Fwile 36
36
Wo sɔkɔn kɛlɛ
(Éf 2:20–22)
1Bɛsaléɛl koo, Ooliab koo, blabozannu faa koo, woo lé Gakelebale gi kinile valé ’wuoatawe nɔ wo lɛ wedɔɔle valé we kɛlɛle we ma bɛ, nyanamanu lé wa pa sɔkɔn gi nyanama pale we ma, wa pa, we faa lé Gakelebale a fe, a yɛrama. 2Bɛsaléɛl koo, Ooliab koo, blabozannu faa lé Gakelebale ’wuoatawe paa wo gi koo, munu faa lé é a wo bli gi léé, ’wo yara pa nyanama ’ko pale ta koo, Moizi wo laa. 3Blannu faa lé Izraɛl lé nénu da wo nya, nyanamanu lé wa pa, sɔkɔn gi nyanama pale we ma, wo we ma, Bɛsaléɛl wo si Moizi va. Bladi faa do do ma woo dan blannu nya Moizi lɛ wolé blibɔmale nya. 4Yé blabozannu faa lé wo ke sɔkɔn gi nyanamanu faa pana, wo faa do do nwa wolé nyanama ’léé, 5yé wo da a fe lɛ Moizi lɛ léé: Nyanamanu lé Gakelebale ko bɔɔ pa a ma, fɛnu lé munu da a nya a pale we ma, é a kiɛre; ko mawe ’ka a faa gi lo. 6Yé Moizi a zana dɔɔ léé, dé é a gɔné nyaoo, dé é a le nyaoo, té mi do kpen da sɔkɔn dɔfɛ nya é dɛrɛ lo. ’Bɛ zo lé wo munu dale blannu nya yi ga. 7Fɛnu lé wa ma’lɛrɛ nyanamanu faa pale we ma, wo lɛ sɔɔ yé a ke vo.
8Blabozannu faa lé wo ke nyanama ’ko pana, wo sɔkɔn kɛlɛ lɛn nénéle sɔ zima vu valé kununu lé a yuɛɛ ke glayivayou valé galunaa valé sɔɔn, wo nya; wo sérubɛn fotonu dɔ a ta pɛɛ gyɛle nya. 9Sɔ do sangi kɛlɛ mɛtrɛ vu ta ziɛn, yé sɔ do ’wuola kɛlɛ mɛtrɛ fié; sɔ faa kinibɛ kɛlɛ do. 10Wo sɔ soru béé é ke ’léé; yé wa soru koɛnu béé é ke ’léé é ziin. 11Wo sɔbɛ koroibole kɛlɛ glayivayou sɔ nya, yé wo wo béé sɔ soru lé wa béé é ke ’léé é vinin, a voélazan san gi; wa kɛlɛ yee duo zo a soru koɛnu voélazan san gi. 12Wo sɔbɛ koroibole yɔ fié wɔlɛ vu béé sɔ vininzan ma, yé wo sɔbɛ koroibole yɔ fié wɔlɛ vu béé sɔ koɛzan voélazan san gi; sɔbɛ koroibolenu ’ko, wo kɛlɛ é ke yɛrama. 13Wo kyan nyawɛnnénu kɛlɛ yɔ fié wɔlɛ vu, yé wo sɔ fié vɔ é ke ’léé wo nya. Yé sɔ faa kɛlɛ kɔn do nya.
14Wo sɔnu kɛlɛ bolikyɛɛ nya, a buale sɔkɔn ta we ma; wo sɔnu ’ko kɛlɛ vu ta do. 15Sɔ do sangi kɛlɛ mɛtrɛ vu ta soru, yé sɔ do ’wuola kɛlɛ mɛtrɛ fié; sɔ vu ta do faa kinibɛ kɛlɛ do. 16Wo sɔ soru béé é ke ’léé, yé wo sɔ suiɛdo béé é ke ’léé. 17Wo fɛ koroibole yɔ fié wɔlɛ vu dɔ sɔ soru lé wa béé é ke ’léé, a ’léé, yé wo fɛ koroibole yɔ fié wɔlɛ vu dɔ sɔnu lé wa béé é ke ’léé é voéla, a ’léé. 18Wo zéné nyawɛnné yɔ fié wɔlɛ vu kɛlɛ, sɔkɔn dɔle é ke ’léé we ma, a faa kɛlɛle do we gi.
19Wo sɔkɔn tabuafɛ do kɛlɛ ’blagɔné kɔlɛ lé wa vɔ zéri’yi sɔɔn va, a nya, yé wa tabuafɛ do kɛlɛ dofɛn kɔlɛ nya, a plale a ta loru we ma.
20Wo yilifee gyɛ sɔkɔn zé nya; wo wo kɛlɛ akasiayili nya, yé wo wo dɔ loru. 21Yilifee do sangi kɛlɛ mɛtrɛ soru, yé a ’wuola kɛlɛ mɛtrɛ buu do bɛlaa do. 22Yilifee faa gane a fié fié, é dɔle é ke yɛrama; wa kɛlɛ yee duo zo sɔkɔn lé yilifee faa lɛ. 23Wo sɔkɔn lé yilifee yɔ do kɛlɛ yirinwana bɛyilazia. 24Wo ganevɔgi gɔɔlifu yɔ fié pla yilifee yɔ do wuo, yilifee do ganevɔgi gɔɔlifu a fié, a gane fié vɔgifɛ nya. 25Wo yilifee yɔ do kɛlɛ sɔkɔn san koɛ zé nya, yirinwana bɛbolazia, 26é valé é ganevɔgi gɔɔlifu yɔ fié nya, ganevɔgi gɔɔlifu fié a yilifee do do wuo. 27Wo yilifee suiɛdo kɛlɛ sɔkɔn nwunzi zé nya, yirivɔnazia. 28Wo yilifee fié kɛlɛ sɔkɔn nwunzi sunnu la; 29wa pa ékema fié, é sia tɛrɛ zia, wa yere é zima é ’wuo ma kpɔwɔlɛ nya; wa kɛlɛ yee duo zo kɔnsun fié zé nya. 30’Bɛ zo lé yilifee kɛlɛ sɔraa, wo valé ’wo ganevɔgi gɔɔlifu nya, ganevɔgi gɔɔlifu a vu ta suiɛdo, ganevɔgi gɔɔlifu fié a yilifee do do wuo. 31Wo sɔkɔn sɛedɔmayilinu kɛlɛ akasiayili nya, 32sɔkɔn san do lé yilifee zé kɛlɛ soru, sɔkɔn nwun zi lé yilifee zé kɛlɛ soru, yirivɔnazia; 33wa sɛedɔmayili mélénazan kɛlɛ, é sia a sun do la fɔɔ yé é bɔ a sun koɛ la we gi. 34Wo yilifeenu ma sɔɔla kyan nya, yé wo wolé kyankpɔwɔlɛnu kɛlɛ a siyilinu wɔrale wo gi we ma, yé wo wo siyilinu ta sɔɔla kyan nya.
35Wo kɔnmikɛlɛsɔ kɛlɛ lɛnsɔ zima lé wa tan lɛn nénéle nya, ’té a yuɛ ké glayivayou koo, galunaa koo, sɔɔn koo, a nya; wa yuɛ la gɔrɔla yé wo sérubɛn fotonu dɔ a ta pɛɛ gyɛle nya. 36Wo wɛyili ziɛn kɛlɛ azé nya; wo wo kɛlɛ akasiayili nya yé wo wo ta sɔɔla kyan nya; wolé ’kɔblanénu a kyan nya, yé wo gɔɔlifu sele wo ganevɔgifɛ ziɛn nya.
37Wo sɔ do kɛlɛ sɔkɔn ’léé zé nya, lɛnsɔ zima lé wa tan lɛn nénéle nya, ’té a yuɛɛ ke glayivayou koo, galunaa koo, sɔɔn koo, a nya; yé wo pɛɛ gyɛ a ta. 38Wo alé wɛyili soru valé ’wolé ’kɔblanénu kɛlɛ, yé wo wɛyili ’wuonu valé wolé sɔkunfɛnu ta sɔɔla kyan nya; wo ganevɔgifɛ soru a zéné nya.
Currently Selected:
Fwile 36: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
