Mi Nɔnɔle 9
9
Wo Taboyi lé fɛti kɛlɛ
(Fw 12; Joz 5:10; 2 MNzfs 30; Lk 22:14–20)
1Wo fwile Éjipiti tɛrɛ la zuo lɛɛ fiézan lé moné vininzan nya Gakelebale we fe Moizi lɛ Sinai bwi la, 2yé é léé: Izraɛlnu ’wo Taboyi lé fɛti kɛlɛ a kɛlɛbléyi va. 3’Ka fɛti kɛlɛ a kɛlɛbléyi va, moné ’ko yi vu ta ziɛnzan nya. ’Ka a kɛlɛ nyanadi yiri zɔrɔ nya; ’ka a kɛlɛ Taboyi lé fɛti sɔnnénu valé kalé gɔnɔlawe faa yɛrama.
4Moizi we fe Izraɛlnu lɛ léé, ’wo Taboyi lé fɛti kɛlɛ. 5’Wo Taboyi lé fɛti kɛlɛ moné vininzan lé yi vu ta ziɛnzan nya nyanadi yiri zɔrɔ nya Sinai bwi la; Izraɛlnu a kɛlɛ dére faa lé Gakelebale a fe Moizi lɛ, a yɛrama.
6Mi kenu ana, wo ’ka tegele lo mi gale lé we ma, yé wo ’ka bɔa Taboyi lé fɛti kɛlɛle lɛ ’bɛ yi nya lo. ’Bɛ yi duo nya wo da Moizi valé Arɔn va, 7yé wo lé Moizi lɛ léé: Mi gale lé we ma, ko ’ka tegele lo. Mɛmalé ko ’ka bɔalɛ ko Bale ban ko bɔlunu va a banbléyi va loo? 8Moizi lé wo lɛ léé: ’Ka an bɛn, yé dé Gakelebale kalé we fe fɛan zo, yé maa fe ka lɛ.
9Yé Gakelebale we fe Moizi lɛ yé é léé: Bé fe Izraɛlmunu lɛ léé: 10dé ka va mi do léé, dé ka kulu va mi do léé, dé é ’ka tegele lo mi gale lé we ma, taa, dé é go ta baa wo lɛ, é a lé é Gakelebale tɔ bɔ Taboyi lé fɛti kɛlɛle nya. 11’Wo fɛti kɛlɛ a moné fiézan lé yi vu ta ziɛnzan nya. ’Wa kɛlɛ nyanadi yiri zɔrɔ nya. ’Wo Taboyi lé fɛ ble, buru lé lévɛn ’ka a va lo, a nya, ’bɛ valé bla nyanale nya. 12Té tu é kini a vafɛ do kpen ma lo; té wa wɔlɛ do kpen ’wii lo. ’Wo Taboyi lé fɛti sɔnnénu faa pa ma.
13Dé mian é ke é pla, yé é ’ka go lɛ tawo lɛ lo, dé é vuru Taboyi lé fɛti kɛlɛle ma, ’wo mi ’ko si alé munu va. Yi lé Gakelebale a dɔ, é ’ka da lɛ Bale ban lɛ a yi la lo, azama; yé mi ’ko é we dɔ ébo nwiin. 14Dé é kɛlɛ léé, bɛn a ka va, yé é sɔ a lɛ léé, ’é Gakelebale lé Taboyi lé fɛti kɛlɛ, é a lé é a kɛlɛ Taboyi sɔnnénu valé a gɔnɔlawe yɛrama. Dé mi a bɛn nyaoo, dé é a kabo lé né nyaoo, ka faa sɔnné a do.
Lati
(Fw 40:34–38; Jn 10:4, 27; 1 Kor 10:1–2)
15Yian nya lé wo Bale lé sɔkɔn dɔ, lati bua Bale lé sɔkɔn ta, zén‐ékeva sɔkɔn ta, é sia nyanadi fɔɔ bladi, ’té é a Bale lé sɔkɔn ta bélé kyɛ zo. 16Bléyi faa va, ’té é a ’bɛ zo; lati a é buale Bale lé sɔkɔn ta, yé é béli é ana bélé kyɛ zo. 17Dé lati si sɔkɔn ta yé é zi sia, Izraɛlnu éé zén‐é a zuo, yé Izraɛlnu ’wolé sɔkɔn dɔa fɛana lé lati dɔ, ana. 18Izraɛlnu woo zi sian Gakelebale dére ta, yé woo ’wolé sɔkɔnnu dɔa Gakelebale dére ta. Bléyi faa lé lati é vo sɔkɔn ta, Izraɛlnu éé voo é nyanale ’bɛ bléyi faa va. 19Dé lati mɔn Bale lé sɔkɔn ta, Izraɛlnu wo Gakelebale lɛdɔama yé wo ’ka ta soowɔlan monomono lo. 20Dé lati mɔn yi sɛ nya Bale lé sɔkɔn ta, Izraɛlnu lé sɔkɔn é vo é dɔle Gakelebale dére ta, yé wo ta soo Gakelebale dére ta. 21Dé lati vo é dɔle nyanadi fɔɔ bladi, yé é nwa bladi, wo ta soowɔlaan. Dé lati yiéyi do valé béli do kɛlɛ faa yé é si ana, wo é ta soowɔlaan. 22Dé lati vo é dɔle Bale lé sɔkɔn ta, dé yi fié léé, dé moné do léé, dé lɛɛ do léé, a nya, a zo duo lé Izraɛlnu lé kɔnnu éé mɔn‐o, ’té wo ’ka ta soowɔlaan monomono lo; yé dé é nwa, ’té wo é ta soowɔla. 23Wo ’wolé sɔkɔnnu dɔa Gakelebale dére ta, yé wo ta soowɔlaan Gakelebale dére ta; woo Gakelebale sɔnnénu paan, Gakelebale a fe Moizi lɛ fɛan zo, a zo.
Currently Selected:
Mi Nɔnɔle 9: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
