Mi Nɔnɔle 8
8
Kyɛbɔnu ma’lɛrɛle
(Fw 25:31–40; 27:20, 21)
1Gakelebale we fe Moizi lɛ, yé é léé: 2Bé fe Arɔn lɛ léma: Dé i bɔnénu dɔ fintran ’léé, é a lé bɔné sɔrafié san ’é bɔra a ’lɛzia. 3Arɔn a kɛlɛ a zo. É kyɛbɔnénu dɔra fintran ta a ’lɛzia, fɛan zo lé Gakelebale a fe Moizi lɛ, a zo. 4Wo fintran kɛlɛ kyan gyɛle nya, fɔɔ yé é bɔ a ganenu valé a vwinu ma, wo wo faa foli kyan nya; Moizi fintran kɛlɛ fɛan zo lé Gakelebale a kɛlɛbɛ gɔɔn a lɛ, a zo.
Lévinu pale é yɛrama
(Fw 29:1–37; Lév 8)
5Gakelebale we fe Moizi lɛ yé é léé: 6’I Lévinu si Izraɛlnu méléna, yé ’i wo kɛlɛ tegele. 7’I wo kɛlɛ tegele ’ko zo: ’i wenyané ’yibo’yi si, bé zén wo ta; ’wo ’wo kɔlɛ ma kyɛɛ faa bo ma; ’wo ’wolé varɔnu zuru, yé ’wo ’wobo kɛlɛ tegele. 8’Bɛ zuo, ’wo dirigɔné boroné do si, yee valé balebanfɛ lé wa no yifaama; burupun zima lé wa vɔɔ nyɔnɔ nya, yee lé. Yé ’i dirigɔné boroné bɛ si wenyané ’yibofɛ nya. 9’I Lévinu bié zén‐ékevasɔkɔn ’léé, yé ’i Izraɛlnu faa laa, ’wo zén ékeva. 10’I Lévinu bié Gakelebale ’lɛ, yé Izraɛlnu ’wo bɛnu pla Lévinu ta ma. 11Arɔn ’é Lévinu nɔla ’wo bɛyi valé ’wo bɛbola Gakelebale ’lɛ, blɛ lé Izraɛlnu a kɛlɛ Gakelebale lɛ, a nya; yé ’wo wo dɔ Gakelebale lé nyanamapazannu nya. 12É a lé Lévinu ’wo bɛnu pla dirigɔnénu ’wuo ta; yé ’bé do nɔ wenyané ’yibofɛ nya, yé ’bé do nɔ balebanwi lé wa kyɛ blé, a nya, Lévinu lé wenyané ’yibole we gi. 13’I Lévinu dɔ Arɔn valé é benu ’lɛ, yé ’i wo nɔla ’wo bɛyi valé ’wo bɛbola, blɛ lé wa kɛlɛ Gakelebale lɛ, a nya. 14’I Lévinu si Izraɛlnu méléna, yé Lévinu ’é kɛlɛ anzé nya ma. 15’Bɛ zuo Lévinu é dan zén‐ékevasɔkɔn gi nyanama pa lɛ. ’Ko zo lé ’i wo kɛlɛ tegele, yé ’i wo nɔla ’wo bɛyi valé ’wo bɛbola, blɛ nya. 16Naa, ’wo wo si Izraɛlnu méléna, yé ’wo wo nɔ an lɛ é ta lé kɔn‐an; maa wo si a va anzé nya, Izraɛlnu lé né vininzannu faa lɛgi. 17Naa, Izraɛlnu lé né vininzannu faa a anzé nya; dé é a munu nyaoo, dé é a winu nyaoo, yian nya lé maa Éjipiti tɛrɛlamunu lé né vininzannu faa gyɛ, ’bɛ yi nya lé maa wo pa é yɛrama anzé nya. 18Yé an Lévinu si Izraɛlnu lé né vininzannu lɛgi. 19Maa Lévinu nɔ Arɔn valé é benu lɛ é ta lé kɔn‐an Izraɛlnu méléna, wolé nyanama pale Izraɛlnu lɛ zén‐ékevasɔkɔn gi we ma, Izraɛlnu lé wenyané ’yibole we gi, yé wo Izraɛlnu tabin léé, dé Izraɛlnu bié fɛna sauun na, té gyɛ do ’é vɔ wo ma lo.
20We faa lé Gakelebale a fe Moizi lɛ Lévinu lé we ma, Moizi koo, Arɔn koo, Izraɛlnu faa koo, wa kɛlɛ. Izraɛlnu a kɛlɛ a zo, Lévinu zé nya. 21Lévinu ’wobo kɛlɛ tegele, yé wo ’wolé sɔnu zuru; Arɔn wo nɔla ’wo bɛyi valé ’wo bɛbola blɛ nya Gakelebale ’lɛ, yé é wolé wenyané ’yibo wo kɛlɛle tegele we ma. 22’Bɛ zuo Lévinu go zén‐ékevasɔkɔn gi wolé nyanama pale we ma, Arɔn valé é benu yuɛ va, Gakelebale dérean fe Moizi lɛ Lévinu lé we ma, a yɛrama. A zo lé wa kɛlɛ wolé we ma.
23Gakelebale we fe Moizi lɛ yé é léé: 24Lévinu lé we lo. Dé Lévinu lɛɛ kɛlɛ yɔ do wɔlɛ soru, é a lé wo faa é kun nyanama pale ma zén‐ékevasɔkɔn gi. 25Dé mi lɛɛ kɛlɛ yɔ fié wɔlɛ vu faa, yé ’é daan nyanama ’ko ma, té é a pa é dɛrɛ lo. 26É a lé é bɔ é bwenu va zén‐ékevasɔkɔn gi, fɛnu lé wo wo bɛ pa wo lee, yuɛpale wo ta we ma; naa, té ’wo nyanama pa é dɛrɛ lo. A zo lé é a lé bé kɛlɛ Lévinu lé nyanama pale we ma.
Currently Selected:
Mi Nɔnɔle 8: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
