Bélidɔwesɛbɛ Fiézan 1
1
Moizi kun Izraɛlnu lé tawole zuo fele ma
(Mi N 10:11)
1Dérenu lé Moizi a fe Izraɛlnu lɛ, ’té wa Juudɛn bwi la, a zi ’ko, fɛna pɛblɛɛna, Sufi yara zia, ’té wa Paran koo, Tofɛl koo, Laban koo, Asérɔt koo, Di‐Zaab koo, wo méléna, wo lé ke ’ko. 2Dé wo si Orɛb yé wo gié Séii gɔ lé zi ta yé wo bɔ Kadɛs‐Baanéa, wo tawo yi vu ta do. 3Wolé tawo lɛɛ yɔ fiézan gi, ’bɛlé moné vu ta dozan lé yi vininzan nya, Moizi we fe Izraɛl lé nénu lɛ. We faa lé Gakelebale a pa a ’léé, léé, ’é a fe, é a fe wo lɛ. 4Amorénu nwiinzan Sioni lé éé nyanaan Esibɔn, ’bɛ valé Bazan munu nwiinzan Ɔg lé éé nyanaan Asitarɔt valé Édréi, Izraɛlnu guli dan wo va yé Izraɛlnu wo kele faa yé we ’ko kɛlɛ. 5Izraɛlnu a Juudɛn yuu zi ’ko, Moab tɛrɛ la yé Moizi bélidɔwe ’ko gi fele péli sia wo lɛ yé é léma:
6Gakelebale, kolé Bale lé kaa lɛ Orɛb a yi la léé, kaa nyanale gɔ ’ko ma sɔ. 7É léé: ’Ka nwa, ’ka zi sia. ’Ka go Amorénu lé gɔ valé é zi tɛrɛ faa la; fɛna pɛblɛɛna koo, gɔ ma koo, pɛngurunu koo, yirinwana bɛyilazia koo, wɛyi vazia koo, Kanaan munu lé tɛrɛ valé Liban tɛrɛ koo, ’ka go wo faa na, fɔɔ yé ka bɔ yuu blɛn Yufrat ma. 8É lé yi la léé, ’é tɛrɛ ’ko faa nɔ ka lɛ; ’ka go, tɛrɛ lé ’yee Gakelebale a fe ébo ’nyɔɔnle nya léé, é dan a nɔ lɛ ka tranu Abraam koo, Izak koo, Jakɔb koo, wo lɛ, wo valé ’wo kulunu lɛ, ’ka go a si kazé nya.
Wo weblemunu si a va
(Fw 18:13–26)
9’Bɛ yi la maa a fe ka lɛ léé, maa do kpen ’ka bɔa ka kɔné sile lɛ lo. 10Gakelebale, kalé Bale, ka fan, yé kyɔ ka a kiɛre bélé lai monénénu zo. 11Gakelebale, ka tranu lé Bale, ’é ka fan kiɛre é ziin gɔnɔ wuru soru ma, yé ’é ka drɔɔ vo, é a fe ka lɛ fɛan zo, a zo ma. 12Wo ka bɛ pa an lee, ’bɛ koo, ka kɔné valé kalé zavɔlenu koo, maa do kpen é bɔa ’bɛ sile lɛ kaa? 13Munu lé ke wedɔɔzannu valé wuoatazannu nya, ’té kalé munu wo dɔɔ, ’ka wo si ka bɛn lɛgɔnɔnu gi yé maa dan wo dɔ lɛ ka nwiinzannu nya. 14Yé ka lé an lɛ ’bɛ yi la léé, we lé maa a fe bɛ, é a é zima. 15Yé maa mi blɛnnu si ka bɛn lɛgɔnɔ faa gi, ’té wa wedɔɔmunu nya, ’té munu wo dɔɔ, yé maa wo dɔ ka nwiin; maa wo kɛlɛ mi wuru soru soru koo, mi yɔ soru soru koo, mi yɔ fié wɔlɛ vu vu koo, mi vu vu koo, wo nwiinzannu nya, yé maa a se kɛlɛ wo lɛ ka bɛn lɛgɔnɔnu gi. 16’Bɛ yi la maa lé kalé weblemunu lɛ léé, ’wo tɔné dɔ ’wo bwenu lɛ; dé we bɔ mi do valé é bwe mélénaoo, dé é bɔ mi do valé bɛn do mélénaoo, ’wa yuɛ gi bo tegele. 17Dé wa we blena, té wo glɛ dɔ munu gi lo; ’wo tɔné dɔ mi kiéné lɛ bélé fɛan zo lé woo tɔné dɔa mi blɛn lɛ, a zo; té wo kana mi do kpen lee lo, naa, weblele a Bale zé nya. Dé we do wo kele, ’wo da a nya an va yé maa a gi ’ma. 18’Bɛ zoan maa fe ka lɛ yi la loo? Yé maa ka kɛlɛwe faa gɔɔn ka lɛ.
Wo mi vu ta fié pa zia Kanaan tɛrɛ naginile we ma
(Mi N 13; LvS 106:24–26)
19Ko si Orɛb, yé bwi blɛn lé a ta éé kana zén‐é mi gi, ’té ka a ye ’ko, ko gié ana fɛfaana; ko Amorénu lé gɔ ma zi sia, Gakelebale, kolé Bale a fe ko lɛ fɛan zo, a zo, yé ko bɔ Kadɛs‐Baanéa.
20Yé maa lé ka lɛ léé, ka bɔ Amorénu lé gɔ lé Gakelebale, kaalé Bale, a nɔ kaa lɛ, a ma. 21Ka yua, sin, Gakelebale, kalé Bale tɛrɛ nɔ ka lɛ; ’ka go, ’ka a si kazé nya, Gakelebale, ka tranu lé Bale a fe ka lɛ fɛan zo, a zo; té ka kana lo; té di ’é kini ka gi lo. 22Yé ka faa da maa va, yé ka léé, ’wo munu nwunvɔ ’wo ’lɛ, yé ’wo go tɛrɛ nagini, yé dé zi kyɛn ta lé ’wo dan gié lɛɛ? yé dé fla kyɛnnu ma lé ’wo dan bɔ lɛɛ? yé ’wo da a zuo fe ’wo lɛ. 23Yé maa a ye léé, ’bɛ a é zima; yé maa mi vu ta fié si ka va, ka bɛn lɛgɔnɔnu gi do do. 24Wo go, yé wo gɔ gié yé wo bɔ pɛnguru lé wa laama Esikɔl, ana, yé wo ana nagini. 25Yé wo tɛrɛ ’ko la féifɛnu si yé wo da a nya ko lɛ; yé wo ana tɛrɛlawe zuo fe ko lɛ yé wo léé, tɛrɛ lé Gakelebale, kolé Bale a nɔ kaa lɛ, é a tɛrɛ zima nya. 26Naa, é ’ka sɔ lɛ ka lɛ léé, ’wo go ana lo, amalé dére lé Gakelebale, kalé Bale a fe ka lɛ, ka sɔn vɔ a ma. 27Ka gun gyɛ kalé sɔkɔnnu gi, yé ka léé, ’wo za a Gakelebale gi, amalé é ’wo si Éjipiti tɛrɛ la, léé, ’é ’wo nɔ Amorénu lɛ, yé ’wo kulu ’é ga. 28Yé ka léé, ’wo go ana kaa? ’Wo bwenu léé, ana munu a blɛɛn yé wo torole mini kaa ta; ana flanu a blɛn yé wo zi gɔrɔ a é torole fɔɔ wo bɔ la ma, yé ’wo Anak munu ye ana é ziin, amalé ’wo fuu faa si ’wo ta. A zoan ka fe an lɛ loo? 29Yé maa lé ka lɛ léé, té ka gi nyɛ ’é kini lo; té ka kana wo lee lo. 30Gakelebale, kalé Bale lé éé tawoo ka ’lɛ, yeebozen é dan ka ta guli dan lɛ, we faa lé é a kɛlɛ ka yuɛ va Éjipiti tɛrɛ la, a yɛrama; 31yé bwi gi é ziin, ka a ye léé, Gakelebale kalé Bale ka si bélé mi é élé né sié fɛan zo, a zo, ta faa lé ka wo, a gi fɔɔ yé ka bɔ fɛkona ’ko. 32Dé Gakelebale, kalé Bale ’bɛ faa kɛlɛoo, ka ’ka pa lɛ ’bɛ ta lo; 33kalé Bale lé éé goo ka ’lɛ yifaama ka nyanana nagini lɛ, ’té é a ka ’lɛ é béli kyɛ gi, ’té éé zi gɔɔn‐an ka lɛ, ’té é a ka ’lɛ é yiéyi lati gi, ka bli ’ka pa lɛ ’bɛ lɛ lo.
34Gakelebale kalé gun gyɛle ’ma. A bli fli yé ébo ’nyɔɔn yé é léé: 35Tɛrɛ zin lé maa anbo ’nyɔɔn léé, maa dan a nɔ lɛ wo tranu lɛ, bléyi ’ko vamunu nyané ’ko, wo va mi do kpen ’ka dan ’bɛ tɛrɛ ye lɛ lo, 36’té dé é ’ka Jéfuné be Kalɛb nya lo; é dan a ye lɛ, yé tɛrɛ lé é tawo a ta, maa dan a nɔ lɛ yee valé élé nénu lɛ; é maa, Gakelebale, dére tawe kɛlɛ tegelee, ’bɛzama. 37Kalé we ma lé Gakelebale bli fli maa ma é ziin, yé é léé, maa é ziin, maa ’ka dan wɔra lɛ ana lo. 38É léé, ’é wuozan, Nɛn be Jozué, é dan go lɛ ana; é a lé maa a dɔ gligli, naa, yee lé we ma lé Izraɛl munu é dan tɛrɛ ’ko ye lɛ ’wozé nya. 39Kalé né kiénénu lé ka wo mawe fe léé, wo dan kɛlɛ lɛ gulizarafɛnu nya, wo ɛ dan wɔra lɛ ana; ka benu lé wo ’ka wezin valé wenyané va sina dɔɔa tan lo, wo ɛ dan wɔra lɛ ana; maa dan a nɔ lɛ wo ɛ lɛ; é dan kɛlɛ wo ɛ zé nya. 40Naa, ’kaa, ’ka nɔla, ’ka go bwi gi Wɛyi Sɔɔn vazia.
41Yé ka lé an lɛ léé, ’wo wenyané kɛlɛ Gakelebale ma; ’wo dan go lɛ yé ’wo dan guli dan lɛ, Gakelebale, ’wolé Bale a fe ’wo lɛ fɛan zo, a zo. Yé ka faa kalé gulidanfɛnu si yé ka boyuɛvawe kɛlɛ yé é dɔ ka gi léé, ’wo go gɔ mazia. 42Gakelebale lé an lɛ léé, maa fe ka lɛ léé, té ka go guli dan lo; yee ’ka ka va lo; té ka nyanézannu ’é ka gyɛ é pla lo. 43Maa a fe ka lɛ, naa, ka ’ka ka tɔné dɔ lɛ lo; dére lé Gakelebale a fe, ka a lɛgama, yé ka bli si kabo lɛ yé ka go gɔ mazia. 44Yé Amorénu lé wo ke é nyanale gɔ ’ko ma, wo da guli dan lɛ ka va, yé ka da ka nwunzi lé zɔrɔfuru nya; wo ka gyɛle sia Séii tɛrɛ la, fɔɔ yé ka bɔ Ooma. 45Ka da ka pa gi yé ka wuvɔ Gakelebale lɛ; naa, Gakelebale ’ka é tɔné dɔ lɛ ka dére lɛ lo, é ’ka ka ban lɛ é tɔné nya lo.
46Ka vo Kadɛs, yé ka mɔn ana é baba.
Currently Selected:
Bélidɔwesɛbɛ Fiézan 1: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
