Fwile 23
23
1Té i viéwe sɔɔla lo. Té i péli vɔ wenyanékɛlɛzan va vié wole nya mi ma lo.
2Té i go mi kiɛre zuo wenyané kɛlɛle we gi lo; dé i a wenayezan nya weblena, té i péli vɔ mi kiɛre va we tegele gi sɛrɛle we ma lo.
3Té i dɔ nyanégyɛzan zuo é pla alé weblena lo.
4Dé i nyanézan lé dirigɔné léé, dé alé sokofale léé, dé é san, dé bé ye, i dan go lɛ a nya a lɛ. 5Dé i nyanézan lé sokofale ye, ’té é dia élé kɔné wuo, dé é dɔ i gi léé, i ’ka dan a kɔné si lɛ a punu lo, i dan bɔ lɛ a va a kɔné sina a punu duowo.
6Dé wa nyanégyɛzan lé we blena, té i izé fe we tegele gi sɛrɛle we ma lo.
7Té i weblele ’wuo pla weple nya lo, té i ga dɔ weanwiinlozan valé mi tegele nwiin lo, naa, maa ’ka dan wegyɛzan vo lɛ é pla lo. 8Té i blɛ si lo; naa, blɛfɛnu sile éé yuɛ fuozan yuɛ ’wiié, yé éé mi tegelenu dére sɛra.
9Té i yaa bɛn ta lo; ka a turu bɛnnu nya Éjipiti tɛrɛ la, amalé bɛn éé ’wuo dɔa wean wuo, ka a gi dɔɔ.
10’Ka féi pa lɛɛ suiɛdo yé ’ka ana fɛnu gyɛ. 11Naa, lɛɛ sɔrafiézan nya, i dan féi pale vo lɛ yé ana tɛrɛ é dan flin lɛ; ilé munu va nyanégyɛzannu gi é dan nana lɛ a ma, yé fɛ lé é vo, bwigiwinu é dan a ble lɛ. ’I yee duo kɛlɛ ilé dɔrɔféi valé ilé ɔliviyilinu lɛ.
12Ilé nyanama faa pa yi suiɛdo nya. Naa, a yi sɔrafiézan nya i dan flin lɛ, ilé diri valé ilé sokofale flinle we gi, ilé luu be valé bɛn flinle we gi.
13We faa lé maa a fe ka lɛ, ka dan a kɛlɛ lɛ, yé té ka bale bɛnu tɔ fe lo; té wa ’ma boenwo ka ’léé monomono lo.
14Lɛɛ do gɔnɔ yaa, ’ka fɛti kɛlɛ an tɔ bɔle we gi. 15Buru lé lévɛn ’ka a va lo, ’ka ’bɛlé fɛti kɛlɛ; bléyi lé wa dɔ, ’sa sola moné nya, buru lé lévɛn ’ka a va lo, i dan a ble lɛ yi sɔrafié nya, maa i bélidɔ fɛan zo, a zo, moné ’ko gi lé ka fwi Éjipiti tɛrɛ la, azama; té wo da wo lee koro nya an yara lo. 16I dan féifɛ vinin lé fɛti kɛlɛ lɛ, nyanama lé bé pa ilé féi, ana fɛ vinin nya; lɛɛ nyaa bléyi va, dé i nyaa ilé nyanama nya, i dan fɛ sile féi lé fɛti kɛlɛ lɛ. 17Lɛɛ do gɔnɔ yaa gɔnénu faa é dan da lɛ Mizan, Gakelebale ’lɛ.
18Buru lé lévɛn ke a va, té i saraka bo a nya, wi lé bé gyɛ an tɔbɔle we gi, a nyɛ va lo; té bé nyɔnɔ tadɔ é béli fɔɔ yé tu é kini a ma lo.
19I lé féifɛ vinin lé ke é zima, i dan da lɛ a nya Gakelebale ilé Bale lé kɔn gi.
Té i boliné dɔne é bu nyɔyi va lo.
20Bé ye, maa lanje do nwunvɔ i ’lɛ, i takuunle zia we gi, gole we gi i nya fɛana lé maa a ma’lɛrɛ, ana. 21’I yuɛ pa ibozen va a yara, yé ’i tɔné dɔ a dére lɛ, té i dɔ a ma plɛplɛ lo, naa, é ’ka dan ka ma we vo lɛ lo, an tɔ a a gi, ’bɛzama. 22Naa, dé i tɔné dɔ a dére lɛ, yé we lé maa fe i lɛ, dé bé faa kɛlɛ, maa dan kɛlɛ lɛ i nyanézannu é nyanézan nya, maa dan kɛlɛ lɛ i mazannu é mazan nya. 23Anlé lanje é dan tawo lɛ i ’lɛ, yé é dan go lɛ i nya, Amorénu koo, Étinu koo, Férézinu koo, Kanaannu koo, Éévinu koo, Jébusinu koo, wo va, yé maa dan wo si lɛ tɛrɛ la tata.
24Té i dia i bli la wolé balenu ’lɛ lo, té i wo bɔ lo; té i wolé tawobɛ zuo sona lo, naa, ’i wo guru zana a gi, yé ’i wolé miyilinu yéli. 25Ka dan Gakelebale, kalé Bale bɔ lɛ, yé é dan kalé fɛblele valé kalé ’yi drɔɔ vo lɛ, yé maa dan gyɛ si lɛ ka méléna. 26Né sɛrɛzan valé sɔnzan ’ka dan kɛlɛ lɛ ilé tɛrɛ la lo. Maa dan ilé ’yinu fan lɛ. 27Maa dan an lee kanale zén lɛ wo gi ka ’lɛ, dé i bɔ munuan ma, maa dan wo bin lɛ, yé maa dan i nyanézannu faa lala dɔ lɛ i ta. 28Maa dan gyebenu nwunvɔ lɛ ka ’lɛ, yé Éévinu koo, Kanaannu koo, Étinu koo, yee gyebenu é dan wo bin lɛ i ma baa. 29Maa ’ka dan wo bin lɛ ka ma baa lɛɛ do kpen gi lo, dé tɛrɛ é da kɛlɛ bwii nya, yé bwigiwinu ’léé gi é gyɛ ka ma. 30Maa dan wo bin lɛ ka ma baa sɛnésɛné, fɔɔ yé ka ’léé gi é gyɛ yé ka bɔ tɛrɛ sile lɛ. 31Maa dan ilé tɛrɛ glɛ dɔ lɛ, é sia Wɛyi Sɔɔn ma fɔɔ yé é bɔ Filisitinu lé wɛyi ma, yé é sia bwi ma fɔɔ yé é bɔ yuu ma; naa, maa dan ana tɛrɛlamunu pa lɛ ka lee, yé ka dan wo bin lɛ ka ’lɛ. 32Té i gi pa do wo va lo, té i gi pa do wolé balenu va lo. 33Wo ’ka dan nyana lɛ ilé tɛrɛ la lo, dé wo da i nyunu léé, i wenyané kɛlɛ an ma; naa, dé i wolé balenu bɔ é dan kɛlɛ lɛ i kunsan nya.
Currently Selected:
Fwile 23: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
