1 Korɛ̃tɩdara 12
12
Thu Phuu khaardasɔ
1Sɩ omɩna, ado gɩrɛ dɔnɩ Thu Phuu khaardasɔ gɩ, ge wer ma‐n ƴaal na‐n jɩ mɔ̃ gɩ hanaa ga. 2Nɩ jɩrɛ ɔbɔɔkɛ nɩ kɔɔ donɩ thɩldara, wɩ‐n kɔɔ haal nɛr dɩ na‐n kpaan ba, thɩlalaakɛ na‐n punoneni na mɩɩ nʋɔaˈ. 3Gɛr gɩ dɩ ma‐n so nar gɩrɛ ayɩ: Tibilikɛ na sɔnɩ nayɩ, ɩnɩ sʋɔn Jeju, ga do Thãgbaa Thurə gɩ thaˈ; dɩ tibil na puno na so nayɩ: Jeju dɔ Kɔ̃tɩn, saagado Thu Phuurə gɩ thaa ga.
4Khaarda caar dɩɩdɩɩ hale, sɩ Thu Phuu bɩɛllala gɩ the.#Rɔm 12:6–8 5Bul thɔ̃ caar dɩɩdɩɩ hale, sɩ Kɔ̃tɩ̃ bɩɛllala gɩ the. 6Thɩ̃ cʋʋ caar dɩɩdɩɩ hale, sɩ Thãgba bɩɛlla gɩɩkɛ n cʋɛnɩ thɩ̃ɛ fɛʋʋle dɩ ga‐n dã tɩbɩlala fɛʋ. 7Tɩbɩla fɛʋ bɩɛlbɩɛl n ˈlɛr Thu Phuurə thɩ̃ cʋʋrɛ, ga‐n bul tɩbɩla fɛʋ. 8Ʋkha n ˈlɛr kpɛsɛ thɩmɩɩr, dɩɩ the Thu Phuurə, ʋkha n ˈlɛr jɩ thɩmɩɩr, dɩɩ the Thu Phuu bɩɛllala. 9Ʋkha n ˈlɛr ha pɛrɛ, dɩɩ the Thu Phuu bɩɛllala, ʋkha n ˈlɛr kho kpɛɛ khaardaa, dɩɩ the Thu Phuu bɩɛllala. 10Ʋkha n ˈlɛr punone da‐n cʋʋna nɔ kpaa thɩ̃ɛ; ʋkha n ˈlɛr Thãgba tukɩr tir; ʋkha n ˈlɛr jɩɩr da‐n jɩna gɩrɛ thɛnɩ Thu Phuurə na gɩrɛ na thɛnɩ Thu Phuurə ga; ʋkha n ˈlɛr thɩmɩɩ kpɩɩ mɩɩrɛ dɩɩdɩɩ; ʋkha n ˈlɛr punone da‐n finə thɩmɩɩ kpɩɩkɛ n mɩanɩ. 11Thu Phuu bɩɛlla gɩ ˈlẽˈlẽˈlẽekɛ n cʋɛnɩ ga thɩ̃sɔɔkɛra fɛʋ, da‐n tɩnɛ tɩbɩla fɛʋ dɩɩdɩɩ mɔ̃kɛ a‐n ƴaalnɩ.
Thɩ̃ dɩɩrɛ tomɩ ɓãasɔra
12Gɩdonɩ mɔ̃kɛ tomɩr donɩ thɩ̃ bɩɛl sa hana ɓaanʋ dɩɩ jɔr, dɩ mɔ̃kɛ tomɩ ɓaanʋsɔɔle jɔrnɩnakɛ sɩ tomɩ bɩɛlla gɩ do, mɛ̃ gɩ ha na Kirisiti.#Rɔm 12:4–5 13A Juifisɔ ha sɩ, a wɩrɛ na dɔnɩ Juifisɔa wɛ, a dea wɛ, a waɩa wɛ, Thu Phuurəəkɛ dɔnɩ bɩɛl wɩ kɔɔ kpɛɛ sɛrɛ fɛʋ, sɩ debiro sɩ do tomɩ bɩɛl, dɩ sɛrɛ fɛʋ Thu Phuu bɩɛl sɩ kɔɔ yɔ.
14Gɛr gɩ tomɩr na do ɓã bɩɛlaˈ, sɩ ɓaanʋ jɔrɛ. 15Ado nɔɔ sor ayɩ, gɩdonɩ ɩna do nyɔ̃aˈ, ɩna do tomɩrɩda ga, gelelakɛ na cʋgʋʋrɛ da do tomɩrɩda geraa ya? 16Dɩ ado nũu sor ayɩ, gɩdonɩ ɩna do yirəˈ, ɩna do tomɩrɩda ga, gelelakɛ na cʋgʋʋrɛ da do tomɩrɩda geraa ya? 17Ado yire tomɩr do fɛʋ, sɩ nɩdaa kana ga ha? Ado nɩdaa tomɩr do fɛʋ, sɩ hʋ̃ nɩdaa kana ga ha? 18Mee Thãgba pɩɛr tomɩ ɓaanʋsɔ bɩɛlbɩɛl tomɩrra mɔ̃kɛ a‐n ƴaalnɩ. 19Dɩ ado fɛʋ dor tomɩ ɓã bɩɛl, sɩ kana tomɩr na ha? 20Gɛr gɩ gɩrɛ dɩ tomɩ ɓaanʋ jɔr, sɩ dɩ tomɩr do bɩɛl dɩbara. 21Yire na puno na so nyɔɔna nayɩ, ɩna hana ɔɔ ƴaalaa ga; dɩ yʋʋ gɩ a na so nɛɛra nayɩ, ɩna hana awɩ ƴaalaa ga. 22Sɩ tomɩ ɓã ƴɩrɛ n kanɩ ho sar wa hana fãga jɔjɔaˈ, sɩ thɩ̃ɛ gɩɩkɛ teananɩ hananɛ. 23Tomɩ ɓaanʋsɔɔkɛ sa‐n jɩɩnɩ therna bɔɔbɔaˈ, sɩ‐n jɩɛ cʋ gɩ jɔɔ; mɛ̃ asɩ tomɩ ɓãsɔɔkɛ na bʋɔnɔnɩ yɩraˈ n ka ˈlɛ cʋrɛ jɔɔ dɩ a‐n kar. 24Sɩ gɩrɛ kanɩ bɔr yɩr na‐n ˈlɛ mãˈ. Sɩ Thãgba kɔɔ gbɛbɩrɛ tomɩr a gba cʋʋr a pɛr tomɩ ɓaanaakɛ na jɩɛnɩ ˈlɛ cʋʋraˈ, 25dɩ mɛ̃ leere na hale tomɩrra ga, sɩ gɩ do mɛ̃ tomɩ ɓaanʋsɔ n jɩɩ hɩɩn kha na fɩl bɩɛl. 26Dɩ ado tomɩ ɓã bɩɛl na gaar bʋɔ, tomɩ ɓaanʋ fɛʋ n gaarɛ kha na ɔr, a wɩ cʋ tomɩ ɓã bɩɛl, tomɩ ɓaanʋsɔ fɛʋ n kãkarɛ kha na ɔr.
27Nɛr dɔ Kirisitii tomɩ, dɩ nɛr dɔ ɔɔ tomɩ ɓãsɔ dɩɩdɩɩ. 28Dɩ Thãgba pɛrɛ we gbɛbɩdaraa thɩ̃thɩɩn: Cacara, thɔ̃thɔna; balanyɔ, Thãgba tukɩr tidara; balãther, dɩɩrdara; agɩpɩ, nɔ kpaa thɩ̃ cʋʋdara; agɩpɩ, wɩrɛ hananɩ kho kpɛɛ khaardaa, na bubulo, na ƴɛ kʋla, na thɩmɩɩ kpɩɩ dɩɩdɩɩ mɩɩdara.#Efɛ 4:11 29Fɛʋ n dɔ thɔ̃thɔna kã? Fɛʋ n dɔ Thãgba tukɩr tidara kã? Dɩ fɛʋ n dɔ dɩɩrdara kã? Dɩ fɛʋ n cʋɛ nɔ kpaa thɩ̃ɛ kã? 30Dɩ fɛʋ n hana kho kpɛɛ khaardaa kã? Dɩ fɛʋ n mɩa thɩmɩɩ kpɩɩ kã? Dɩ fɛʋ n fien thɩmɩɩ kpɩɩ kã? 31Na‐n hanana khaardaasɔɔkɛ baannɩɩ ƴaal; sɩ ma nɩ narɛ hʋɛɛkɛ bʋɔnɔnɩnakɛ a ka.
Currently Selected:
1 Korɛ̃tɩdara 12: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
