1 Korɛ̃tɩdara 13
13
Naʋ
1A mɩ jɩ tibil caar fɛʋʋ thɩmɩɩ na mɩɩ, a gɩrɛ thɔ̃thɔ̃daar thusɔ n mɩɩnɩ gɩ, sɩ a ma hana naʋaˈ, nʋɔ mɩ‐n kɩɛr oro oro gbõgbõ khaa, agɩbo dẽgelẽbi khaa wele wele. 2A mɩ hana punone a na tinə Thãgba tukɩrʋ, a mɩ jɩrɛrakɛ dakha thɩ̃ gbulsɔ fɛʋ, a hanana jɩɩr ɓibi, ado mɩ hananakɛ ha pɛrɛ ɓibiikɛ na əəleni gɔ̃gɔna, sɩ a ma hana naʋaˈ, ma do thɩ̃aˈ.#Mat 17:20; 21:21; Mar 11:23 3A mɩ gbarakɛ ɩ̃ thɩ̃ fɛʋ a tɩnɛ bɔdara, a ɩ̃ tomɩ mɩ gbarakɛ ˈlaa wɩ thiə, sɩ a ma hana naʋaˈ, gele na taa mɩ bʋɔaˈ.
4Naʋ n hananɛ ha fʋrɛ, naʋ n bulole haar ka, naʋ na‐n gbugəˈ, naʋ na‐n nɩna dɩbara ga, aa‐n ka irəˈ, 5naʋ na‐n cʋʋ thɩ̃ɛɛkɛ na teanɩ kha gaaga, aa‐n yɩrna ɔɔda ga, aa‐n hana nɩ̃khiəˈ, aa‐n therna puureekɛ wɩ‐n cʋgʋʋnaˈ; 6gɩrɛ na saranaˈ na‐n daaraa ga, sɩ sobɔr n daaraa. 7Naʋ na‐n bo da‐n ɩɩ haanɩ dɩ para ga, a‐n hananɛ ha pɛrɛ thɩɛna fɛʋ, a‐n hananɛ nũ pɛrɛ thɩɛna fɛʋ, a‐n hananɛ ha fʋrɛ thɩɛna fɛʋ.
8Naʋ na hana khu paaraˈ. Thãgba tukɩr tir na phor na ka, thɩmɩɩ kpɩɩ mɩɩrɛ ga pɩrrɛ, jɩɩr na phor na ka; 9gɩdonɩ jɩ kuru sɩ hana, dɩ Thãgba tukɩr kuru sɩ‐n ti. 10Sɩ ɔbɔɔkɛ gɩrɛɛkɛ thʋnanɩ bɔr ka na ɩnɩ, gɩrɛ dɔnɩ dakuru na phor na ka. 11Ɔbɔɔkɛ mɩ kɔɔ donɩ bɩsaan, bɩsaanɛ mɩ‐n mɩɩ, dɩ bɩsaanɛ mɩ‐n kpɩɛr, dɩ mɔ̃ mɩ‐n kuurni na bɩnɛ, bɩsã khaara gɩ oti. Sɩ ɔbɔɔkɛ mɩ khɔnɩ pɩ, gɩrɛ dɔnɩ bɩsaanɛ pho marɛ ka. 12Nɩ̃kɛ sɩ‐n yɩrɛ thɩ̃ɛ mɔ̃ tibil n yɩnɩ thɩ̃ɛ hɩɩnʋna, sɩ biroo sɩ‐n yɩɛ, sɩ a bɔɔ dã gbelẽ gbelẽ sa yɩɛ. Nɩ̃kɛ dakuru sɩ jɩ, sɩ a bɔɔ dã ma jɩ gɛr vʋ̃ʋ mɔ̃kɛ Thãgba jɩ mɩnɩ.
13Gɛr gɩ gɩrɛ, thɩ̃ɛ yẽtherɩkɛ jɩlɛnɩ dʋɔn: Ha pɛrɛ, nũ pɛrɛ, naʋ, sɩ geleelerarakɛ dakɔ̃tɩ̃ɩkɛ jɔnɩ fɛʋ dʋɔn naʋra.
Currently Selected:
1 Korɛ̃tɩdara 13: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
