Mi Nɔnɔle 36
36
Lomu lé zarablewe
(Mi N 27:10–11; Joz 17:3–4)
1Jozɛfu bɛn gizannu, Manasé be Makii be Galaad lé kɔn ’léézannu bié Moizi valé Izraɛlnu kulunu lé kɔn ’léézannu va, yé wo we fe wo lɛ. 2Wo léé: Gakelebale bii, kozan, béli dɔ léé, ’é zaratɛrɛ nɔ Izraɛlnu lɛ ’munnu zunle nya. Gakelebale lé kozan lɛ léé, ’é ko bwe Sɛlofesad zara nɔ a lunu lɛ. 3Naa, dé é kɛlɛ léé, wo Izraɛl bɛn bɛ gi mi si, ’té wo kolé zara si ko tranu zé va, yé bɛn lé wo ’bɛ si, ’té wo ’bɛnu lé zarafɛ taa pa a nya. A zo lé zara lé ko a ye ’munnu zunle nya, a ke é dan san lɛ ko lee. 4Yé dé Izraɛlnu lé lɛɛ yɔ fié wɔlɛ vuzan bɔ, bɛn lé wo ’bɛ si, wo ’bɛnu zara taa pa a nya, yé wa si ko tranu zé va.
5We lé Gakelebale a fe, Moizi a fe Izraɛlnu lɛ. Yé é léé: Jozɛfu benu kulunu zé a néné. 6We lé Gakelebale a fe Sɛlofesad lunu lé we ma, yee lé ke ’ko: dé é sɔ wo lɛ léé, wo bo‐oo boan sié, a se a wo lɛ, ’té dé gɔnézan a wo tranu gɔnɔlazan nya. 7Dé é a zaraoo zaraan nya Izraɛlnu va, té é si bɛn do va yé wa nɔ bɛn bɛ lɛ lo, naa, Izraɛlnu faa ’é vo é nyanale ’wo tranu zaratɛrɛ la. 8Yé blɛnnu faa lé, wo zara ke Izraɛlnu va, é a lé wo bo si ’wo tranu gɔnɔla, léé, Izraɛlnu faa do do ’wo nyana ’wo tranu zaratɛrɛ la. 9Dé é a zaraoo zaraan nya, té é si bɛn do va yé wa nɔ bɛn bɛ lɛ lo, Izraɛlnu bɛnnu ’wo vo é nyanale ’wolé zara ta do do.
10We lé Gakelebale a fe Moizi lɛ, Sɛlofesad lunu tawo a ta. 11Sɛlofesad lunu Makla koo, Tiisa koo, Ogla koo, Milka koo, Noa koo, wo ’wo ti bwe lé nénu si; 12wo bo si Jozɛfu be Manasé kulu gi munu va, yé wolé zaratɛrɛ vo ’wo tranu gɔnɔ gi.
13Bélidɔwenu valé ’é sɔnnénu lé Gakelebale a nɔ Izraɛlnu lɛ Moizi lɔlu nya, Moab lé fɛna pɛblɛɛna, Juudɛn yuu sɔnɔ, Jériko yara, yee lé ke bɛ.
Currently Selected:
Mi Nɔnɔle 36: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
