Fwile 35
35
Munu da sɔkɔn kɛlɛfɛnu nya
(Fw 31:12–17)
1Moizi Izraɛl lé nénu faa laa, yé é lé wo lɛ léé: Wenu lé Gakelebale a fe léé, ’wa kɛlɛ, yee lé ke ’ko. 2’Wo nyanama pa yi suiɛdo; naa, yi sɔrafiézan é dan kɛlɛ lɛ kalé yi nyané nya. Flinyi lé, Gakelebale lé yi lé. Mi lé é nyanama pa ’bɛ yi nya, wo dan ga dɔ lɛ a nwiin. 3Té ka kyɛ sɔn ka nyanana do kpen na flinyi nya lo.
4Moizi lé Izraɛl lé nénu faa lɛ léé: We lé Gakelebale a fe bélidɔwe nya, yee lé ke ’ko. 5’Ka ka leefɛ ke si Gakelebale blan nya. Munu faa lé bli zin ke wo gi, wo dan da lɛ Gakelebale blan nya; kyan valé gɔɔlifu valé zéné koo, 6glayivayou sɔ valé galunaa sɔ valé sɔ sɔɔn koo, lɛnsɔ zima koo, bolikyɛɛsɔ koo, 7’blagɔné kɔlɛ lé wa vɔ zéri ’yi sɔɔn va, é valé dofɛn kɔlɛ koo, 8zianbla ginzannu lé wa kɛla nyɔnɔ lé wa zén‐é mi ta, a nya, ’bɛ valé zianbla ginzannu lé woo lasikɔrɔ kɛla wo nya koo, 9ɔnisigɔlɛ valé gɔlɛwezan bɛnu lé woo éfɔdi valé golɛtafɛ ’lɛra wo nya, wo koo, woo lé. 10Ka va munu faa lé wo ke blabozannu nya, ’wo da, yé fɛ faa lé Gakelebale a fe, ’wa kɛlɛ ma. 11Sɔkɔn valé étabuafɛnu koo, alé nyawɛnnénu koo, alé yilifeenu koo, a sɛedɔmayilinu koo, alé wɛyilinu valé alé ganevɔgifɛnu koo, 12kyankɛsu valé a siyilinu koo, nyanai zén mi la nyanana koo, kyankɛsu tasɔ koo, 13tablé valé é siyilinu koo, a ma nyanamapafɛnu faa koo, Bale ’lɛburu koo, 14fintran valé é ma nyanamapafɛnu koo, élé bɔnénu koo, fintran lé nyɔnɔ koo, 15lasikɔrɔ kyɛblena valé é siyilinu koo, nyɔnɔ lé wa zén‐é mi ta valé lasikɔrɔ ginzan koo, sɔ lé ke duoli nya sɔkɔn ’léé koo, 16balebanna lé woo winu kyɛ blé a ta koo, alé zéné nyannyanné koo, a siyilinu koo, a ma nyanama pafɛnu faa koo, ’wolikana valé é gane koo, 17gɔrɔ bosɔnu valé élé wɛyilinu valé é ganevɔgifɛnu valé é ’léé sɔ koo, 18sɔkɔn kunfɛnu koo, gɔrɔ kunfɛnu valé wolé balenu koo, sɔkɔn gi nyanama pasɔnu koo, 19balebanzan Arɔn lé balelasɔnu koo, a benu lé sɔnu lé wa zén‐é wo ta balebannyanama lé we ma koo, woo lé é a lé munu é da wo nya Bale blan nya.
20Izraɛl lé nénu faa si Moizi va.
21Munu faa lé é sɔ wo bli lɛ, ’té wo bli ke é zima, wo da Gakelebale blan nya, zén‐ékevasɔkɔn koo, a ma nyanamapafɛnu koo, balelasɔnu koo, wo kɛlɛle we gi. 22Gɔnénu koo, lomu koo, wo da fɛ nya; munu faa lé bli zin ke wo gi, wo da tɔnémakyan koo, kyankpɔwɔlɛnu koo, bɛmazénénu koo, bɛmakyan koo, kyanfɛnu gɔnɔ kiɛre koo, wo nya; Bale blan kyan lé wa pa é yɛrama Gakelebale zé nya, wo faa do do a nɔ. 23Glayivayou sɔnu valé galunaa sɔnu valé sɔ sɔɔnnu koo, lɛnsɔ zima valé bolikyɛɛ sɔ koo, ’blagɔné kɔlɛ lé wa vɔ zéri ’yi va, ’bɛ valé dofɛn kɔlɛ koo, munu faa lé fɛnu ’ko ke wo lee, wo da wo nya. 24Munu faa lé é sɔ wo lɛ léé, ’wo ’wozé blan nɔ gɔɔlifu valé zéné nya, wo da a nya Gakelebale blan nya, a bɔle we ma. Akasiayili lé wa kɛla sɔkɔn gi nyanamapafɛnu nya, dé ’bɛ a mian lee, ’bɛnu da wo nya. 25Lomu faa lé wo kununu zunwo ’wo zua, kununu lé wa zun, wo da a nya, kununu lé wo yuɛɛ ke glayivayou valé galunaa valé sɔɔn, yee lé, é valé lɛnsɔ zima nya. 26Lomu faa lé bli zin ke wo gi, ’té woo bolikyɛɛ zunwo ’wo zua, wo wo zun. 27Ɔnisigɔlɛ valé gɔlɛwezan bɛnu lé woo éfɔdi valé golɛtafɛ ’lɛra wo nya, wo koo, 28zianbla ginzannu koo, fintran lé nyɔnɔ valé nyɔnɔ lé wa zén‐é mi ta valé nyɔnɔ lé woo lasikɔrɔ ginzan kɛla a nya koo, munu va yarakinizannu da wo nya. 29Nyanama lé Gakelebale munu bɔɔ pa a ma Moizi lɔlu nya, Izraɛl lé munu faa lé é ke wo bli gi léé, ’wo nyanama ’ko paan, gɔnénu valé lomu, wo da blan nya Gakelebale lɛ wobo lé blibɔmale nya.
30Moizi lé Izraɛl lé nénu lɛ léé: Uru be Uri, ’bɛ be Bɛsaléɛl, Juda bɛngizan, Gakelebale a si a va, ’ka ’bɛ gi dɔɔ ma. 31Bale Léli koo, gi kinile koo, ’wuoatawe koo, nyanama gɔnɔ faa dɔɔle koo, é a fan a nya. 32-33Fɛdɛrɛ kɛlɛle koo, kyan valé gɔɔlifu valé zéné gyɛle koo, gɔlɛwezan vɔle kyan gi koo, yili nyanama koo, fɛfoto dɔle gɔnɔ faa koo, é wo kɛlɛle gikinile nɔ a lɛ. 34Yee koo, Dan bɛngizan, Aisamak be Ooliab koo, Bale blɛ kɛlɛ wo lɛ léé, ’wo we paa munu gi ’wo zua. 35Yili nyaale gɔnɔ faa koo, foto dɔle valé fɛ nyɔɔ gyɛle koo, sɔnu lé wo yuɛɛ ke glayivayou valé galunaa valé sɔɔn, wo valé lɛnsɔ zima, wo tanle valé wo ta pɛɛ gyɛle koo, nyanama gɔnɔ faa pale valé fɛ dɛrɛ gɔnɔ faa kɛlɛle koo, Bale wo fan alé ’wuoatawe nya wo faa kɛlɛle we gi.
Currently Selected:
Fwile 35: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
