Lévinu 20
20
We lɛdɔle mi gi
(Lév 18; 2 BDWS 17:2–7; 2 Kor 6:15–18)
1Gakelebale we fe Moizi lɛ yé é léé: 2Bé fe Izraɛl lé nénu lɛ léma:
Dé Izraɛl lé nénu va mi do léé, dé bɛn bɛ mi lé ke é nyanale Izraɛlnu va, dé yee léé, dé é ’élé né do kɛlɛ Mɔlɔk banfɛ nya, wo dan we lɛdɔ lɛ a gi ga nya. Ana tɛrɛ la munu é dan gɔlɛ vuli lɛ a va. 3Yé maa, maa dan dɔ lɛ a ma yé maa dan a si lɛ élé munu va, ’élé nénu kɛlɛ Mɔlɔk banfɛ nya, yé é anlé fɛna sauun sɛrɛ yé é an tɔ plɛplɛ kɛlɛ tɔ pla nya, ’bɛzama. 4Mi ’ko lé ’élé nénu kɛlɛ Mɔlɔk banfɛ nya, dé munu ’ka dɔ lɛ a ma yé wa gyɛ lo, 5maabozen, é dan dɔ lɛ yee valé élé kɔngimunu ma yé maa dan a si lɛ élé munu va, yee valé munu faa lé woo goo Mɔlɔk zuo bélé bɔrɔdɛ le zo, bélé mi ’ko a kɛlɛ fɛan zo, a zo, wo nya.
6Dé mi do go miléli laamunu valé ’monédɔmunu va, yé é wo kɛlɛwe kɛlɛ, maa dan dɔ lɛ a ma yé maa dan a si lɛ élé munu va. 7Maa a Gakelebale, kalé Bale nya, amalé ’ka kabo pa é yɛrama yé ’ka kɛlɛ sauun. 8’Ka anlé bélidɔwenu kɛlɛ yé ’ka wo ta tawo. Maa a Gakelebale lé éé ka kɛla sauun, a nya.
9Dé miomian bale pa é ti valé é bu ma, wo dan we lɛdɔ lɛ a gi ga nya; é bale pa é ti valé é bu ma; a nyɛ a ébo nwiin.
10Dé mi do wenyané kɛlɛ gɔné na va, dé é wenyané kɛlɛ é bɔlu do na va, ’wo we lɛdɔ gɔnézan valé gɔné gini le gi ga nya.
11Dé mi do wenyané kɛlɛ é ti na va, dé é ’é ti na porole ye ’bɛ zo, ’wo we lɛdɔ gɔné ’ko valé le ’ko gi ga nya; wo nyɛ a wobo nwiin.
12Dé mi do yi gyɛ é be na va, ’wo we lɛdɔ wo fiénu gi ga nya; wo we vɔɔle kɛlɛ. Wo nyɛ a wobo nwiin.
13Dé mi do yi gyɛ gɔné bɛ va bélé le zo, wo bozowe kɛlɛ; ’wo we lɛdɔ wo gi ga nya; wo nyɛ a wobo nwiin.
14Dé mi do blɛnzan valé ’é bu si é nanu nya, ’bɛ a wenyané blɛn nya; gɔné ’ko koo, lomu ’ko koo, ’wo wo kyɛ ble, té wenyané blɛn ’ko zo é kɛlɛ ka va lo we gi.
15Dé mi do yi gyɛ wi do va, ’wo we lɛdɔ a gi ga nya; yé ’ka wi gyɛ é ziin.
16Dé lezan yi gyɛ wi va, ’ka yee le valé wi gyɛ; wo nyɛ a wobo nwiin.
17Dé mi do é buru si, dé a ti lu léé, dé a bu lé néle léé, yé é ’bɛ porole ye yé ’bɛ a porole ye, ’bɛ a we dɛrɛdɛrɛ nya; wo dan wo si lɛ wolé munu yuɛ gi; é ’é buru poro, amalé é wenyané dɔ ébo nwiin.
18Dé mi do yi gyɛ le lé é nɔla, a va, dé é a poro, dé é a nyɛ ta bɔra, dé lezan é nyɛ ta bɔra, wo dan wo fiénu si lɛ ’wolé munu va.
19Té i bu buru poro lo, té i ti buru poro lo, naa, wa ibo lé munu nya; mi lé é ’bɛ kɛlɛ, é wenyané dɔ ébo nwiin.
20Dé mi do yi gyɛ é ti bwe na va, é ’é ti bwe na porole bɔra; wo wenyané dɔ wobo nwiin, wo dan vo lɛ sɔnzannu nya yé wo ga a zo.
21Dé mi do é bwe na si, we tiridɔle lé; é ’é bwe na porole bɔra; wolé né ’ka dan ye lɛ lo.
22’Ka anlé bélidɔwenu faa valé an déretawenu faa lɛdɔma, yé ’ka wo ta tawo, léé, tɛrɛ lé maa a gona ka nya a ta yé maa ka nyana a ta kli, té é féé ka nya lo. 23Bɛnnu lé maa dan wo bin lɛ ka ’lɛ, té ka wo kɛlɛwe kɛlɛ lo; naa, wo we ’konu faa kɛlɛ, yé wa bélé bo zo an yuɛ gi. 24Maa a fe ka lɛ léé, wolé tɛrɛ é dan kɛlɛ lɛ kazé nya; maa dan a nɔ lɛ ka lɛ kazé nya; é a tɛrɛ nyɔnɔzan nya. Maa a Gakelebale, kalé Bale lé é ka valé bɛnnu kini ékema, a nya.
25É a lé ka wi zin valé wi tiridɔle worona dɔɔ, yé ka miané zin valé miané tiridɔle worona dɔɔ; winu koo, mianénu koo, tɛrɛvawi lé éé tawoo é plɛ ta koo, wo lé maa wo gɔɔn ka lɛ léé, wo tiri a é dɔle bɛ, té ka kabo tiri dɔ wo do nya lo. 26Maa, Gakelebale a sauun, amalé ’ka kɛlɛ sauun an lɛ; maa ka valé bɛnnu kini ékema léé, ’ka kɛlɛ anzé nya.
27Dé gɔné léé, dé le léé, dé woo migale léli laan, ɛɛ, dé woo ’moné dɔa, ’wo we lɛdɔ wo gi ga nya; ’wo wo gyɛ gɔlɛ nya; wo nyɛ a wobo nwiin.
Currently Selected:
Lévinu 20: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
