1 Korɛ̃tɩdara 10
10
Thɩ̃ nɩrɔrɛ Ɩjɩrayɛldaraa thɩmɩɩra
1Omɩna, mɩ‐n ƴaalɛ na‐n dədinə ga, asɩ mama thɩ kɔ̃tɩ̃sɔ fɛʋ kɔɔ hale ndɔlɔ̃paarra, dɩ wɛr fɛʋ kɔɔ kpãsɛrɛ lanyʋɔnna;#Thɩɩ 13:21–22; 14:22–29 2dɩ wɛr fɛʋ kɔɔ ˈlɛr yɔ kpɛɛrɛ ndɔlɔ̃paarra na lanyʋɔnna dɩɩ do awɩ ˈli khara na Mʋɩjɩ gɩ the; 3dɩ wɛr fɛʋ kɔɔ khor dɩko ca bɩɛlɩkɛ dɔnɩ thudaa,#Thɩɩ 16:35 4dɩ wɛr fɛʋ kɔɔ yɔr thɩ̃ yɔna ca bɩɛlɩkɛ dɔnɩ thudaa. Gɩdonɩ wɩ‐n kɔɔ yɔr gɩrɛ thɛnɩ thu boka kɔ̃tɩɩnaakɛ n kɔɔ kpaan warnɩ, dɩ bokaarɩlera Kirisiti gɩ.#Thɩɩ 17:6; Ther 20:11 5Sɩ tɩbɩla bərəəm wɛrra na kɔɔ da Thãgba haarra ga, gɩdonɩ wɩ kɔɔ thiire le bəənnə.#Ther 14:29–30
6Dɩ ga thɩ̃sɔɔle daan gɩ do sar thɩ̃ nɩrɔrɛ, dɩ mɛ̃ sa‐n do thɩ̃ puu ƴaal thue na‐n fʋ sɩ awɩ kha ga.#Ther 11:4 7Na‐n debi do thɩl jidara, mɔ̃kɛ ɩkhasɔ wɛrra kɔɔ hanaˈ, mɔ̃kɛ gɩ kherenɩ Thãgbaa sɛbɛra ayɩ: “Tɩbɩlaale kɔɔ toore wɩ kho wa‐n yɔna, sɩ agɩpɩ wɩ ɩɩr wa‐n sa bɩna.”#Thɩɩ 32:6 8Sa‐n do dakha bɔdɛl cʋʋdara mɔ̃kɛ ɩkhasɔ wɛrra kɔɔ cʋʋnaˈ, dɩ mɛ̃ tɩbɩla gbɩlanɩ kpelẽ yẽther kɔɔ ji khiir wi bɩɛlla.#Ther 25:1–18 9Sa‐n fifilə dakha Kɔ̃tɩn a na hɩɩn, mɔ̃kɛ ɩkhasɔ wɛrra kɔɔ cʋʋnɩ dɩ siisɔ kɔɔ kʋʋr waˈ.#Ther 21:5–6 10Na‐n hũhuun dakha mɔ̃kɛ ɩkhasɔ wɛrra n kɔɔ hũhuunni, dɩ gbõgolõdaar kɔɔ kʋʋr waˈ.#Ther 16:41–49 11Ga thɩ̃sɔɔkɛ kɔɔ dã wɛr gɩ nɩ sar thɩ̃ɛ, dɩ wɩ khere ger ga‐n dɩɩr sɩ fɩlɛ, sɛrɛɛkɛ dananɩ nɛnɛ̃ pɩpɩɩ bɔɔkɛ. 12Gɛr gɩ dɔ ʋrɛɛkɛ n pɩɛrnɩ haar ɩnɩ jɩɛ jɩɩl, n jɩɩ hɩɩn, a na‐n jəə koe.
13Fifiləle na‐n dã nɩ saagado gɩrɛ tibil n yɩnaa ga; sɩ Thãgbaakɛ dɔnɩ sobɔdaar a na tu dɩ na yɩ bɩ̃ ber gɩ jɔ anɩ fãgara ga, sɩ fifiləlela a na gbɛbɩrɛ the paar dɩ mɛ̃ na puno na fʋ gar dɩbara.
Gɩrɛ bonɩ ji nʋʋn hananɩ
14Gɛr gɩ nɛrɛɛkɛ mɩ‐n nanɩ, a nɩ jɩ nɩ fuo hʋnɔnɛ na thɩl jir. 15Mɩ mɩɩna nɛr mɔ̃kɛ nɩ donɩ tɩɩ kpɛsɛsɔ; nɛrɛɛ thɛthɛ n jʋrɛ gɩrɛra mɩ‐n sonɩ na hɩnɛ. 16Bɔ̃bɔna thɩ̃ yɔnanɛɛkɛ sɩ‐n gbanɩ dɩ sa‐n khɩɩna Thãgba, ga do Kirisitira sɩ bulnə kha ɔɔ tɔmãa? Dɩ buruukɛ sɩ‐n kuurni, ga do Kirisitira sɩ bulnə kha ɔɔ tomaa?#Mat 26:26–28; Mar 14:22–24; Lu 22:19–20 17Dɩ gɩdonɩ buru bɩɛl gɩ‐n do, sɛrɛɛkɛ jʋɔnɔnɩ tomɩ bɩɛl sɩ do, gɩdonɩ buru bɩɛlla sɩ‐n bul kha fɛʋ kho. 18Nɩ hɩnɛ wɩrɛ dɔnɩ Ɩjɩrayɛldara tibil yinəna: Wɩrɛ n khɔnɩ bonɩ ji thɩ̃ɛ, ga do Thãgbara wɩ bulnə kha mɔ̃ wa‐n jiirəəni bonɩɛɛle bonɩ ji paaraa?#Lev 7:6 19Dɩ anyera mɩ‐n so thakɛra? A thɩɛna gaa, bonɩ ji nʋʋn dɔ thɩ̃ɛ wɛ? Dɩ agɩbo thɩl dɔ thɩ̃ɛ wɛ? Kpei. 20Sɩ gɩrɛ wɩ‐n jinəni bonɩɛ, kɔ̃tɛɛbiisɔra wɩ‐n ji, ga do Thãgbara ga, dɩ ma‐n ƴaal nɩ bulo kha na kɔ̃tɛɛbiisɔaˈ.#Dət 32:17 21Na puno na‐n yɔ Kɔ̃tɩnɩ thɩ̃ yɔna, nɩ bir na‐n yɔna kɔ̃tɛɛbiisɔɔ thɩ̃ yɔna ga; na puno na bul kha na‐n kho Kɔ̃tɩnɩ dɩko, sɩ nɩ bir na‐n khona kɔ̃tɛɛbiisɔɔ dɩkoaˈ. 22Gbugi sɩ‐n cʋʋ gɩ fɔ Kɔ̃tɩn yaa? Dɩ sɛr ba hana fãga a jʋɔ yaa?#Dət 32:21
Thɩ̃ cʋʋrɛ fɛʋ Kɔ̃tɩnɩ i dʋbɩra
23Hʋɛ hale thɩ̃ɛ fɛʋʋ cʋʋra, sɩ ga do thɩ̃ɛ fɛʋ bʋɔnɔaˈ. Hʋɛ hale thɩ̃ɛ fɛʋʋ cʋʋra, sɩ ga do thɩ̃ɛ fɛʋ n cʋɛ tibil dɩ khɔ̃ da‐n pɛraˈ.#1 Kor 6:12 24Tibil na‐n ƴaal thɩ̃ɛ na‐n bɔ ɩnɛr bɩɛlla dɩbara ga, sɩ tɩbɩla fɛʋ bɩɛlbɩɛl n ka na ƴaalɛ gɩrɛ na bɔnɩ ʋkhara. 25Nʋʋn wo nʋʋnɩkɛ wɩ‐n dolonɩ ƴaa na‐n khɔ, sɩ na‐n bule thɩ̃ɛ a gba kpɩɛrnɔaˈ; 26gɩdonɩ gɩ kherere Thãgbaa sɛbɛra ayɩ: “Thɩɩ na thɩ̃ɛ fɛʋʋkɛ harɔnɩ, Kɔ̃tɩn hɩna.”#Khɩ 24:1 27Ado tibilikɛ na dɔnɩ ha pɛdaaraˈ we nɩ dɩko khʋʋ, dɩɩ da nar dɩ nɩ jal, nɩ khɔ thɩ̃ɛ fɛʋʋkɛ wa ha nɩnɩ, sɩ na‐n bule thɩ̃ɛ a gba kpɩɛrnɔaˈ. 28Sɩ ado tibil so nar aa: Bonɩɛ wɩ jinə; na‐n khoa koe, gɩdonɩ ntɛɛle khɛ narnɩ gɛr dɔ nɔɔ, na kpɩɛrnɔɔkɛ ga ɩnanɩ. 29Sɩ kpɩɛrnɔɔkɛ mɩ sonɩ, ga do afɩ thɛthɛɛda mɩ soaˈ, sɩ tɩɩ kpɩɩleeda. Anyeraakɛ tɩɩ kpɩɩ na ˈlaa na yɩ dɩɩ ɩ̃ hʋ hanana a na‐n so. 30Ado mɩ taa fʋɔr Thãgba sɩ na kho, mɔ̃ ga do wa‐n mɩɩ ɩ̃da puu gekɛrara mɩ‐n fʋɔrɔnɩ Thãgba?
31Dɩ gɛr gɩ thɩ̃ɛ wo thɩ̃ɛɛkɛ nɩ‐n khonɩ, agɩbo nɩ‐n yɔnɩ, na thɩ̃ doo wo thɩ̃ dookɛ nɩ‐n cʋʋnɩ, na‐n cʋɛ thɩɛna fɛʋ ga‐n dʋbɩ Thãgbaa i. 32Na‐n do nɛ baradaa Juifisɔra, dɩ wɩrɛraakɛ na dɔnɩ Juifisɔa wɛ, dɩ Thãgbaa we gbɛbɩdarara waˈ; 33mɔ̃kɛ mɛrɛɛ thɛthɛ n donɩ bʋɔ gɩrɛ thɩ̃ɛ fɛʋra, dɩ ma da tɩbɩla fɛʋ haar; ma‐n ƴaal gɩrɛ na bɔ marnaˈ, sɩ gɩrɛ na bɔnɩ tibil jɔjʋɔra dɩ wa ˈlɛ taarɛ.
Currently Selected:
1 Korɛ̃tɩdara 10: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
