Fwile 24
24
Moizi go Sinai gɔ nwiin
(Mt 5:8; Ébr 9:18–23; 12:29)
1Kazambale lé Moizi lɛ léé: ’I da Gakelebale vazia, bii valé Arɔn koo, Nadab valé Abiu koo, Izraɛl mi segelenu yɔ yaa wɔlɛ vu koo, wo nya, yé ka dan dia lɛ ka bli la baa. 2Té wo faa bié Gakelebale sɔnɔ lo; té munu é gɔ gié Moizi va lo; Moizi do kpen é dan bié lɛ Gakelebale sɔnɔ.
3Moizi da Gakelebale dére faa valé bélidɔwenu faa zuo fe lɛ munu lɛ. Munu faa a zi pa dére do nya léé: We faa lé Gakelebale a fe, ko dan a kɛlɛ lɛ.
4Moizi Gakelebale dérenu faa gyɛ. ’Bɛ zuo é nwa bladi tutu; é balebanna kɛlɛ gɔ nyana ma yé é gɔlɛ vu ta fié pla é ke la Izraɛl bɛn vu ta fié zé nya. 5É Izraɛlnu va pɛniɛnu nwunvɔ Gakelebale banle we gi, balebanwi lé wa kyɛ blé, a nya, ’bɛ valé bɔvɔ sarakanu bole dirigɔnénu nya we gi. 6Moizi a nyɛ gi bɔi fié, yé é a lɛ do zén kananu gi, yé é a koɛ zana balebanna ta. 7É gipawe sɛbɛ si yé é a ta fe munu faa tɔné gi. Munu léé: We faa lé Gakelebale a fe, ko dan a kɛlɛ lɛ, yé ko dan a lɛdɔ lɛ a ma. 8Moizi nyɛ si yé é a nwɛɛn munu ta a fele nya léé: Gipawe lé Gakelebale a kɛlɛ ka va dére ’konu faa yɛrama, a dɔ plɛplɛ nyɛ lé ke ’ko.
9Moizi gɔ gié Arɔn koo, Nadab valé Abiu koo, Izraɛl lé mi segelenu yɔ yaa wɔlɛ vu koo, wo nya ’é va. 10Wo Izraɛl lé Bale ye; a gane wuofɛ a bélé safiigɔlɛ wezan lé woo yɛrɛ yé a zi, a zo; a gi a é bɔle bélé la boen zo. 11É ’ka é bɛ nwa lɛ Izraɛl lé nénu va mi vabole ma lo. Wo Kazambale ye yé wo fɛ ble yé wo ’yi mini.
12Gakelebale lé Moizi lɛ léé: ’I gɔ gié an vazia, yé ’i vo ’ko; maa dan gɔlɛfénnu nɔ lɛ i lɛ, bélidɔwenu valé an sɔnnénu lé maa wo gyɛ we paale wo gi we ma, wo nya. 13Moizi nwa, ’té Jozué lé, ’bɛ alé nyanama paan, ’té ’bɛ a a va, yé Moizi Kazambale lé gɔ gié. 14É lé mi segelenu lɛ léé: ’Ka ko lɛbɛn ’ko, fɔɔ yé ko da ka va é ziin. Arɔn valé Uru lo; wo dan vo lɛ ka va; dé we do bɔ mian ma, wo lɛ lé azan é dan a fe lɛ.
15Moizi gɔ gié yé lati bua gɔ ta. 16Gakelebale lé fuasan nyana Sinai gɔ nwiin, yé lati bua a ta yi suiɛdo. Yi sɔrafiézan nya, Gakelebale Moizi laa lati méléna. 17Gakelebale lé fuasan lé ke gɔ nwiin, é a Izraɛl lé nénu yuɛ gi bélé kyɛ lé, éé fɛnu blé, a zo. 18Moizi wɔra lati méléna yé é gɔ gié. Moizi vo gɔ nwiin yi yɔ fié, bladi nyanadi.
Currently Selected:
Fwile 24: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
