1 Korɛ̃tɩdara 11
11
Khɛraa too Thãgba fʋɔr paar
1Nɩ dɔ ɩ̃ phɛldara mɔ̃kɛ mɩ donɩ Kirisitii phɛldaar.#1 Kor 4:16; Fili 3:17 2Mɩ‐n khɩɩ nɛr mɔ̃kɛ nɩ‐n jɩna mɩnɩ thɩ̃ɛ fɛʋra, na mɔ̃kɛ nɩ fʋnɩ ɩ̃ so mɔ̃kɛra mɩ kɔɔ mɩɛ nɩnɩ. 3Sɩ mɩ‐n ƴaalɛ nɩ jɛ dɩ Kirisiti dɔ yʋʋ konana fɛʋ, sɩ kuun do yʋʋ khɛrra, dɩ Thãgba do yʋʋ Kirisitira. 4Kuun wo kuunikɛ n suboni thɩ̃ɛ da‐n bɩɛlna Thãgba, agɩbo Thãgba tukɩrʋ a‐n ti, ʋrɛ dʋɔraanɩ yʋʋ a‐n beesi. 5Khɛr wo khɛrɩkɛ dakha n bɩɛlnɛnɩ Thãgba, agɩbo Thãgba tukɩrʋ a‐n ti na yʋ biire, ʋrɛ dʋɔraanɩ yʋʋ a‐n beesi, gɩdonɩ gɩ hʋrɛ yʋʋ a bel. 6Gɩdonɩ a khɛr na kɛɛ thɩ̃ɛ yʋʋra ga, dɔ a khabɩ yʋʋ; dɩ gɩdonɩ yicur thɩ̃ɛ gɩ khɛrra ado a khabɩ yʋʋ, agɩbo ado a bel yʋʋ, dɩ dɔ a na‐n kɛɛ thɩ̃ɛ yʋʋra. 7Kuun na teana a na‐n kɛa thɩ̃ɛ yʋɔaˈ, gɩdonɩ a‐n kuure kha na Thãgba a dona Thãgbaa i dʋbɩdaar, sɩ khɛr or, kuuni i dʋbɩdaar gɩ.#Jən 1:26–27 8Gɩdonɩ ga do khɛrɩ pa Thãgba ti kuunaˈ, sɩ kuuni pa a ti khɛr.#Jən 2:18–23 9Dɩ ga do khɛr dɔ nɔɔ dɩ Thãgba tiro kuunaˈ, sɩ kuun dɔ nɔɔ dɩ tiro khɛr. 10Gɛr gɩ Thãgbaa thɔ̃thɔ̃daar thusɔ dɔ kɩrʋ dɩ khɛr teena a hanana thɩ̃ɛ yʋɔ, gɩ nɩna dɩ bɩɛl hale a hananaa hʋɛ. 11Sɩ wo Kɔ̃tɩnɩ thɛthɛra, khɛr na hale a kuun na halaa ga, dɩ kuun na hale a khɛr na halaa ga. 12Gɩdonɩ mɔ̃kɛ khɛr thenɩ kuunna, ɔmɛ̃ khɛr do nɔɔ dɩ kuun hale, sɩ thɩ̃ɛ fɛʋ Thãgbara gɩ the.
13Nɛrɛɛ thɛthɛ n ka jʋrɛ hɩnɛ, gɩ teere kha khɛr na‐n bɩɛl Thãgba na yʋ biire ya? 14Ne wer na yɩɛrakɛ dɩɩ do ado kuun hana yʋsuune vʋɔlvʋɔl, yicuru gɩ‐n dʋʋraa; 15sɩ ado khɛr or hana gɩ dɩɩ dʋʋraa i dʋbɩdaa gaa? Gɩdonɩ Thãgba haarɛ yʋsuune vʋɔlvʋɔl gɩ dʋɔraa kɛɛdaa. 16Ado gɩ da tibillə dɩ na bana, sɛrɛ sa mɩlna thɩ̃ɛ thakaˈ, dɩ Thãgbaa we gbɛbɩdara gɩrakɛ dakha ga.
Mɔ̃kɛ Kɔ̃tɩnɩ dɩko khor hanɩ
(Mat 26:26–29; Mar 14:22–25; Lu 22:15–20)
17Mɩ ha nɛr thɩmɩɩ nɔ ʋrɛ wer, sɩ gɩrɛraakɛ ma punoni na khɩɩ naˈ dʋɔn gɩdonɩ, na‐n gbɛbɩ kha gɩ ka cʋɛ nɩ bɔr na‐n pɛraˈ, sɩɩ do nɩ ka puurore dɩ na‐n pɛr. 18Caca thɩ̃ɛ, mɩ kɔɔ nɩɛrɛ dɩ ɔbɔɔkɛ nɩ‐n gbɛbɩnɩ kha mɔ̃kɛ nɩ donɩ we gbɛbɩdara, leere n har anɩ thɩ̃thɩɩn, dɩ mɩ pɛ gɛr haar kho bɩɛl. 19Gɩdonɩ dɔ thʋ̃ kha wer n ha anɩ thɩ̃thɩɩn, dɩ mɛ̃ wa jɩ wɩrɛ dɔnɩ sobɔdara anɩ thɩ̃thɩɩn. 20Wo, ɔbɔɔkɛ nɩ‐n gbɛbɩnɩ kha pa bɩɛl, ga do Kɔ̃tɩnɩ dɩko nɩ‐n khoaˈ. 21Gɩdonɩ ɔbɔɔkɛ na‐n khonɩ dɩkɔra, tɩbɩla fɛʋ bɩɛlbɩɛl n kɔɔ mar dɩ wa‐n kho awɩ thɛthɛɛ dɩko, sɩ ʋ n toona kɔmɛr, dɩ taan na‐n kʋ ʋ. 22Na hana cɔna ka na khonɩ na‐n yɔna gaa? Dɩ agɩbo Thãgbaa we gbɛbɩdara nɩ‐n beesi na‐n pɛna wɩrɛ na hananɩ thɩ̃aˈ yicuru ya? Anye ma thʋ̃ na so nar? Ɩ̃ khɩa nɩ wɛ? Ma khɩɩ nɩ gelelaale weraˈ.
23Gɩdonɩ Kɔ̃tɩnɩ pa mɩ kɔɔ ˈlɛ gɩrɛɛkɛ mɩ kɔɔ dɩɩr nɩnɩ, gɩ sor ayɩ: Dɩtɩnɔɔkɛ wɩ kɔɔ liirnanɩ Jeju Kɔ̃tɩn, a kɔɔ gbaar buru, 24dɩ ɔbɔɔkɛ a kɔɔ fʋɔrnɩ Thãgba a pɛr pɩ, a kuure sa so ayɩ: “Gɩrɛ dɔ ɩ̃ tomɩɩkɛ cʋɔrɛnɩ anɩ sora; na‐n cʋɛ thakɛ a na jɛna mɩ.” 25Dɩ mɔ̃ wɩ khonɩ na pɩ, a gbaar thɩ̃ yɔnanɛ oti a so ayɩ: “Thɩ̃ yɔnanɛɛkɛ dʋɔn nɔ bɩɛl ʋlfɛ phaakɛ thɛnɩ ɩ̃ tɔmɩna; na‐n cʋɛ thakɛ a na jɛna mɩ bɔɔ fɛʋʋkɛ na‐n yɔ gɩnɩ.”#Thɩɩ 24:6–8; Jer 31:31–34 26Gɩdonɩ bɔɔ fɛʋʋkɛ nɩ‐n khonɩ buruukɛ, dɩ na‐n yɔna thɩ̃ yɔnanɛɛkɛ, Kɔ̃tɩnɩ khi nɩ‐n nɩna phaphapha a ɩna. 27Gɛr gɩ ʋrɛɛkɛ na khɔnɩ buruukɛ a na yɔna Kɔ̃tɩnɩ thɩ̃ yɔnaakɛ na fɩlɛɛkɛ na teanɩ kha ga, a na ˈlɛr sor Kɔ̃tɩnɩ tomɩra na Kɔ̃tɩnɩ tɔmɩna.
28Gɛr gɩ dɔ tibil n bəər ɔɔ bɩ̃ a hɩɩn, sɩ a kho buru a yɔna thɩ̃ yɔnanɛ. 29Gɩdonɩ ʋrɛɛkɛ khɔnɩ a yɔna sɩ aa jɩ dɩɩ do Kɔ̃tɩnɩ tomɩ ga, kɩɩlʋ a kho, a yɔna kɩɩlʋ a pɛr dɩbara. 30Gɛrra dɔ nɔɔ dɩ tomɩ sɩdara na khodara jɔr anɩ thɩ̃thɩɩn, dɩ tibil jɔjʋɔ na‐n khiir. 31Sɩ ado sɩ bəər asɩ bɩ̃ na hɩɩn, sa ˈlɛ kɩɩlʋaˈ. 32Sɩ ɔbɔɔkɛ sɩ‐n ˈlɛnɩ kɩɩlʋ, Kɔ̃tɩn n naarɛ sɩ, dɩ mɛ̃ sa ˈlɛ so heene nakha thɩdara ga.
33Mɛ̃ gɩ ɩ̃ omisɔ, ɔbɔɔkɛ nɩ‐n gbɛbɩnɩ kha nɩ kho dɩkɔ, nɩ jɩlɛ na pɩɛrɛ kha. 34Ado kɔmɛr fʋrɛ ntɛ a kɔɔ khɔ dɩkor ɔɔ cɔ, dɩ mɛ̃ na gbɛbɩ kha na‐n pɛ kɩɩlʋ dɩbara ga. A mɩ pɔ, gɛr ma gbɛbɩrɔ yɛ̃ thɩ̃sɔ.
Currently Selected:
1 Korɛ̃tɩdara 11: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
