Mi Nɔnɔle 10
10
Gɔɔlifu béli fié
(LvS 81:4–6; Jo 2:1, 15)
1Gakelebale we fe Moizi lɛ yé é léé: 2’I béli fié foli gɔɔlifu nya. Wo dan kɛlɛ lɛ ilé munu faa laafɛnu nya, yee valé wolé ta soowɔla fɛnu nya. 3Dé wo béli fɛn bléyian va, é a lé munu faa ’é zén ékeva i punma, zén‐ékevasɔkɔn ’léé. 4Dé wo béli do fɛn, minwiinzannu koo, Izraɛl mi wuru do do nwiinzannu koo, ’wo zén ékeva i punma ma. 5Dé ka béli fɛn plɛplɛ, munu lé wolé sɔkɔnnu ke é dɔle yirinwanazia, ’wo zi sia é vinin. 6Dé ka béli fiézan fɛn plɛplɛ, munu lé wolé sɔkɔnnu ke é dɔle yirinwana bɛyilazia, ’wo zi sia ’bɛnu zuo. Wo dan béli fɛn lɛ plɛplɛ wo nwale we ma. 7Ka dan béli fɛn lɛ é ziin munu zénle ékema we ma, naa, té ’ka ’bɛzé fɛn plɛplɛ lo. 8Arɔn benu lé wo ke Balebanzannu nya, wo ɛ bélinu fɛn ma. É dan kɛlɛ lɛ bélidɔwe lé a glɛ ’ka lo, a nya, ka valé ka kulunu zé nya. 9Tɛrɛ lé ka ke a ta, dé ka a gona guli dan lɛ ana, ka nyanézannu lé wo dan ka ma, wo va, ’ka bélinu fɛn plɛplɛ ma, yé ka sele é dan dɔ lɛ maa, Gakelebale kalé Bale gi, yé an dan ka si lɛ ka nyanézannu lee. 10’Ka béli fɛn ka ginanayinu valé kalé fɛti yinu la, ’té ka balebanwi kyɛ blé Gakelebale lɛ, ’té ka Bale bɔvɔ sarakanu boo, yé wo dan ka sele dɔ lɛ maa, kalé Bale gi. Maa a Gakelebale, kalé Bale nya.
Wo si Sinai
(Mi N 9:17–23; 2 BDWS 1:6–8)
11A lɛɛ fiézan lé moné fiézan lé yi yɔ dozan nya, lati si Gakelebale lé sɔkɔn lé, wenayefɛ ke a gi, a ta. 12Yé Izraɛlnu nwa Sinai bwi la yé wo zén tawole va, tawobɛ lé wa gɔɔn wo lɛ, a yɛrama. Lati dɔ Paran bwi la. 13Wo ta vininzan soowɔla, dére lé Gakelebale a fe Moizi lɛ, a yɛrama.
14Judanu lé drapo soowɔla é vinin, ’té alé sunya palu a wo va. Aminadab be Nasɔn a Juda lé sunya palu nwiinzan nya. 15Suaa be Nétanéɛl a Isakaanu lé sunya palu nwiinzan nya. 16Élɔn be Éliab a Zabulɔnnu lé sunya palu nwiinzan nya.
17Wo Bale lé sɔkɔn fwi, yé Gɛɛsɔn benu valé Mérari benu sɔkɔn kɔné si yé wo goan.
18Rubɛnnu lé drapo soowɔla, yee valé élé sunya palunu nya. Rubɛnnu lé sunya palu nwiinzan a Sédéuu be Élisuu nya. 19Siméɔnnu lé sunya palu nwiinzan a Surisadai be Sélumiɛl nya; 20Gadnu lé sunya palu nwiinzan a Déuɛl be Élizaf nya.
21Kéat munu fɛna sauun lé fɛnu si yé wo goan. Wo sɔkɔn dɔ, ’té woo ’wo bɔlunu lɛbɛn‐é.
22Éfraimnu lé drapo soowɔla, yee valé élé sunya palunu nya. ’Té Amiud be Élisama ɛ ke Éfraim lé sunya palu nwiinzan nya. 23Manasénu lé sunya palu nwiinzan lé ke Pédaasuu be Gamliɛl nya. 24Bɛnjamɛnnu lé sunya palu nwiinzan lé ke Gidéoni be Abidan nya.
25Dannu lé drapo soowɔla, yee valé élé sunya palunu nya; wo ɛ ke wo faa nyaana nya, wo zi bin sunyanu nya. Dan lé sunya palu nwiinzan a Amisadai be Aiézɛɛ nya. 26Azɛɛnu lé sunya palu nwiinzan a Okran be Pagiɛl nya. 27Néfitalinu lé sunya palu nwiinzan a Éan be Aira nya.
28Izraɛlmunu tawo wolé sunyapalunu ma fɛan zo, yee lé ke bɛ; wo tawo ’bɛ zo.
29Moizi lé é na ti Madian mi Réuɛl be Obab lɛ léé: Tɛrɛ lé Gakelebale a nɔle we fe ko lɛ, ana lé ko dan go lɛ bɛ. ’I da, kaa go, yé ko dan wezin kɛlɛ lɛ i lɛ, naa, Gakelebale a fe léé, é dan wezin kɛlɛ lɛ Izraɛl lɛ. 30Obab a zi pa a lɛ léé: Maa ’ka go lo; naa, maa dan go lɛ anlé tɛrɛ la, an yaatɛrɛ la. 31Yé Moizi léé: Ilé zanté; té i si ko va lo. Fɛana lé ko sɔkɔnnu dɔa, i wona dɔɔ, ’bɛzama. ’I kɛlɛ kolé zigɔɔnzan nya. 32Yé dé i da ko va, wezin lé Gakelebale é dan a kɛlɛ lɛ ko lɛ, é dan kɛlɛ lɛ i ginanamawe nya é ziin.
33Wo si Gakelebale lé gɔ nwiin yé wo tawo yi yaa. Gakelebale lé gipawe pagikɛsu go wo ’lɛ. Wo tawo yi yaa wo nyanana naginile we ma. 34Wo ta soowɔla aan wo, Gakelebale lé lati a wo nwiin yiéyi bléyi faa va.
35Dé gipawe pagikɛsu nwa bléyian va, Moizi léé: Gakelebale, ’i nwa, i nyanézannu ’é kini ékema, yé i zapazannu ’wo fwi i ’lɛ. 36Yé dé wo kɛsu dɔra, é léé: Gakelebale, ’i da i pa gi, Izraɛlnu wuru é wuru méléna.
Currently Selected:
Mi Nɔnɔle 10: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
