Korɛ̃tɩdara 1
1
Fʋɔrɛ na Thãgba khɩɩrɛ
1Mɛr Polɩkɛ dɔnɩ Jeju Kirisitii thɔ̃thɔn mɔ̃ Thãgba tuni, na Timotheekɛ dɔnɩ omine, thɔna sɛbɛɛkɛ a ha Thãgbaa we gbɛbɩdaraakɛ hanɩ Korɛ̃tɩ na tɩɩ phuusɔ fɛʋʋkɛ hanɩ paar fɛʋ Akaɩra.#Th t t 18:1 2Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ a jɛ nɩ dakha bʋɔra.
3Thãgba asɩ Kɔ̃tɩ̃ Jeju Kirisitii Thɩ hɩna fʋɔrɛ, Thɩrɛ gɩ kɛ bʋɔ n fʋnɩ, a dor dakha Thãgbaakɛ ha faarɛ fɛʋ n thernɩ. 4Ɔr n cʋɛ sɩ dɩ sa‐n faa haar asɩ nɩra fɛʋ, dɩ mɛ̃ ha faarɛɛkɛra sɛrɛɛ thɛthɛ n ˈlɛnɩ Thãgbaa pa, sa punone ɔmɛ̃ a na cʋʋ wɩrɛ n yɛnɩ nɩ caar wo nɩ caar dɩɩdɩɩ, dɩ wa faa haar. 5Gɩdonɩ mɔ̃kɛ sɩ‐n ˈlɛnɩ Kirisitii gaar jɔɔ, mɛ̃ dakha sɩ‐n ˈlɛ ha faarɛ jɔɔ dɩ a‐n the Kirisitirara. 6Ado sɩ‐n yɩrɛ nɩwɛ hananana, anɩ ha faa na anɩ taa ˈlɛ dɔ kɩrʋ; dɩ ado sɩ ˈlɛ ha faarɛ, anɩ ha faa dɔ kɩrʋ, kɛ na ba cʋɛ nɩnɩ dɩ na fʋ haar bɔ gaar ca bɩɛllaakɛra sɩ‐n yɩnɩ dakha ser. 7Dɩ asɩ nũ pɛ nɛrɛra na ha baal paaraˈ, gɩdonɩ sɩ jɩrɛ dɩ mɔ̃kɛ nɩ bulni kha na sɛrɛ bɔ gaarɛ, mɛ̃ na bul kha na sɛrɛ ha faarɛ.
8Omɩna, sa‐n ƴaal na‐n jɩ mɔ̃kɛ gɩrɛ hanaa ga: Nɩwɛ kɔɔ dã sɛr Ajɩra waa, dɩ sɩ kɔɔ gbɛ̃gbɛl dɩɩ thʋ̃ kãasɩ asɩ fãgara, sa thʋ̃ jɩrakɛ sa hananɛ yire bã.#1 Kor 15:32 9Sɩ kɛrakɛ asɩ bɩnɔ ser yɩ khikhi togʋʋ sɩ too, dɩ mɛ̃ sa pɛ asɩbara haar mɔ̃kɛ sɩ donɩ thɩ̃aˈ, sɩ sɩ pɩɛr Thãgba haar, ʋrɛɛkɛ n cʋɛnɩ khe dɩ wɩ ɩɩr a the khirera. 10Ɔr gɩɩkɛ kɔɔ taa sɩnɩ, dɩ ɔrra na taa sɩ khi puurəəkɛ; ɔrra sɩ hananɔ nũ pɛrɛ dɩ a na taa sɛr wo. 11Nɛrɛ dakha n bulo si na Thãgba bɩɛlɛ, dɩ bɔ jɩɩrɩkɛra sɩ‐n ˈlɛnɩ tibil jɔjʋɔɔ Thãgba bɩɛllala na dor nɔɔ, dɩ tibil jɔjʋɔ na khɩɩ Thãgba asɩdara.
Gɩrɛ dɔnɩ nɔɔ dɩ Pol ƴaal hʋ kpɩɩ mɔ̃ a na jalnɩ Korɛ̃tɩ
12Gɩdonɩ asɩ məbida dʋɔn sobɔ so jɩ thɩmɩɩrɩkɛ asɩ kpɩɛrnɔ n ha sɩnɩ, dɩ sa‐n ɩɩrna tɩbɩla fɛʋʋ thɩ̃thɩɩn na phur na fɩlɛɛkɛ hanɩ wasɩ, kɛ thɛnɩ Thãgbara, sɩ anɩ thɩ̃thɩɩn jɔ; sɩ ga do tibil kpɛsɛrɛra gɩ thaˈ, sɩ Thãgbaa bɔ jɩra gɩ‐n the. 13Sa khere nar dɩkha kpɩɩ, sɩ ga do gɩrɛ nɩ‐n yɩnɩ sɛbɛra na gɩrɛɛkɛ na jɩnɩ kɩrʋ gaaga. Nɩ kɔɔ jɩrɛ asɩda gbe, dɩ mɩ pɛrɛ haar na jɩrɛ tue bɔɔbɔɔ na dana khu paar, 14dɩ Jeju Kɔ̃tɩnɩ wirə sɛr na dɔ nar məbidaa mɔ̃kɛ na do sarnɩ məbidaa.
15Ga tu jɩɩlera dɔ nɔɔ dɩ ɩ̃ kɔɔ ƴaalla gɩ do anɩ pa mɩ kɔɔ pɔ ɓo, dɩ mɛ̃ na ˈlɛ balanyɔ kãkar, 16sɩ ɩ̃ the anɩ pa ɩ̃ jal Masedʋan, sɩ ɩ̃ bir ɩ̃ the Masedʋan wo ɩ̃ pɔ anɩ pa, nɩ thɔɔ mɩ dɩphã ma‐n jal Jude.#Th t t 19:21 17Dɩ mɔ̃ mɩ‐n ƴaalnɩ thalera, khʋma khʋma tibil ha maa bɛ? Agɩbo gɩ ho mɔ̃ tibili tibil do pa hanɩ ɩ̃ ƴaal n jal, gɩ ho “ɔɔ” na “ooho” har ɩ̃ pa ya? 18Mɔ̃kɛ Thãgba donɩ sobɔdaar, mɛ̃ thɩmɩɩrɩkɛ sɩ kɔɔ mɩɩ nɩnɩ na kɔɔ do “ɔɔ” na “oohoaˈ.” 19Gɩdonɩ Thãgbaa Bikuun Jeju Kirisitiikɛ mɛrɛ na Sɩlvɛ̃ na Timothe kɔɔ mɩɩnɩ ɔɔda anɩ thɩ̃thɩɩn, na kɔɔ do “ɔɔ” dɩ “ooho” ga, ɔrra wer “ɔɔ” haar gɩ dɩbara.#Th t t 18:5 20Gɩdonɩ Thãgbaa ʋlfɛsɔ fɛʋ “ɔɔ” gɩ do ɔrra. Dɩ gɛr gɩ, ɔr dɔ ʋrɛ sɩ‐n gbanɩ dɩ sa‐n sona “amɛn” Thãgbaa i na‐n dʋbɩrɔ. 21Ʋrɛɛkɛ n cʋɛ sɩnɩ nakha nɛrɛ dɩ sɩ tɩ Kirisitira, kɛ kɔɔ phire sini dakha, Thãgba gɩ. 22A pɛ sarɛ dakha ɔɔ jẽ, a pɛ asɩ hara Thu Phuu dɩ do barã paar gɩrɛraakɛ sa ˈlɛnɩ.
23Mɔ̃ ga fʋnɩ sɩɩ do gɩ bul ner dɔ nɔɔ ma kɔɔ birni pɔ Korɛ̃tɩ dɩɩra ga, dɩ Thãgba to garɛ yire dɩ sobɔr mɩ so. 24Sɩ ga nɩna fãga sɩ‐n ƴaal sɩ cʋʋ nar ha pɛdaara ga, sɩ sɩ‐n ƴaalɛ sɩ bul kha anɩ da hanana, gɩdonɩ nɩ tɩrɛ ha pɛrɛra.
Currently Selected:
Korɛ̃tɩdara 1: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
