1 Korɛ̃tɩdara 3
3
Thãgbaa thɔ̃daraa thɔ̃
1Ado mɛr gɩ omɩna, ma kɔɔ puno a mɩɩna nɩ mɔ̃kɛ wɩ‐n mɩɩnanɩ Thu Phuudara ga, sɩ mɔ̃kɛ nɩ donɩ tɩbɩlaakɛ hananɩ tibil kpɩɛrɛ dɩbara dɔrɔɔm, na mɔ̃kɛ nɩ donɩ bibɔrɔsɔ Kirisitira. 2Ɩlɛ̃ mɩ kɔɔ ha nɩ ga do dɩko khena ga, gɩdonɩ na‐n kɔɔ puno na mar paˈ, na nɛnɛ̃kɛrakɛ, sɩ na‐n mar paˈ,#Ebi 5:12–13 3gɩdonɩ tɩbɩlaakɛ hananɩ tibil kpɩɛrɛ dɩbara dɔrɔɔm nɩ do ˈlo. Gɩdonɩ ɔbɔɔkɛ gbugi na kɩla n bonɩ dɩ ga‐n ha anɩ thɩ̃thɩɩn, ga do tɩbɩlaakɛ hananɩ tibil kpɩɛrɛ dɩbara dɔrɔɔm nɩ do dɩ na‐n ɩɩr a ho tɩɩ ba gaa? 4Ɔbɔɔkɛ ʋ n sonɩ dɩ yɩ, ine wer Polɩda ɩnɩ do; ʋ n yɩ, ine wer Apolɔsɩɩda ɩnɩ do, na thʋ̃ do tɩbɩlaakɛ hananɩ tibil kpɩɛrɛ dɩbara dɔrɔɔm mãa?#1 Kor 1:12 5Anye Apolɔsɩ do? Dɩ anye Pol do? Thɔ̃dara wɩ do, kɛ dɔnɩ nɔɔ dɩ nɩ pɛr haar, mɔ̃kɛ Kɔ̃tɩn kɔɔ ha wɩnɩ bɩɛlbɩɛl thɔma. 6Mɛr kɔɔ dire, dɩ Apolɔsɩ sɛ, sɩ Thãgba n cʋɛ dɩ ga‐n khɔ̃;#Th t t 18:4–11, 24–28 7mɛ̃ gɩɩ, ga do ʋrɛ n direni dʋɔn thɩ̃ɛ dɩ ʋrɛ n sɛnɩ ga, sɩ Thãgbaakɛ n cʋɛnɩ dɩ ga‐n khɔ̃ gɩ. 8Ʋrɛ n direni, na ʋrɛ n sɛnɩ, bɛla wɩ do, dɩ wɛr fɛʋ bɩɛlbɩɛl na ˈlɛr awɩ thɛthɛɛ lɩmɩ mɔ̃ awɩ thɛthɛɛ thɔ̃ hanɩ. 9Gɩdonɩ thɔ̃ dona sɩ do nakha Thãgba, dɩ nɩ dor Thãgbaa lɛ, a dona Thãgbaa cɔ. 10Mɔ̃kɛ bɔ jɩɩrɩkɛ Thãgba kɔɔ jɩ mɩnɩ hanɩ, mɩ kɔɔ kpɛɛ gʋʋ mɔ̃kɛ go mɩ kɔ̃tɩ̃ kpɛsɛɛ n kpɛɛnɩ gʋʋ, dɩ tibil kpɩɩ n dɛbɩ. Sɩ dɔ tɩbɩla bɩɛlbɩɛl n jɩɩ hɩɩn mɔ̃ wɩ‐n dɛbɩnɩ; 11gɩdonɩ tibil na bir na kpɛɛ go kpɩɩ, saagado gɩrɛ kɔɔ ˈlenɩ kpɛɛrɛ gaaga, gɛr dʋɔn Jeju Kirisiti. 12Dɩ gɛr gɩ ado tibil na dɛbɩ go kpɛɛrɛɛkɛ na dɛ, na dɛ bulo, na boka ɓɔnaakɛ khiinoni the nʋɔ, na dɛɛ, na hʋɔn, na thagbola, 13ga yɩrrɛ dɩ wa jɩ mɔ̃ tɩbɩla bɩɛlbɩɛlɩ thɔ̃ hanɩ. Gɩdonɩ Wireele na nɛrɔ, gɩdonɩ dɔɔ na nɛrɔ, dɩ dɔɔlera na mɩɛnɛ tɩbɩla fɛʋ bɩɛlbɩɛlɩ thɔ̃ na hɩɩn. 14Ado ntɛɛ thɔ̃ɔkɛ dɔnɩ gɩrɛ a dɛbɩnɩ go kpɛɛrɛraale bo sɩ, ga dor a na ˈlɛr lɩmɩnɛ; 15sɩ ado dɔɔ hɩ̃ ntɛɛ thɔ̃, ga dor a ˈleere, sɩ ɔɔ thɛthɛ wer na ˈlɛr taarɛ, sɩ ga hor dɔɔra a ca the. 16Na jɩ dɩɩ do nɛr dɔ cʋɔr Thãgbara, dɩ Thãgbaa Thu na‐n cɔ anɩ bɩnɔaa?#1 Kor 6:19; 2 Kor 6:16 17Ado tibil wɩɛl Thãgbaa cɔ, Thãgba na wɩɛlʋʋlɛ; gɩdonɩ Thãgbaa cɔ n phure, dɩ nɛr dʋɔn Thãgbaa cɔra.
18Tibil na‐n fɩɩl dɩbara ga. Ado tibil anɩ thɩ̃thɩɩn na kpɩɛr ɩnɛr dʋɔn tɩɩ kpɛsɛ nɛnɛ̃ bɔɔraakɛ, a ka deba dɔ də̃bəəlu dɩ mɛ̃ a na do tɩɩ kpɛsɛ. 19Gɩdonɩ kpɛsɛrɛɛkɛ dɔnɩ thɩdaa də̃bəəle gɩ do Thãgbara, gɩdonɩ gɩ kherere Thãgbaa sɛbɛra ayɩ: “A fʋrɛ tɩɩ kpɛsɛsɔra awɩ fɩɩlla”;#Jɔ 5:13 20wo: “Kɔ̃tɩn jɩrɛ tɩɩ kpɛsɛsɔɔ kpɩɛr, a jɩ gɛr dɩɩ do mɔlɔdaa gɩ do.”#Khɩ 94:11
21Gɛr gɩ tibil na‐n gba tibil a do ɔɔ məbida ga, gɩdonɩ thɩ̃ɛ fɛʋ nɛr hɩna, 22ado Pol gɩ, ado Apolɔsɩ gɩ, ado Sefasɩ gɩ, ado thɩɩkɛɛda gɩ, ado yire gɩ, ado khir gɩ, ado nɛnɛ̃ thɩ̃ɛɛkɛ gɩ, ado thɩ̃ɛɛkɛ na ɩnanɩ gɩ, thɩ̃ɛ ɓibi nɛr hɩna. 23Sɩ nɛrɛ Kirisiti hɩna nɩ, sɩ Kirisiti Thãgba hɩnaa.
Currently Selected:
1 Korɛ̃tɩdara 3: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
