Fwile 26
26
Sɔkɔn bozen dɔbɛ
(1 Kor 3:16; Ébr 9:1; 11:24; Wg 21:3)
1I dan sɔkɔn kɛlɛ lɛ lɛnsɔ vu nya; lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya; i dan sérubɛnnu foto dɔ lɛ a ta pɛɛ gyɛle nya. 2Sɔ do sangi é dan kɛlɛ lɛ mɛtrɛ vu ta ziɛn, yé a ’wuola é dan kɛlɛ lɛ mɛtrɛ fié; sɔ faa kinibɛ é dan kɛlɛ lɛ do. 3Wo dan sɔ soru béé lɛ é ke ’léé; yé wa soru koɛnu béé é ke ’léé é ziin. 4I dan sɔbɛ koroi bo lɛ glayivayou sɔ nya, yé i dan wo béé lɛ sɔ soru lé bé béé é ke ’léé é vinin, a voélazan gane la; yé i dan a kɛlɛ lɛ yee ɛ zo a soru koɛnu é voélazan gane la. 5I dan sɔbɛ koroibole yɔ fié wɔlɛ vu béé lɛ sɔ vininzan ma, yé i dan sɔbɛ koroibole yɔ fié wɔlɛ vu béé lɛ sɔ fiézan gane la; sɔbɛ koroibolenu ’ko, ’wo kɛlɛ é ke yɛrama. 6I dan kyan nyawɛnnénu kɛlɛ lɛ yɔ fié wɔlɛ vu, yé ’i sɔ fié vɔ é ke ’léé wo nya. Yé sɔ faa é dan kɛlɛ lɛ kɔn do nya.
7I dan sɔnu kɛlɛ lɛ bolikyɛɛ nya, a buale sɔkɔn ta we ma; i dan sɔ ’konu kɛlɛ lɛ vu ta do. 8Sɔ do sangi é dan kɛlɛ lɛ mɛtrɛ vu ta soru, yé a ’wuola é dan kɛlɛ lɛ mɛtrɛ fié; sɔ vu ta do faa kinibɛ é dan kɛlɛ lɛ do. 9I dan sɔ soru béé lɛ é ke ’léé, yé i dan sɔ suiɛdo béé lɛ é ke ’léé, yé i dan sɔ suiɛdozan po yéli lɛ sɔkɔn yara. 10I dan fɛ koroibole yɔ fié wɔlɛ vu dɔ lɛ sɔ soru lé, bé béé é ke ’léé é vinin, a voélazan san gi, yé i dan fɛ koroibole yɔ fié wɔlɛ vu dɔ lɛ sɔnu lé bé béé é ke ’léé é voéla, a san gi. 11I dan zéné nyawɛnné yɔ fié wɔlɛ vu kɛlɛ lɛ, yé ’i nyawɛnnénu vɔ fɛ koroibolenu gi. ’Bɛ zo lé i dan sɔ faa kɛlɛ lɛ kɔn do nya. 12Sɔ blɛn é mini kɔn ta fɛan zo, a sɔ do buu é dan zana lɛ kɔn zuo zia mɛtrɛ do; 13sɔ é dan zana lɛ sɔkɔn sannu la, mɛtrɛ buu do do, sɔkɔn ta buale we ma.
14I dan sɔkɔn tabuafɛ do kɛlɛ lɛ ’blagɔné kɔlɛ lé wa vɔ zéri’yi sɔɔn va, a nya, yé i dan a tabuafɛ do kɛlɛ lɛ ’bɛ ta loru dofɛn kɔlɛ nya.
15I dan yilifee gyɛ lɛ sɔkɔn zé nya; i dan wo kɛlɛ lɛ akasiayili nya, yé i wo dɔ loru. 16Yilifee do sangi é dan kɛlɛ lɛ mɛtrɛ soru, yé a ’wuola é dan kɛlɛ lɛ mɛtrɛ buu do bɛlaa do. 17I dan a gane fié dɔ lɛ ’wo ke yɛrama; i dan a kɛlɛ lɛ yee duo zo sɔkɔn lé yilifee faa lɛ. 18I dan sɔkɔn lé yilifee yɔ do kɛlɛ lɛ yirinwana bɛyila zia. 19I dan a ganevɔgi gɔɔlifu yɔ fié pla lɛ yilifee yɔ do wuo, yilifee do ganevɔgi gɔɔlifu a fié, a gane fié vɔgifɛ nya. 20I dan yilifee yɔ do kɛlɛ lɛ sɔkɔn san koɛ zé nya, yirinwana bɛbolazia, 21é valé é ganevɔgi gɔɔlifu yɔ fié nya, ganevɔgi gɔɔlifu fié a yilifee do wuo. 22I dan yilifee suiɛdo kɛlɛ lɛ sɔkɔn nwun zi zé nya, yirivɔnazia. 23I dan yilifee fié kɛlɛ lɛ sɔkɔn nwun zi sunnu la; 24bé pa ékema fié, é sia tɛrɛ zia, bé yere é zima é ’wuo ma kpɔwɔlɛ nya; é dan kɛlɛ lɛ yee duo zo wo fié zé nya, yé i wo dɔ a sun fié ta. 25’Bɛ zo lé alé yilifee é dan kɛlɛ lɛ sɔraa, wo valé wo ganevɔgi gɔɔlifu nya, a ganevɔgi gɔɔlifu a vu ta suiɛdo, a ganevɔgi gɔɔlifu fié a yilifee do do wuo. 26I dan sɔkɔn sɛedɔmayilinu kɛlɛ lɛ akasiayili nya, sɔkɔn san do lé yilifee zé é dan kɛlɛ lɛ soru, 27sɔkɔn san koɛ lé yilifee zé é dan kɛlɛ lɛ soru, sɔkɔn nwun zi lé yilifee zé é dan kɛlɛ lɛ soru, yirivɔnazia. 28A sɛedɔmayili mélénazan ’é sia a sun do la fɔɔ yé é bɔ a sun koɛ la. 29I dan yilifeenu ma sɔɔla lɛ kyan nya; yé i dan kyankpɔwɔlɛ kɛlɛ lɛ a sɛedɔmayilinu wɔragifɛnu nya, yé i dan a sɛedɔmayilinu ma sɔɔla lɛ kyan nya. 30I dan sɔkɔn nwa lɛ a kɛlɛbɛ lé maa gɔɔn i lɛ gɔ nwiin, a yɛrama.
31I dan sɔ do kɛlɛ lɛ lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya; a yuɛ la ’é kɛlɛ é gɔrɔlale yé wo dan sérubɛnnu foto dɔ lɛ a ta pɛɛ gyɛle nya. 32I dan a dun lɛ wɛyili ziɛn lé, wo wo kɛlɛ akasiayili nya, ’té wo kyan gié wo ma, wo ’wuo ’léé; kyan’kɔblanénu é dan kɛlɛ lɛ wɛyilinu ma, yé wɛyilinu é dan dɔ lɛ ganevɔgi gɔɔlifu ziɛn gi. 33I dan sɔ vɔ lɛ nyawɛnnénu ’léé, yé i dan wenayefɛ pagikɛsu dɔra lɛ ’bɛna, sɔ zi; sɔ é dan fɛna sauun valé fɛna sauun tinle gi bɔi lɛ. 34I dan nyanai zén mi la nyanana dɔra lɛ wenayefɛ pagikɛsu ta, fɛna sauun tinle na. 35I dan tablé dɔra lɛ sɔ ’lɛzia, yé i dan fintran dɔra lɛ tablé yara sɔkɔn lé yirinwana bɛyilazia; yé i dan tablé dɔra lɛ yirinwana bɛbolazia.
36I dan sɔ do kɛlɛ lɛ sɔkɔn’léé zé nya, lɛnsɔ zima lé wa tan lɛn nénéle nya, ’té a yuɛɛ ke glayivayou valé galunaa valé sɔɔn nya; wo dan pɛɛ gyɛ lɛ a ta. 37I dan wɛyili soru kɛlɛ lɛ akasiayili nya, sɔkunfɛnu nya, yé i dan wo ma sɔɔla lɛ kyan nya; kyan’kɔblané é dan kɛlɛ lɛ wo ma, yé i dan zéné sele lɛ wo gane soru vɔna nya.
Currently Selected:
Fwile 26: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
