Lévinu 27
27
Balekunlenu valé fɛvuzannu
(2 BDWS 23:21–23)
1Gakelebale we fe Moizi lɛ yé é léé: 2Bé fe Izraɛl lé nénu lɛ léma:
Dé mi do Bale kun, dé é a mi lé we nya, é dan kɛlɛ lɛ Gakelebale zé nya, é dɔ Moizi gi fɛan zo, a yɛrama. 3Dé é a gɔné lé a lɛɛ bɔ yɔ do valé yɔ yaa méléna, a mafɛ a gɔɔlifu sikla yɔ fié wɔlɛ vu, fɛna sauun lé sikla yɛrama; 4dé é a le nya, bé mafɛ fe sikla yɔ do wɔlɛ vu. 5Nénu lé wo lɛɛ éé bɔa soru valé yɔ do méléna, ’i gɔnézan mafɛ fe sikla yɔ do, yé ’i le zé fe sikla vu. 6Dé wo lɛɛ ’ka tan bɔ lɛ soru lo, ’i gɔnézan mafɛ fe gɔɔlifu sikla soru, yé ’i le zé kɛlɛ gɔɔlifu sikla yaa. 7Dé wo lɛɛ gié yɔ yaa ta, ’i gɔné mafɛ fe sikla vu ta soru, yé ’i le zé fe sikla vu. 8Gɔɔli ’léé lé bé fe bɛ, dé a banwofɛ ’ka Balekunzan lee lo, wo dan da lɛ a nya Balebanzan va yé ’bɛ é ban dɔ a nwiin, yé ’bɛ é dan a mafɛ fe lɛ, gɔɔli lé ke gɔnézan ’ko lee, a yɛrama.
9Dé é a Gakelebale banwinu lé we nya, wi faa lé wa no Gakelebale lɛ, é a fɛ plɛplɛ lé a ’lɛ ke, a nya. 10Wo ’ka wo tavɔɔan lo, wo ’ka a nyané dɔa a zin pai lo, yé wo ’ka a zin dɔa a nyané pai lo; dé wo wi tavɔɔwi nɔ, wo fiénu a fɛ plɛplɛ lé a ’lɛ ke, a nya. 11Dé é a wi tiridɔlenu lé wo ’ka Gakelebale baan wo nya lo, wolé we nya, ’wo da ’bɛ wi nya Balebanzan lɛ, 12yé é dan a mafɛ fe lɛ a zin valé a nyané yɛrama, yé gɔɔli ’lééan Balebanzan a fe bɛ, wo dan a nɔ lɛ. 13Dé é sɔ wo lɛ léé, wa tabo, ’wo gɔɔli ’léé ’ko soruzan pa a ma.
14Dé mi do élé kɔn pa é yɛrama Gakelebale zé nya, Balebanzan é dan a mafɛ fe lɛ a zin valé a nyané yɛrama, yé wo dan dɔ lɛ Balebanzan dére ta. 15Mi lé élé kɔn nɔ Bale lɛ bɛ, dé é sɔ a lɛ léé, ’é a tabo, ’é gɔɔli ’léé ’ko soruzan pa a ma, yé kɔn é dan kɛlɛ lɛ azé nya.
16Dé mi do élé féi do pa é yɛrama Gakelebale zé nya, i dan a mafɛ fe lɛ, fɛwɔlɛ lé wa vɔ yee féi ta, a yɛrama, sɔnmléwɔlɛ vlekyɛɛ vu, gɔɔlifu sikla yɔ fié wɔlɛ vu. 17Dé é ’élé féi pa é yɛrama Bale zé nya lɛɛ nyané gi, wo dan dɔ lɛ a ’léé lé Balebanzan a fe, a ta; 18dé é ’élé féi pa é yɛrama lɛɛ nyané zuo, Balebanzan é dan a mafɛ fe lɛ, lɛɛ lé é vo fɔɔ yé lɛɛ nyané é bɔ, a yɛrama, yé a mafɛ ’léé lé é a fe bɛ, é dan a ke si lɛ a ta. 19Mi lé ’élé féi pa é yɛrama bɛ, dé é sɔ a lɛ léé, ’é a tabo, féi mafɛ lé bé fe bɛ, é dan a soruzan pa lɛ a ma a taa nya, yé féi é dan vo lɛ a lee. 20Dé é ’ka féi ’ko tabo lɛ lo, dé é a dan mi bɛ lee, wo ’ka bɔa a tabole lɛ é dɛrɛ lo. 21Dé féilɔzan si a ta lɛɛ nyané nya, wo dan féi ’ko pa lɛ é yɛrama yé é vo bélé féi lé wa vo Gakelebale zé nya, a zo; é dan kɛlɛ lɛ Balebanzan zé nya.
22Dé mi do féi do lɔ yé é ’ka alé fɛna nya é kyɛn lo, yé é sɔ a lɛ léé, ’é a nɔ Gakelebale lɛ, 23Balebanzan é dan a vlɛ fe lɛ, lɛɛnu lé é vo fɔɔ yé lɛɛ nyané é bɔ, a yɛrama, é dɔ i gi fɛan zo, a zo; yé mi ’ko é dan a banwo lɛ yee yi duo nya, a vlɛ lé wa fe, a nya, naa, é a é pale é yɛrama Gakelebale zé nya, azama. 24Lɛɛ nyané nya, féi é dan nɔla lɛ mi lé é a lɔ a lee, ’bɛzan lee, yé é dan kɛlɛ lɛ azé nya é pai.
25Fɛnu mafɛ faa lé bé fé, é dan kɛlɛ lɛ fɛna sauun lé sikla yɛrama; sikla do a géra yɔ do nya.
26Mi do kpen ’ka bɔa ’élé trubɛnu lé né vininnu pale lɛ é yɛrama lo, é a Gakelebale zé nya é kwakwa, a yaale né vininzan nya lé we ma. Dé é a diri nyaoo, dé é a ’bla nyaoo, é a Gakelebale zé nya. 27Dé é a wi tiridɔle lé we nya, wo dan ’bɛ tabo lɛ, bé ’léé fe fɛan zo, a zo, yé wa taa pa a ma a soruzan nya; dé wo ’ka a tabo lɛ lo, wo dan a dan lɛ, bé vlɛ fe fɛan zo, a va.
28Fɛ faa lé mi a no Gakelebale lɛ bale pale a ma nya élé fɛnu va, wo ’ka bɔa a danle lɛ lo, yé wo ’ka bɔa a tabole lɛ lo; dé mi léé, dé wi léé, dé alé fɛna va féi do léé, a zo lé alé we ke; fɛ faa lé wa no bale pale a ma nya, é a Gakelebale zé nya é ta lé kɔn‐an. 29Mi lé wa nɔ bale pale a ma nya, wo ’ka bɔa a tabole lɛ lo, ga ɛ ’bɛ nyaan.
30Tɛrɛ lé fɛvuzan faa, dé é a féifɛnu nyaoo, dé é a yiliporonu nyaoo, wa Gakelebale zé nya; é a fɛ do lé wa pa é yɛrama Gakelebale zé nya, a nya. 31Dé é sɔ mi do lɛ léé, élé fɛvuzan do tabo, ’é a taa pa a soruzan nya. 32Dé i a ilé winu nɔnɔna, wi faa lé éé giéan ilé ’blatabinyili wuo, dé diri léé, dé trubɛnu léé, a vuzan faa a Gakelebale zé nya. 33Wo ’ka dan a ma gini lɛ lo, dé a zin léé, dé a nyané léé, a yele we gi lo, yé wo ’ka a tavɔɔan lo; dé wo wi do nɔ wi bɛ pai, wo fiénu kɛlɛ fɛ plɛplɛ nya, yé wo ’ka wo taboo lo.
34Bélidɔwenu lé Gakelebale a nɔ Moizi lɛ Izraɛlnu zé nya Sinai gɔ nwiin, wo lé ke bɛ.
Currently Selected:
Lévinu 27: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
