Lévinu 25
25
Lɛɛ sɔrafiézannu
(Fw 23:10–11; 2 BDWS 15:1–11)
1Gakelebale we fe Moizi lɛ Sinai gɔ nwiin yé é léé: 2Bé fe Izraɛlnu lɛ léma:
Dé ka bɔ tɛrɛ lé maa a nɔ ka lɛ, a ta, ana tɛrɛ é dan flin lɛ; é dan kɛlɛ lɛ flin lɛɛ nya, Gakelebale tɔ bɔle we gi. 3Ka dan féi pa lɛ lɛɛ suiɛdo gi, yé ka dan kalé dɔrɔféi dɔrɔkwɛɛnu bɔi lɛ lɛɛ suiɛdo gi, yé ka dan wo poronu so lɛ. 4Naa, a lɛɛ sɔrafiézan a flin lɛɛ nya, ’bɛ a tɛrɛ flin bléyi nya, Gakelebale tɔ bɔle we gi; té ka féi pa lo, té ka kalé dɔrɔféi dɔrɔkwɛɛnu bɔi lo. 5Té ka ’sagɔi gyɛ lo; kalé dɔrɔ nénu lé wo nwa wo ma yé wo poro baa, té ka wo so lo; é a tɛrɛ lé flin lɛɛ nya. 6Fɛ lé é dɔ kalé tɛrɛ flin bléyi va, é a kalé fɛblele nya; bii koo, i wuogɔné valé i wuole koo, ilé nyanamapazan valé bɛn lé ke é nyanale i va koo, 7ilé trubɛnu valé winu lé ke ilé tɛrɛ la koo, é a kalé fɛblele nya; fɛ faa lé é dɔ, é a fɛblele nya.
Lɛɛ nyané lé we
(Éz 61:1–3; Lk 4:16–26)
8’Ka flin lɛɛ sɔrafié nɔnɔ, ’é kɛlɛ lɛɛ sɔrafié sɔrafié gɔnɔ sɔrafié, yé flin lɛɛ sɔrafié ’ko, a lɛɛ é dan kɛlɛ lɛ lɛɛ yɔ fié wɔlɛ sɔraziɛn nya. 9Moné sɔrafié lé yi vuzan nya, ka dan bélinu fɛn lɛ yé a zuoi éé goo wele nya; wenyané ’yibo yi nya, ka dan béli fɛn lɛ kalé tɛrɛ faa la. 10A lɛɛ yɔ fié wɔlɛ vuzan ’é kɛlɛ kalé lɛɛ nyané nya; ka dan vole éboma ’ko zana dɔɔ lɛ kalé tɛrɛ la munu faa lɛ; é a kalé lɛɛ nyané nya; ka faa do do é dan nɔla lɛ kalé fɛna; yé ka faa do do é dan nɔla lɛ kalé munu va. 11A lɛɛ yɔ fié wɔlɛ vuzan é dan kɛlɛ lɛ kalé lɛɛ nyané nya; té ka féi pa lo; fɛ lé é kɛlɛ féi é boan, té ka ’bɛ gyɛ lo; kalé dɔrɔ nénu lé wo nwa wo ma yé wo poro baa, té ka wo so lo. 12É a lɛɛ nyané nya, ’bɛzama; ’ka ye kalé fɛ plɛplɛ do nya. Ka dan kalé féifɛ ble lɛ. 13Lɛɛ nyané ’ko gi, ka faa do do é dan nɔla lɛ kalé fɛna. 14Dé ka fɛ dɔ ka bɔluzan lee, ɛɛ, dé ka fɛ dɔle si ka bɔluzan lee, té ka dabli kɛlɛ ka ke lɛ lo. 15Dé i fɛ dɔle si i bɔluzan lee, lɛɛ nyané lé ’bɛ gié, ’i ’bɛ nɔnɔ, yé féipalɛɛ lé ’bɛ vo yé lɛɛ nyané é bɔ, ’i ’bɛ nɔnɔ, yé ’ka a ’léé fe ’bɛ yɛrama. 16Dé lɛɛ vo kiɛre, ’ka a taa pa, dé lɛɛ vo sɛ, ’ka a vlɛ ke si a ta; naa, yee lé bé lɔ, ’bɛzama. 17Té ka va mi do kpen é dabli kɛlɛ é bɔluzan lɛ lo, ’i kana ilé Bale lee; naa, maa a Gakelebale, kalé Bale nya.
Lɛɛ sɔrafiézan lé fɛblele
18’Ka tawo anlé bélidɔwenu ta, ’ka an dérenu lɛdɔma yé ’ka wo ta tawo, yé ka dan nyana lɛ ana tɛrɛ la duaa. 19Tɛrɛ é dan baa lɛ ka lɛ, ka dan fɛ ble lɛ yé ka kan, yé ka dan nyana lɛ ana duaa. 20Dé ka fe léé, dé ko ’ka féi pa lɛ yé ko fɛ gyɛ lo ’naan, ko dan mɛ fɛ ble lɛ lɛɛ sɔrafiézan nyaa? 21maa dan kalé lɛɛ suiɛdozan drɔɔ vo lɛ, yé ’bɛ lɛɛ gi kalé fɛ é dan dɔ lɛ lɛɛ yaa zé nya. 22Ka dan féi pa lɛ a lɛɛ sɔraazan nya, ’té ka fɛ kwa blé; fɔɔ yé é bɔ a lɛɛ sɔraziɛnzan ma yé kalé féifɛ dɛrɛ é bɔra, ’té ka fɛ kwa blé.
Fɛ nɔle ézannu lɛ
23Té ka tɛrɛ dan monomono lo; naa, tɛrɛ a anzé nya, yé ka a an va bélé bɛn zo, bélé fɛginizannu zo. 24Tɛrɛ faa lé é dan kɛlɛ lɛ kazé nya, é a lé ka tɛrɛ tabole se kɛlɛ munu lɛ.
25Dé i bwe kɛlɛ nyanégyɛzan nya yé élé tɛrɛ buru do dɔ, mi lé a tabole se ke a lɛ, ’té é ke a gɔnɔlazan nya, ’bɛ é dan fɛ lé a bwe a dɔ, a tabo lɛ. 26Dé mi lé a tabole se ke a lɛ, dé ’bɛ ’ka lo, dé yeebozen a tabofɛ ye, 27é fɛ dɔ bléyian va, ’bɛ lɛɛ lé ’bɛ gié, ’é ’bɛ nɔnɔ, yé yee lé é vo, ’é a mafɛ nɔ a dɔleezan lɛ, yé fɛ é dan nɔla lɛ azé nya. 28Dé é ’ka a tabofɛ ye lɛ lo, fɛ lé é a dɔ bɛ, é dan vo lɛ a dɔleezan lee, fɔɔ yé lɛɛ nyané é bɔ; lɛɛ nyané nya, alé féi é dan vo lɛ a lee, yé a dɔleezan é dan si lɛ ana.
29Fla lé gɔrɔ ke é bole a zi, dé mi do é nyanakɔn dɔ mi do lɛ ’bɛna, é sia a dɔbléyi ma, yé é bɔ lɛɛ do, a tabole se a a lɛ; a tabole se a a lɛ lɛɛ do ’ko nya. 30Naa, kɔn ’ko lé ke fla lé gɔrɔ ke é bole a zi, a ta, é sia a dɔbléyi ma, dé lɛɛ do lɛ sɔɔ yé wo ’ka a tabo lɛ lo, é dan vo lɛ lɛɛfaama a dɔleezan valé élé nénu lee; é ’ka dan bɔra lɛ a gi lɛɛ nyané nya lo. 31Fla lé gɔrɔ ’ka é bole a zi lo, alé kɔnnu a bélé féi zé zo; ’bɛ tabole se a, yé a dɔleezan é dan si lɛ a gi lɛɛ nyané nya. 32Dé é a Lévinu lé flanu valé wolé kɔnnu nya, a tabole se a Lévinu lee, glɛ ’ka ’bɛ gi lo. 33Mi lé é kɔn lɔ Lévi mi lee, é dan si lɛ a gi lɛɛ nyané nya, yé é dan si lɛ yee fla boen ta; naa, Lévinu lé flanu valé wolé kɔnnu a wozé fɛna nya Izraɛl munu va. 34Féinu lé ke Lévinu lé flanu zi, wo ’ka ’bɛ dɔa lo; naa, wa Lévinu zé nya lɛɛfaama, ’bɛ glɛ ’ka lo.
Fɛ drɔn pale nyanégyɛzan ma
35Dé nyané i bwe gyɛ i sɔnɔ yé a bɛwɔlɛi ’ka a ma lo, ’i bɔ a va; mi lé ke i va bɛn nya, bé kɛlɛ a lɛ yee duo zo, a vole é yuɛma i va we gi. 36Té i fɛpamale valé fɛ taa si a lee lo; ’i kana ilé Bale lee yé i bwe é dan vo lɛ é yuɛma i va. 37Té i gɔɔli drɔn pa a ma, a pamale yele we ma lo; té i vɛɛn pa a ma a taa yele we ma lo. 38Maa a Gakelebale, kalé Bale nya; maa ɛ ka si Éjipiti tɛrɛ la, Kanaan tɛrɛ nɔle ka lɛ yé an kɛlɛ kalé Bale nya we gi.
Luunu vole ’woboma
39Dé nyané i bwe gyɛ i sɔnɔ yé ébo dɔ i lee, té i luu panyanama nɔ a lɛ lo. 40’É vo i va bélé nyanamapazan zo, bélé mi lé é nyana i lee, a zo; é dan vo lɛ ilé nyanama pana fɔɔ yé lɛɛ nyané ’é bɔ. 41’Bɛ yi nya lé é dan si lɛ i va, yee valé ’élé nénu nya, yé é dan go lɛ élé munu va, ’é tranu lé fɛna. 42Naa, wa an wuomunu lé maa wo si Éjipiti tɛrɛ la, wo nya. Té ’wo wo dan bélé woo lunu daan fɛan zo, a zo lo. 43Té i pla a nwiin plɛplɛ lo; ’i kana ilé Bale lee. 44Bɛn bɛnu lé ke ka zi, ’bɛna lé ka dan kalé luugɔné valé luudané si lɛ yé wo dan kɛlɛ lɛ izé nya; wo va lé i dan luugɔné valé luudané lɔ lɛ. 45Bɛn bɛnu lé ke é nyanale ka va, i bɔalɛ léé, i wolé nénu lɔ é ziin; bɛn bɛnu lé nénu lé wo dan wo yaa lɛ kalé tɛrɛ la, ’ka ’bɛnu lɔa yé ’wo kɛlɛ kazé nya. 46Wo dan vo lɛ kalé zarafɛnu nya, kalé nénu zé nya ka zuo; wo dan vo lɛ kalé luunu nya lɛɛfaama, ’bɛ glɛ ’ka lo. Naa, dé é a ka bwenu Izraɛlnu nya, té ka va mi do kpen é pla é bwe nwiin plɛplɛ lo.
47Bɛn bɛ mi do lé ke é nyanale ka va, dé é kɛlɛ fua nya, yé i bwe lé ke é nyanale a sɔnɔ, dé ’bɛ kɛlɛ nyanégyɛzan nya yé ’bɛ ébo dɔ bɛn lé ke é nyanale ka va, a lee, dé ’bɛ kaan lo, dé ébo dɔ a lele do lee, 48a tabole se ana, abo dɔle zuo; a bwenu é bɔalɛ léé, wa tabo. 49Dé a ti bwe valé a ti zuan léé, dé a ti bwe valé a zuan be léé, dé wo gɔnɔlazan do léé, ’bɛ é bɔalɛ léé, ’bɛ a tabo; dé ’bɛ kaan lo, dé abozen fɛ ye, é bɔalɛ léé, ébo tabo. 50É sia abo dɔ lɛɛ ma, fɔɔ yé é bɔ lɛɛ nyané ma, yee valé é dɔleezan é dan ’bɛ lɛɛnu nɔnɔ lɛ; wo dan a tabo gɔɔli ’léé dɔɔ lɛ a lɛɛnu ’léé yɛrama; wo dan a gɔɔli nɔnɔ lɛ nyanamapazan lé gɔɔli zo. 51Dé a lɛɛnu a tan di, wo dan a tabo gɔɔli nɔ lɛ ’bɛ yɛrama, ’té a dɔ?-?vagɔɔli ’léé ginin a wo gi. 52Dé a lɛɛ vo sɛ yé lɛɛ nyané é bɔ, wo dan ’bɛ nɔnɔ lɛ, yé wa tabo ’bɛ lɛɛnu ’léé yɛrama. 53É dan kɛlɛ lɛ bélé lɛɛmazan lé ke nyanama pana, a zo; mi lé é ke a va bɛ, té ’bɛ é pla a nwiin plɛplɛ ka yuɛ va lo. 54Dé a tabozan do kpen ’ka ye lɛ lo, é dan bɔra lɛ lɛɛ nyané gi, yee valé é nénu nya. 55Naa, Izraɛlnu a maa ɛ lé luu nya, ’bɛzama; wa anlé luunu lé maa wo si Éjipiti tɛrɛ la, wo nya. Maa a Gakelebale, kalé Bale nya.
Currently Selected:
Lévinu 25: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
