1 Korɛ̃tɩdara 1
1
Fʋɔrɛ
1Mɛr Polɩkɛ Thãgba wenɩ dɩ ɩ̃ do Jeju Kirisitii thɔ̃thɔn mɔ̃ Thãgba tuni, na Sɔsɩtɛnɩkɛ dɔnɩ omine, 2thɔna sɛbɛɛkɛ a ha Thãgbaa we gbɛbɩdaraakɛ hanɩ Korɛ̃tɩ, kɛ dɔnɩ wɩrɛ leanɩ kpɩɩ a ha Jeju Kirisitira, kɛ Thãgba wenɩ dɩ wɩ do tibil phuusɔ mɔ̃kɛ wɩrɛ fɛʋʋkɛ hanɩ paar wo paar, kɛ n fʋɔrɛnɩ Jeju Kirisiti asɩ Kɔ̃tɩ̃ hanɩ, kɛ dɔnɩ awɩ Kɔ̃tɩ̃ na asɩda.#Th t t 18:1 3Thãgba asɩ Thɩ na Jeju Kirisiti Kɔ̃tɩn n hana nɩ ha ɩɩ, a jɛ nɩ dakha bʋɔra.
Thãgba khɩɩrɛ bɔnanɛnaakɛ Korɛ̃tɩdara ˈlɛnɩ
4Wire wo wire mɩ‐n khɩɩ ɩ̃ Thãgba anɩ sora, mɔ̃kɛ Thãgba kɔɔ jɩ nɩnɩ bʋɔra dɩɩ do Jeju Kirisiti dɔ nɔɔ. 5Gɩdonɩ ɔrra nɩ kɔɔ ˈlɛ ler thɩɛna fɛʋ dɩɩdɩɩkɛ dʋɔnnɩ, thɩmɩɩ mɩɩrɛ fɛʋ na jɩɩr fɛʋ, 6dɩɩ the gɩrɛraakɛ sobɔ so jɩɩr Kirisitira kɔɔ tɩnɩ kɩbɩ anɩ thɩ̃thɩɩn; 7dɩ mɛ̃ Thãgbaa khaarda bɩɛllakɛ na ɓɔr nɩ mɔ̃kɛ nɩ toonɩ gɩrɛ dɩ na‐n pɩɛr asɩ Kɔ̃tɩ̃ Jeju Kirisitii nɩrɔaˈ. 8Ɔr na cʋɛ nɩ dakha dɩ na tɩ gɩ dana khu paar, dɩ mɛ̃ na hana so paar asɩ Kɔ̃tɩ̃ Jeju Kirisitii wirə ga. 9Sobɔdaar Thãgba do, ɔrkɛ kɔɔ wɛ nɩnɩ nɩ dɔ kha kũu bɩnɔ na ɔɔ Bikuun Jeju Kirisiti asɩ Kɔ̃tɩ̃.
Mɔ̃kɛ Korɛ̃tɩ we gbɛbɩdara kuurni dɩɩdɩɩ
10Omɩna, asɩ Kɔ̃tɩ̃ Jeju Kirisitii i mɩ gba dɩ ma‐n phʋʋrna nɩ, dɔ na‐n mɩɩ kha nɔ bɩɛl, na‐n do leere n ha anɩ thɩ̃thɩɩnaˈ, sɩ nɩ fɔ kha bɔɔbɔɔ a hanana kpɩɛr bɩɛl na nɔ bɩɛl. 11Gɩdonɩ ɩ̃ omisɔ mɩ nɩrɛ thɩ̃ɛ anɩ pa dɩ Kʋloee too mɩɩ mɩ ayɩ, kɩla n har anɩ thɩ̃thɩɩn. 12A thɩɛna gaa nɛrɛ bɩɛlbɩɛlɩ pa ʋ n yɩ, ine wer Polɩda ɩnɩ do; ʋ n yɩ, ine wer Apolɔsɩɩda ɩnɩ do; ʋ n yɩ, ine wer Sefasɩɩda ɩnɩ do; ʋ n yɩ, ine wer Kirisitiida ɩnɩ do.#Th t t 18:24 13Tɩnɛ paar kɔɔ har Kirisitira kã? Wɩ kɔɔ kpar Pol kʋkʋ thɩrʋra anɩ sora kã? Dɩ agɩbo Polɩ i dɔ gɩrɛ wɩ gbanɩ a kpɛɛna nɩ nyʋɔnɔ yaa? 14Mɩ‐n khɩɩrɛ Thãgba gɩrɛraakɛ ma kɔɔ kpɛɛnɩ tibil nɛrɛra nyʋɔnɔ saagado Kirisipusi na Gayʋsɩ gaaga;#Th t t 18:8; 19:29; Rɔm 16:23 15dɩ mɛ̃ tibil na puno na so nayɩ ɩ̃ i wɩ kɔɔ gba a kpɛɛna nɩ nyʋɔnɔaˈ. 16Wo Sɩtefanasɩɩ cɔdara mɩ kɔɔ kpɛɛ nyʋɔnɔ, sɩ ado ntɛ halerakɛ dɩ ɩ̃ kɔɔ kpɛgʋʋ nyʋɔnɔ ma jaˈ.#1 Kor 16:15
Kpɛsɛrɛɛkɛ dɔnɩ thɩdaa na kpɛsɛrɛɛkɛ dɔnɩ Thãgbaada
17Gɩdonɩ Kirisiti na kɔɔ thɔ̃ mɩ ma‐n kpɛa tɩbɩla nyʋɔnɔaˈ, sɩ ma‐n mɩa tutugo bʋɔɔ thɩmɩɩ, sɩ ma‐n gba thɩmɩɩrɩkɛ thɛnɩ tibil kpɛsɛra a na mɩɩna gɩ ho ga ba cʋʋrɛ Kirisitii kʋkʋ thɩr gɩ debi gɩ do mɔlɔaˈ. 18Gɩdonɩ Kirisitii khi kʋkʋ thɩrʋra, ga thɩmɩɩ dor də̃bəəle wɩrɛraakɛ n buureni, sɩ ado sɛrra wɛ, kɛ ˈlɛnɩ taarɛ, Thãgbaa fãga gɩ do sar. 19Gɩdonɩ gɩ kherere Thãgbaa sɛbɛra ayɩ:
“Ma wɩɛlɛ kpɛsɛdaraa kpɛsɛ,
ma bũburone thɩ̃ jɩnaa jɩ.”#Eja 29:14
20Ka tɩɩ kpɛsɛ ha? Ka sɛbɛ kheredaar ha? Ka nɛnɛ̃ bɔɔkɛɛ thɩ̃ banadaar ha? Thãgba na kɔɔ cʋʋ kpɛsɛrɛɛkɛ dɔnɩ thɩdaa dɩɩ do də̃bəələə?#Jɔ 12:17; Eja 19:12; 33:18; 44:25 21Gɩdonɩ mɔ̃ Thãgbaa kpɛsɛ hanɩ, tibil na kɔɔ puno na ɔɔ thɛthɛɛ kpɛsɛ a jɩ Thãgba ga, mɛ̃ gɩ kɔɔ da Thãgba haar dɩ gba Thãgbaa thɩmɩɩ mɩɩrɛɛkɛ dɔnɩ də̃bəəlela a taana wɩrɛ pɩɛrnɩ haar; 22Juifisɔ jɩɩn wɩ‐n ƴaal, dɩ Gɩrɛkɩsɔ na‐n yɩrna kpɛsɛ ƴaalɛ, 23sɩ se wer, Kirisitiikɛ wɩ kɔɔ kpanɩ kʋkʋ thɩrʋra, ɔɔda sɩ‐n mɩɩ, dɩ nɛ baradaa gɩ do Juifisɔra, a dona də̃bəəle wɩrɛraakɛ na dɔnɩ Juifisɔaˈ; 24dɩ Kirisitira dɔ Thãgbaa fãga, na Thãgbaa kpɛsɛ, wɩrɛraakɛ Thãgba wenɩ, ado Juifisɔ wɛ, ado Juifisɔ waˈ. 25Gɩdonɩ gɩrɛ hɔnɩ Thãgbaa də̃bəəl tibil yinəna, gɩ hananɛ kpɛsɛrɛ a jɔ tibilida, dɩ gɩrɛ hɔnɩ Thãgbaa yɔɔ hana fãga a jɔ tibili fãga.
26Nɩ hɩnɛ omɩna, mɔ̃kɛ werɩkɛ Thãgba kɔɔ we nɩnɩ hanɩ: Anɩ thɩ̃thɩɩn, wɩrɛɛkɛ dɔnɩ tɩɩ kpɛsɛsɔ tibil yinənaakɛ wa kpɛraˈ, dɩ wɩrɛ dɔnɩ fãgadara wa kpɛraˈ, dɩ wɩrɛ dɔnɩ dakha nũfe wa kpɛraˈ; 27sɩ Thãgba phiire gɩrɛ tibil n wenɩ də̃bəəle ga‐n pɛ kpɛsɛdarara yicuru. Thãgba phiire gɩrɛ tibil na‐n thernanaˈ, ga‐n pɛ fãgadarara yicuru; 28Thãgba phiire gɩrɛɛkɛ na hananɩ irəˈ, na gɩrɛɛkɛ wɩ‐n beesini, kɛ na dɔnɩ thɩ̃aˈ, gɩ cʋʋ gɩrɛɛkɛ dɔnɩ thɩ̃ɛ gɩ debi gɩ do mɔlɔ thɩ̃ɛ, 29dɩ mɛ̃ tibil bɩɛllakɛ na puno na məbi Thãgbaa ƴɛra ga. 30Dɩ ɔɔ thɛthɛra dɔ nɔɔ dɩ nɩ ha gɩrɛ Jeju Kirisitira, kɛ dɔnɩ ʋrɛ Thãgba cʋʋnɩ dɩ do sar kpɛsɛrɛ, na fɩl sarʋ, na kpɩɩ leere, na birsere; 31dɩ mɛ̃ gɩ ha mɔna gɩ kherenɩ Thãgbaa sɛbɛra ayɩ: “Dɔ ʋrɛɛkɛ n məbəni, a na‐n məbi gɩrɛraakɛ Kɔ̃tɩn cʋʋnɩ.”#Jer 9:24
Currently Selected:
1 Korɛ̃tɩdara 1: LOBIRI
Highlight
Copy
Compare
Share
Want to have your highlights saved across all your devices? Sign up or sign in
Bible Society of Burkino Faso 1985.
