1 Korɛ̃tɩdara 6
6
Thãgbadaraa we kha kɩɩl paar
1Ado ʋ̃ tibil anɩ ha hananɛ sor na ʋ, a na ˈlar na wɩɩ wɩrɛɛkɛ Thãgba na hɛllɔnɩ soraa pa wɩ kɩlɛnaa ya, ga do tɩɩ phuusɔɔ pa ga gʋʋraa? 2Na jɩ dɩɩ do tɩɩ phuusɔ na kɩlɛna thɩ̃ tinənəə? Dɩ ado nɛr na kɩlɛna thɩ̃ tinəne, na thʋ̃ na mar na kɩɩl kɩɩl yɩra gaa? 3Na jɩ dɩɩ do sɛr na kɩlɛna thɔ̃thɔ̃daar thusɔaa? Dɩ a thale gɩ, sa teena sɩ kɩɩl nɛnɛ̃ yireekɛɛ kɩɩlaa? 4Sɩ a nɩ hana kha sor nɛnɛ̃ yireekɛɛ thɩmɩɩra, dɩɩ do tɩbɩlaakɛ we gbɛbɩdara na‐n thernanaˈ nɩ‐n ƴaal wɩ gʋrɛ gɩ. 5Mɩ mɩɩrɛ gɩrɛ yicuru n fɔ nɩ, dɩ ger ha mɛnakɛ, tɩɩ bɩɛl na ha anɩ thɩ̃thɩɩn a hana kpɛsɛrɛ, a gʋʋr ɔɔ omisɔɔ soaa? 6Sɩ dɩ ʋ̃ omi n hana ʋ̃ omi sor, dɩɩ ba jal na jɩɩl ha pɛ ˈleedaraa ƴɛra? 7Sobɔr gɩ, sopugo ˈlire ka nar mɔ̃kɛ nɩ‐n kɩɩlnɩ khasɔ. Mɔ̃gɩdo a ga ha otəˈ dɩ na‐n tu la? Mɔ̃gɩdo dɩ na‐n tu anɩda n jala ga? 8Sɩɩ do nɛr n ka na‐n cʋʋ gɩrɛ na‐n hanɩ otəˈ, dɩ nɩ yɩ tɩbɩlaada n ka na jala, dɩ omɩnana nɩ‐n cʋʋrakɛ gelela wo. 9Na jɩ dɩɩ do wɩrɛ na sarana na lõ Thãgba fãgadaarɩ dʋɔaa gaa? Na‐n fɩɩl dɩbara ga: Bɔdɛl cʋʋdara, na thɩldara, na khɛ kpɩɩ ƴaaldara na kũu kpɩɩ ƴaaldara, na wɩrɛ n cʋɛnɩ khɛr khaa, na konaakɛ n ƴaalɛnɩ kuun khɛr khaa, na khɛraakɛ n ƴaalɛnɩ khɛr kuun kha, 10na yudara, na ha pɩɛrdara, na ta laardara, na tɩɩ nɩɩrdara, na tɩɩ tagɩrɩdara, wa lõ Thãgba fãgadaarɩ dʋɔaˈ. 11Dɩ thalera ɩkhaa tibilsɔ nɛrɛra kɔɔ ha, sɩ Thãgba kɔɔ cɔcɔɔ nɛr, a kɔɔ lee ner kpɩɩ, a kɔɔ cʋʋrɛ sor dɩɩ hɛl nar dɩɩ do Jeju Kirisiti Kɔ̃tɩnɩ i na asɩ Thãgbaa Thu dɔ nɔɔ.
Mɔ̃ asɩ tomɩ teenanɩ gɩ dɔ Thãgbaa cʋda
12Nɩ yɩ, hʋɛ hale thɩ̃ɛ fɛʋʋ cʋʋra, sobɔr gɩ wer, sɩ ga do thɩ̃ɛ fɛʋ na dɔ nar thɩ̃ bʋɔaˈ. Mɩ hananɛ hʋɛ wer a na cʋʋ thɩ̃ɛ fɛʋ, sɩ ma tu kpɩɩrakɛ a na do thɩ̃ bɩɛlɩ deaˈ.#1 Kor 10:23 13Dɩkor dʋɔn bɩnɛɛda, dɩ dakha bɩnɛ do dɩkorɩda; sɩ Thãgba na kperẽ ger fɛʋ a na kʋɛ. Sɩ Thãgba na kɔɔ cʋʋ tomɩr bɔdɛl cʋʋrɛra ga, sɩ Kɔ̃tɩnɩda tomɩr do, dɩ gɩrɛ dɔnɩ tomɩrɩda gɩ bar Kɔ̃tɩn. 14Dɩ Thãgbaakɛ kɔɔ ɩrɛnɩ Kɔ̃tɩn khirera, na ɩɩr sɛr dakha na ɔɔ fãga. 15Na jɩ dɩɩ do anɩ tomɩ dʋɔn Kirisitii tomɩ ɓã gaa? Dɩ ma gbaar Kirisitii tomɩ ɓã wo ɩ̃ cʋʋ gɩ do khɛ bɔdɛlɩ tomɩ ɓã ya? Kpei, ga‐n ha thalaa koe. 16Na jɩ dɩɩ do ʋrɛɛkɛ lenɩ kha na khɛ bɔdɛl, tomɩ bɩɛl wɩ gbɛbɩ do kha gaa? Gɩdonɩ gɩ sor Thãgbaa sɛbɛra ayɩ: “Wɛr yenyɔ na debire na do tibil bɩɛl.”#Jən 2:24 17Sɩ ʋrɛɛkɛ lenɩ kha na Kɔ̃tɩn wɩ gbɛbɩrɛ do kha thu bɩɛl.
18Nɩ fe khiru pɛ bɔdɛl cʋʋrɛra. Sopugo wo sopugookɛ tibil n cʋʋnɩ, ga‐n lʋ̃ʋ tomɩrra ga, sɩ ʋrɛɛkɛ faanɩ dɩbara bɔdɛl cʋʋrɛra, ɔɔ thɛthɛɛ tomɩra a‐n cʋʋ sopugo da‐n pɛ. 19Na jɩ dɩɩ do anɩ tomɩ dʋɔn cʋɔr Thu Phuurəəkɛ hanɩ anɩ bɩnɔ, kɛ nɩ kɔɔ ˈlɛnɩ Thãgbara gaa? Na hɩ̃ anɩbara ga.#1 Kor 3:16; 2 Kor 6:16 20Gɩdonɩ Thãgba kɔɔ the ner the nʋɔ dɩɩ khɩɩr ka, gɛr gɩ anɩ tomɩra na anɩ thurə nɩ cʋɛ Thãgbaa i ga‐n dʋbɩrɔ.
Currently Selected:
1 Korɛ̃tɩdara 6: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
