Lévinu 22
22
Balebanwinu blele lé we
(Lév 7:19–21; 1 Kor 11:28–30)
1Gakelebale we fe Moizi lɛ yé é léé: 2Bé fe Arɔn valé é benu lɛ léma: An ’lɛfɛnu lé Izraɛl lé nénu wo pa é yɛrama anzé nya, té wa ble lo; té wo an tɔ ’lɛzan kɛlɛ fɛ pla nya lo. Maa a Gakelebale nya. 3Bé fe wo lɛ léma:
Ka kulu valé ka gɔnɔgimunu faa lé wo bié Gakelebale ’lɛfɛnu lé Izraɛl lé nénu a pa é yɛrama Gakelebale zé nya, wo ma, ’té dé ’bɛzan ’ka é zima lo, ’bɛ mi ’ko, an dan ’bɛ si lɛ ana an yuɛi. Maa a Gakelebale nya.
4-5Arɔn gɔnɔ gi gɔné faa lé pantɛn gyɛ ke a ma, ɛɛ, dé frɔlɔgyɛ a a ma, té é fɛ plɛplɛ ’ko ble lo, fɔɔ ’té é kɛlɛ tegele. Mi lé é ’ka é zima lo ’é manele migale ma lé we ma koo, mi lé a ’yi so a ma koo, mi lé é mane tawoplɛlawi ma yé ’bɛ a kɛlɛ naané koo, dé fɛofɛan mi kɛlɛ naané, ’bɛzan koo, wolé we a yee bɛ duo gi. 6Mi lé é mane fɛ ’konu ma, é ’ka é zima lo fɔɔ nyanadi; té é fɛ plɛplɛ ’konu ble lo, naa, ’é zuru; 7yiri vɔle zuo é kɛlɛ tegele, ’bɛ zuo é dan fɛ plɛplɛ ’konu ble lɛ, naa, é a alé fɛblele nya.
8Dé wi gale léé, dé wi lé a kɔlɛ ma mian, dé yee léé, té é a ble lo, dé ’bɛ é da a kɛlɛ naané. Maa a Gakelebale nya.
9’Wo anlé bélidɔwenu lɛdɔma, dé wo da wenyané dɔ wobo nwiin yé wo ga, fɛ plɛplɛ kɛlɛle fɛ pla nya we ma. Maa a Gakelebale nya, maa ɛ wo kɛlɛ segele.
10Té bɛn do kpen é fɛ plɛplɛ ’ko ble lo; dé mi lé ke é nyanale Balebanzan va, ’bɛ valé alé nyanamapazan, té ’bɛnu é fɛ plɛplɛ ’ko ble lo. 11Naa, luu lé balebanzan a lɔ gɔɔli nya, ’bɛ é bɔaléé ’bɛ a ble, ’é valé mi lé wa yaa alé kɔn gi, ’bɛnu a ble; wo dan Balebanzan leefɛ ble lɛ.
12Balebanzan lu lé é mi pla si, Bale ’lɛfɛ plɛplɛ ’ko lé wa no a nwale valé a tuale nya, té é a ble lo. 13Balebanzan lu lé é kɛlɛ gyɛzarale nya, ɛɛ, dé a zana a bɔra yé alé né ’ka lo, yé é da nyana lɛ é ti lé kɔn gi bélé é blɛnla zo, a se a a lɛ léé, ’é ’é ti leefɛ ble. Té bɛn do kpen a ble lo.
14Dé mi do fɛ plɛplɛ do ble é tanyila, é dan fɛ plɛplɛ ma banwo lɛ Balebanzan lɛ, yé ’é a taa pa a soruzan nya. 15Bale ’lɛfɛ plɛplɛnu lé Izraɛl lé nénu a nɔ Gakelebale lɛ wo nwale valé wo tuale nya, té Balebanzannu a kɛlɛ fɛ pla nya lo; 16dé wa kɛlɛ, wo dan wenyané dɔ lɛ wobo nwiin Bale ’lɛfɛ plɛplɛ blele nya; naa, maa a Gakelebale nya, maa ɛ wo kɛlɛ mi segele nya.
Balebanwi sile a va
(2 BDWS 17:1; Mal 1:13–14; 2 Sam 24:24)
17Gakelebale we fe Moizi lɛ yé é léé: 18-19Bé fe Arɔn valé é benu koo, Izraɛl lé nénu faa koo, wo lɛ léma:
Dé é a Izraɛl lé mi nyaoo, ɛɛ, dé é a wo va bɛn bɛ mi nyaoo, dé é léé, ’é Gakelebale ban, balebanwi lé wa kyɛ blé, a nya, dé diri léé, dé ’bla léé, dé boli léé, a gɔné lé we do kpen ’ka a ma lo, ’é yee ɛ si; dé bale kunle lɛsɔɔle léoo, dé bli drɔɔ blɛ léoo, a zo lé ’é a kɛlɛ, Bale lé é ban‐ɛn blele we gi. 20Wi lé fɛ a a ma, té ka ’bɛ nɔ lo; Bale ’ka ’bɛlé é ban‐ɛn blé lo. 21Dé mi do a a va léé, ’é bɔvɔ saraka bo Gakelebale lɛ, dé diri léé, dé trubɛ léé, yee lé fɛ ’ka a ma lo, ’é da yee ɛ nya; dé bale kunle lɛsɔɔle léé, dé bli drɔɔ blɛ léé, a zo lé alé we ke, Bale lé ’é ban‐ɛn blele we gi; té we do kpen é kɛlɛ a ma lo. 22Wi yuɛwiile koo, wi ganegale koo, wi tuole koo, wi lé manɔn ke a ma, ɛɛ, dé koo ɛ ke a ma, ɛɛ, dé a ma baa, ’bɛ wi koo, té ka bale ban wo do kpen nya lo; té ka wo do kpen pa balebanna ta, saraka lé kyɛ a blé Gakelebale ’lɛ, a nya lo. 23Dé diri léé, dé ’bla léé, dé a mɛn do a grɔgrɔ, ɛɛ, dé é a kpégéléne, i bɔalɛ léé, i bli drɔɔ blɛ kɛlɛ ’bɛ nya, naa, dé é a bale kunle lɛsɔɔle nya, ’bɛ nyi ’ka sié lo. 24Dé nyɛ dɔ wi wuofɛ ma, ɛɛ, dé é ’wii, dé wa si é wo a gi, ɛɛ, dé wi blale lé, té ka ’bɛ nɔ Gakelebale lɛ lo; té ka saraka bo ’bɛ wi nya kalé tɛrɛ la lo. 25Té ka ’bɛ zo wi si bɛn bɛ mi do lee, a nɔle kalé Bale lé fɛblele nya we gi lo; naa, tuo a wo ma, ’bɛzama; fɛ a wo ma; Bale ’ka dan ’é ban‐ɛn ble lɛ lo.
26Gakelebale lé Moizi lɛ léé: 27dé diri léé, dé ’bla léé, dé boli léé, dé é né yaa, a né é dan vo lɛ é bu va yi sɔrafié; é sia a yi sɔraazan ma, wa nyi sié léé, saraka lé kyɛ a blé, ’wo ’bɛ bo a nya Gakelebale lɛ. 28Dé é a diri nyaoo, dé é a ’bla nyaoo, té ka wi do valé élé né bɔrɔ bo yi do nya lo.
29Dé ka bɔvɔ saraka bo Gakelebale lɛ, ’ka bo é bobɛ gi yé é ban‐ɛn ble. 30’Ka a wi ble a yi duo nya; té ka a wi do kpen vo fɔɔ yé tu é kini a ma lo. Maa a Gakelebale nya.
31’Ka anlé bélidɔwenu lɛdɔma, yé ka wo ta tawo. Maa a Gakelebale nya. 32Té ka an tɔ ’lɛzan kɛlɛ tɔ pla nya lo, an kɛlɛle segele Izraɛl lé nénu méléna we gi. 33Maa a Gakelebale nya, maa ka pa é yɛrama yé maa ka si Éjipiti tɛrɛ la, kɛlɛle kalé Bale nya we gi. Maa a Gakelebale nya.
Currently Selected:
Lévinu 22: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
