1 Korɛ̃tɩdara 9
9
Thɔ̃thɔnɩ hʋ hana
1Ma hana hʋɛ na cʋʋ mɔ̃ mɩ pɛrnɩ haaraa? Ga do thɔ̃thɔn ha maa? Ma kɔɔ yɩ Jeju asɩ Kɔ̃tãa? Ga do nɛr dɔ ɩ̃ nyɛ̃kɩɛr thɔ̃ Kɔ̃tɩnna gaa? 2Ado ma do thɔ̃thɔn ɩkhasɔra ga, sɩ ne wer mɩ thʋnɛ do nar thɔ̃thɔn, gɩdonɩ nɛr dɔ jɩɩnɩkɛ n nɛnanɩ dɩ thɔ̃thɔn ha mɩ, gɩrɛraakɛ nɩ donɩ Kɔ̃tɩnɩda. 3Gɛr dɔ ɩ̃ birseekɛ mɩ‐n birseni wɛkɛ n pɛ marnɩ sor. 4Sa hana hʋɛ sɩ kho sa‐n yɔna gaa? 5Sa hana hʋɛ na kpa ha pɛdaarɩkɛ dɔnɩ asɩ khɛr sa‐n kpaarna, mɔ̃kɛ wɩ̃ thɔ̃thɔna n cʋʋnɩ, na mɔ̃kɛ Kɔ̃tɩnɩ õkuunsɔ na Sefasɩ n cʋʋnaa? 6Dɩ agɩbo mɛrra dɩbara na Barnabasɩ, ser na hana hʋɛ na ba faa asɩ nyɛ̃kɩɛr thɔ̃ dora gaa yaa? 7Amɛ na gbaan ɔɔ thɛthɛɛ war a na‐n lɩmɩ dɩbara sɩ a na‐n cʋʋ sɔrasɩ? Amɛ na kʋlɛ lɩɛ sa a na kho ga thã? Amɛ na‐n khɛ nʋma sɩ ga do nʋmaa ilẽ n haanɛa?
8Gɩrɛ mɩ sonɩ, tibil kpɩɛrɛ gɩ dɩbara ya? Ga do thalera jɔfʋ soaa? 9Mee gɩ kherere Mʋɩjɩɩ jɔfʋra ayɩ: “Nakɩɩrɩkɛ na‐n sanɩ jɔ, fa‐n lii nʋɔaˈ.” Nakena Thãgba n kpɩɛrna dɩbara ya?#Dət 25:4; 1 Tim 5:18 10Agɩbo, ga do sɛr dɔ nɔɔ dɩɩ mɩɩrɔ thalaa yaa? Ɔɔ, sɛr dɔ nɔɔ dɩɩ kherero ayɩ: Ʋrɛɛkɛ n kʋlɛnɩ a teenanɛ a na‐n kʋlɛ na nũ pɛrɛ, dɩ ʋrɛ na‐n thɔnɩ jɔ, a na‐n thɔ na nũ pɛrɛ mɔ̃ a na yɩrɔnɩ ɔɔda. 11Ado sɩ kɔɔ diire anɩ thɩ̃thɩɩn thɩ̃ɛɛkɛ dɔnɩ thudaa, ga dor thɩ̃ kʋkʋʋ ado sa ˈlɛ nar nɛnɛ̃ bɔɔkɛɛ thɩ̃sɔa bɛ?#Rɔm 15:27 12Ado ʋkhasɔ hananɛ hʋɛ a na ˈlɛ nar thɩ̃ɛ, ga do sɛr ka teena gaa? Sɩ sa kɔɔ cʋʋ mɔ̃kɛra sɩ hananɩ hʋɛaˈ, sɩ sɩ‐n fʋrɛ haar thɩ̃ɛ fɛʋra, dɩ mɛ̃ sa var Kirisitii tutugo bʋɔɔ thɩmɩɩ ga‐n kpaaraa ga.
13Na jɩ dɩɩ do wɩrɛɛkɛ n dɔnɩ Thãgba fʋɔr cɔ thɔma, thɩ̃ɛɛkɛ n thɛnɩ Thãgba fʋɔr cʋɔrɔ wɩ‐n khoaa? Na wɩrɛ n jenɩ bonɩɛ, bonɩ ji thɩɛna n haanɛ waa?#Dət 18:1 14Dɩ mɛna Kɔ̃tɩn kɔɔ pɛr oti, dɩ wɩrɛ n mɩanɩ tutugo bʋɔɔ thɩmɩɩ, tutugo bʋɔ na‐n haanɛ wɩ.#Mat 10:10; Lu 10:7
15Sɩ mɛrɛ ma kɔɔ cʋʋrakɛ dɩɩ ho mɩ hananɛ ga hʋʋlaˈ. Sɩ ma khere nar gɩrɛ nɩ cʋɛ ɔmɛ̃ mɛrɛra gaa koe, gɩdonɩ khir ka ba marɛ gɩrɛɛkɛ tibil na cʋʋnɩ dɩ a tɔ̃ mɩ ga məbiile. 16Gɩdonɩ ado ma mɩɩ tutugo bʋɔɔ thɩmɩɩ, ga do mar məbidaa ga; gɩdonɩ thɩ̃ɛ gɩɩkɛ teananɩ ɩ̃ cʋɛ phubi, dɩ ga puu marɛ ado ma‐n mɩɩ tutugo bʋɔɔ thɩmɩaˈ. 17Sɩ ado ɩ̃ ƴaalla gɩ the, ma ˈlɛr lɩmɩnɛ; sɩ ado ga the ɩ̃ ƴaalla ga, thɔma gɩ a heen mɩ. 18Dɩ anye dɔrakɛ ɩ̃ lɩmɩ tɔr? Gɛr dɔ mɔ̃ mɩ‐n mɩɩnɩ tutugo bʋɔɔ thɩmɩɩ, ɩ̃ mɩa gɩ na ˈlaanɛ khaar, sɩ ma‐n bo na kpãkpãa hʋ hananɛnaakɛ tutugo bʋɔɔ thɩmɩɩ na ha mɩnaˈ.
19Waʋ mɩ do tɩbɩla fɛʋra wer, sɩ mɩ debire do tɩbɩla fɛʋʋ dee dɩ mɛ̃ ma ˈlɛ wɩ waa ˈlɛ paar. 20A mɩ hana Juifisɔ, mɩ‐n debire dɩ ɩ̃ ho Juifi, dɩ mɛ̃ ma ˈlɛ Juifisɔ. A mɩ hana wɩrɛ hanɩ jɔfʋra, mɩ‐n debire dɩ ɩ̃ ho jɔfʋ hɩ̃hɩn, sɩrakɛ ga do jɔfʋra mɩ ha ga, dɩ mɛ̃ ma ˈlɛ wɩrɛ hanɩ jɔfʋra. 21A mɩ hana jɔfʋ ˈleedara, mɩ‐n debire dɩ ɩ̃ ho ma hana jɔfʋaˈ, sɩrakɛ ga do mɩ faarɛ Thãgbaa jɔfʋaˈ, sɩ Kirisitii jɔfʋ biro mɩ ha, dɩ mɛ̃ ma ˈlɛ wɩrɛɛkɛ na hananɩ jɔfʋaˈ. 22A mɩ hana yɔyɔa, mɩ‐n debire dɩ ɩ̃ ho mɩ yɔɔrɛ, dɩ mɛ̃ ma ˈlɛ yɔyɔa; mɩ‐n debire dɩ ɩ̃ do thɩ̃ɛ fɛʋ tɩbɩlala fɛʋ, dɩ mɛ̃ ado gɩ ha mɔnakɛ, ma thʋnɛ na taa ɩkhasɔ. 23Tutugo bʋɔɔ thɩmɩɩ dɔ nɔɔ dɩ ma‐n cʋʋrɔ thɩɛna fɛʋ, dɩ mɛ̃ ma ˈlɛrɔ dakha ɩ̃da mer.
Kɔlɔ̃kɔɔ caar na nɔɔrɛ
24Na jɩ dɩɩ do wɩrɛ n caannɩ kɔlɔ̃kɔɔ ca paar, fɛʋ n caan, sɩ tɩɩ bɩɛl dɩbara n ˈlɛ khoraa? Mɛ̃ gɩ, na‐n ca ga ˈlɛˈlɛ ca. 25Tibil wo tibilikɛ dɔnɩ nɔnɔɔ, a‐n fʋrɛ dɩbara thɩ̃ɛ fɛʋra; sɩ wɛr wɩ‐n cʋʋrɛ wɩ ˈlɛ khor cacadaar dʋʋrra sɩɩ dorakɛ dakʋɛnaa gɩ, sɩ se wer, khorɩkɛ na dɔnɩ dakʋɛnaa ga sa ˈlɛ. 26Gɛr gɩ me wer mɩ‐n car, sɩ ga do baba ga, mɩ‐n thʋrɛ, sɩ ga do pɔɩ mɩ‐n jaˈ; 27sɩ ɩ̃ tomɩ mɩ‐n ka ma‐n ʋʋnnɔ, ma‐n cʋgʋʋ a jo, saagado mɛ̃ ga, ma mɩɩrɛ Thãgbaa thɩmɩɩ tɩbɩlala wer ker na pɩ, sɩɩ do me wer wɩ bo mer faa.
Currently Selected:
1 Korɛ̃tɩdara 9: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
