Fwile 15
15
Wolé lɛrɛvɔle
(2 Sam 22; Wbz 5; Wg 15:2–4)
1Yé Moizi valé Izraɛl lé nénu lɛrɛ ’ko vɔ Gakelebale lɛ: Wo léma:
Maa dan lɛrɛ vɔ lɛ Gakelebale lɛ, naa, é ’élé plɛplɛ nagɔɔn wéiin:
É wisoo valé étazan vuli wɛyi va.
2Gakelebale a anlé plɛplɛ nya, yé yee ɛ tɔ zin lé maa a fé;
Yee ɛ an si we gi.
É a anlé Bale nya; maa dan a kɛlɛ lɛ blɛn;
É a an ti lé Bale nya; maa dan a tɔ bié lɛ.
3Gakelebale a gulidanzan lé éé nyana woo, a nya;
A tɔ lé Gakelebale.
4É Faraɔn lé goronu valé élé sunyanu vuli wɛyi va;
Wɛyi Sɔɔn alé gulidanzan zinzinnu mini.
5Wɛyi nwalenu wo ta sɔɔla;
Wo go wɛyi wɔlɛ ma bélé gɔlɛ zo.
6Oo, Gakelebale, i bɛyibɛ ilé plɛplɛ nagɔɔn;
Oo, Gakelebale, i bɛyibɛ ko nyanézan ’wii.
7Ilé zevɔfɛ blɛnblɛnnu nya lé
I mazannu yara bua;
Ilé bliflile nwa wo ma
Yé é wo ble bélé ’sapɛɛ zo.
8I nyé lé fu fɛle we ma lé
’Yinu zun dɔ;
’Yiyoronu dɔ loru bélé kɔnguru zo
Wɛyi nwale dɔ plɛplɛ wɛyi méléna.
9Ko nyanézan léma: Maa dan go lɛ wo zuo, maa dan dɔ lɛ wo ma,
Maa dan gulizarafɛ guli lɛ,
Maa dan anlé we lɛgi pa lɛ wo ma fɔɔ yé an bli ma kɔn ’é si.
Maa dan anlé gwɔun so lɛ é kɔlɛ gi, an bɛ é dan wo kulu ga lɛ.
10I fu fɛ ilé flinle nya
Wɛyi bua wo ta;
Wo go ’yi wɔlɛ ma
Bélé lɛɛ zo.
11Oo, Gakelebale, de ɛ ke bii zo balenu mélénaa?
De ɛ ’lɛra sauun bélé bii zo,
’Té a tɔ bɔ yara lé,
’Té éé we blɛnblɛnnu kɛlaa?
12I bɛyi soi
Tɛrɛ wo mini.
13Ilé nyanai zénle nya lé i go munu ’ko nya,
A nya lé i wo si we gi;
Ilé plɛplɛ nya lé
I nyanana sauun lé zi gɔɔn wo é lɛ.
14Munu a maan yé wo kɔlɛ ma éé nyɔɔn‐an:
Kana blɛn zén Filisiti munu gi;
15Édom nwiinmunu gi nyɛ kini;
Moab tɛrɛ lé gulidanzannu kɔlɛ ma nyɔɔn;
Kanaan munu faa kɛlɛ tɔɔtɔɔ.
16Kanale valé di kinile é dan bɔ lɛ wo ma fiaa;
I bɛ lé plɛplɛ lé we ma lé
Wo dan kinin lɛ bobogyɛzannu nya bélé gɔlɛ zo,
Fɔɔ yé ilé munu é gié, oo, Gakelebale,
Fɔɔ yé ilé munu lé i wo ye izé nya,
Yé wo gié.
17I dan go lɛ wo nya yé i dan wo nyana lɛ, gɔ lé i dan a nɔ lɛ wo lɛ wozé tɔnɔ nya, a nwiin,
Fɛ lé bé na kɛlɛ i nyanana nya, ana, oo Gakelebale,
Fɛna sauun lé bé kɛlɛ, ana, oo Mizan.
18Gakelebale é dan pla lɛ munu nwiin lɛɛfaama, a glɛ ’ka lo.
19Faraɔn lé wisoonu koo, alé goronu koo, alé wisootazannu koo, wo wɔra wɛyi va,
Yé Gakelebale da wɛyi nya wo ta;
Naa, Izraɛl lé nénu tawo wɛyi méléna tɛrɛ gale ta.
20Arɔn buru, balelayezan Mari yɔyɔ si, yé lomu faa da a zuo, yɔyɔnu nya wo lee, ’té woo nɛnɛ boo. 21Mari we Izraɛl lé nénu lé lɛrɛ ma yé é léé:
Gakelebale élé plɛplɛ nagɔɔn wéiin amalé ’ka lɛrɛ vɔ a lɛ;
É wisoo valé étazan vuli wɛyi va.
Mara lé ’yinu
(Fw 17:1–7; Mi N 33:8–9)
22Moizi Izraɛl si Wɛyi Sɔɔn ma. Wo go Suré nyéné vazia; wo tawo yi yaa nyéné la aan wo, wo ’ka ’yi ye lɛ lo. 23Wo bɔ fɛ dona, wa laama Mara; naa, ’yi lé ke Mara é a é nyanale, amalé wo ’ka bɔa a minile lɛ lo. Bɛwemalé wo fɛkona laa Mara. 24Munu gun gyɛ Moizi ma yé wo léé: Mɛ lé ko dan a mini lɛɛ? 25Moizi siaa Gakelebale lɛ; yé Gakelebale yili do gɔɔn a lɛ yé é a vɔ ’yi va. Yé ’yi kɛlɛ néné. ’Bɛna lé Gakelebale ’é sɔnné valé élé bélidɔwenu nɔ munu lɛ, yé ’bɛna lé é wo gi dan. 26É léé: Dé i Gakelebale, ilé Bale dére ban i tɔné nya é zima, we lé ke tegele a yuɛ gi, dé bé kɛlɛ, dé i tɔné dɔ alé bélidɔwenu lɛ, dé i tawo a sɔnné faa yɛrama, gyɛnu lé maa Éjipiti munu gyɛ wo nya, maa ’ka dan i gyɛ lɛ a do kpen nya lo; maa a Gakelebale lé éé i bélié, a nya, azama.
27Wo bɔ Élim, fɛana lé ’yibɔna vu ta fié valé yɔyili yɔ yaa wɔlɛ vu ke, ana. Wo sɔkɔnnu dɔ ’bɛna, ’yi sɔnɔ.
Currently Selected:
Fwile 15: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
