Lévinu 23
23
Fɛtinu
(Fw 20:8–11; 31:13–17)
1Gakelebale we fe Moizi lɛ yé é léma: 2Bé fe Izraɛl lé nénu lɛ léma:
Gakelebale lé fɛtinu lé ka dan wo zana dɔɔ lɛ, wo dan kɛlɛ lɛ zénle ékeva plɛplɛnu nya. Anlé fɛtinu lé ke ’ko.
3Ka dan nyanama pa lɛ yi suiɛdo; naa, yi sɔrafiézan a flinyi nya; ’bɛ ɛ ke ka nyanayi nya; wo dan zénle ékeva plɛplɛ do kɛlɛ lɛ. Té ka nyanama do kpen pa lo; é a Gakelebale lé flinyi nya, ka nyanana faa na.
4Gakelebale lé fɛtinu, zénle ékeva plɛplɛnu lé ka dan wo zana dɔɔ lɛ wozé bléyi va, wo lé ke ’ko:
Taboyi valé buru lé lévɛn ’ka a va lo
(Mi N 28:16–25; Mt 26:17–30)
5Moné vininzan lé yi vu ta ziɛnzan nya, nyanadi yiri zɔrɔ nya, é dan kɛlɛ lɛ Gakelebale lé Taboyi nya. 6Moné ’ko lé yi vu ta soruzan nya, buru lé lévɛn ’ka a va lo, wo dan ’bɛlé fɛti kɛlɛ lɛ Gakelebale bɔle we gi; buru lé lévɛn ’ka a va lo, ka dan a ble lɛ yi sɔrafié. 7A yi vininzan nya, ka dan zénle ékeva plɛplɛ do kɛlɛ lɛ; té ka nyanama pa lo, ’té dé é ’ka ka ma’lɛrɛ we nya lo. 8Saraka lé wa kyɛ blé, ka dan wo bo lɛ Gakelebale lɛ yi sɔrafié gi. A yi sɔrafiézan nya ka dan zénle ékeva plɛplɛ do kɛlɛ lɛ; té ka nyanama pa lo, ’té dé é ’ka ka ma’lɛrɛwe nya lo.
9Gakelebale we fe Moizi lɛ yé é léé: 10Bé fe Izraɛl lé nénu lɛ léé:
Dé ka bɔ tɛrɛ lé maa a nɔ ka lɛ, a ta, dé ka kun kalé féifɛ sile ma, ka dan kalé féifɛ vininzan si lɛ yé ka goan Balebanzan lɛ. 11É dan ’sanwun ’ko dia lɛ é bɛ fié la Gakelebale ’lɛ, ’é ban‐ɛn blele we ma; Balebanzan é dan a dia lɛ ’é bɛ fié la flinyi ta tu kinile nya. 12Yian nya lé ka yee ’sanwun dia é bɛ fié la, lɛɛ do ’blané lé, we do kpen ’ka a ma lo, ka dan a nɔ lɛ Gakelebale lɛ, balebanwi lé wa kyɛ blé, a nya; 13’ka a taa pa burupun zima lé wa vɔɔ nyɔnɔ nya, a suoné fié, saraka lé wa kyɛ blé, a nya, ’té Gakelebale a gin sié néné; yé ka dan baleban’yi zana lɛ dɔrɔ litré do é buu nya. 14Buru koo, dé ’sa sélile léé, dé a wiile léé, ’bɛ koo, té ka wo ble lo fɔɔ yian nya lé ka da blɛ nya kalé Bale lɛ, a yi nya. É a bélidɔwe lé é ’ka nyaan lo, a nya, ka kulunu zé nya, ka gɔnɔ faa gi.
Fɛ sile féi lé fɛti
(Fw 23:16; Mi N 28:26–31; Kw 2:1)
15Flinyi lé ka da ’sanwun nya yé wa dia é bɛ fié la a nya bɛ, é sia ’bɛlé tu kinile ma, ’ka flɛyi do do sɔrafié nɔnɔ tegele. 16’Ka yi yɔ fié wɔlɛ vu nɔnɔ fɔɔ yé é bɔ flinyi sɔrafiézan ta tu kinile ma; yé ka dan blɛ dɛrɛ kɛlɛ lɛ Gakelebale lɛ. 17’Ka buru fié si kalé kɔn gi a diale é bɛ fié la we gi; ’ka wo kɛlɛ burupun zima suoné fié nya yé ’ka lévɛn vɔ a va yé ka pane; é a fɛvininzan nya Gakelebale zé nya. 18Buru ’ko, ka dan fɛan nɔ lɛ a va, yee lé ke ’blané sɔrafié lé wo lɛɛ ke do, ’té we do kpen ’ka wo ma lo, wo koo, dirigɔné boroné do koo, ’blagɔné fié koo, wo nya; ka dan wo nɔ lɛ Gakelebale lɛ, balebanwi lé wa kyɛ blé, a nya; ’ka wo va blɛ valé baleban’yi nɔ ékeva; é a saraka lé wa kyɛ blé, ’té Gakelebale a gin sié néné, a nya. 19Ka dan wenyané ’yibo saraka bo lɛ boligɔné nya, yé ka dan bɔvɔ saraka bo lɛ lɛɛ do ’blané fié nya. 20Sarakabowi koo, fɛ vininzan lé buru koo, ’blané fié koo, Balebanzan é dan wo dia lɛ ’é bɛ fié la Gakelebale ’lɛ; wa fɛ lé wa pa é yɛrama Gakelebale zé nya, wo nya, yé wo dan kɛlɛ lɛ Balebanzan zé nya. 21A yi duo nya, ka dan fɛti zana dɔɔ lɛ yé ka dan zénle ékeva plɛplɛ do kɛlɛ lɛ; té ka nyanama pa lo, ’té dé é ’ka ka ma’lɛrɛle nya lo. É a bélidɔwe lé é ’ka nyaan lo, a nya, ka kulunu zé nya, ka gɔnɔ faa gi.
22Dé ka a ’sa gyɛna kalé tɛrɛ la, ’ka kalé féi sun do ta ’sa vo, yé té ka ’sagɔi sia lo. ’Ka ’bɛ vo nyanégyɛzan valé bɛn zé nya. Maa a Gakelebale kalé Bale nya.
Lɛɛ dɛrɛ lé fɛti
(Mi N 29:1–6)
23Gakelebale we fe Moizi lɛ yé é léé: 24Bé fe Izraɛl lé nénu lɛ léma:
Moné sɔrafiézan lé yi vininzan nya, ka dan flinyi zana dɔɔ lɛ bélinu fɛnli nya, yé ka dan zénle ékeva plɛplɛ kɛlɛ lɛ. 25Té ka nyanama pa lo, ’té dé é ’ka ka ma’lɛrɛle nya lo, yé sarakanu lé wa kyɛ blé, ka dan wo bo lɛ Gakelebale lɛ.
Wenyané ’yiboyi lé fɛti
(Lév 16; Mi N 29:7–11; Zak 13:1)
26Gakelebale we fe Moizi lɛ yé é léé:
27Moné sɔrafiézan ’ko lé yi vuzan nya, é a wenyané ’yiboyi nya; ka dan zénle ékeva plɛplɛ kɛlɛ lɛ, yé ka dan kabo kɛlɛ lɛ kiéné, yé sarakanu lé wa kyɛ blé, ka dan wo bo lɛ Gakelebale lɛ. 28Té ka nyanama do kpen pa yi ’ko la lo, naa, é a wenyané ’yiboyi nya, azama; yi lé wo dan kalé wenyané ’yibo lɛ Gakelebale, kalé Bale ’lɛ, é a ’bɛ yi nya. 29Yi ’ko la, dé mian é ’ka ébo kɛlɛ lɛ kiéné lo, wo dan a si lɛ élé munu va. 30Yi ’ko la, dé é a nyanamaoo nyanamaan nya, mian é a pa, maa dan a sɛrɛ lɛ élé munu va. 31Té ka nyanama do kpen pa lo. É a bélidɔwe lé é ’ka nyaan lo, a nya, ka kulunu zé nya, ka gɔnɔ faa gi. 32É a kalé flinyi do nya, ka nyanayi nya, yé ka dan kabo kɛlɛ lɛ kiéné; é sia yi sɔraziɛnzan lé nyanadi ma fɔɔ yé é bɔ yi vuzan lé nyanadi ma, ’ka kalé flinyi lé we kɛlɛ.
Fɛti lé wa kɛla faa wuo
(Mi N 29:12–39; 2 BDWS 16:13; Néé 8:13–18)
33Gakelebale we fe Moizi lɛ yé é léé: 34Bé fe Izraɛl lé nénu lɛ léma:
Moné sɔrafiézan ’ko lé yi vu ta soruzan nya, é dan kɛlɛ lɛ fɛti lé wa kɛla faa wuo, a nya, Gakelebale tɔ bɔle we gi, yi sɔrafié. 35A yi vininzan nya, ’ka zénle ékeva plɛplɛ do kɛlɛ; té ka nyanama pa lo, ’té dé é ’ka ka ma’lɛrɛle nya lo. 36Saraka lé wa kyɛ blé, ka dan a bo lɛ Gakelebale lɛ yi sɔrafié. A yi sɔraazan nya, ka dan zénle ékeva plɛplɛ kɛlɛ lɛ, yé sarakanu lé wa kyɛ blé, ka dan wo bo lɛ Gakelebale lɛ; é a zénle ékeva blɛɛn nya, té ka nyanama pa lo, ’té dé é ’ka ka ma’lɛrɛle nya lo.
37Gakelebale lé fɛtinu lé ke bɛ. Zénle ékeva plɛplɛnu lé ka dan wo zana dɔɔ lɛ, sarakanu lé wa kyɛ blé koo, balebanwi lé wa kyɛ blé koo, blɛnu koo, saraka bowi valé baleban’yi koo, wo nɔle Gakelebale lɛ we gi, woo lé ke bɛ; ’wo fɛ ’konu nɔ wo nɔyi nya. 38’Bɛ ta loru, ’ka vo Gakelebale lé flinyinu kɛlɛna; kalé blɛnu koo, balekunle lɛsɔɔ saraka faa koo, kalé bli drɔɔ blɛ faa koo, ’ka vo wo nɔna Gakelebale lɛ.
39Moné sɔrafiézan lé yi vu ta soruzan nya, dé ka kalé féifɛnu gyɛ, ka dan fɛti kɛlɛ lɛ Gakelebale lɛ yi sɔrafié; a yi vininzan a flinyi nya, yé a yi sɔraazan a flinyi nya. 40A yi vininzan nya, yili nɔnɔminu poro koo, yɔlaanu koo, yilikwɛɛnu koo, yuu gɔ la yilibɛnu koo, ka dan wo si lɛ yé ka dan gi nana zana gyɛ lɛ Gakelebale ’lɛ yi sɔrafié. 41Ka dan fɛti ’ko kɛlɛ lɛ Gakelebale ’lɛ yi sɔrafié lɛɛ do do ma. É a bélidɔwe lé é ’ka nyaan lo, a nya, ka kulunu zé nya. ’Ka kɛlɛ moné sɔrafiézan nya. 42Ka dan nyana lɛ faanu wuo yi sɔrafié; Izraɛl gi né faa é dan nyana lɛ faanu wuo, 43ka kulunu lé a gi dɔɔle we gi léé, maa Izraɛlnu nyana sɔkɔnnu wuo, maalé wo sile Éjipiti tɛrɛ la zuo. Maa a Gakelebale, kalé Bale nya.
44Moizi Gakelebale lé fɛti ’konu gi fe Izraɛl lé nénu lɛ a zo.
Currently Selected:
Lévinu 23: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
