Lévinu 19
19
Balebɔzi tawenu
(1 Pi 1:14–16; Lév 7:11–21; 11:45; Éf 4:25, 28)
1Gakelebale we fe Moizi lɛ yé é léé: 2Bé fe Izraɛl lé nénu faa lɛ léma:
Maa Gakelebale, kalé Bale, maa a sauun, amalé ’ka kɛlɛ sauun.
3Ka faa do do, ’ka ti valé ka bu lɛdɔma yé ’ka anlé flinyi lé we kɛlɛ. Maa a Gakelebale, kalé Bale nya.
4Té ka go miyilinu zuo lo, yé té ka bale selelenu kɛlɛ kabo lɛ lo.
5Dé ka bɔvɔ saraka bo Gakelebale lɛ, ’ka bo ’é bobɛ nya yé é ban‐ɛn ble. 6’Ka sarakabowi ble a boyi valé élé tu kinile nya. Yee lé é vo yé yi yaa bɔ ’bɛ ma, ’ka kyɛ ble. 7Dé wa ble yi yaazan nya, ’té wo fɛ sɛrɛle ble. ’Té Bale ’ka dan ’bɛ saraka ban‐ɛn ble lɛ lo. 8Mi lé é a ble, é wenyané dɔ ébo nwiin, naa, é Gakelebale ’lɛfɛ kɛlɛ fɛ pla nya; mi ’ko bɛ, wo dan a si lɛ élé munu va.
9Dé ka a ’sa gyɛna kalé tɛrɛ la, ’ka kalé féi sun do ta ’sa vo, yé té ka ’sagɔi sia lo. 10Dé ka a kalé dɔrɔporo sona, a pan lé ka yuɛ gié a ta, té ka a so é dɛrɛ lo; a poro lé é dia, té ka ’bɛ sia lo. ’Ka ’bɛ vo nyanégyɛzan valé bɛn bɛ mi zé nya. Maa a Gakelebale, kalé Bale nya.
11Té ka kyeenwo lo, té ka viéwo ka ke lɛ lo, té ka dabli kɛlɛ ka ke lɛ lo.
12Té ka bale ’nyɔɔn an tɔ nya vié nya lo, naa, dé bé kɛlɛ, ’té ilé Bale tɔ kɛlɛ fɛ pla nya. Maa a Gakelebale nya.
13Té ka yaa ka bɔlunu ta lo, té ka fɛ do kpen sia gla nya lo.
Té ilé nyanamapazan ban é yii i lee fɔɔ yé tu é kini a ma lo.
14Té i bale pa tɔnéwiizan ma lo; té i fɛ do pla yuɛwiizan ’lɛ, yé é kɛlɛ a diafɛ nya lo; naa, ’i kana ilé Bale lee. Maa a Gakelebale nya.
15Dé ka a we blena, té ka weple kɛlɛ lo; té ka dɔ nyanégyɛzan zuo nyané lé a gyɛle we ma lo, té ka mi blɛn lé we kɛlɛ é blɛn ma lo, naa, ’ka bɔluzannu lé we ble we tegele yɛrama.
16Té ka mitɔsɛrɛwe nwɛɛn kalé munu va lo. Té ka nwa ka bɔluzannu ma wo nyɛ zanale we ma lo. Maa a Gakelebale nya.
17Té i bwe za pa i bli gi lo; é a lé i we pla i bɔluzan lɛ, naa, té i wenyané dɔ ibo nwiin alé we ma lo. 18Té ibo lé we lɛ gi pa lo, té ilé munu vawe pa i bli gi lo. I bɔluzan ’é sɔ i lɛ bélé biibozen zo. Maa a Gakelebale nya.
19’Ka anlé bélidɔwe lɛdɔma.
Té ka nyanama pa wi gɔnɔ fié nya ékeva lo; té ka fɛwɔlɛ gɔnɔ fié vɔ kalé féi lo; té i kununu vɔɔle sɔ zén i ta lo.
20Luudané lé a bwɛ ke, ’té wo ’ka a tabo lɛ lo, yé wo ’ka a vo lɛ éboma lo, dé mi bɛ wenyané kɛlɛ le ’ko va, wo dan we lɛdɔ lɛ wo gi, naa, té ’wo wo gyɛ lo, lezan ’ka éboma lo, azama. 21Gɔné ’ko é dan da lɛ élé saanle ma ’blagɔné do nya wenyaa saraka bofɛ nya Gakelebale lɛ, zén‐ékevasɔkɔn ’léé. 22Wenyané lé é a kɛlɛ bɛ, balebanzan é dan a ma wenyané ’yibo lɛ Gakelebale ’lɛ, wenyaa saraka ’blagɔné nya, yé wenyané lé é a kɛlɛ bɛ, wo dan a ma we vo lɛ.
23Dé ka bɔ ana tɛrɛ la, dé ka yili gɔnɔ faa suru, ka dan wo poronu ye lɛ bélé mi lé a gane ’ka é dɔle lo, a zo; lɛɛ yaa gi é dan kɛlɛ lɛ ka lɛ a zo; té ka wo poro ble lo. 24A lɛɛ ziɛnzan gi, ’wo wo poro faa pa é yɛrama Gakelebale zé nya, ’té ka gi éé nanaan. 25A lɛɛ soruzan nya, ka dan wo ble lɛ, yé ka dan vo lɛ wo sona. Maa a Gakelebale, kalé Bale nya.
26Té ka fɛ do kpen ble é nyɛ nya lo. Té ka ’moné dɔ fɛ do kpen nya lo. 27Té ka nwin bo koro ma lo; té ka puo ma gun ma gyɛ lo. 28Té ka kɔlɛ ma mian migale lé we ma lo; té ka kɔlɛ ma nyɔɔ gyɛ lo. Maa a Gakelebale nya.
29Té i lu vo léé, ’é kɛlɛ bɔrɔdɛ le nya lo, dé lomu faa é da kɛlɛ bɔrɔdɛ lomu nya, yé tɛrɛ é fan tɛrɛgyɛwe nya.
30’Ka anlé flinyinu kɛlɛ yé ’ka anlé fɛna sauun ye fɛ blɛn nya. Maa a Gakelebale nya.
31Té ka go miléli laamunu valé ’monédɔzannu va lo; te ka we laa wo lee lo, dé wo da ka tiri dɔ. Maa a Gakelebale, kalé Bale nya.
32Dé nwanabɔzan bɔ i ma é nyanale, ’i nwa; ’i mi segele lɛdɔma. ’I kana Bale lee. Maa a Gakelebale nya.
33Dé bɛn bɛ mi da nyana lɛ ka va kalé tɛrɛ la, té ka yaa a ta lo. 34Bɛn bɛ mi lé ke é nyanale ka va, ’ka alé we kɛlɛ bélé kalé flami zo; ’é sɔ ka lɛ bélé kabozen zo, naa, ka a bɛnnu nya é vinin Éjipiti tɛrɛ la. Maa a Gakelebale, kalé Bale nya.
35Té ka we ple kɛlɛ weblele koo, fɛ sangi valé a ’wuola danle koo, fɛ danle kilo la koo, fɛ danle fɛdankana‐né gi koo, wolé we gi lo. 36Kalé fɛdanfɛ koo, kalé kilonu koo, kalé fɛdangifɛ éfa koo, kalé litré koo, ’wo kɛlɛ tegele. Maa a Gakelebale, kalé Bale lé é ka si Éjipiti tɛrɛ la, a nya.
37’Ka anlé bélidɔwenu faa lɛdɔma, ’ka an déretawenu faa kɛlɛ, yé ’ka wo ta tawo. Maa a Gakelebale nya.
Currently Selected:
Lévinu 19: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
