Lévinu 24
24
Fintran valé Bale ’lɛburu lé we
(Fw 27:20–21; Mi N 8:1–4; Zak 4:2–14)
1Gakelebale we fe Moizi lɛ yé é léé:
2Bé fe Izraɛlnu lɛ léé, ’wo da fintran zé nyɔnɔ nya i lɛ, ɔliviwɔlɛ lé wa zɔn, a nyɔnɔ bozen nya, kyɛbɔ bile yifaama we gi. 3Arɔn é dan a ma’lɛrɛ lɛ zén‐ékevasɔkɔn gi, sɔ lé ke wenayefɛ ’lɛ é dɔle, a ’lɛ zia, kyɛbɔnu bile bléyi faa va we gi Gakelebale yara, nyanadi fɔɔ yé bladi é pa. É a bélidɔwe lé a glɛ ’ka lo, a nya, ka kulunu zé nya. 4É dan kyanfintran nɛnɛnu ma’lɛrɛ lɛ a bile yifaama we ma Gakelebale ’lɛ.
5I dan burupun zima si lɛ yé i dan buru vu ta fié kɛlɛ lɛ; buru do burupun suoné nya fié. 6I dan wo pla lɛ é ke ta lɛ fié, a lɛ do ’é kɛlɛ suiɛdo, yé a do ’é kɛlɛ suiɛdo, tablé lé ke kyan nya Gakelebale ’lɛ, a ta. 7’I lasikɔrɔpo tegele zén a lɛ fiénu ta, yé é dan kɛlɛ lɛ weseledɔmigifɛ nya buru ta, saraka lé wa kyɛ blé Gakelebale ’lɛ, a nya. 8Flinyi do do faa ma wo dan buru ’konu pla lɛ Gakelebale ’lɛ; é a gipawe lé é ’ka nyaan lo, a nya, yé Izraɛl lé nénu é dan a tawe kɛlɛ lɛ. 9Buru ’ko a Arɔn valé é benu zé nya yé wo dan wo ble lɛ fɛna plɛplɛ do na; é a wolé Bale ’lɛfɛ plɛplɛ nya, sarakanu lé wa kyɛ blé Gakelebale ’lɛ, é a wo va fɛ do nya. É a bélidɔwe lé é ’ka nyaan lo, a nya.
Balesɔnɔzan valé migyɛzan gi we lɛdɔle
(Mi N 15:32–36; 1 MNw 21:9–13; Mt 5:38–42)
10Gɔné do lé a bu ke Izraɛl le nya yé a ti a Éjipiti gɔné nya, é da Izraɛlnu va yé é we sia Izraɛl mi do va fla. 11Izraɛl le be ’ko, é Bale sɔnɔ yé é Bale tɔ sauun sɔnɔ. Wo goan Moizi va. Wa bu laama Dibri lu Sélomit; Dan bɛn gi le lé. 12Wa vɔ kɔn gi, fɔɔ yé dé Gakelebale é dan a fe lɛ fɛan zo, yé Moizi a fe. 13Yé Gakelebale lé Moizi lɛ léé: 14’Ka Balesɔnɔzan ’ko bɔra fla gini ma; munu faa lé wo dére ’ko ’ma, wo dan ’wo bɛ pla lɛ a nwiin, yé munu faa é dan gɔlɛ vuli lɛ a va yé ’é ga. 15’I we fe Izraɛlnu lɛ léé: Dé miomian bale pa élé Bale ma, ’té é wenyané dɔ ébo nwiin. 16Mi lé é Gakelebale tɔ sɛrɛ, wo dan ga dɔ lɛ a nwiin; munu faa é dan gɔlɛ vuli lɛ a va. Dé é a bɛn bɛ gi mi nyaoo, dé é a flazan nyaoo, é dan ga lɛ; é Bale tɔ sɛrɛ, azama.
17Mi lé é mi gyɛ, wo dan a gyɛ lɛ.
18Mi lé é mi bɛ lé wi do gyɛ, é dan a lɛgi nɔ lɛ; fɛ yuɛmale faa valé é lɛgi pale lé.
19Dé mi do é bɔluzan tuo, é a lé wa é tuo a zo; 20’wo wɔlɛ yélile lɛi pa wɔlɛ yélile nya; ’wo yuɛ lɛi pa yuɛ nya, ’wo suiɛ lɛi pa suiɛ nya; fɛan zo lé mi é bɔluzan tuo, a bɛ duo gi lé wo dan a kɛlɛ lɛ yee é lɛ.
21Mi lé é wi gyɛ, ’é a lɛi nɔ, naa, mi lé é mi gyɛ, wo dan a gyɛ lɛ.
22Bɛn bɛ mi valé flazan lé bélidɔwe a do; naa, maa a Gakelebale, kalé Bale nya.
23Moizi we fe Izraɛl lé nénu lɛ; wo Balesɔnɔzan si fla yé wo gɔlɛ vuli a va. We lé Gakelebale a fe Moizi lɛ, Izraɛl lé nénu a kɛlɛ.
Currently Selected:
Lévinu 24: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
