Fwile 25
25
Sɔkɔn dɔle lé we
(Fw 35:4–35)
1Gakelebale we fe Moizi lɛ ye é léma: 2Bé fe Izraɛl lé nénu lɛ léé, ’wo da an blan nya ma; bé si anzé nya mi faa lé wa nɔ bli zin nya, wo lee. 3Fɛ lé i dan a si lɛ wo lee an blan nya, yee lé ke ’ko: kyan koo, gɔɔlifu koo, zéné koo, 4glayivayou sɔnu valé galunaa sɔnu valé sɔ sɔɔnnu koo, lɛnsɔ zimanu koo, bolikyɛɛsɔnu koo, 5’blagɔné kɔlɛ lé wa tana zéri ’yi sɔɔn nya, ’bɛ valé dofɛn kɔlɛnu koo, akasiayilinu koo, 6fintran nyɔnɔ koo, nyɔnɔ lé wa zén‐é mi ta, é valé zianbla ginzannu lé woo lasikɔrɔ kɛla wo nya koo, 7ɔnisigɔlɛ valé gɔlɛwezan bɛnu lé woo éfɔdi valé golɛtafɛ ’lɛra wo nya, wo koo, woo lé. 8Wo dan anlé kɔn dɔ lɛ yé maa dan nyana lɛ wo méléna. 9Sɔkɔn koo, a gifɛnu koo, ka dan wo kɛlɛ lɛ a kɛlɛbɛ lé maa dan a gɔɔn lɛ i lɛ, a yɛrama.
Kyankɛsu — tablé — fintran
(Fw 37:1–9; Kol 2:17)
10Wo dan kyankɛsu kɛlɛ lɛ akasiayili nya; a sangi é dan kɛlɛ lɛ mɛtrɛ do bɛlaa do, a ’wuola é dan kɛlɛ lɛ mɛtrɛ buu do bɛlaa do, a nwale loru é dan kɛlɛ lɛ mɛtrɛ buu do bɛlaa do. 11I dan kyan tegele ’yi gié lɛ a gi valé a lala, yé i dan kyanbale diri lɛ a lɔlu zi. 12I dan kyankpɔwɔlɛ ziɛn sele lɛ yé i dan wo vɔ lɛ a sun ziɛn ta, a fié a bɛ do la yé a fié a bɛ do la. 13I dan a siyilinu kɛlɛ lɛ akasiayili nya yé i dan kyan ’yi gié lɛ wo ma. 14I dan a siyilinu wɔra lɛ kpɔwɔlɛnu gi, kɛsu bɛ fié ta, kyankɛsu sile we ma. 15A siyilinu é dan vo lɛ kyankɛsu ma kpɔwɔlɛnu gi, wo ’ka dan wo si lɛ a gi lo. 16Wenayefɛ lé maa dan a nɔ lɛ i lɛ, i dan a pa lɛ kyankɛsu gi. 17I dan nyanai zén mi la nyanana kɛlɛ lɛ kyan tegele nya; a sangi é dan kɛlɛ lɛ mɛtrɛ do bɛlaa do, a ’wuola é dan kɛlɛ lɛ mɛtrɛ buu do bɛlaa do. 18I dan sérubɛn foto fié kɛlɛ lɛ kyan nya, nyanai zén mi la nyanana ’wuo fiénu ta; i dan wo kɛlɛ lɛ kyan lé wa gyɛ, a nya. 19’I sérubɛn do kɛlɛ a ’wuo do la yé ’i sérubɛn do kɛlɛ a ’wuo koɛ ta; sérubɛnnu koo, nyanai zén mi la nyanana koo, bé faa foli é ke ’léé do. 20Sérubɛnnu é dan wo bɛa soi lɛ a ta loru yé wo nyanai zén mi la nyanana ta bua a nya, ’té wa wo ke yara ma; sérubɛnnu é dan wo yara dɔ lɛ nyanai zén mi la nyanana ta. 21I dan nyanai zén mi la nyanana dɔra lɛ kyankɛsu ta loru, yé wenaye fɛ lé maa dan a nɔ lɛ i lɛ, i dan a pa lɛ kyankɛsu gi. 22’Bɛna lé ko dan kee lɛ i nya; maa dan anlé bélidɔwenu faa nɔ lɛ i lɛ Izraɛl lé nénu zé nya, nyanai zé mi la nyanana ta loru, sérubɛnnu lé i wo dɔ wenayefɛ pagikɛsu ta, wo méléna.
23I dan tablé do kɛlɛ lɛ akasiayili nya; a sangi é dan kɛlɛ lɛ mɛtrɛ do, a ’wuola é dan kɛlɛ lɛ mɛtrɛ buu nya, yé a wuo vɔle é dan kɛlɛ lɛ mɛtrɛ buu do bɛlaa do. 24I dan kyan tegele ’yi gié lɛ a ma yé i dan kyanbale diri lɛ a lɔlu zi. 25I dan tablé lɔlu dɔ lɛ é ta loru, bɛnwɔlɛ ziɛn pale ékema zo, yé i dan kyanbale diri lɛ é ziin ’bɛ zi. 26I dan kyankpɔwɔlɛ ziɛn kɛlɛ lɛ tablé zé nya, yé i dan kyankpɔwɔlɛ vɔ lɛ a sun ziɛn lé ke a gane ziɛn yɛrama, wo ta. 27Kyankpɔwɔlɛ é dan kɛlɛ lɛ tablé lɔlu ma, yé wo dan tablé siyilinu wɔra lɛ wo gi. 28I dan a siyilinu kɛlɛ lɛ akasiayili nya, yé i dan kyan gié lɛ wo ma; wo dan kɛlɛ lɛ tablé sifɛ nya. 29Alé planu koo, alé gaannénu koo, alé bééné bɔnu koo, alé palaganeanénu koo, ’i wo kɛlɛ saraka bo’yi we ma; i dan wo kɛlɛ lɛ kyan tegele nya. 30I dan an ’lɛburu dɔra lɛ tablé ta yifaama an ’lɛ.
31I dan fintran kɛlɛ lɛ kyan tegele nya. ’I dan fintran ’ko kɛlɛ lɛ kyan gyɛle nya; a gane koo, a pun koo, a bɔnu koo, a ma gininu koo, a vwinu koo, wo faa ’é kɛlɛ é ke ’léé do. 32A blan suiɛdo ’é kɛlɛ a sannu ta, fintran blan yaa ’é kɛlɛ a bɛ do la, yé fintran blan yaa ’é kɛlɛ a san koɛ la. 33Bɔ yaa lé ke bélé amandé wɔlɛ zo, é dan kɛlɛ lɛ a blan do ma, é ma gini do do valé vwi do do nya, bɔ yaa lé ke bélé amandé wɔlɛ zo é dan kɛlɛ lɛ a blan fiézan ma, é ma gini do do valé vwi do do nya; a blan suiɛdo lé é kɛlɛ fintran ma, a zo duo lé é dan kɛlɛ lɛ wo faa zé nya. 34Bɔ ziɛn lé ke bélé amandé wɔlɛ zo, é dan kɛlɛ lɛ fintran pun ma, é ma gini do do valé vwi do do nya. 35A blan fié lé é bɔra fintran pun gi, a ma gini do ’é kɛlɛ wo wuo, a ma gini do ’é kɛlɛ a blan fié koɛ wuo, yé a ma gini do ’é kɛlɛ a blan fié pɔné wuo; blan suiɛdo lé wo bɔra fintran gi, wo dan kɛlɛ lɛ yee ɛ zo. 36Fintran ma gininu valé é blannu wo dan kɛlɛ lɛ é ke ’léé do; a faa é dan kɛlɛ lɛ kyan gyɛle nya, kyan tegele nya. 37I dan a fintran bɔné sɔrafié kɛlɛ lɛ, yé i wo dɔra wo ’léé fɛan zo, léé, a san é bɔra a ’lɛzia. 38A dirifɛnu valé a yeezéngifɛ é dan kɛlɛ lɛ kyan tegele nya. 39Kyan tegele talan do é dan fintran valé é ma nyanamapafɛnu faa kɛlɛ lɛ. 40’I yuɛ pa ibo va, ’i wo kɛlɛ a kɛlɛbɛ lé maa a gɔɔn i lɛ gɔ nwiin, a yɛrama.
Currently Selected:
Fwile 25: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
