Mi Nɔnɔle 11
11
Munu gun gyɛ yé kyɛ bi
(Fw 16:1–3; 2 BDWS 9:22)
1Munu gun gyɛ, yé we ’ko ’ka sɔ lɛ Gakelebale lɛ lo. Gakelebale ’bɛ ’ma aan wo, a bli fli, yé é kyɛ bi wo méléna, yé é wolé fla san do ble. 2Munu siaa Moizi lɛ. Moizi bazoro Gakelebale lɛ, yé kyɛ diri. 3Wo fɛkona tɔ pa Tabéra; Gakelebale kyɛ bi wo méléna, ’bɛzama.
4Boamunu lé wo zén Izraɛlnu va, wo bli bɔle sia fɛnu ma, yé Izraɛlnu boen é ziin, wo kun wuvɔle ma, a fele nya léé: De ɛ dan wi nɔ lɛ ko lɛ yé ko blee? 5Pɔnu lé ko wo ble Éjipiti tɛrɛ la, ’té ko ’ka wo lɔ lɛ lo, wo koo, kɔn?-?kɔnbrɔ koo, mélɔn koo, pwaro koo, gyaba valé lae koo, wo sele a ko gi. 6Ko a gana sin, wi do kpen ’ka é dɛrɛ lo. Mana saa lé ko a yena ’ko.
7Mana a bélé koriandra wɔlɛ zo; a yuɛɛ a bélé déliumgɔlɛ zo. 8Munu éé zén‐é a siale va, ’té wa pun dɔa fɛzɔngɔlɛnu nya, dé ’bɛ kaan lo, wa zɔn‐o ’woli gi; wa dɔneé bɔ gi, yé wa kɛlɛ gatonu nya. A néné a bélé gato lé wa kɛla nyɔnɔ nya, a zo. 9Dé lolu a vɔna wo nyanana é béli, ’té mana éé zanaan é ziin.
10Moizi munu lé wuvɔle ’ma, ’té wo valé ’wolé nénu éé wuvɔa ’wolé sɔkɔnnu ’léé. Yé Gakelebale bli fli é baba. 11Moizi bli kyɛ dɔ, yé é lé Gakelebale lɛ léé: Mɛmalé i nyané paan maa, i wuozan taa? Yé mɛmalé an ’ka i yuɛ gi bɔ lɛ lo yé i munu ’ko faa dɔ an nwiin kɔné nyaa? 12Maa ɛ munu ’ko bɔn sii? Maa ɛ wo yaa? Yé bé fé maa lɛ léé, an wo si an golɛ gi bélé lezan lé éé nyɔ dɔa élé né ’léé, a zo, yé i léé, an go wo nya fɔɔ tɛrɛ lé ibo ’nyɔɔn wo tranu lɛ léé, i dan a nɔ lɛ wo lɛ bɛ, a taa? 13Dé ’bɛ kaan lo, maa wi yé kyɛn, yé maa nɔ munu ’konu faa lɛɛ? Naa, wa wuvɔna an ma, ’té wa fé léé, ’i wi nɔ ’wo lɛ, ’wa ble. 14Maa do ’ko, an ’ka bɔa munu ’konu faa sile lɛ lo, naa, wo bɛn mini an lɛ. 15Té i ’bɛ zoɛ we kɛlɛ an lɛ lo; a fila vɔ léé, i an gyɛ. Ilé zanté, dé maa i yuɛi bɔ, té maa anlé kle ’ko blena ye lo.
Moizi mi yɔ yaa wɔlɛ vu si a va
(Fw 18:13–26)
16Gakelebale lé Moizi lɛ léé: ’I mi segele yɔ yaa wɔlɛ vu bié an punma, munu lé i wo dɔɔ mi segelenu nya munu va, ’té wa é plale munu nwiin; ’i go wo nya zén‐ékevasɔkɔn ’léé, yé wo dɔ ’bɛna i va. 17Maa dan zun lɛ ’bɛna yé maa dan we fe lɛ i lɛ, yé bli lé é ke i gi, maa dan ’bɛ zoɛ bli vɔ lɛ wo gi, léé, wo bɔ i va munu ’ko kɔné sile nya, té i kɔné ’ko si i do lo we ma. 18Bé fe munu lɛ léé, ’wo kɛlɛ tegele tɛlɛ yi lé we ma, yé wo dan wi ble lɛ. Wa laa wuvɔle nya maa Gakelebale tɔné gi, ’té wa fé léé, de ɛ dan wi nɔ lɛ ’wo lɛ yé ’wa blee? Naa, ’wa yi la drɔɔ Éjipiti tɛrɛ la. Maa, Gakelebale ’é dan wi nɔ lɛ wo lɛ yé wa ble. 19Wo dan a ble lɛ, yi do kaan lo, yi fié kaan lo, yi soru kaan lo, yi vu kaan lo, yi yɔ do kaan lo, 20naa, wo dan a ble lɛ fɔɔ moné do, fɔɔ yé wi ’ko é bɔra wo nyé gi, yé é nɔla wo ’léé. Maa Gakelebale lé é ke wo méléna, wo an vo ’wo bɛ zuo, azama; wo wuvɔ an lɛ, ’té wa fé léé, mɛmalé ’wo si Éjipiti tɛrɛ laa? azama.
21Moizi léé: Munu lé maa ke wo méléna ’ko, wa ganelami baa wuru do yɔ soru yé bii léé, ’é dan moné do wi blele nɔ lɛ wo lɛɛ? 22Dé wo dan ’blanu valé dirinu bɔrɔ bo lɛ yé ’bɛ é wo kaan? taa, dé wo dan wɛyi va pɔnu faa zén lɛ ékeva yé ’bɛ é wo kaan? 23Yé Gakelebale a zi pa Moizi lɛ léé: Maa, Gakelebale bɛ ’ka é wo sɔa a nya loo? Wean maa a fe, dé é dan kɛlɛ lɛɛ? dé é ’ka dan kɛlɛ lɛ loo? i dan a ye lɛ sin.
24Moizi bɔra, yé dére lé Gakelebale a fe, é a zuo fe munu lɛ. É mi segelenu va mi yɔ yaa wɔlɛ vu zén ékeva, yé é wo diri sɔkɔn zi. 25Gakelebale zun lati gi, yé é we fe Moizi lɛ, yé bli lé é ke Moizi gi, é ’bɛ zoɛ bli vɔ mi segele yɔ yaa wɔlɛ vu ’ko gi. Léli zén wo ta bléyian va, wo kun balelawe fele ma, naa, wo ’ka yara pa lɛ a fele ta lo.
26Mi fié ana, wa do laama Eldad, yé wa koɛzan laama Médad. Wo vo sɔkɔn dɔna, yé léli zén wo ta ’bɛna. Wo tɔ a é gyɛle sɛbɛ ta, naa, wo ’ka go lɛ Bale lé sɔkɔn ’léé lo; wo balelawe fe sɔkɔn dɔna. 27Pɛniɛné do vlan buru a zuo fele Moizi lɛ we ma, yé é léé: Eldad valé Médad a balelawe fena sɔkɔn dɔna. 28Yé Nɛn be Jozué lé é ke Moizi wuozan nya é sia a kiéné la bléyi va, é we fe yé é léé: Anzan Moizi, bé yi ga wo lee. 29Moizi a zi pa a lɛ léé: I a maawona wo va anlé we maa? Gakelebale lé munu faa ’é kɛlɛ balelawefemunu nya ma, yé Gakelebale ’é léli zén wo ta ma. 30Yé Moizi si wo va yé é go sɔkɔn dɔna, yee valé Izraɛl lé mi segelenu nya.
Sawɛnu da
(LvS 78:17–35; Fw 16:1–18)
31Gakelebale fu gié wɛyi ta, yé é da sawɛnu nya, yé é wo zun wo nyanana. Wa é sɔɔlale wo nyanana zi a bɛ do la bélé yi do tawona zo, yé a bɛ koɛ la wa ’bɛ zo. Wo sié tɛrɛ ma mɛtrɛ do. 32Munu a gyɛle sia yi do tegele, yé tu kini yé wo yiri vɔ a gyɛle nya. Mian ’bɛzan ’ka a gyɛ lɛ di lo, ’bɛ a gyɛ vlekyɛɛ nya yɔ soru. Wo wo nwɛɛn wozé nya sɔkɔn dɔna zi. 33Sawɛnu a wo ’léé bléyian va, ’té wo ’ka tan a soo lɛ lo, Gakelebale lé bliflile nwa munu ma, yé é munu gyɛ migyɛgyɛ blɛɛn nya. 34Wo fɛkona tɔ pa Kibrɔt‐Ataava. Munu lé, blibɔle fɛ ma wo kun, wo wo pa ana, azama.
35Munu nwa Kibrɔt‐Ataava, gole Asérɔt we ma, yé wo bɔ ana.
Currently Selected:
Mi Nɔnɔle 11: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
