Fwile 13
13
Taboyi valé né vininzannu lé we
(Fw 12; 1 Kor 5:7–8; 6:19–20)
1Gakelebale we fe Moizi lɛ yé é léé: ’I né vininnu faa pa é yɛrama anzé nya. 2Izraɛl lé né vininnu faa a anzé nya, ’bɛ valé winu lé né vininnu nya. 3Moizi lé munu lɛ léé: Yi ’ko nya lé ka si luu gi Éjipiti tɛrɛ la, a sele ’é dɔ ka gi ma; Gakelebale bɛ plɛplɛ nya lé é ka si ana. Buru lé lévɛn ke a va, té ka a ble ’bɛ yi ’ko nya lo. 4Ka fwi kyɔ ’sa solamoné nya. 5Kanaan munu koo, Éti munu koo, Amoré munu koo, Éévi munu koo, Jébusinu koo, wolé tɛrɛ lé Gakelebale ébo ’nyɔɔn ka tranu lɛ léé, é dan a nɔ lɛ ka lɛ, dé ka wɔra yee tɛrɛ nyɔnɔzan ’ko ta, ka dan Gakelebale bɔ lɛ a bɔbɛ ’ko nya moné ’ko duo nya. 6Yi sɔrafié nya, buru lé lévɛn ’ka a va lo, ka dan a ble lɛ, yé a yi sɔrafiézan nya wo dan fɛti kɛlɛ lɛ Gakelebale tɔbɔle we gi. 7Buru lé lévɛn ’ka a va lo, ka dan a ble lɛ yi sɔrafié nya; buru lé lévɛn ke a va, té wa ye ka va lo, té wo lévɛn ye ka va lo, kalé tɛrɛ faa la. 8I dan a fe lɛ i be lɛ léé: We lé Gakelebale a kɛlɛ ko lɛ, ko fwile Éjipiti tɛrɛ la bléyi va, a sele dɔ ko gi we lé. 9É dan kɛlɛ lɛ i lɛ bélé tɔmase zo i bɛ ta, bélé weseledɔmigifɛ zo i yarapɛla, Gakelebale lé bélidɔwe kɛlɛle i ’léé we gi; naa, Gakelebale ka fwi Éjipiti tɛrɛ la é bɛ plɛplɛ nya. 10I dan bélidɔwe ’ko kɛlɛ lɛ lɛɛ do do ma, bléyi lé wa dɔ, a nya.
11Dé Gakelebale ka wɔra Kanaan munu lé tɛrɛ la, ébo ’nyɔɔn ka valé ka tranu lɛ fɛan zo, a zo, dé é nyaa tɛrɛ nɔle nya ka lɛ, 12ka dan né vininnu faa pa lɛ é yɛrama Gakelebale zé nya, dé é a kalé winu lé né vininnu nyaoo, gɔnénu a Gakelebale zé nya. 13Ka dan sokofale lé né vinin tabo lɛ ’blané nya, yé dé i ’ka a taboo lo, bé bɔrɔ yéli. Ka dan ka benu lé né vininzannu faa tabo lɛ é ziin. 14Yé dé i be a laa i lee yi do nya léé, ’bɛ gi lé nɔɔ? i dan a fe lɛ a lɛ léé: Gakelebale ko fwi Éjipiti tɛrɛ la, é ko si luu gi é bɛ plɛplɛ nya; 15yé Faraɔn ’ka aan wo daanna ko ma lo, amalé Gakelebale né vininnu faa gyɛ Éjipiti tɛrɛ la, é sia munu lé né vininnu ma fɔɔ yé é bɔ winu lé né vininnu ma. Né vininnu faa lé ke gɔné nya, wean ma lé ko wo no Gakelebale lɛ saraka nya yé ko ko benu lé né vininnu faa taboo, a gi lé ke bɛ. 16We ’ko é dan kɛlɛ lɛ bélé tɔmase zo i bɛ ta, bélé pɔɔ zo i yarapɛla; Gakelebale ko si Éjipiti é bɛ plɛplɛ nya, ’bɛzama.
Wo zén tawole va
(LvS 27:1; Néé 9:12, 19)
17Faraɔn daan munu ma ’wo go aan wo, Kazambale ’ka go lɛ wo nya Filisitinu lé tɛrɛ la zi ta lo, dɔlé ’té ’bɛ a é pu; naa, Kazambale léé: Dé munu guli ye, dé wo bli é dan nɔla lɛ yé wo nɔla wo pa gi é ziin Éjipiti tɛrɛ laa? 18Naa, Kazambale go wo nya bwi gi zia, Wɛyi Sɔɔn vazia. Izraɛl lé nénu si Éjipiti tɛrɛ la gulidanfɛnu nya wo lee. 19Moizi go Jozɛfu wɔlɛnu nya é lee; naa, Jozɛfu lé Izraɛl lé nénu lɛ léé, ’wo bale ’nyɔɔn, a fele nya léé: Kazambale é dan bɔra lɛ ka va, yé dé ka fwi ’ko, ’ka go an wɔlɛnu nya fɛkona ma baa.
20Wo si Sukɔt yé wo nyana Étam, bwi glɛ mun la. 21Gakelebale goo wo ’lɛ, yiéyi é a lati pɔrɔlɔ gi, zi gɔɔnle wo lɛ we gi, yé é béli é a kyɛ pɔrɔlɔ gi, wo va kinile we gi, wolé tawole é yiéyi valé é béli we ma. 22Lati pɔrɔlɔ ’ka sié wo ’lɛ é yiéyi lo, yé kyɛ pɔrɔlɔ ’ka sié wo ’lɛ é béli lo.
Currently Selected:
Fwile 13: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
