1 Korɛ̃tɩdara 7
7
Korɛ̃tɩdaraa bule hedaara
1Ado gɩrɛraakɛ nɩ kɔɔ khere marnɩ gɩ, gɩ bɔrɛ tibillə dɩ a na‐n tha khɛrra ga. 2Sɩ mɔ̃ ga fʋnɩ sɩ bɔdɛl cʋʋrɛ na‐n halaˈ, dɔ kuun n hana ɔɔ khɛr ker, khɛr n hana ɔɔ ko ker. 3Dɔ kuun na‐n ha ɔɔ khɛr gɩrɛɛkɛ teanaanɩ, khɛr na‐n cʋɛ ɔmɛ̃ dakha ɔɔ kora. 4Khɛr na hɩ̃ ɔɔ tomɩ dɩbara ga, sɩ kuun hɩna; mɛna gɩ, kuun na hɩ̃ ɔɔ tomɩ dɩbara ga, sɩ khɛr hɩna. 5Na‐n bo kha phɩɩn, saagado nɔ bɩɛl nɩ gʋʋr kha sa lee kha gbe, nɩ yɩ ƴɩɛ Thãgba bɩɛlɛla gaaga; sɩ agɩpɩ nɩ bir nɩ gbɛbɩ, a mɛ̃ gaa Satã na yɩrɛ hʋɛ na fifilə ni, gɩrɛraakɛ na marnɩ na fʋ dɩbara ga. 6Mɔ̃ mɩ yɩnɩ thɩ̃ɛ dɩɩ ha thakɛ gɛrra mɩ so, sɩ ga do jɔfʋ gɩ dɩ ɩ̃ pɛraˈ, 7sɩ ga da marɛ ado tɩbɩla fɛʋ na har mɔ̃kɛ mɩ hanɩ; sɩ tɩbɩla bɩɛlbɩɛl hananɛ khaardaa dɩɩdɩɩkɛ thɛnɩ Thãgbaa pa, ʋ n hana ɔɔda kpɩɩ, ʋ na ɔɔda kpɩɩ.
8Sɩ ado wɩrɛɛkɛ na hɛnɩ paˈ, na khikhɛra, mer yɩ gɩ bɔrɛ wɩ tɔɔ mɔ̃kɛ mɩ hanɩ. 9Sɩ ado wa mar na fʋ dɩbara ga, dɔ wɩ he, gɩdonɩ her baar thueekɛ na fɔ wɩnɩ ga‐n hərə wi.
He kuur thɩmɩɩr
10Sɩ ado wɩrɛ hɛnɩ pɩ gɩ, jɔfʋ gɩ dɩ ɩ̃ pɛr, sɩ ga do mɛr jɛ gɩ pɛraˈ, Kɔ̃tɩn sɔ, dɩ khɛr na‐n bo ɔɔ koaˈ.#Mat 5:32; 19:9; Mar 10:11–12; Lu 16:18 11Sɩ ado a ˈlire bor, a tɔɔ a na‐n he tɩɩ kpɩɩ bã, agɩbo wɩ gʋrɛ kha sa a bir a gba ɔɔ ko; sɩ kuun na‐n faa ɔɔ khɛraˈ. 12Sɩ mɩ sor wɩ̃ tibilsɔra ga do Kɔ̃tɩn ga, sɩ ɩ̃ pa gɩ the: Ado õkuun hananɛ khɛrɩkɛ na pɩɛrnɩ haaraˈ, sɩ khɛr dɔɔ tu ɩna toore na ɩnɩ ko, kuun na‐n fagʋaˈ. 13Sɩ a khɛr hana kuun daa pɛr haaraˈ, sa tu a toona khɛr dɔɔ, khɛrɩle na‐n faa ɔɔ kora ga. 14Gɩdonɩ kuunikɛ na pɩɛrnɩ haaraˈ, khɛr n dor nɔɔ dɩ tiro dɩ ha kpɩɩ; dɩ khɛrɩkɛ na pɩɛrnɩ haaraˈ, õkuun n dor nɔɔ dɩ tiro dɩ ha kpɩɩ; a ga ha thalaˈ, ga dor anɩ bɩsãsɔ na hor thɩldaar bɩsana, sɩ nɛnɛ̃kɛ wɩ tirore ha kpɩɩ. 15Sɩ ado ʋrɛɛkɛ na pɩɛrnɩ haaraˈ ƴaalɛ ɩnɩ‐n bo a punone bo; a õkuun gɩ, a õkhɩɛn gɩ, liir dɩphã li paar na halaˈ, gɩdonɩ ha ie toorera Thãgba we sɩ. 16Gɩdonɩ khɛr, mɔ̃ fɩ jɩ dɩ fɛr na dɔ nɔɔ dɩ afɩ ko na ˈlɛrɔ taarɛ? Dɩ agɩbo kuun, mɔ̃ fɩ jɩ dɩ fɛr na dɔ nɔɔ dɩ afɩ khɛr na ˈlɛrɔ taarɛ?
Sɩ tɔɔ mɔ̃ sɩ hanɩ sɩ Thãgba we sɩ
17Gele hale gbobi, sɩ tɩbɩla dɩɩdɩɩ na‐n jala mɔna Kɔ̃tɩn kɔɔ yɩnɩ gɩ hana, gɩ mɩɛna mɔ̃ Thãgba wenɩ ntɛ; thakɛ mɩ pɛr gɩ hana we gbɛbɩdarara paar fɛʋ. 18Tibil hale dɩ Thãgba kɔɔ wɩɩ ɔbɔɔkɛ a donɩ khʋ̃ kurdaar ya? A na‐n kerroaˈ. Tibil hale dɩ Thãgba kɔɔ wɩɩ sɩ aa ˈlɛ kur khʋ̃a ya? Ntɛ na‐n kur khʋ̃ʋ bã. 19Khʋ̃ kurre na do thɩ̃aˈ, a fa kur khʋ̃aˈ, ga do thɩ̃ɛ dakha ga, sɩ Thãgbaa jɔfʋ hɩɩnɛ gɛr dɔ thɩ̃ɛ.
20Tibil n tɔɔ mɔ̃kɛ a kɔɔ hanɩ sɩ dɩ Thãgba wɩɩ. 21Dee fɩ kɔɔ do sɩ dɩ Thãgba we fɩ ya? Fa‐n dɛna ga; sɩ ado fɩ yɩ hʋɛ wer a na do waʋ, ka gba hʋ dɔɔle. 22Gɩdonɩ ʋrɛɛkɛ dɔnɩ dee, sɩ dɩ Kɔ̃tɩn wɩɩ, Kɔ̃tɩnɩ waʋ a do; dɩ mɛ̃ ʋrɛɛkɛ dɔnɩ waʋ, sɩ dɩ Thãgba wɩɩ, Kirisitii dee a do. 23Thãgba kɔɔ the ner the nʋɔ dɩɩ khɩɩr ka, na‐n debi do tɩbɩlaa deaˈ. 24Omɩna, mɔ̃kɛ nɩ kɔɔ hanɩ ɔbɔɔkɛ Thãgba kɔɔ we nɩnɩ dɩɩdɩɩ, mɛ̃ na too kha na Thãgba.
Wɩrɛ hɛnɩ pɩ na wɩrɛ na hɛnɩ paada
25Sɩ ado wɩrɛ dɔnɩ khɛ biirəəkɛ na jɛnɩ kuunaa gɩ, ma hana jɔfʋʋkɛ thɛnɩ Kɔ̃tɩnɩ pa ga, sɩ ɩ̃ kpɩɛrnɔ mɩ‐n ha nɩ, mɔ̃kɛ mɩ donɩ tibilikɛ Kɔ̃tɩn donanɩ bʋɔ dɩ ɩ̃ do sobɔ tibil. 26Gɛr gɩ gɩrɛ mɩ‐n kpɩɛrnɩ gɛr bʋɔnɔ, gɩdonɩ bɔɔkɛra n ɩnanɩ khɩɩrɛ: Gɩ bɔrɛ dɩ tibil na too mɔ̃kɛ a hanɩ. 27Fɩ lire kha na khɛr ya? Fa‐n ƴaal fɩ kuure lidaalaˈ; a fa hana khɛraˈ, fa‐n yɩ fɩ hɛ khɛraˈ. 28Sɩ ado fɩ her, ga do sopugo fɩ cʋaˈ; sɩ ado khɛ biireekɛ na jɛnɩ kuunaˈ he kuun, ga do sopugo a cʋaˈ. Sɩ wɩrɛ hɛnɩ, wa yɩrɛ nɩwɛ awɩ yi hanana, dɩ ma‐n na nɩ yɛ ga nɩɩlera ga. 29Sɩ mɩ yɩ wɔɔ omɩnaa: Bɔɔra ˈlire paalɛ, dɔ dɩphã wɩrɛ hananɩ khɛr n ho wɩrɛ na hananɩ khɛra ga; 30dɩ wɩrɛ n bɛnɩ n ho wɩrɛ na‐n bɛnaˈ; dɔ wɩrɛ n kãkanɛnɩ n ho wɩrɛ na‐n kãkanɛnaˈ, dɩ wɩrɛ n thɛnɩ thɩ̃ɛ n ho wɩrɛ na hananɩ thɩ̃aˈ; 31dɔ wɩrɛ n ˈlɛnɩ awɩda thɩɩraakɛ n ho wɩrɛ na‐n ˈlɛnɩ thɩ̃aˈ; gɩdonɩ mɔ̃ thɩɩra hanɩ gɩrɛ, a‐n phor.
32Sɩ mɩ nar na‐n dɛ fɩɩʋrakaˈ. Ʋrɛɛkɛ na hɛnɩ khɛraˈ, Kɔ̃tɩnɩ thɩ̃ a‐n dɛna, mɔ̃ a na fʋnɩ sɩ na da Kɔ̃tɩn haar. 33Sɩ ʋrɛɛkɛ hɛnɩ khɛr, thɩɩkɛɛda a‐n dɛna, mɔ̃ a na fʋnɩ sɩ na da ɔɔ khɛr haar, 34dɩ ƴɩɛ yenyɔ a‐n jɛ. Khɛrɩkɛ na hananɩ kuunaˈ na khɛ biireekɛ na jɛnɩ kuunaˈ, Kɔ̃tɩnɩ thɩ̃ wɩ‐n dɛna ɩnɩ‐n pho tomɩrra na thuerə. Sɩ ʋrɛɛkɛ hɛnɩ kuun, thɩɩkɛɛda a‐n dɛna, mɔ̃ a na fʋnɩ sɩ na da ɔɔ ko haar.
35Mɔ̃ mɩ‐n mɩɩnɩ thakɛ, anɩda bɔ mɩ‐n ƴaal, ga do pheru mɩ‐n pɛ naraˈ, sɩ fɩl bʋɔ mɩ‐n nɩ nar, dɩ na jɩɩ hɩɩn nɩ faa dɩbara Kɔ̃tɩnna, dɩ dɩkha na hale na dĩdiə naˈ. 36Sɩ ado tibil yɩɛ dɩɩ do ga dor i kʋɛ thɩ̃ɛ ɔɔ khɛ biirrəəkɛ na jɛnɩ kuunaˈ, ado ɔɔ he bɔ na ka, dɩ kpɩɛr a yɩɛ dɩɩ bɔr herra, a cʋɛ gɩrɛ a yɩnɩ dɩɩ bɔr, ga do sopugo a cʋaˈ; dɔ her n cʋʋ. 37Sɩ ʋrɛɛkɛ kpɩɛrɛnɩ hi ɔɔ bɩnɔ dɩ ga do fɛrɛrɛ ga, sɩɩ do dɩbara a fʋ ayɩ, ɩna mar ɩnɩ khɛ biirrəəkɛ na jɛnɩ kuunaˈ da too, ntɛɛle cʋʋrɛ bɔɔ. 38Mɛ̃ gɩ, ʋrɛɛkɛ faanɩ ɔɔ khɛ biirikɛ na jɛnɩ kuunaˈ dɩ he kuun, a cʋʋrɛ bɔɔ, sɩ ʋrɛɛkɛ na tuonni ɩnɩ khɛ biir n hɛ kuunaˈ, a cʋʋrɛ bɔɔ a jɔ. 39Khɛr n lire kha na ɔɔ ko bɔɔ fɛʋʋkɛ ɔɔ ko hananɩ yire; sɩ a ɔɔ ko khi, a hananɛ hʋɛ na he ʋrɛɛkɛ a‐n ƴaalnɩ, sɩ dɔ gɩ do mɔ̃ Kɔ̃tɩn tuni. 40Sɩ ado mɔ̃ ɩ̃ kpɩɛrnɔ hanɩ gɩ, ado a too mɔ̃kɛ a hanɩ ga daaraarɛ na jɔ, dɩ mɩ pɛrɛ haar Thãgbaa Thu wer mɩ hanaanɛ.
Currently Selected:
1 Korɛ̃tɩdara 7: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
