Fwile 14
14
Wo Wɛyi Sɔɔn kini
(Joz 24:6–7; LvS 106:7–11; Ébr 11:29)
1Gakelebale we fe Moizi lɛ yé é léé: 2Bé fe Izraɛl lé nénu lɛ léé, ’wo nɔla yé ’wo nyana Pi‐Aairɔt, Migidɔl valé wɛyi méléna, Baal‐Séfɔn yara; fɛkona yara lé ka dan nyana lɛ, wɛyi sɔnɔ. 3Faraɔn é dan a fe lɛ Izraɛl lé nénu ma léé, wa é saanle ana tɛrɛ la; bwi wo zi lɛ sɔɔ. 4Maa dan Faraɔn bli kɛlɛ lɛ tɔntɔn, yé é dan go lɛ wo zuo; naa, maa dan anlé fuasan nagɔɔn lɛ Faraɔn valé élé sunyanu faa nya, yé Éjipiti munu é dan a gi dɔɔ lɛ léé, maa a Gakelebale nya. Yé Izraɛl lé nénu a kɛlɛ a zo.
5Wa fe Éjipiti mununwiinzan blɛn lɛ léé, munu vlan buru. Yé Faraɔn valé é wuomunu bli nɔla munu lé we ma. Wo léé: Mɛ ɛ kɛlɛ ko lɛ yé ko daan Izraɛl ma, wo go, yé wo ’ka kolé nyanama paan é dɛrɛ loo? 6Faraɔn élé goro ma’lɛrɛ yé é go élé munu nya é va. 7É goro zima si wuru yaa, é valé Éjipiti lé goronu faa nya; gulidanmunu a wo faa gi. 8Gakelebale Éjipiti mununwiinzan blɛn Faraɔn bli kɛlɛ tɔntɔn yé Faraɔn go Izraɛlnu zuo. Izraɛl lé nénu si wo va baale nya wo yuɛ gi. 9Éjipiti munu go wo zuo; wisoonu faa koo, Faraɔn lé goronu koo, alé wisootazannu valé alé sunyanu koo, wo bɔ wo ma é nyanale wɛyi sɔnɔ, Pi‐Aairɔt vazia, Baal‐Séfɔn yara.
10Faraɔn bié. Izraɛl lé nénu a nagini, yé wa ye léé, Éjipiti munu a dana ’wo zuo. Yé kana blɛn zén Izraɛl lé nénu gi, yé wo siaa Gakelebale lɛ. 11Wo lé Moizi lɛ léé: Mipana ’ka Éjipiti tɛrɛ la lo, bɛwemalé é a lé i da ko nya yé ko ga bwi gii? Mɛ lé bé kɛlɛ ko lɛ ko sile Éjipiti tɛrɛ la nya ’koo? 12Ko ’ka a fe lɛ i lɛ Éjipiti tɛrɛ la léé, ’i ko vo, ko nyanama pa Éjipiti munu lɛ loo? Naa, Éjipiti munu lé nyanama pale sɔ ko lɛ é mini gale bwi gi la. A zoan ko fe i lɛ loo? 13Moizi lé munu lɛ léé: Té ka kana we do kpen lee lo, ’ka dɔ flee, yé Gakelebale é dan ka si lɛ we gi fɛan zo kyɔ, ka dan a ye lɛ; naa, Éjipiti munu lé ka wo yé kyɔ, ka ’ka dan wo ye lɛ é dɛrɛ monomono lo. 14Gakelebale é dan ka ta guli dan lɛ; yé ’kaa, ’ka vo é tadɔle.
15Gakelebale lé Moizi lɛ léé: Mɛmalé wa siaanaa? Bé fe Izraɛl lé nénu lɛ léé, ’wo tawo. 16Bii, ’ilé tawomayili nwa, ’i bɛ soi wɛyi ta yé bé fén gyɛ; yé Izraɛl lé nénu é dan wɔra lɛ wɛyi méléna tɛrɛ gale ta. 17Yé maa, maa dan Éjipiti munu bli ta dɔ lɛ plɛplɛ, wo wɔrale ana ka zuo we gi; yé maa dan anlé plɛplɛ nagɔɔn lɛ Faraɔn valé élé sunyanu faa koo, alé goronu valé alé wisootazannu koo, wo nya. 18Dé maa anlé plɛplɛ nagɔɔn, Faraɔn koo, alé goronu koo, alé wisootazannu koo, wo nya, ’té Éjipiti munu é dan a gi dɔɔ lɛ léé, maa a Gakelebale nya.
19Kazambale lé lanje lé éé tawoo Izraɛl lé sɔkɔndɔna ’lɛ, é si ana yé é go wo zuo; yé lati pɔrɔlɔ lé éé goo wo ’lɛ, é si ana yé é dɔ wo zuo. 20É dɔ Éjipiti munu gu blɛn valé Izraɛl munu gu blɛn méléna. Lati ’ko bɛ do la a gunu nya, yé a bɛ do la a fɛna fu nya. Yé béli ’ko faa gi, mi gu blɛn fié ’ko ’ka bié lɛ wo ke sɔnɔ lo.
21Moizi é bɛ soi wɛyi ta. Yé Gakelebale wɛyi gyɛ é zuo, yirinwanazia fu lé é gié plɛplɛ é béli bléyi faa va bɛ, a nya; é wɛyi guru gi ga yé a ’yinu fén gyɛ. 22Izraɛl lé nénu wɔra wɛyi méléna tɛrɛ gale ta yé ’yinu kɛlɛ bélé kɔnguru zo wo bɛyila valé wo bɛbola. 23Éjipiti munu da wo zuo; Faraɔn lé wisoonu faa koo, alé goronu valé alé wisootazannu koo, wo wɔra wɛyi méléna wo zuo. 24Manegɔné we bléyi va, ’té Gakelebale a kyɛ pɔrɔlɔ valé lati pɔrɔlɔ méléna, yé é Éjipiti mi gu nagini, yé é wo vɔɔ é ke gi. 25É wolé goronu gane so, yé wolé tawole kɛlɛ tɔntɔn. Yé Éjipiti munu léé: Kaa vlan buru Izraɛl lee, naa, Gakelebale a Izraɛl ta guli danna Éjipiti munu va.
26Gakelebale lé Moizi lɛ léé: ’I bɛ soi wɛyi ta; yé ’yinu é dan zén lɛ Éjipiti munu koo, wolé goronu koo, wolé wisootazannu koo, wo ta. 27Moizi é bɛ soi wɛyi ta. Yé tu kini gunu va, wɛyi da é pa gi, yé Éjipiti munu vlan buru a lee; naa, Gakelebale Éjipiti munu vuli wɛyi méléna. 28’Yinu da wo pai, yé goronu koo, wisootazannu koo, Faraɔn lé sunyanu faa lé wo wɔra wɛyi gi Izraɛl lé nénu zuo, wo koo, é wo ta sɔɔla; a do kpen ’ka so lɛ a lee lo. 29Naa, Izraɛl lé nénu tawo tɛrɛ gale ta wɛyi méléna, yé ’yinu kɛlɛ bélé kɔnguru zo wo bɛyila valé wo bɛbola.
30’Bɛ yi ’ko nya, Gakelebale Izraɛl si Éjipiti munu lee; yé Izraɛl Éjipiti munu galenu ye wɛyi gɔ la. 31Gakelebale bɛ plɛplɛ lé é we kɛlɛ Éjipiti munu lɛ a nya, Izraɛl a ye. Yé munu kanaan Gakelebale lee, yé wo bli vo Gakelebale valé é wuozan Moizi lɛ.
Currently Selected:
Fwile 14: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
