Fwile 11
11
Moisi né vininzannu gale lɛ kini
1Gakelebale lé Moizi lɛ léé: Maa dan da lɛ dunuvɔmagyɛ do nya é ziin Faraɔn valé Éjipiti va. ’Bɛ zuo é dan daan lɛ ka ma yé ka si fɛkona. Dé é zi nɔ ka lɛ webozen nya, é dan ka bin lɛ boenwo. 2Bé fe munu lɛ léé, wo faa do do ’wo gɔɔlifubɔ valé kyanbɔ laa ’wo punmazan lee, gɔnénu a laa ’wo punma gɔné lee, yé lomu a laa ’wo punma le lee. 3Gakelebale a kɛlɛ léé, wo kɛlɛ mi zin nya Éjipiti munu yuɛ gi; Moizi bozen tɔ a é bɔle Éjipiti tɛrɛ la, Faraɔn wuozannu valé munu yuɛ gi.
4Moizi léé: Gakelebale léma: É béli tu la, é dan gié lɛ Éjipiti tɛrɛ la; 5yé né vininnu faa é dan ga lɛ Éjipiti tɛrɛ la, é sia Faraɔn lé ke é nyanale élé fuablin ta, ’bɛlé né vinin ma yé é bɔ wuolomu lé wo ke é nyanale ’woli zi, ’bɛnu lé né vinin ma, fɔɔ yé é bɔ winu lé né vininnu faa ma. 6Siaale plɛplɛnu é dan kɛlɛ lɛ Éjipiti tɛrɛ faa la, siaalenu lé wo vinin ’ka tan kɛlɛ lɛ lo, yé wo ’ka dan ’bɛ zoɛ siaa wo lɛ é ziin monomono lo, wo nya. 7Naa, Izraɛl lé nénu méléna, é sia munu ma fɔɔ yé é bɔ winu ma, dé é a blén nyaoo, a do kpen ’ka dan we lɛ lo, kalé a gi dɔɔle we gi léé, yee Gakelebale glɛ dɔ Éjipiti valé Izraɛl gi. 8Yé i wuozannu lé ke ’ko, wo faa dan da lɛ ’é va yé wo dan dia lɛ ’wo bli la ’é ’lɛ a fele nya léé: ’I go, bii valé i bɛmamunu faa nya. ’Bɛ zuo é dan go lɛ. Moizi si Faraɔn va, é bli flile baba nya.
9Gakelebale lé Moizi lɛ léé: Faraɔn ’ka dan é tɔné dɔ lɛ ka lɛ lo, anlé gyɛzorowenu gi gyɛle Éjipiti tɛrɛ la we gi. 10Moizi valé Arɔn gyɛzorowe ’konu faa kɛlɛ Faraɔn yuɛ va, yé Faraɔn ’ka daan lɛ Izraɛl lé nénu ma, léé, ’wo si élé tɛrɛ la lo.
Currently Selected:
Fwile 11: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
