Mi Nɔnɔle 34
34
Kanaan tɛrɛ glɛnu valé a gulibɛ
(Ézék 47:13–21)
1Gakelebale lé Moizi lɛ léma: 2Bé fe Izraɛlnu lɛ léma: Dé ka bɔ Kanaan tɛrɛ la, ana tɛrɛ é dan kɛlɛ lɛ kalé zarafɛ nya. Kanaan tɛrɛ lé. A glɛnu lé ke ’ko:
3A yirinwana bɛyilazia glɛ éé sian Tisɛn bwi la, Édom sɔnɔ. ’Bɛ gi léé, kalé yirinwana bɛyilazia glɛ éé sié Wɛminiélɛ Wɛyi ma yé éé giéan yirinwanazia; 4yé éé nɔlaa Akrabim gɔ yirinwana bɛyilazia, é gié Tisɛn fɔɔ yé é bɔ Kadɛs‐Baanéa yirinwana bɛyilazia, yé é go gole nya Asaa‐Adari yé éé giéan Asimɔn zia; 5a péli sia Asimɔn yé éé nɔlaan fɔɔ yé é bɔ Éjipiti lé ’yiyoro plɛplɛ ma, yé é bɔ wɛyi ma.
6Kalé yirivɔnazia glɛ lé ke Wɛyi blɛn nya. Yee ɛ ke kalé yirivɔnazia tɛrɛ glɛ nya.
7Kalé yirinwana bɛbolazia tɛrɛ glɛ lé ke ’ko: é sia Wɛyi blɛɛn ma yé éé goo fɔɔ yé é bɔ Ori gɔ ma, 8a péli sia Ori gɔ ma é ziin, ’ka a gié Amat zia yé é bɔ Sédad, 9yé é go gole nya Zifrɔn yé é bɔ Asaa‐Énan. Yee ɛ ke kalé yirinwana bɛbolazia tɛrɛ glɛ nya.
10Kalé yirinwanazia tɛrɛ glɛ péli éé sian Asaa‐Énan ma, yé é bɔ Séfam; 11éé sié Séfam yé é zun Ribla vazia, ’té ’bɛ ke Ain yirinwanazia; yé éé zunwo yé é go Kinérɛt Wɛyi ma yirinwanazia; 12yé éé zunwo é ziin Juudɛn yuu vazia yé é bɔ Wɛminiélɛ Wɛyi ma.
Tɛrɛ lé ke kazé nya, a faa glɛ lé ke bɛ.
13Moizi lé Izraɛl lé nénu lɛ léma: Tɛrɛ lé ka dan a guli lɛ munu ma ’munnu zunle nya, yee lé ke bɛ; yee lé Gakelebale é dan a nɔ lɛ bɛn sɔraziɛn é buu lɛ. 14Naa, Rubɛn bɛn valé Gad bɛn, wo ’wozé zarafɛ si wo tranu gɔnɔla yɛrama; Manasé bɛn lɛgɔnɔ do ’wozé zara si é ziin. 15Bɛn fié ’ko valé Manasé bɛn lɛgɔnɔ do wozé zarafɛ si Juudɛn ’lɛzia, Jériko yara, yirinwanazia.
Tɛrɛ gulizannu
(Joz 14)
16Gakelebale lé Moizi lɛ léma: 17Munu lé wo dan tɛrɛ guli lɛ ka ma, wo tɔ lé ke ’ko: Balebanzan Éléazaa koo, Nɛn be Jozué koo, woo lé, 18yé ka bɛn faa gi mi segele do do si yé ’bɛnu ’é pa wo va tɛrɛ gulile we ma.
19Munu lé wo wo si, wo lé ke ’ko:
Juda bɛn zé lé ke Jéfuné be Kalɛb nya.
20Siméɔn bɛn zé lé é ke Amiud be Samuɛl nya.
21Bɛnjamɛn bɛn zé lé é ke Kislɔn be Élidad nya.
22Dan bɛn zé lé é ke mi segele Jogli be Buki nya.
23Jozɛfu bɛn fiénu zé lé ke ’ko: Manasé bɛn zé lé é ke mi segele Éfɔd be Aaniɛl nya. 24Éfraim bɛn zé lé é ke mi segele Sifitan be Kémuɛl nya.
25Zabulɔn bɛn zé lé é ke mi segele Paanak be Élisafan nya.
26Isakaa bɛn zé lé é ke mi segele Azan be Paltiɛl nya.
27Azɛɛ bɛn zé lé é ke mi segele Sélomi be Aiud nya.
28Néfitali bɛn zé lé é ke mi segele Amiud be Pédaɛl nya.
29Munu lé Gakelebale a fe léé, ’wo Kanaan tɛrɛ guli Izraɛlnu ma, wo lé ke bɛ.
Currently Selected:
Mi Nɔnɔle 34: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
