thãgbaada dɔ nɔɔ, sɩ ado sɩ jɩrɛ fɩlɛ nɛr dɔ nɔɔ. 14Gɩdonɩ Kirisitii naʋ n tɔ sɩ, gɩdonɩ sɩ jɩɛ jɩ dɩ ado bɩɛl kɔɔ khire tɩbɩlala fɛʋ, ga dor dɩ tɩbɩla fɛʋ khiire. 15Dɩ ɔr kɔɔ khe tɩbɩlala fɛʋ, dɩ mɛ̃ wɩrɛɛkɛ n hananɩ yire, wa hana yire wa‐n nana dɩbara ga, sɩ gɩ dɔ ʋrɛ kɔɔ khe warnɩ sa ɩɩr a the khireraada. 16Mɛ̃ gɩ, a fʋna nɛnɛ̃ dɩphã, sa‐n hɩɩn tibil mɔ̃kɛ tɩbɩla thɩɩra n hɩɩnnaˈ. Dɩ adorakɛ thalee hɩɩn sɩ kɔɔ jɩna Kirisiti, sɩ ga do mɛ̃ sɩ jɩɩ gɩrɛ bã. 17Ado tibil ha Kirisitira tibil phaa a‐n do, thɩ̃ tɩna phor ka, hɩnɛ thɩ̃ɛ fɛʋ n debire dɩɩ do daphaa. 18Dɩ gele fɛʋ Thãgbara gɩ the, kɛ cʋɛ sɩnɩ dɩ sɩ bir kũu kha na ɔr dɩɩ the Kirisitira, dɩ ha sɩ bir kũu kha thɔma. 19Gɩdonɩ Thãgba kɔɔ haan Kirisitira a cʋʋ tɩbɩla dɩ wɩ bir kũu kha na ɔr Thãgba, aa therna tɩbɩlaa dɩ pa ga, wo a pɛ sarɛ sa‐n mɩa bir kũu kha thɩmɩɩr. 20Sɛr dʋɔn Kirisitii dedeesɔɔkɛ Kirisitira thɔnɩ, dɩɩ ho sɛr Thãgba n gba da‐n kpãkpaana dɩ yɩ: Sɩ‐n phʋʋr nɛr Kirisitii irə, nɩ birə kuune kha na Thãgba. 21Kirisitiikɛ na kɔɔ jɛnɩ sopugoəˈ, ɔr a cʋʋ dɩ debi do sopugo dɩɩ do sɛr dɔ nɔɔ, dɩ mɛ̃ sɩ debi do fɩl sarʋ Thãgbara, dɩ Kirisitira gɩ the.
Currently Selected:
Korɛ̃tɩdara 5: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
