Mi Nɔnɔle 35
35
Lévinu lé flanu
(Joz 21; 2 BDWS 12:19)
1Gakelebale we fe Moizi lɛ Moab lé fɛna pɛblɛɛna, Juudɛn yuu sɔnɔ, Jériko yara. 2É léma: ’Ka fe Izraɛlnu lɛ léma: Zara lé wo dan a ye lɛ bɛ, ’wa va fla kenu nɔ Lévinu lɛ, wozé nyanana nya. Yé é ziin, ’wo fla ’konu gini ma tɛrɛ nɔ wo lɛ. 3Flanu ’é kɛlɛ wo nyanananu nya, yé fla gini ma tɛrɛ ’é kɛlɛ wolé trubɛnu blena nya, wolé fɛnu valé wolé trubɛnu faa zé nya. 4Flanu lé ka dan a nɔ lɛ Lévinu lɛ bɛ, wo gini ma tɛrɛnu ’é si fla zi gɔrɔ ma yé é a zi lɛ sɔɔ mɛtrɛ wuru fié yɔ soru. 5’Ka fla zi dan; yirinwanazia zé ’é kɛlɛ kilo do; yirinwana bɛyilazia zé ’é kɛlɛ kilo do; yé yirinwana bɛbolazia zé ’é kɛlɛ kilo do. Fla é vo a méléna. Yé yirivɔnazia zé ’é kɛlɛ kilo do. Wolé flanu gini ma tɛrɛnu lé ke bɛ.
6Flanu lé ka dan wo nɔ lɛ Lévinu lɛ, wo va fla suiɛdo ’é kɛlɛ mi yɔɔlaflanu nya; flanu lé migyɛzannu é bɔa yɔɔle lɛ ana, wo nya. Yé ’ka fla yɔ fié wɔlɛ fié nɔ wo lɛ ’bɛnu ta loru. 7Flanu faa lé ka dan a nɔ lɛ Lévinu lɛ, fla yɔ fié wɔlɛ sɔraa lé, ’é valé wo gini ma tɛrɛnu nya. 8Flanu lé ka dan a si lɛ Izraɛlnu lé flanu va yé ka a nɔ wo lɛ, munu lé wozé ke di, é a lé wa nɔ kiɛre, yé munu lé wozé ’ka di lo, é a lé wa nɔ sɛ. Bɛn do do faa lé flanu a kiɛre fɛan zo, é a lé wa nɔ Lévinu lɛ a ’léé yɛrama.
Mi yɔɔlaflanu
(2 BDWS 4:41–43; Joz 20)
9Gakelebale lé Moizi lɛ léma: Bé fe Izraɛlnu lɛ léma: 10Dé ka Juudɛn yuu kini yé ka bɔ Kanaan tɛrɛ la, 11’ka flanu pa, flanu lé wo dan kɛlɛ lɛ ka yɔɔnanu nya, wo nya. Mi lé é ’ka mi gyɛ lɛ ébo yuɛ va lo, fla ’ko ’é kɛlɛ a yɔɔna nya. 12Fla ’konu é dan kɛlɛ lɛ migyɛzan yɔɔna nya mi nyɛ lɛgipazan lee, léé, té wa gyɛ é dɔle weblezannu ’lɛ lo. 13Flanu lé ka dan wo nɔ lɛ wo lɛ bɛ, wo va fla suiɛdo é dan kɛlɛ lɛ mi yɔɔlaflanu nya. 14’Ka fla yaa nɔ wo lɛ Juudɛn ’lɛzia, yé ka fla yaa nɔ wo lɛ Kanaan tɛrɛ la. Wo ɛ dan kɛlɛ lɛ mi yɔɔlaflanu nya. 15Fla suiɛdo ’konu é dan kɛlɛ lɛ Izraɛlnu koo, bɛnnu koo, munu lé wo ke é nyanale ka méléna koo, ka yɔɔnanu nya. Ana lé migyɛzannu faa lé wo ’ka mi gyɛ lɛ wobo yuɛ va lo, wo dan yɔɔ lɛ.
16Dé é kɛlɛ léé, mi do é bɔluzan bla foliɛwɔlɛ nya yé é ga, ’té migyɛzan lé; ’wa gyɛ ’é ga ma. 17Dé mi do gɔlɛ sia yé é mi gyɛ a nya yé é ga, ’té migyɛzan lé; ’wa gyɛ ’é ga ma. 18Dé mi do yili sia, dé é mi gyɛ a nya yé é ga, ’té migyɛzan lé; ’wa gyɛ ’é ga ma. 19Mi nyɛ lɛipazannu ’é migyɛzan gyɛ; dé wo kee a nya yian ma, ’é a gyɛ ma. 20Dé mi do za a é bɔlu do gi yé é a nyunu, dé ’bɛ kan lo, dé we kyɛn do ɛ ke ana, yé é fɛ do vuli a va yé é ga ’bɛ we ma, 21dé ’bɛ kaan lo, dé é fɛ duun a lɛ a nyané nya ’é gi yé é ga, ’té migyɛzan lé; mi nyɛ lɛipazan a gyɛ ’é ga ma; dé wo kee a nya yian ma, ’é a gyɛ ma.
22Naa, dé mi do é bɔluzan nyunu kele, ’té a za ’ka a gi lo, dé ’bɛ kaan lo, dé é fɛ do vuli a va ’té we kyɛn ’ka wo méléna lo, 23dé ’bɛ kaan lo, dé é fɛ do duun a lɛ é tanyila yé é kɛlɛ ga nya, ’té a za ’ka a gi lo, ’té é ka we naané ginina a vazia lo, 24bélidɔwenu lé é a lé wo migyɛzan ’ko valé mi nyɛ lɛgipazan lé we ble wo yɛrama, wonu lé ke ’ko: 25É a lé munu é migyɛzan si mi nyɛ lɛgipazan lee, yé wa pa zia é ziin yɔɔlafla lé é go a ta bɛ, ana, yé é vo ’bɛna fɔɔ yé Balebanmunu ’lɛzan lé wo Bale ’lɛnyɔnɔ zén a nwiin, yé ’bɛ é ga. 26Dé migyɛzan si é yɔɔlafla la 27yé wo kee nyɛ lɛgipazan nya, ’té é a yɔɔlafla gini ma, yé ’bɛ a gyɛ, ’té migyɛwe ’ka ’bɛ nwiin lo. 28Naa, é a lé migyɛzan é vo é nyanale é yɔɔlafla la fɔɔ yé Balebanmunu ’lɛzan é ga. Balebanmunu ’lɛzan gale zuo, é bɔalɛ léé, é da ébo lé fla.
29Wenu lé é ke ka kululawenu nya, ka valé kalé nénu zé nya, ka nyanana faa na, yee lé ke bɛ.
Nyɛ lɛgipazan
(WP 9:5–6; Fw 21:12–14)
30Dé mi do é bɔlu do gyɛ, dé anayezannu kɛlɛ, ’wo migyɛzan gyɛ wo dére ta. Té wo ga dɔ mi nwiin wenayezan do dére ta lo.
31Migyɛzan lé a gyɛ yara lé, té ka a tabole nyi si lo. Naa, ’wa gyɛ, ’é ga. 32Balebanzan gale ’lɛ, té ka a tabole nyi si yé é zi ye yé é si yɔɔlafla ta yé é nyana élé fla é ziin lo. 33Tɛrɛ lé ka nyana ana, té ka a sɛrɛ lo, naa, mi nyɛ éé tɛrɛ sɛra. Nyɛ lé wa zana tɛrɛ la bɛ, a siafɛ ’ka lo, fɔɔ ’té mi lé é mi gyɛ, ’té wa gyɛ é wo. 34Tɛrɛ lé ka dan nyana lɛ a ta bɛ, ana lé maa dan nyana lɛ ka méléna; té ka a sɛrɛ lo. Naa, maa a Gakelebale lé éé nyanaan Izraɛlnu méléna, a nya.
Currently Selected:
Mi Nɔnɔle 35: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
