Mi Nɔnɔle 21
21
Zéné méné
(1 Kor 10:9; Jn 3:14–16)
1Arad mununwiinzan blɛn lé é ke Kanaan mi nya, éé nyanaan yirinwana bɛyilazia tɛrɛ la, é a ’ma léé, Izraɛlnu a dana Atarim zi ta. É guli dan Izraɛl va, yé é mi kenu kun guli ma. 2Yé Izraɛl Gakelebale kun léé, dé i munu ’ko pa an lee, an dan bale pa lɛ wo ma yé maa wo sɛrɛ. 3Gakelebale Izraɛl dére ’ma, yé é Kanaan munu pa wo lee. Wo bale pa fla valé a tamunu faa ma yé wo wo sɛrɛ tata, yé wo fɛkona tɔ pa Ooma.
4Wo nwa Ori gɔ ma yé wo Wɛyi Sɔɔn lé zi sia, paale Édom lé tɛrɛ ma we ma. Munu bli kɛlɛ pɛpɛ zia, 5yé wo we fe Gakelebale ma, yé wo we fe Moizi ma, yé wo léé: Mɛmalé ka ko si Éjipiti tɛrɛ la, léé, ko ga bwi la koo? Naa, fɛblele ’ka ana lo, yé ’yi ’ka ana lo, yé fɛ naané ’ko blele nɔla ko ’léé. 6Yé Gakelebale méné suiɛ yaale pa zia munu ’ko ma; wo suiɛ dɔ munu ma, yé Izraɛlnu kiɛre ga. 7Munu da Moizi va, yé wo léé: Ko wenyané kɛlɛ, naa, ko we fe Gakelebale ma yé ko we fe i ma. ’I bazoro Gakelebale lɛ, ’é méné ’konu si ko ma. Moizi bazoro munu tɔ ma. 8Gakelebale lé Moizi lɛ léé: ’I méné suiɛ yaale foto kɛlɛ, yé bé dun yiliblan do ’léé; dé miomian méné suiɛ dɔ a ma, dé é méné foto ’ko nagini, é dan béli lɛ. 9Moizi zéné foli méné foto nya, yé é a dun yiliblan ’léé, yé dé miomian méné suiɛ dɔ a ma, dé é zénéméné nagini, ’té é béli.
10Izraɛlnu go, yé wo sɔkɔnnu dɔ Obɔt. 11Wo si Obɔt yé wo ’wolé sɔkɔnnu dɔ Ijé‐Abarim bwi la lé é ke Moab yara, ana, yirinwanazia.
12Wo si ’bɛna yé wo ’wolé sɔkɔnnu dɔ pɛnguru lé wa laama Zérɛd, ana.
13Wo si ’bɛna yé wo ’wolé sɔkɔnnu dɔ Aanɔn yuu lé éé yoroan bwi la Amorénu glɛ la, a zi, naa, Aanɔn yuu a Moabnu lé tɛrɛ glɛ nya, Moab valé Amorénu méléna. 14Amalé é a é gyɛle Gakelebale lé gulidanlenu zuofesɛbɛ gi léé, Vaɛb lé é ke Sufa tɛrɛ la koo, Aanɔn lé ’yiyoro plɛplɛ koo, 15’yiyoro plɛplɛ lé a pélisia Aa vazia yé é mane Moab glɛ ma koo, woo lé.
16Wo si fɛkona yé wo bɔ Bɛɛ; yee Bɛɛ na lé Gakelebale lé Moizi lɛ léé, ’i munu zén ékema yé maa dan ’yi nɔ lɛ wo lɛ, yee Bɛɛ duo lé. 17’Bɛ zuo Izraɛlnu lɛrɛ ’ko vɔ léé:
’Yiguru, ’i bɔ. ’Ka a tɔbɔlɛrɛ vɔ.
18’Yiguru lé minwiinzannu a bo,
Munu va mi segelenu a bo
Plaminwiinyili valé wolé yilinu nya, yee lé.
19Wo si bwi la yé wo go Matana; yé wo si Matana yé wo go Naaliɛl, yé wo si Naaliɛl yé wo go Bamɔt 20yé wo si Bamɔt yé wo go Moab tɛrɛ la pɛnguru gi, yé wo go Pizga gɔ nwiin, ’té bwi vo wo wuo.
21Izraɛlnu munu nwunvɔ Amorénu nwiinzan Sioni va, a fele a lɛ we gi léé: 22’I zi nɔ ko lɛ léé, ko gié ilé tɛrɛ la; ko ’ka dan wɔra lɛ kalé féinu koo, kalé dɔrɔféinu koo, ana lo, yé ko ’ka dan ’yiguru gi ’yi mini lɛ lo; ko dan gié lɛ gbéin ta tegele fɔɔ yé ko ilé tɛrɛ glɛ kini. 23Sioni ’ka Izraɛlnu giéle nyi si lɛ élé tɛrɛ la lo; é ’élé munu faa zén ékema, yé wo da zi dɔ lɛ Izraɛlnu lee, bwi la; é da Jaas, yé é guli dan Izraɛlnu va. 24Izraɛl wo gyɛ gwɔun nya yé wo alé tɛrɛ si, é sia Aanɔn fɔɔ Jabɔk yuu ma, fɔɔ Amɔn lé tɛrɛ glɛ la; naa, Amɔnnu lé tɛrɛ glɛ la a plɛplɛ. 25Izraɛlnu fla faa si, yé wo nyana kli Amorénu lé fla blɛnnu ta, Esibɔn valé é zi flanu faa ta. 26Naa, Esibɔn a Amorénu nwiinzan Sioni lé fla nya; é guli dan Moabnu nwiinzan vininzan va, yé é ’bɛlé tɛrɛ si fɔɔ yé é bɔ Aanɔn yuu ma. 27Amalé lɛrɛvɔzannu a sia lɛrɛ nya léé:
’Ka da Esibɔn.
’Ka Sioni lé fla dɛrɛ pa, ’ka a kɛlɛ plɛplɛ.
28Naa, kyɛ do si Esibɔn,
Kyɛnɛnɛ si Sioni lé fla;
É Aa‐Moab ble,
Munu lé woo nyanaan Aanɔn yuu gɔ torole nwiin, é wo ble.
29Moabnu, ka gale nyɔ,
’Kaa Kémosimunu, ka san.
Moab gɔnénu kɛlɛ fwilazannu nya,
Yé alé blɛnnénu kɛlɛ Amorénu nwiinzan Sioni lé luunu nya.
30Ko kolé dinwɔlɛnu vuli wo va,
A péli sia Esibɔn fɔɔ Dibɔn, ko fɛ sɛrɛ,
Ko ’wii tɛrɛ ta fɔɔ Nofak,
Fɔɔ Médéba.
31Izraɛlnu nyana kli Amorénu lé tɛrɛ la. 32Moizi munu nwunvɔ Jaézɛɛ mavɔɔle we ma, yé wo alé tɛrɛla flanu si, yé Amorénu lé wo ke ana, wo wo bin.
33Wo nɔla, yé wo gié Bazan lé zi ta. Bazan nwiinzan Ɔg bɔra zi dɔle a lee we gi, yee valé élé munu faa nya, gulidanle wo va we gi Édréi. 34Gakelebale lé Moizi lɛ léé: Té i kana a lee pelo, maa dan a pa lɛ i lee, yee koo, alé munu faa koo, alé tɛrɛ koo, wo nya; wean bé kɛlɛ Amorénu nwiinzan Sioni lé ke Esibɔn, a lɛ, yee duo lé i dan a kɛlɛ lɛ wo lɛ. 35Yé wa gyɛ, yee valé é benu valé alé munu faa nya. A kiéné do ’ka so lɛ a ta lo, yé wo alé tɛrɛ si.
Currently Selected:
Mi Nɔnɔle 21: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
