Lévinu 21
21
Balebanmunu dɔbɛ
(Éz 52:11; Ézék 44:20–25; Mal 3:3)
1-2Gakelebale lé Moizi lɛ léé: Bé fe Balebanzannu Arɔn benu lɛ léé:
Dé é ’ka abo lé mi tegele nya lo, té Balebanzan ébo tiri dɔ élé munu va migale lé we ma lo; a bu koo, a ti koo, a be koo, a bwe koo, 3a buru lé ke blɛn nya, ’té é ’ka tan bo si lɛ lo, ’té é ke é nyanale a va, ’bɛ koo, woo lé é mane wo gale ma. 4É a élé munu va wo nwiinzan nya, amalé té ébo kɛlɛ bélé mi pla zo yé ébo kɛlɛ naané lo.
5Té Balebanzannu ’wo nwin puiɛ lo, té wo ’wo puo ma gun ma gyɛ lo, té wo pɔɔ gyɛ ’wo kɔlɛ ma lo. 6Wa é sile a va wolé Bale zé nya; té wo ’wolé Bale tɔ kɛlɛ fɛ pla nya lo; naa, sarakanu lé wa bo Gakelebale lɛ, ’té wa kyɛ blé yé é kɛlɛ wolé Bale blefɛ nya bɛ, ’wo ɛ a bo; wa segele.
7Dé bɔrɔdɛ le léé, dé le sɛrɛle léé, té wa si lo; lezan lé a zana a bɔra, té wa si lo; naa, Balebanmunu a é sile a va wolé Bale zé nya, azama. 8Balebanzan ɛ kalé Bale blefɛ no, amalé ’ka a ye mi segele nya; maa, Gakelebale lé maa ka pa é yɛrama, maa a sauun, amalé é dan kɛlɛ lɛ mi segele nya ka lɛ.
9Dé Balebanzan lu ébo sɛrɛ gɔnéginile nya, ’té é ’é ti sɛrɛ. ’Wa kyɛ ble.
10Balebanzan lé ke é bwenu ’lɛzan nya, ’té wo Bale ’lɛnyɔnɔ zén a nwiin bɛ, ’té wa pa é yɛrama yé é balebannasɔnu zén‐é ’é ta bɛ, té é sɔ si é ’wuo ma lo, té ’élé sɔnu fia lo. 11Té é bié migale ma lo; té ébo kɛlɛ naané lo, dé a ti léé, dé a bu léé, wolé we ma lo. 12Té é si fɛna sauun na lo, té ’élé Bale lé fɛna sauun kɛlɛ fɛna pla nya lo; naa, alé Bale ’lɛnyɔnɔ a a nwiin bélé tɔkoro zo. Maa a Gakelebale nya.
13Le lé é ’ka tan gɔné dɔɔ lɛ lo, ’é ’bɛ si é na nya. 14Gyɛzarale koo, le bɔrale koo, le sɛrɛle koo, bɔrɔdɛle koo, té é wo do kpen si é na nya lo; naa, alé munu va blɛnzan lé é ’ka tan gɔné dɔɔ lɛ lo, ’é ’bɛ si. 15Té ’é kulu tɔ sɛrɛ élé munu va lo; naa, maa a Gakelebale nya; maa ɛ kɛlɛ segele.
16Gakelebale we fe Moizi lɛ yé é léé: 17Bé fe Arɔn lɛ léma:
A gɔnɔ gi mi valé a kulu la mi do lé fɛ do bɔ wo kɔlɛ ma, té wo bié Bale lé fɛblele nɔle we ma lo. 18Gɔné faa lé we do bɔ wo kɔlɛ ma, bale ’lɛnyanama pale se ’ka wo lɛ lo; yuɛwiizan koo, tunbozan koo, korogyɛzan koo, dé é a mɛn do minilɛzan nya koo, 19mi lé a wɔlɛ ’ka drɔle tegele lo koo, 20kɔnɔgyɛzan koo, mɛn do siéizan koo, yuɛnédɔzan koo, kwɛgyɛzan koo, puɛpuɛgyɛzan koo, mi lé a wuofɛ ’wii koo, woo lé. 21Balebanzan Arɔn gɔnɔ gi mi faa lé we do bɔ wo kɔlɛ ma, té ’wo bié saraka lé wa kyɛ blé, a bole we gi Gakelebale lɛ lo; fɛ do bɔ a kɔlɛ ma, bɛwemalé é ’ka bɔalɛ léé, é bié alé Bale lé fɛblele nɔle we gi lo. 22A se a a lɛ léé, é ’ézé Bale lé fɛ ble; Bale ’lɛfɛ koo, ’bɛ lé wa pa é yɛrama Bale zé nya koo, ’é a ble. 23Fɛ do bɔ a kɔlɛ ma, amalé té é go kɔnmikɛlɛsɔ vazia lo, té é bié balebanna sɔnɔ lo; té é anlé fɛna sauunnu kɛlɛ fɛ planu nya lo; naa, maa a Gakelebale nya; maa wo ’lɛ dɔ.
24’Bɛ zo lé Moizi we fe Arɔn valé é benu koo, Izraɛl lé nénu faa koo, wo lɛ.
Currently Selected:
Lévinu 21: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
