Lévinu 26
26
Drɔɔvole valé balepale
(2 BDWS 11:28; Éz 3:10–11)
1Té ka miyilinu kɛlɛ kabo lɛ lo, té ka fɛ do kpen foto kɛlɛ lo, té ka yobɔ kɛlɛ lo; gɔlɛ lé wa ma guru vɔ mi ’wuo foto nya, té ka do kpen dɔ kalé tɛrɛ la, ka diale wo ’lɛ we gi lo; maa a Gakelebale, kalé Bale nya, azama.
2’Ka anlé flinyinu kɛlɛ yé ’ka anlé fɛna sauun ye ka kanamafɛ nya. Maa a Gakelebale nya.
3Dé ka tawo anlé bélidɔwenu ta, dé ka an sɔnnénu pa yé ka tawo wo ta, 4maa dan lɛɛ da lɛ é dabléyi va, yé tɛrɛ é dan fɛ dɔ lɛ yé kalé féiyilinu é dan ’wo poro baa lɛ. 5Dé ’sagyɛle ’ka tan nyaa lɛ lo, ’té kalé dɔrɔnu tin, yé ka dan vo lɛ a poro sona fɔɔ yé féipabléyi bɛ é bɔ; ka dan fɛ ble lɛ yé ka kan, yé ka dan nyana lɛ duaa kalé tɛrɛ la. 6Maa dan kalé tɛrɛ vo lɛ drɔɔ, yé mi do gi nyɛ ’ka dan kini lɛ yibla lo; maa dan wi nyanénu faa si lɛ kalé tɛrɛ la, yé guli ’ka dan da lɛ kalé tɛrɛ la lo. 7Ka dan ka nyanézannu zuo bin lɛ yé ka dan wo gyɛ lɛ gwɔun nya. 8Ka va mi soru é dan mi yɔ soru bin lɛ, yé ka va mi yɔ soru é dan mi baa soru bin lɛ, yé ka dan ka nyanézannu gyɛ lɛ gwɔun nya. 9An dan an yara dɔ lɛ ka vazia, yé maa dan ka kɛlɛ lɛ néyaazannu nya, yé maa dan ka fan lɛ, yé an dan dɔ lɛ anlé gipawe ta ka va. 10Ka dan kalé fɛ kwanu ble lɛ, yé ka dan fɛ kwa bɔra lɛ, fɛ dɛrɛnu pana yele we ma. 11Maa dan nyana lɛ ka va yé maa ’ka dan serele bo lɛ ka ma lo. 12Maa dan tawo lɛ ka va, yé maa dan kɛlɛ lɛ kalé Bale nya, yé ka dan kɛlɛ lɛ anlé munu nya. 13Maa a Gakelebale nya, kalé Bale lé é ka si Éjipiti tɛrɛ la, ’té é ka si luu gi, maa a a nya; maa luubale kini ka ma, yé maa yara si ka ’wuo ma, ’té ka tawoo ka yara biéle nya.
14Naa, dé ka ’ka ka tɔné dɔ lɛ an lɛ yé ka an sɔnnénu faa pa lo, 15dé ka lɔlu plɛn anlé bélidɔwenu ma, yé ka serele bo anlé gɔnɔlawenu ma, yé dé bɛwemalé ka ’ka an sɔnnénu faa pa lɛ lo, yé ka anlé gipawe sɛrɛ, 16we lé maa dan a kɛlɛ lɛ ka lɛ, yee lé ke ’ko. Maa dan kana blɛn zén lɛ ka gi, yé maa dan ka gyɛ lɛ fuunégyɛ valé kɔlɛkyɛdɔgyɛ nya, yé ka yuɛi é dan zun lɛ yé ka boen é dan kle ble lɛ; ka dan fɛ vɔ lɛ kalé féi é pla; ka nyanézannu é dan a ble lɛ. 17Maa dan dɔ lɛ ka ma yé ka nyanézannu é dan ka kele lɛ; ka zapamunu é dan pla lɛ ka nwiin, yé ka dan boavlan buru lɛ, ’té mi do kpen ’ka ka zuo lo.
18Dé maa ’bɛ kɛlɛ yé ka ’ka ka tɔné dɔ lɛ an lɛ duowo lo, maa dan we lɛdɔ lɛ ka gi taawo gɔnɔ sɔrafié kalé wenyané ma. 19Kalé plɛplɛ lé kabo kɛlɛ a nya blɛn bɛ, maa dan ’bɛ si lɛ ka lee. Maa dan la kɛlɛ lɛ ka lɛ bélé foliɛwɔlɛ zo, yé maa dan tɛrɛ kɛlɛ lɛ ka lɛ bélé zéné zo. 20Ka dan nyanama pa lɛ é pla; kalé tɛrɛ ’ka dan fɛ dɔ lɛ lo, yé kalé yilinu ’ka dan ’wo poro baa lɛ lo.
21Dé ka dɔ an ma yé ka ’ka ka tɔné dɔle an lɛ nyi si lɛ lo, maa dan ka bla lɛ gɔnɔ sɔrafié taawo kalé wenyanénu ma. 22Maa dan bwigiwinu nwa lɛ ka ma, yé wo dan kalé nénu si lɛ ka lee yé wo dan kalé winu kulu ga lɛ, yé wo dan ka ke si lɛ a va yé ka vo sɛné; yé kalé zinu é dan ga lɛ.
23We lɛdɔle ka gi ’ko, dé ’bɛ ’ka ka drɔ lɛ lo yé ka dɔ an ma plɛplɛ, 24maa dan dɔ lɛ ka ma plɛplɛ é ziin yé maa dan ka bla lɛ gɔnɔ sɔrafié taawo kalé wenyanénu ma. 25Maa dan da lɛ gwɔun nya ka va, yé ’bɛ é dan anlé gipawe lɛi pa lɛ; dé ka zén ékema kalé flanu ta, maa dan da lɛ migyɛgyɛ nya ka méléna, yé maa dan ka pa lɛ ka nyanézannu lee. 26Kadɔplɛplɛfɛ lé ke kalé fɛblele nya, dé maa ’bɛ si ka lee, le vu é dan bɔ dɔne lɛ bɔ do gi, yé wo dan a guli lɛ ka ma, yé ka dan a ble lɛ yé ’bɛ ’ka dan ka kan lɛ lo.
27Dé maa ’bɛ kɛlɛ yé ka ’ka ka tɔné dɔ lɛ an lɛ duowo lo, yé ka dɔ an ma, 28maa dan dɔ lɛ ka ma é ziin bliflile blɛn nya yé maa dan we lɛdɔ lɛ ka gi taawo gɔnɔ sɔrafié kalé wenyanénu ma. 29Ka dan ka benu wi ble lɛ, yé ka dan ka lunu wi ble lɛ. 30Maa dan kalé gɔnwiin yobannanu sɛrɛ lɛ, yé kalé miyilinu lé ka wo pa é yɛrama yiri zé nya, maa dan wo sɛrɛ lɛ. Maa dan ka galenu pla lɛ kalé miyili sɛrɛlenu ta, yé anboen é dan serele bo lɛ ka ma. 31Maa dan kalé flanu kɛlɛ lɛ é bin nya; maa dan kalé fɛna sauunnu sɛrɛ lɛ tata, yé maa ’ka dan kalé lasikɔrɔ gin nénénu si lɛ é dɛrɛ lo. 32Maa dan tɛrɛ sɛrɛ lɛ tata, yé ka nyanézannu lé wo dan nyana lɛ ana, wo ’léé é dan ma lɛ wo ma. 33Maa dan ka sɔɔla lɛ bɛnnu gi yé maa dan go lɛ gwɔun nya ka zuo. Kalé tɛrɛ é dan vo lɛ é pla yé kalé flanu é dan vo lɛ lu nya.
34Bléyian va lé tɛrɛ ke é sɛrɛle, ’té ka a ka nyanézannu lé tɛrɛ la bɛ, ’bɛ bléyi va lé kalé tɛrɛ é dan élé flinyinu kɛlɛ lɛ; tɛrɛ é dan vo lɛ drɔɔ yé é dan élé flinyinu kɛlɛ lɛ. 35Ka a é nyanale kalé tɛrɛ la bléyian va, ka ’ka flinle nɔ lɛ a lɛ lo, amalé bléyian va lé tɛrɛ ke é sɛrɛle, é dan flin lɛ. 36Ka va munu lé wo vo é yuɛma ’wo nyanézannu lé tɛrɛ la, maa dan wo zuru va nyɛ kini lɛ; yililaa vun lé é ke wena bɛ, a lee lé wo dan vlan buru lɛ; wo dan vlan buru lɛ bélé fɛan zo lé mi éé vlan buruwo gwɔun ’lɛ, a zo, ’té woo goo diale nya, dɔlé ’té mi do kpen ’ka wo zuo lo. 37Wo dan zana lɛ wo ke gi, bélé gwɔun lé mi gyɛle zo, ’té mi do kpen ’ka wo zuo binna lo. Ka ’ka dan dɔ lɛ ka nyanézannu ’lɛ lo; 38ka dan zamaga wo lɛ bɛnnu va, yé wo dan ka pa lɛ ka nyanézannu lé tɛrɛ la. 39Ka va munu lé wo vo é yuɛma, wo dan vo lɛ lulalulané wolé wenyanénu ma wo nyanézannu lé tɛrɛ la; wo dan vo lɛ lulalulané é ziin wo tranu lé weplenu ma.
40Wolé weplenu valé wo tranu lé weplenu koo, anlé bélidɔwe sɛrɛlenu koo, wo dɔ an ma plɛplɛ fɛan zo koo, wo dan a fe lɛ; 41wenyané ’konu ma lé maa dɔ wo ma plɛplɛ é ziin, yé maa go wo nya wo nyanézannu lé tɛrɛ la. Yé wo bli lé é ’ka si lɛ wo kɛlɛwe kyɛn lɛ bɛ lo, wo dan a zun lɛ yé wo dan wolé weplenu banwo lɛ. 42Gipawe lé maa a kɛlɛ Abraam va, a sele é dan dɔ lɛ an gi, yé gipawe lé maa kɛlɛ Izak va, a sele é dan dɔ lɛ an gi, yé gipawe lé maa a kɛlɛ Jakɔb va, a sele é dan dɔ lɛ an gi, yé tɛrɛ boen sele é dan dɔ lɛ an gi. 43Wo dan si lɛ wolé tɛrɛ la, yé bléyian va lé wolé tɛrɛ ke é sɛrɛle, ’té wa baa, é dan élé flinyinu kɛlɛ lɛ; wo lɔlu plɛn anlé gɔnɔlawenu ma, yé wo boen serele bo anlé bélidɔwenu ma, amalé wo dan wolé weplenu banwo lɛ. 44Naa, duowo, dé wa wo nyanézannu lé tɛrɛ la, maa ’ka dan sɔn vɔ lɛ wo ma lo, yé maa ’ka dan serele bo lɛ wo ma fɔɔ yé maa wo nyaa lo, fɔɔ yé maa anlé gipawe sɛrɛ wo va lo; maa a Gakelebale, wolé Bale nya, azama. 45Gipawe kyɛn lé maa a kɛlɛ, ’té maa wo si Éjipiti tɛrɛ la bɛnnu yuɛ va a nya, an kɛlɛle wolé Bale nya we gi bɛ, a sele é dan dɔ lɛ an gi wo vazia. Maa a Gakelebale nya.
46Sɔnnénu koo, gɔnɔlawenu koo, bélidɔwenu koo, ’té Gakelebale wo kɛlɛ yee valé Izraɛlnu méléna Sinai gɔ nwiin bɛ, ’té Moizi wo fe, woo lé ke bɛ.
Currently Selected:
Lévinu 26: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
