1 Korɛ̃tɩdara 15
15
Khi ɩɩr thɩmɩɩr
1Omɩna, mɩ cʋʋ nɛr nɩ jɛna tutugo bʋɔɔkɛ mɩ kɔɔ mɩɩ nɩnɩ, kɛ dɔnɩ gɩrɛ nɩ kɔɔ ˈlɛnɩ dakha a jɩɩllɔ kɩbɩ. 2Gɛr dɔ dakha gɩrɛ dɔnɩ nɔɔ dɩ nɩ ˈlɛrɔ taarɛ, ado nɩ fʋ gɛr gel mɔ̃kɛ mɩ kɔɔ mɩɩ nɩnɩ; ado mɛ̃ gɩ yuuəˈ, ga dor mɔlɔ nɩ kɔɔ pɛr haar.
3Caca thɩ̃ kɔ̃tɩ̃ɩkɛ mɩ kɔɔ dɩɩr nɩnɩ, kɛ dɔnɩ dakha gɩrɛ mɩ kɔɔ ˈlɛnɩ dʋɔn: Kirisiti kɔɔ khire asɩ sopugosɔra mɔ̃kɛ Thãgbaa sɛbɛ sonɩ,#Eja 53:5–12 4dɩ wɩ kɔɔ dʋʋrɛ, sɩ a ɩɩrɛ a the khirera balãther wirera, mɔ̃kɛ Thãgbaa sɛbɛ sonɩ,#Khɩ 16:8–10; Mat 12:40; Th t t 2:24–32 5dɩ a kɔɔ nɩnanɛ ɔɔbara Sefasɩ agɩpɩ yʋɔr yenyɔra.#Mat 28:16–17; Mar 16:14; Lu 24:34, 36; Jã 20:19 6Agɩpɩ a kɔɔ nɩnanɛ ɔɔbara bɔ bɩɛlla omɩna taamɔɩra na dɛbɩrɛ, kɛ jɔɔ hanɩkɛ nɩ̃ na yire, sɩ dɩ ɩkhasɔ daar daanɩkɛ dɔnɩ khiir. 7Agɩpɩ a nɩnanɛ ɔɔbara Jakɩ, agɩpɩ dɩ nɩna ɔɔbara wo thɔ̃thɔnana fɛʋ. 8Agɩpɩ fɛʋ a nɩna mɛr dakha ɔɔbara, sɩrakɛ mɛr hʋɔn ʋrɛɛkɛ wɩ ɓɔrnɩ kɔ̃.#Th t t 9:3–6 9Gɩdonɩ mɛr dɔ dabuu fɩɩʋ thɔ̃thɔnasɔra, ma teena wɩ we mɩ thɔ̃thɔnaˈ, gɩdonɩ mɩ kɔɔ kpoore Thãgbaa we gbɛbɩdarasɔra.#Th t t 8:3 10Sɩ Thãgbaa bɔ jɩ dɔ nɔɔ dɩ ɩ̃ do gɩrɛ mɩ donɩ gɩrɛ, dɩ ɔɔ bɔ jɩra mɛrɛra na kɔɔ do mɔlɔ kpɩɩrakaˈ, sɩ mɩ‐n ka dor thɔma a jɔ wɛr fɛʋ, sɩrakɛ ga do ɩ̃ pa gɩ thaa koe, sɩ Thãgbaa bɔ jɩɩkɛ a kɔɔ jɩ mɩnɩ bʋɔra dɔ nɔɔ. 11Gɛr gɩ ado mɛr gɩ ado wɛr gɩ, gɛr dɔ Thãgbaa thɩmɩɩkɛ sɩ‐n mɩɩnɩ, dɩ gɛrra nɩ kɔɔ pɛr haar.
12Dɩ ado Thãgbaa thɩmɩɩ n mɩɩrɛ ayɩ: Kirisiti kɔɔ ɩɩrɛ a the khirera, dɩ mɔ̃ gɩ fʋ sɩ ɩkhasɔ anɩ thɩ̃thɩɩn n yɩ: Khi ɩɩrɛ na hala? 13Ado khi ɩɩrɛ na‐n halaˈ, Kirisiti dakha na kɔɔ ɩɩr na the khirera ga. 14Dɩ ado Kirisiti na kɔɔ ɩɩr a the khirera ga, ga dor Thãgbaa thɩmɩɩkɛ sɩ‐n mɩɩnɩ mɔlɔ gɩ, dɩ anɩ ha pɛ dakha mɔlɔ gɩ. 15Dɩ ga dorakɛ sõso so jɩdara sɩ do Thãgbara, gɩdonɩ sɩ kɔɔ mɩɩrɛ a pɛr Thãgbara ayɩ, a kɔɔ ɩɩrɛ Kirisiti dɩ the khirera, sɩɩ do aa kɔɔ ɩɩrʋʋ dɩ the khirera ga, dɩ gɩdonɩ khe na‐n ɩɩr ger dɩ wɩ the khirera ga. 16Gɩdonɩ ado khe na ɩɩr na the khirera ga, Kirisiti dakha na kɔɔ ɩɩr na the khirera ga. 17Dɩ ado Kirisiti na kɔɔ ɩɩr a the khirera ga, anɩ ha pɛ mɔlɔ gɩ do, ga dor nɩ hale anɩ sopugosɔra ˈlo; 18dɩ ga dor dakha wɩrɛ pɛnɩ Kirisiti haar sa daar daanɩkɛ dɔnɩ khir wɩ buure. 19Ado ga yi hanaakɛ thɩɩra dɩbara sɩ yɩrɔ nũ pɛrɛ sɩ hana Kirisitira, ga dor sɛr n kɔ bʋɔ a jɔ tɩbɩla fɛʋ.
20Sɩ gel Kirisiti kɔɔ ɩɩr a the khirera, ɔr dɔ cacadaar wɩrɛraakɛ daarɛnɩ daanɩkɛ dɔnɩ khir. 21Gɩdonɩ mɔ̃kɛ khir thenɩ tɩɩ bɩɛlla, mɛ̃ dakha khi ɩɩrɛ the tɩɩ bɩɛlla. 22Gɩdonɩ mɔ̃kɛ Adã donɩ nɔɔ dɩ fɛʋ na‐n khiir, mɛ̃ dakha Kirisiti na do nɔɔ dɩ fɛʋ na bir na ˈlɛ yire; 23sɩ jɔ kha jɔ kha gɩ, Kirisiti n do cacadaar, agɩpɩ ɔɔ bir ɩ̃ bɔɔ, wɩrɛɛkɛ Kirisitira hɩnɩ. 24Agɩpɩ khu paar n dã dɩphã, liir a na gba fãgadaar dʋʋr na ha Thãgba Thɩrɛ, ɔbɔɔkɛ a na bũburoni dakpɛna yʋʋsɔ fɛʋ, na hʋ hanadara fɛʋ, na fãgadara fɛʋ na pɩ. 25Gɩdonɩ dɔ a do fãgadaar phaphapha a jəəro ɔɔ lãlaardara fɛʋ nɛɛ.#Khɩ 110:1 26Pɩpɩɩ lãlaardaarɩkɛ na bũburoneni khir gɩ, 27gɩdonɩ “Thãgba gbaar thɩ̃ɛ fɛʋ dɩ jəəro nɛɛ.” Dɩ ɔbɔɔkɛ Thãgbaa sɛbɛ sonɩ ayɩ, thɩ̃ɛ fɛʋ jʋʋraarɛ, gɩ yɩrrɛ mɛ̃ dɩ ʋrɛra pɩɛrnɩ thɩ̃ɛ fɛʋ dɩ jəəro nɛɛ, ɔr dɩbara sɛ.#Khɩ 8:6 28Ɔbɔɔkɛ thɩ̃ɛ fɛʋ na jʋʋraanɩ na pɩ, le Bikuuni thɛthɛ na jo dɩbara ʋrɛraakɛra ɔʋɛnɩ thɩ̃ɛ fɛʋ dɩɩ jʋʋraa, dɩ mɛ̃ Thãgba na do yʋʋ fɛʋra ɓibi.
Khi ɩɩr bananɛ
29Dɩ ado ga ha thalaˈ, anye wɩrɛ wɩ kpɛɛnɩ nyʋɔnɔ kherə na yɩ? Dɩ adorakɛ khe na ɩɩr khirera kpɩɩaˈ, mɔ̃ dɔ nɔɔ dɩ wa kpɛɛ wɩ nyʋɔnɔ kherə? 30Dɩ sɛrɛ dakha, anyera sɩ‐n faa dɩbara bɔ kʋrra bɔɔ fɛʋʋkɛra? 31Sobɔr gɩ omɩna, mɔ̃ nɩ donɩ ɩ̃ məbida asɩ Kɔ̃tɩ̃ Jeju Kirisitira waa gel, mɛna gɩ ha na gɩrɛ, wire fɛʋ khikhi togʋʋ mɩ‐n too.
32Ado mɔ̃kɛ tibil kpɩɛrɛ hanɩ mɩ kɔɔ kɛ̃kɛrɛna hɔ̃ nɛbi kho thɩ̃ɛ Efɛjɩ dɩɩra, sɩɩ do khe na ɩɩr na the khirera ga, anyee kho ca ma ˈlɛ gelela? Dɩ sa‐n cʋɛ gɩrɛ sokpaa sɔnɩ ger bɛɛ: “Sɩ khɔɔ a na yɔna, gɩdonɩ cʋɔ sa khiire.”#Eja 22:13 33Na‐n fɩɩl anɩbara ga: Tɩɩ puu kuune ˈlãˈlãˈlã n kʋɛrɛ fɩl bʋɔ. 34Nɩ dɔ gɩ gba nɩ khər mɔ̃kɛ gɩ teenɩ kha, dɩ na‐n cʋʋ sopugoəˈ, gɩdonɩ ɩkhasɔ na jɩ Thãgba ga. Mɩ sor thakɛ yicuru n fɔ nɩ.
Mɔ̃ kheekɛ na ɩrɛnɩɩ tomɩ na hanɩ
35Sɩ ʋkha na sor: Mɔ̃ khe na fʋ sɩ na ɩɩr na the khirera? Anyee tomɩ ca wa bir na ɩna gɩrɛ kper? 36Də̃bəəlu ha fɩ bã; gɩrɛ fɩ‐n diirni na hana yire saagado gɩ kɔɔ khire ɓoaa ga. 37Ɔbɔɔkɛ fa‐n diirni, ga do phuloleekɛ na phonɩ fɩ‐n kɔɔ gba diirəˈ, sɩ bire gɩ, agado jʋ birəˈ dɩɩ do thɩ̃ diir kpɩɩ. 38Sɩ Thãgba n ˈlaaraa tomɩr mɔ̃kɛra a kɔɔ ƴaalnɩnakɛ gɩ hana, dɩ a‐n har thɩ̃ diire bɩɛlbɩɛl tomɩr dɩɩdɩɩ.
39Nʋʋn fɛʋ na‐n do nʋ̃ ca bɩɛlaˈ, tibildaa n har kpɩɩ, dɩ nʋmaada n ha kpɩɩ, dɩ ˈlominəəda n ha kpɩɩ, dɩ thʋmaada n ha kpɩɩ. 40Ƴũ thɩ̃ɛsɔ n hale, thɩdaasɔ n hale, sɩ ƴũ thɩ̃ɛɛ carã pa n har kpɩɩ, dɩ thɩdaa n ha kpɩɩ ga ƴɛra. 41Wiree carã n har kpɩɩ, dɩ porɩ carã n ha kpɩɩ, dɩ ƴepələ̃bee carã n ha kpɩɩ, gɩdonɩ ƴepələ̃berarakɛ bɩɛlɩ carã n har kpɩɩ na ʋ̃ ƴepələ̃bi. 42Mɛ̃ gɩ ha khee ɩɩrra, tomɩ kʋɛnaa wɩ‐n dʋ mɔ̃ wɩ‐n diirni thɩ̃ɛ, sɩ mɔ̃ a‐n ɩɩrnɩ aa‐n do dakʋɛnaa ga. 43Mɔ̃ wa‐n dʋʋnɩ dabeesinaa a‐n do, sɩ mɔ̃ a‐n ɩɩrnɩ cʋrɛ a‐n ɩɩrna. Mɔ̃ wa‐n dʋʋnɩ dayɔgɔ a‐n do, sɩ mɔ̃ a‐n ɩɩrnɩ fãga haar a‐n do. 44Mɔ̃ wa‐n dʋʋnɩ tomɩ jaar a‐n do, sɩ mɔ̃ a‐n ɩɩrnɩ thudaa a‐n do; tomɩ jaar n hale, dɩ thudaa n hale dakha. 45Gɛr gɩ dɩɩ khere Thãgbaa sɛbɛra dakha ayɩ: “Caca tibilikɛ dɔnɩ Adã debire a do tibilikɛ hananɩ yire”, sɩ pɩpɩɩ Adã do thueekɛ n ˈlaanɛnɩ yire.#Jən 2:7 46Ga do thudaa dɔ cacadaa ga, sɩ tibil jaar gɩ, gɩrɛ dɔnɩ thudaa pɩɩrɔrɛ. 47Caca tibil thɩɩra a the, thɩlãkobe Thãgba gba a mɩɩ, sɩ balanyɔ tibil ƴũ a the. 48Mɔ̃ thɩlãkobidaar hanɩ, mɛ̃ thɩlãkobidara ha dakha, dɩ mɔ̃ ƴũdaar hanɩ, mɛ̃ ƴũdara ha dakha. 49Dɩ mɔna sɩ kɔɔ donɩ thɩlãkobidaarɩ hoho, mɛ̃ sa do dakha ƴũdaarɩ hoho. 50Gɩrɛ mɩ sonɩ wɔɔ omɩnaa dʋɔn: Tomɩ nʋʋn na tɔmɩn na puno na lõ Thãgba fãgadaarɩ dʋɔaˈ, dɩ gɩrɛ dɔnɩ dakʋɛnaa na puno na ˈlɛ dakha gɩrɛ na kʋɛanaa ga.
Kəəree khi dɩɩ
51Hɩnɛ thɩ̃ gbul gɩ dɩ ɩ̃ so, ga do sɛrɛ fɛʋ na daarɛ daanɩkɛ dɔnɩ khiirəˈ, sɩ fɛʋ sa debire,#15:51–52; 1 Tes 4:15–17 52dapaara, mɔ̃ tibil n canɩ yinə pɩpɩɩ tutuu ʋʋnna. Gɩdonɩ tutuu na ʋnɛ, dɩ khe na ɩɩr na tomɩrɩkɛ na dɔnɩ dakʋɛnaa ga, sɩ sɛrɛ sa debire. 53Gɩdonɩ dɔ tomɩ kʋɛnaakɛ n to gɩrɛ na dɔnɩ dakʋɛnaa ga, dɩ tomɩ khinəneekɛ n to gɩrɛ na dɔnɩ dakhinənəˈ. 54Sɩ ɔbɔɔkɛ tomɩ kʋɛnaakɛ na tonɩ gɩrɛ na dɔnɩ dakʋɛnaa ga na pɩ, dɩ tomɩ khinəneekɛ na to gɩrɛ na dɔnɩ dakhinənəˈ na pɩ, le thɩmɩɩrɩkɛ kherenenɩ Thãgbaa sɛbɛra ayɩ: “Kəəre gbaar khir a dɩɩ” na dã dɩphã.#Eja 25:8
55“Khir ya, ka afɩ kəəra ha?
Khir ya, ka afɩ kpalla ha?”#Oje 13:14
56Khiri kpal dʋɔn sopugo, dɩ sopugoo fãga dʋɔn jɔfʋ. 57Sɩ Thãgba hɩna fʋɔrɛ, ɔrkɛ n hana sɩnɩ kəəre, dɩ asɩ Kɔ̃tɩ̃ Jeju Kirisitira gɩ‐n the.
58Mɛ̃ gɩ ɩ̃ omisɔɔkɛ mɩ‐n nanɩ, nɩ fɔ gɩ ma, na‐n ha tutugo paaraˈ, na‐n dɔ thɔma Kɔ̃tɩnna wire wire gɩ bɔr ga‐n pɛr, gɩdonɩ nɩ jɩrɛ dɩ anɩ thɔna Kɔ̃tɩnna na do mɔlɔ kpɩɩrakaˈ.
Currently Selected:
1 Korɛ̃tɩdara 15: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
