Korɛ̃tɩdara 4
4
1Gɛr dɔ kɩrʋ mɔ̃kɛ sɩ hananɩ thɔ̃ ca ƴɩrɛ, mɔ̃kɛ bɔ jɩɩrɩkɛ sɩ ˈlɛnɩ hanɩ, nyɛ̃ɛ na‐n khiir saˈ. 2Sɩ‐n bor yicur thɩ̃ɛ fɛʋʋkɛ n cʋɛnɩ wolonena, dɩ sa‐n ɩɩrna fɩɩlaˈ, dɩ sa‐n golõ dakha Thãgbaa thɩmɩaˈ, sɩ sobɔ sorra casɩ sɩ‐n nɩnana Thãgbaa ƴɛra, tibil caar fɛʋʋ kpɩɛrra, dɩ tibil teena sɩ do. 3Sɩ adorakɛ asɩ tutugo bɔ thɩmɩɩ bo ker, wɩrɛraakɛ n buureni gɩ ker, 4kɛ dɔnɩ ha pɛ ˈleedara, kɛ nɛnɛ̃ bɔɔkɛɛ thãgba yaarnɩ awɩ kpɩɛr, wa‐n puno a yɩ tutugo bʋɔɔ dahɩraˈ, kɛ dɔnɩ tutugo bʋɔɔkɛ n nɛnanɩ Kirisitii i dʋbɩ, kɛ dɔnɩ ʋrɛ n kureni kha na Thãgba. 5Ga do asɩbara sɩ gba sa‐n mɩɩ mɔ̃ sɩ hanaˈ, Jeju Kirisitii Kɔ̃tɩ̃ do sɩ‐n mɩɩ, na mɔ̃ sɩ donɩ anɩ thɔ̃ dodaarsɔ dɩɩ do Jeju dɔ nɔɔ. 6Gɩdonɩ Thãgbaakɛ sɔnɩ ayɩ, dahɩrɛ n caranɛ dabirəə thɩ̃thɩɩn, ɔr cʋɛ dahɩrɛ dɩɩ carã asɩ hara, gɩ cʋɛ tibil a jɩ Thãgbaa i dʋbɩɩkɛ Kirisiti n nɩnanɩ.#Jən 1:3
Thãgbaa dahɩrɛɛkɛra a pɛrnɩ asɩ hara dʋɔn tɩɩ ko thɩ̃ɛ ja daara
7Sɩ hananɛ ga tɩɩ ko thɩ̃ɩkɛ daaraakɛ dɔnɩ ja daa, dɩ mɛ̃ fãgaakɛ na hanɩ mɩɛrɛra ga, ga dor Thãgba hɩna, ga do asɩ pa gɩ thaˈ. 8Nɩwɛ fɛʋra sa‐n yɩ fɛfɛɛ paaraˈ, sɩ sa ha tiirrə na təˈ. Kpɩɛrɛ nyanyãa sɛr ka, sɩ sa‐n faa nũ pɛraˈ. 9Wɩ‐n kpoo sarɛ sɩ Thãgba na bo saˈ. Wɩ‐n thʋna sɛr thɩɩ, sɩ sa wɩɛlaˈ. 10Wire fɛʋ paar fɛʋ, asɩ tomɩ n khi Jejuu khi, dɩ mɛ̃ dakha Jejuu yi na yɩr asɩ tomɩra. 11Gɩdonɩ sɛrkɛ hananɩ yire, bɔɔ fɛʋra wɩ‐n to sɩ khirrə dɩɩ do Jejuuda dɔ nɔɔ, dɩ mɛ̃ Jejuu yi na yɩr asɩ tomɩraakɛra dɔnɩ dakhinəne. 12Mɛ̃ gɩ, khir n dʋɔn thɔma sɛrɛra, sɩ yire n puno a na‐n do thɔma nɛrɛra.
13Ha pɛ ca bɩɛlla sɩ hana mɔ̃kɛ gɩrɛ kheranɩ Thãgbaa sɛbɛra sonɩ ayɩ: “Haar mɩ kɔɔ pɛr, gɛr gɩ dɩ ɩ̃ kɔɔ mɩɩ”, sɛrɛ dakha haan sɩ pɛr gɛr gɩ dɩ sa‐n mɩɩ.#Khɩ 116:10 14Gɩdonɩ sɩ jɩrɛ dɩ ʋrɛɛkɛ kɔɔ ɩrɛnɩ Jeju Kɔ̃tɩn khirera, a na ɩɩr sɛr dakha na Jejura, a kpa sɩ sɩ jɩɩl kha na nɛrɛ ɔɔ ƴɛra. 15Gɩdonɩ gelela fɛʋ nɛr dɔ kɩrʋ dɩ a‐n ha, dɩ mɛ̃ bɔ jɩɩr na‐n dɛbɩrɔ gɩ cʋʋ Thãgba khɩɩrɛ jɔɔ n hale tibil jɔjʋɔra, Thãgbaa i na‐n dʋbɩrɔ.
Mɔ̃ sɩ‐n ɩɩrnɩ na ha pɛrɛ
16Gɛr dɔ kɩrʋ nyɛ̃ɛ na‐n khiir saˈ, gɩdonɩ adorakɛ asɩ tomɩɩkɛ na kʋɛrɛ, sɩ asɩ tibil ʋrɛ hanɩ bɩnɔ, kɛ na dɔnɩ dayɩnanaˈ, n debire dɩ do daphaa da‐n pɛr wire fɛʋ. 17Gɩdonɩ asɩ nɩ jaba jabaakɛ sɩ‐n yɩnɩ nɛnɛ̃ bɔɔkɛ gbe, har dɩ a‐n ɩna sar i dʋbɩrɛɛkɛ dɔnɩ khorrdaa. 18Gɩdonɩ ga do gɩrɛ tibil n yɩnɩ na yire ser n hɩɩnaˈ, sɩ gɩrɛ tibil na punoni na yɩ na yirəˈ sɩ‐n hɩɩn. Gɩdonɩ gɩrɛ tibil n yɩnɩ na yire dakananɛ gɩ, sɩ gɩrɛ tibil na punoni na yɩ na yirəˈ khorrdaa gɩ do.
Currently Selected:
Korɛ̃tɩdara 4: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
