Fwile 12
12
Taboyi lé we
(Fw 13:3–10; Lk 22:7–20; 1 Kor 5:7–8)
1Gakelebale we fe Moizi valé Arɔn lɛ Éjipiti tɛrɛ la yé é léé: 2Moné ’ko é dan kɛlɛ lɛ moné vininzan nya ka lɛ; é dan kɛlɛ lɛ lɛɛ lé moné vininzan nya ka lɛ. 3’Ka we fe Izraɛl munu faa lɛ léé: Moné ’ko yi vuzan nya, ’ka ’blané do do si kɔn ma kɔn ma, kɔn do ’blané do. 4Dé kɔn do gimunu a kiéné ’blané do ma, wo valé ’wo punmazan é dan ’blané si lɛ, munu yɛrama; ka dan munu nɔnɔ lɛ ’blané do ma wolé fɛblele yɛrama. 5’Blagɔnéné lé a lɛɛ ke do, ’té we do kpen ’ka a ma lo, yee lé. Dé ’blané léé, dé boliné léé, ka dan a si lɛ. 6Ka dan yuɛ pa lɛ a va fɔɔ yé moné ’ko yi vu ta ziɛnzan é bɔ; Izraɛl munu faa é dan ’wozé gyɛ lɛ nyanadi yiri zɔrɔ nya. 7Ka dan a nyɛ si lɛ yé kɔn lé ka dan a ble lɛ a gi, wo dan a nyɛ pa lɛ duolivɔgiyili fié valé a ’wuotayili ma. 8Béli ’ko duo nya, ka dan a wi ble lɛ é panele nya; ka dan a ble lɛ buru lé lévɛn ’ka a va lo koo, zianbla nyanale koo, wo nya. 9Té ka a ble é gi zalozalo nya lo, té ka a dɔne lo; naa, ka dan a pane lɛ kyɛ ma, a ’wuo koo, a ganenu koo, a gifɛnu koo, wo faa nya. 10Té tu é kini a wi do kpen ma lo; dé tu kini yeean ma, ka dan a kyɛ ble lɛ. 11Dé ka a a blena, ka dan a ble lɛ ka ma nya é ’lɛrɛle, ’té sawala a ka gane ma, ’té kalé tawomayilinu a ka lee; ka dan a ble lɛ kabo tunule nya. Gakelebale lé mi tabofɛ lé.
12’Bɛ lé béli, maa dan gié lɛ Éjipiti tɛrɛ la, yé maa dan Éjipiti tɛrɛ la né vininnu faa gyɛ lɛ, é sia munu ma fɔɔ yé é bɔ winu ma, yé maa dan Éjipiti lé balenu lé we ble lɛ. Maa a Gakelebale nya. 13Nyɛ é dan kɛlɛ lɛ tɔmase nya ka lɛ ka nyanakɔnnu ma; maa dan nyɛ ye lɛ yé maa dan gié lɛ ka ta loru, yé dé maa Éjipiti tɛrɛ la munu gyɛ, dunuvɔmagyɛ do kpen ’ka dan ka kulu ga lɛ lo. 14Yi ’ko sele é dan dɔ lɛ ka gi, yé ka dan Gakelebale tɔbɔ fɛti kɛlɛ lɛ yi ’ko nya; ka kulu é kulunu é dan fɛti ’ko kɛlɛ lɛ bélé bélidɔwe lé a glɛ ’ka lo, a zo. 15Buru lé lévɛn ’ka wo va lo, ka dan wo ble lɛ yi sɔrafié. É sia a yi vinin ma, té lévɛn é kɛlɛ kalé kɔnnu gi é dɛrɛ lo; naa, é sia a yi vininzan ma fɔɔ yé é bɔ a yi sɔrafiézan ma, dé mian buru ble, té lévɛn a a va, ’wo ’bɛzan si Izraɛl va. 16Fɛti yi vininzan a yi plɛplɛ nya; ka dan zénle ékeva sauun do kɛlɛ lɛ a yi la; a yi sɔrafiézan a yi plɛplɛ nya; ka dan zénle ékeva sauun do kɛlɛ lɛ ’bɛ yi la é ziin. Té ka nyanama pa yi ’konu nya lo; ’ka fɛ dɔne é pla. 17Buru lé lévɛn ’ka a va lo, ka dan ’bɛlé fɛti kɛlɛ lɛ, naa, yi ’ko nya lé maa dan ka si lɛ Éjipiti tɛrɛ la bélé sunyanu palunu zo; ka kulu é kulunu é dan fɛti kɛlɛ lɛ yi ’ko la bélidɔwe lé a glɛ ’ka lo, a nya. 18Moné vinin nya, moné yi vu ta ziɛnzan nya, é nyanadi, buru lé lévɛn ’ka a va lo, ka dan a ble lɛ fɔɔ yé ka nyaa a yi yɔ do wɔlɛ dozan nya, é nyanadi. 19Yi sɔrafié ’konu nya, té lévɛn é kɛlɛ kalé kɔnnu gi lo; naa, dé mian buru ble, ’té lévɛn a a va, wo dan a tɔ fwi lɛ Izraɛlnu va, dé bɛn léoo, dé Izraɛl mi léoo, wo dan a tɔ fwi lɛ. 20Buru lé lévɛn ke a va, té ka a ble lo; buru lé lévɛn ’ka a va lo, ka dan a ble lɛ kalé kɔnnu faa gi.
21Moizi Izraɛl lé mi segelenu faa laa yé é lé wo lɛ léé: ’Ka go ’blané si kalé kɔnnu zé nya yé ka mitabofɛ gyɛ. 22’Bɛ zuo ka dan izopéyili bɛné si lɛ yé ka a vɔ kana gi nyɛ va, yé nyɛ lé ke kana gi, ka dan a pa lɛ duolivɔgiyili fié valé a ’wuolayili ma. Té ka va mi do kpen é si élé kɔn gi lo fɔɔ yé bladi é pa. 23Dé Gakelebale gié Éjipiti blale we gi, dé é nyɛ ye duolivɔgiyili fié valé a ’wuolayili ma, Gakelebale é dan gié lɛ kɔn ’léé ta loru, yé é ’ka dan a nyi si lɛ léé, mikulugazan é wɔra kalé kɔnnu gi mi gyɛle we gi lo. 24Ka dan we ’ko kɛlɛ lɛ bélidɔwe nya, ka valé kalé nénu zé nya, lɛɛfaama, a glɛ ’ka lo. 25Dé ka wɔra tɛrɛ lé Gakelebale dan a nɔ lɛ ka lɛ élé blivolɛdére yɛrama bɛ, ana, ’ka we sauun ’ko kɛlɛ ana. 26Dé kalé nénu a laa ka lee léé: We ’ko gi lé ka vazia nɔɔ? 27Ka dan a fe lɛ wo lɛ léé: Mitabo saraka lé; Gakelebale lé é Izraɛl lé nénu lé kɔnnu tabo Éjipiti tɛrɛ la, ’té é Éjipitinu gyɛ yé é kolé kɔnnu vo, a tɔbɔ saraka lé. Munu tua yé wo dia ’wo bli la. 28Yé Izraɛl lé nénu go, yé we lé Gakelebale a fe Moizi valé Arɔn lɛ, wa kɛlɛ.
Éjipitinu lé né vininzannu ga
(Fw 11:1–8; LvS 105:36–38; 136:10)
29Tu la, né vininnu faa lé ke Éjipiti tɛrɛ la, Gakelebale wo gyɛ, é sia Faraɔn lé ke é nyanale élé webleblin ta, ’bɛlé né vinin ma fɔɔ yé é bɔ bokɔngizan lé né vinin ma, ’bɛ valé winu lé né vininnu ma. 30Faraɔn nwa é béli, yee koo, é wuozannu faa koo, Éjipiti munu faa koo, wo nya; kɔn lé migale ’ka a gi lo, a do kpen ’ka lo, amalé wo siaa blɛnnu wo Éjipiti tɛrɛ la. 31Béli boen wuo, Faraɔn Moizi valé Arɔn laa yé é lé wo lɛ léé: ’Ka nwa, ’ka si anlé munu méléna, ka valé Izraɛl lé nénu nya. ’Ka go, ’ka Gakelebale bɔ, ka a fe fɛan zo, a zo. 32’Ka kalé ’blanu valé dirinu si, ka a fe fɛan zo, a zo; ’ka go, yé ’ka an drɔɔ vo. 33Éjipiti munu Izraɛl munu tunu yé wo wo pa zia za ma, naa, wo léé, ’wo faa a zamaga wona. 34Buruyɔɔ lé wo ’ka tan lévɛn vɔɔ lɛ a va lo, munu go a nya. Wo ’wolé sɔnu vuru buruyɔɔ dɔgikananu ma yé wo wo pa ’wo bɛapa ta. 35We lé Moizi a fe Izraɛl lé nénu lɛ, wa kɛlɛ, yé gɔɔlifukananu koo, kyankananu koo, sɔnu koo, wo wo laa Éjipiti munu lee. 36Gakelebale munu kɛlɛ mi zinnu nya Éjipiti munu yuɛ gi, yé fɛ faa lé wa ma laa, wa nɔ wo lɛ. Yé wo ’wii Éjipiti munu ta.
Wo si Éjipiti tɛrɛ la
(WP 15:13–14; Kw 7:6–7; Mi N 33:3–5)
37Izraɛl lé nénu si Ramzɛs yé wo Sukɔt zi sia, ’té wo mi baa wuru do yɔ soru bɔa, ’té wo ’ka nénu nɔnɔ lɛ wo ma lo. 38Mi gɔnɔ faa go wo zuo wo gu nya; ’bla valé dirinu a wo va kiɛre é ziin. 39Wo wo bin Éjipiti tɛrɛ la, yé wo ’ka bɔa lɛ léé, wo mɔn lo, yé wo ’ka bɔa lɛ léé, wo go fɛ nya wo lee lo, amalé buruyɔɔ lé wo si Éjipiti tɛrɛ la a nya, ’té wo ’ka tan lévɛn vɔɔ lɛ a va bɛ lo, wa si yé wa kɛlɛ trala nya.
40Izraɛl lé nénu nyana Éjipiti tɛrɛ la lɛɛ wuru fié yɔ do wɔlɛ vu. 41Lɛɛ wuru fié yɔ do wɔlɛ vu lɛ sɔɔ aan wo, a lɛsɔɔyi nya ’té lé, Gakelebale munu si Éjipiti tɛrɛ la bélé sunyanu palunu zo; 42Gakelebale wo si Éjipiti tɛrɛ la, amalé wo dan yee yi ’ko lé fɛti kɛlɛ lɛ Gakelebale tɔbɔle we gi. Izraɛl lé nénu faa koo, wo kulunu faa koo, wo dan yee yi ’ko lé fɛti kɛlɛ lɛ Gakelebale tɔbɔle we gi.
43Gakelebale we fe Moizi valé Arɔn lɛ léé: Mitabo fɛti lé bélidɔwe do lo: bɛn do kpen ’ka dan a ble lɛ lo. 44Luu faa lé ka wo lɔ gɔɔli nya, ’ka wo gane dɔ, a zuo wa ble. 45Naa, bɛn valé nyanamapazan ’ka dan a ble lɛ lo. 46’Wa ble kɔn gi do kpen ɛ na; té ka bɔra a wi do kpen nya béera lo, té ka a wɔlɛ do kpen ’wii lo. 47Izraɛl munu faa é dan mitabofɛ ble lɛ. 48Dé bɛn do a é nyanale ka va yé é sɔ a lɛ léé, ’é Gakelebale lé mitabofɛ ble, é a lé wo alé kɔn gi gɔnénu faa gane dɔ; ’bɛ zo lé é kɛlɛ Izraɛl mi nya yé é bɔa a blele lɛ; naa, té ganedɔlozan do kpen a ble lo. 49Flazan valé bɛn lé ke é nyanale ka va, wo fiénu lé bélidɔwe a do.
50We lé Gakelebale Moizi valé Arɔn bélidɔ a nya, Izraɛl lé nénu faa a kɛlɛ ’bɛ yɛrama ’kyɛ. 51Yé yi ’ko duo nya lé Gakelebale Izraɛl lé nénu si Éjipiti tɛrɛ la, wolé sunya palunu yɛrama.
Currently Selected:
Fwile 12: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
