1 Korɛ̃tɩdara 14
14
Thɩmɩɩ kpɩɩ mɩɩrɛ
1Na‐n gbuoro naʋ ƴaalɛ yʋʋ; sɩ na‐n ƴaalɛ dakha Thu Phuu khaardasɔ, sɩ gɩrɛ na jɩɩnɩ ƴaallakɛ jɔɔ dʋɔn Thãgba tukɩr tir. 2Gɩdonɩ ʋrɛ n mɩanɩ thɩmɩɩr na thɩmɩɩ kpɩɩ, ga do tɩbɩla a‐n mɩɩna ga, sɩ Thãgba a‐n mɩɩna. Gɩdonɩ tibil na‐n jɩ gɩrɛ a‐n sonaˈ, sɩ Thu Phuu n cʋgɛɛ da‐n mɩɩ thɩmɩɩ gbul. 3Sɩ ʋrɛɛkɛ n tenɩ Thãgba tukɩrʋ, tɩbɩla a‐n ka da‐n mɩɩna gɩ cʋʋ wɩ wɩ hana khɔ̃ pɛrɛ, na ƴɛ kʋʋl jaal, na ha faarɛ. 4Ʋrɛɛkɛ n mɩanɩ thɩmɩɩr na thɩmɩɩ kpɩɩ ɔɔ thɛthɛ gɩ‐n cʋʋ da‐n khɔ̃, sɩ ʋrɛɛkɛ n tenɩ Thãgba tukɩrʋ, we gbɛbɩdara a‐n cʋʋ dɩ wa‐n khɔ̃. 5Mɩ‐n ƴaalɛ nɛrɛ fɛʋ na‐n mɩa thɩmɩɩr na thɩmɩɩ kpɩɩ, sɩ ƴaal kɔ̃tɩ̃ɩkɛ mɩ hananɩnakɛ jɔɔ dʋɔn, na‐n te Thãgba tukɩrʋ. Gɩdonɩ ʋrɛ n tenɩ Thãgba tukɩrʋ, a kɔ̃tɩnɛ a jɔ ʋrɛ n mɩanɩ thɩmɩɩr na thɩmɩɩ kpɩɩ, agado ɔɔ thɩmɩɩra a‐n fi dɩ we gbɛbɩdara na‐n ˈlɛrɔ khɔ̃ pɛraˈ.
6Sɩ omɩna nɩ hɩnɛ, anyee bɔ ca ga taa nɩ, ado mɩ pɔ anɩ pa, a na mɩɩ thɩmɩɩr na thɩmɩɩ kpɩɩ, agado thɩ̃ nɩrɔrɛ, na jɩɩr, na Thãgba tukɩr tir, na dɩɩrɛ mɩ‐n mɩɩna na? 7Thɩ̃ɛɛkɛ na hananɩnakɛ yirəˈ, sɩ gɩ hananɛ wire, a bɩɩl gɩ, a salãa gɩ, ado bɩɩl na‐n ʋ̃ dɩɩ yɩraˈ, mɔ̃ wa jɩ gɩrɛ gɩ‐n sonɩ? Ado salãa na‐n bɩ̃ dɩɩ yɩraˈ, mɔ̃ wa jɩ gɩrɛ gɩ‐n sonɩ? 8Dɩ dakha ado wa jɩɩ ʋ̃ tutuəˈ, ʋmɔ̃ na gbɛbɩrɛ ko ke gbɛbɩrʋʋ? 9Mɛ̃ gɩ, nɛrɛ dakha, ado anɩ delẽbi thɩmɩɩ na‐n yɩr casaˈ, mɔ̃ tibil na fʋ sɩ na jɩ gɩrɛ n mɩanɩ? Gɩdonɩ bʋla bʋla nɩ‐n mɩɩ. 10Thɩmɩɩ caar dɩɩdɩɩ na jɔr thɩɩra kpãkpalã ga, sɩ thɩmɩɩr na hale sa ˈlee kɩrʋaˈ. 11Dɩ gɛr gɩ ado ma jɩ thɩmɩɩrɩkɛ tibil n mɩɩnaˈ, kpakpal ma do okɛrara n mɩanɩ, dɩ ɔr dakha na do marɛ kpakpal. 12Mɛ̃ gɩ, nɛrɛ dakha, mɔ̃kɛ na hananɩ Thu Phuu khaarda ƴaalɛ kpãkpalã ga, na‐n ƴaalɛ a ˈlɛ jɔɔ gɩrɛɛkɛ na cʋɛnɩ we gbɛbɩdara dɩ wa khɔ̃ wa‐n pɛr. 13Gɛr gɩ ʋrɛɛkɛ n mɩanɩ thɩmɩɩr na thɩmɩɩ kpɩɩ, dɔ a bɩɛl Thãgba a haa thɩmɩɩ fiir. 14Gɩdonɩ a ma bɩɛl Thãgba na thɩmɩɩ kpɩɩ, ɩ̃ thu n bɩɛlnɛ, sɩ ɩ̃ kpɩɛr wer kpalalɛ too. 15Dɩ mɔ̃ ga ha? Ma bɩɛlɛ Thãgba gɩ the thuerə, sɩ dakha ma bɩɛlɛ Thãgba gɩ the kpɩɛrɛra. Ma khɩnɛ nɩɛ gɩ the thuerə, sɩ dakha ma khɩnɛ nɩɛ gɩ the kpɩɛrɛra. 16A fa fʋɔr Thãgba dɩɩ do thuerə gɩ‐n the, mɔ̃ ʋrɛɛkɛ dʋɔnnɩ nũpɛthe na fʋ sɩ na dee “Amɛn” afɩ Thãgba fʋɔrra, aa jɩnɩ gɩrɛ fɩ‐n sona? 17Fɩ‐n fʋɔrɛ Thãgba wer na sobɔr, sɩ ga cʋʋ tɩɩ kpɩɩ da khɔ̃ na pɛraˈ. 18Mɩ‐n khɩɩrɛ Thãgba gɩrɛraakɛ mɩ‐n mɩɩnɩ thɩmɩɩr na thɩmɩɩ kpɩɩ dɩ ɩ̃ jɔ nɩ fɛʋ. 19Sɩ we gbɛbɩdaraa thɩ̃thɩɩn, mɩ nar ɩ̃ mɩa thɩmɩɩ be yemɔɩ, sɩ gɩ do kpɩɛrɛra gɩ the, gɩ dɩɩr ɩkhasɔ, gɩ baar thɩmɩɩ be gbɩlanɩ yʋɔrɩkɛ ma mɩɩnɩ na thɩmɩɩ kpɩɩ.
20Omɩna wei, na‐n do bɩsana bɩ̃ kuurera gaa koe. Sɩ puu cʋʋrɛra wer, nɩ dɔ bɩsã bii, sɩ ado bɩ̃ kuurdaara gɩ, nɩ dɔ kũu bɩ̃ cɩɩsɔ. 21Gɩ kherere Thãgbaa jɔfʋra ayɩ:
“Kɔ̃tɩn sor ayɩwɔɔ:
Ca kpɩɩsɔ na kpakpalaa nɔ ma gba
na mɩɩna na mɩɩmɩɩ wa tibilsɔraakɛ,
sɩrakɛ wa pɛ mɩ nũəˈ.”#Eja 28:11–12
22Gɛr hɩna, jɩɩn thɩmɩɩ kpɩɩ mɩɩrɛ do, ga do wɩrɛraakɛ pɩɛrnɩ haar ga, sɩ wɩrɛraakɛ na pɩɛrnɩ haaraˈ. Sɩ Thãgba tukɩr tir do jɩɩn, ga do wɩrɛraakɛ na pɩɛrnɩ haaraa ga, sɩ ha pɛdarara. 23Dɩ a mɛ̃ gɩ, a we gbɛbɩdaar haar gbɛbɩ kha, dɩ tɩbɩla fɛʋ na mɩɩ thɩmɩɩr na thɩmɩɩ kpɩɩ, dɩ wɩrɛ dɔnɩ nũpɛthesɔ, agɩbo wɩrɛɛkɛ na dɔnɩ ha pɛdara ga, lõ le, ga do wa sor nayɩ yʋ budara hanaa? 24Sɩ ado tɩbɩla fɛʋ na ti Thãgba tukɩrʋ, dɩ ʋrɛɛkɛ na dɔnɩ ha pɛdaaraˈ, agɩbo nũpɛthe, lõ le, tɩbɩla fɛʋʋ thɩmɩɩ na punoone, dɩ a na ˈlaarɛ dakha na yɩ mɔ̃kɛ a hanɩ; 25dɩ thɩ̃ɛɛkɛ keranɩ ɔɔ hara ga yɩrrɛ, dɩ a na jire na sumo a na‐n fʋɔr Thãgba sa a so ayɩ: “Thãgba har anɩ thɩ̃thɩɩn ger.”
Mɔ̃ gɩ teenanɩ thɩ̃ɛ na‐n jala mʋmʋr we gbɛbɩdaraa thɩ̃thɩɩn
26Omɩna, dɩ mɔ̃ gɩ teena gɩ hana? Ɔbɔɔkɛ nɩ‐n gbɛbɩnɩ kha dɩ ʋkha nɛrɛra n hana nɩɛ, ʋ n hana dɩɩrɛ, ʋ n hana nɩrɔ thɩmɩɩr, ʋ n hana thɩmɩɩ kpɩɩ mɩɩrɛ, ʋ n hana thɩmɩɩ fiir, dɔ na‐n cʋʋ thɩ̃ɛ fɛʋ we gbɛbɩdara n khɔ̃ wa‐n pɛr. 27Ado thɩmɩɩ kpɩɩ mɩɩdara hale, wɩ dɔ tɩbɩla yenyɔ agɩbo yẽther dɩbara, sɩ wa‐n mɩa kpa kha kpa kha, dɩ dɔ thɩmɩɩ fidaar n hale a na‐n fi. 28Sɩ ado thɩmɩɩ fidaar na halaˈ, ntɛ n pɩra pɔbɩ we gbɛbɩdaraa thɩ̃thɩɩn, sɩ na mɩa dɩbara nakha Thãgba. 29Sɩ ado wɩrɛ n tenɩ Thãgba tukɩrʋ gɩ, dɔ yenyɔ agɩbo yẽther na‐n mɩɩ, sɩ wɩrɛ sɛnɩ n jʋrɛ gɩrɛra n mɩanɩ na hɩnɛ. 30Sɩ ado tibil kpɩɩkɛ tɔɔnɩ hananɛ nɩrɔ thɩmɩɩr, dɔ cacadaar n pɩr. 31Gɩdonɩ nɩ punone fɛʋ a ti Thãgba tukɩrʋ kpa kha kpa kha, dɩ mɛ̃ tɩbɩla fɛʋ na ˈlɛr dɩɩrɛ, fɛʋ n ˈlɛ dakha ha faarɛ. 32Gɩrɛ Thãgbaa Thu n cʋʋnɩ Thãgba tukɩr tidara dɩ wa‐n mɩɩ, gɩ‐n wurre Thãgba tukɩr tidarara. 33Gɩdonɩ Thãgba na do bʋla bʋla Thãgba ga, sɩ ha ie Thãgba a do.
Mɔ̃kɛ gɩ‐n hanɩ paar fɛʋʋkɛ tɩɩ phuusɔ n gbɛbɩnɩ kha, 34dɔ khɛra n pɩr pɔbɩ we gbɛbɩdaraa pa, gɩdonɩ wa hana hʋɛ na mɩɩ thɩmɩɩraˈ, sɩ wɩ jɔ dɩbara mɔ̃kɛ dakha Thãgbaa jɔfʋ sonɩ. 35Ado wɩ‐n ƴaalɛ wɩ jɩ thɩ̃ɛ, wa‐n bulene awɩ kosɔ le cʋɔrɔ, gɩdonɩ yicur thɩ̃ɛ gɩ, a khɛr na mɩɩ thɩ̃ɛ we gbɛbɩdaraa pa. 36Anɩ pa Thãgbaa thɩmɩɩ ba therakɛ yaa, dɩ agɩbo nɛr dɩbara gɩ ba dã yaa? 37Ado tibil pɛr haar Thãgba tukɩr tidaar ha nɩ, agɩbo Thu Phuudaar ha nɩ, dɔ ntɛ n tu dakha dɩ gɩrɛ mɩ khere narnɩ Kɔ̃tɩnɩ jɔfʋ gɩ do. 38Dɩ ado ntɛ yɩ ɩnɩ‐n bor, a bɔ bɛɛ. 39Gɛr gɩ ɩ̃ omisɔ, na‐n ƴaalɛ na haar fɛʋ Thãgba tukɩr tir, sɩ na‐n pɩɛr tibil a na‐n mɩɩ thɩmɩɩr na thɩmɩɩ kpɩaa ga. 40Dɔ thɩ̃ɛ fɛʋ na‐n cʋʋ na fɩl bʋɔ, dɩ dakha nyanyaanɛ na‐n halaˈ.
Currently Selected:
1 Korɛ̃tɩdara 14: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
